Málikɔ 13 - Ɔngana á Kɛ̌kɛ

Yéso aɔɔtɔa nyɔngɔ á ujukana éndu á Mokonga

¹ Ka juana á Yéso k'éndu á Mokonga, ngoigi nɛkɛ moci áongoɗea te: «Ngoisigi, ɛnjia phɔ́ etae ánjá nde na mɔphɛkɔ ángbó ndee!»

² Yéso áonsikisia te: «Ɔɔna mɔphɛkɔ ángbó nde? Nna n'ɛtɛ nde aikande gǔ á dakɛ, bui angbɔɔkanande.»

³ Ɓî Yéso ɗáiki gǔ á mamba á Mijɛitúni, áoenga endu á Mokonga. Cɔ, Pɛ́tɛɛ, Yakɔ́ɓɔ, Yoáni na Andeé ɓáobika omúsia ka mpɛphɛ te:

⁴ «Ósongoɗea phɔ́ mbenɔ sina nde nyɔngɔ ndɔ atɔtɔkɛanande.»

⁵ Yéso áǒngoɗea ɓe: «Ɛ́ngɛphani! Nkpa kanódemɛmbɛ.

⁶ Nga, ɓakpa ɓásii ɓábikande k'ína ani. Nkpa na nkpa ayɔngande: ‹Eme aámbé, nende Kiísito.› Ɓáedemagande ɓakpa ɓásii phɛɛ.

⁷ Mbenɔ nde ɓɔɔ́kaeka nyɔngɔ émani á bíbí na nnde á ɗanga, ɓókóɓɛmbɛ na kɔɓɔɓɔkɔ í. Nga, nndɔ bui akeni átɔtɔkɛanɛ. Nndɔ kaɓɛku gǎkɛ sungiaga á mokonda.

⁸ Ande gea te: Ɓato á k'ékuna moci ɓámanande na ɓato á k'ékuna nɛngbo, koɓoamɛ moci amanande na koɓoamɛ nɛngbo. Na ɓato á ka koɓoamɛ moci ɓámanande na ɓato á ka koɓoamɛ nɛngbo. Ɓaningina aɗengisande ɔma ɗanga-ɗanga. Nja aguande phɔtɔ k'óma ɗanga-ɗanga. Kema ndɔ bui aɓande ɓea ɓoaé á k'ama mosá-mosá.

⁹ Ɓenu gǎkɛ, ɛ́ngɛphani. Ɓakpa ɓánɔtɔngande ka ntua á tena á nyɔngɔ. Ɓánóɓindande phɛɛ suɓi éndu á madondanɔ ndea Ɓayúda ka nyɔngɔ á Mokonga. Ɓánóbisande ka njaga á ɓakɔta na ɓaamɛ ka nyɔngɔ ani. Kó, ɓɔ̌tɔmiande gǎkɛ nyɔngɔ nɛmɔ.

¹⁰ Eya, mosá á sungiaga á mokonda, akeni Mbino-Ánjá áɛmbɛ ka ɓato á k'ékuna bui.

¹¹ Cɔ, mbenɔ nde ɓánókiɗisande ka ntua ka tɔnga anu, ɓókóianɛgɛmbɛ phɔ́ ka nyɔngɔ á ɓoabi nde ɓosikisande. Ka mbenɔ ndɔ, yɔngani tɔ yɔnga nde anobikiande ka mɔ̌. Nga, nna gǎkɛ ɓenu ɓáunge ɓɔyɔngande, a ndiu Měma á kanga ɓojeɗe aunge aɔyɔnga.

¹² Nkpa antɔngande muna-amakɛ ka gea, ɓámmowɛ. Na ɓaniki ɓáɓande ɓaɓiɓia á ɓaɓɔkɔti aɓɔ, na kusisa aɓɔ.

¹³ Ɓakpa ɓɔbu ɓánókangeande ka nyɔngɔ ani. Nkpa nde aphiphiande gǎkɛ tambaga ndɔ na ka sungiaga í, mmbɔ aámbé aamande ka měma.»

Yéso aɔtɔmia mbenɔ á tambaga ángbó

¹⁴ «Mbenɔ akiɗiande nnde ɓɔmɔnande nto á Jɔɔkana n'aiki k'ɔ́ma nde kánkeni ně. (Cɔ, oɓɛ ímbé ootanga óengekisa ye ánjá!) Ambe ɓunde ɓáɓande na Yudɛ́a ɓáteɛ gǔ á mamba.

¹⁵ Mmbé aɓande ka ntɔndɔ éndu nɛkɛ, kákiɛmbɛ, kángiɛmbɛ ka bɛɗa á nkumba nɛkɛ suɓi éndu ka gǎ ně.

¹⁶ Mmbé á ka ciko, kajɛmbɛ na nji ka bɛɗa á bɔngɔ nɛkɛ.

¹⁷ Ngomi k'ésa ndɔ ka ɓama-kaeme na ɓama-mbɛnjɛ.

¹⁸ Kaɓondɔ, mɛmani Mokonga gea, esa ndɔ kaɓɛmbɛ ka mbenɔ á ɓɛjɔ.

¹⁹ Nga, mbenɔ ndɔ aɓande mbenɔ á tambaga ásii phɛɛ, nnde kágeanimbɛ mɔnɔ kpangea á ɓî Mokonga ɗáconji mokonda na ka kesande. Tambaga ɓíndɔ, káɓɛeka ye tanda.

²⁰ Atúoɓá Mɔkɔta na kángbíímisi mbenɔ á tambaga ndɔ, ka ɓakpa kátóamaeka. Angbíímisi ndiu ka nyɔngɔ á ɓakpa nde aɛsɔmbu gea, ɓáɓɛ ɓunɛkɛ.

²¹ A gǎkɛ oɓá nkpa n'anɔ́tɔ̌mi te: ‹Kiísito awani!› kaɓɛ ‹A kosi›, ɓókǒɓeekeɛmbɛ.

²² Nga, ɓakiísito á mbɛa, na ɓaɔtu-nyɔngɔ á mbɛa, ɓákiɗianande, ɓáɔtɔtɔkisa ketangaɔ na mphangiɔ ángbó phɛɛ ka dema á ɓunde Mokonga aɛsɔmbu.

²³ Ɓenu gǎkɛ, ɛ́ngɛphani, ka nyɔngɔ nde ɗénɔtɔ̌mi ye nyɔngɔ bui mosá.»

Bika á Muna-Nkpa

²⁴ Mpɔ k'ésa ndɔ á tambaga, maní aɓande kaiphiɔ, songe kábɛnyɛku.

²⁵ Ɓasɛɛngɔa ɓáguande. Na kema ákpɛkpɛ bui nnde á na koba, aɗengande.

²⁶ Wa, ɓámɔnande Muna-Nkpa n'abiki k'égugu. Abikande na ɓukpɛkpɛ phɛɛ.

²⁷ Mpɔ, áǒteka ɓamalaéka ka nkɛkɛɔ gena á mokonda. Kó, áǒdondanisaga ɓakpa nde aɛsɔmbu. Ande gea, ɓunde aɛsɔmbu ka mokonda bui.

Me nde ɓáɔmɔphana mtini

²⁸ Engekisani phɔ́ mɛní á me nde ɓáɔmɔphana mtini. Ɓɔ ye ɔɔna gea, ntabi í n'akpangi tɛisa nsô á kasa, ɓôúba te, matú á okame a ye tɔ bíbí.

²⁹ A tɔ ɓó ka ɓenu. Ɓo ye ɔɔna nyɔngɔ ndɔ bui n'atɔtɔkɛani, úbani gea Muna-Nkpa a ye tɔ bíbí, amame ka kǐo éndu.

³⁰ Nenóngoɗi ɗoni gea, ɛɓɔkɔti nde kásiɛku kema ndɔ bui na kákiɗianimbɛ.

³¹ Koba na mokonda, anyɛ́nyande. Nyɔngɔ nɛmɔ gǎkɛ unge kányɛ́nyɛku.

Mokonga tɔ aámbé aoúba esa á sungiaga á mokonda

³² Ka nyɔngɔ á esa ndɔ na mbenɔ ndɔ, nna na nkpa nde aoúba ú. Kaɓɛ ɓamalaéka na koba, kaɓɛ eme Muna-Nkpa, tɔndɔ Abɛ.

³³ Eya, ɛ́ngɛphani, ɓókoɗɛmbɛ. Nga, ɓókóoúba esa ndɔɔ.

³⁴ Ande ɓea mǒko moci n'aɔmɛa tamba. Áǒkámbea ɓabɛɗanigi nɛkɛ moangɔ éndu. Mbɛɗanigi moci-moci áoɓá n'ekuma nɛkɛ. Â phɔtɔ ongoɗea mɓondigi-kǐo gea, áɛngɛphɛ. Mpɔ, áoga.

³⁵ Ɓondɔ unge negi, ɛngɛphani. Nga, ɓókóoúba mbenɔ nde mɛna-endu ajuande, kaɓɛ ɔgɔgɔ, kǐpha, ka ɔsa á kɔkɔ, na kamɓimba.

³⁶ Aoɓá n'asɛnɛki, cɛɗɛ! kanódondɛmbɛ ka tɔ̌.

³⁷ Nyɔngɔ nde nɛnɔtɔ̌mi, atɔ unge nɛ̌tɔ̌mi ɓakpa ɓɔbu. Cɔ, ɛ́ngɛphani!