Málikɔ 11 - Ɔngana á Kɛ̌kɛ

Yéso angí ka Yɛusalɛ́ma

¹ Ɓî Yéso na ɓagoigi nɛkɛ ɓábîmisi Yɛusalɛ́ma, ande gea te, nci á na Bɛtɛphágɛ na Bɛtanía bíbí á mamba á Mijɛitúni, Yéso áǒteka ka ɓagoigi nɛkɛ ɓaɓɛ mosá,

² áǒngoɗea: «Gǎni ka nji nde a mosá anu. Ɓo ye okiɗia kó, ɓondondande mponjo á mponda na ɓámɓɔi, na kánkúmbimbɛ mɔnɔ nkpa. Nkóɗani ɓómbikɛ ně.

³ Aoɓá nkpa n'anoúsi gea: ‹Ɓogi ndɔ ka ɓo?› Ɓônsikisia gea: ‹Mɔkɔta aámbé ammɛmi, ansikisande wani kɛ̌kɛnde.›»

⁴ Ɓáoga, ɓáondonda mponjo á mponda ka ntanga, na ɓámɓɔi bíbí á kǐo, ɓáonkoɗa.

⁵ Ka ɓakpa nde ɗáɓátú wa, ɓáǒúsia te: «Ɓoonkoɗa miki á mponda nde ka nyɔngɔ eke?»

⁶ Ɓáǒsikisia ɓíndɔ Yéso ɗɛ́tɔ̌mi. Mpɔ, ɓakpa ndɔ ɓáoɓeekea, ɓángɛ ně.

⁷ Ɓáombikia Yéso na miki á mponda ndɔ, ɓáobisa ngɔ́mbɛ nɛɓɔ gǔ akɛ, mpɔ Yéso áoikiɗia ú.

⁸ Ɓakpa ɓásii, ɓáɔɔyia ngɔ́mbɛ nɛɓɔ k'aphe, ɓunɛngbo gǎkɛ kasa nde ɗáɓáteni na ciko.

⁹ Ɓakpa ɓunde ɗáɓátú otamba mosá á Yéso, na ɓunde ɗáɓátú mbusa akɛ, ɓáokoga gea, Obebɔ oo! Ɓosegi ka mmbé abiki k'ína á Mɔkɔta.

¹⁰ Ɓosegi ka kiɗia á koɓoamɛ ndea tatasu Daúdi. Obebɔ átáiɛ na koba!

¹¹ Yéso áokiɗia ka Yɛusalɛ́ma. Akiɗi ye, áongia suɓi éndu á Mokonga. Áɔɛnjia kema bui ko. Ɓî esa agɔgɔmani gǎkɛ, áojuana, áoja na Bɛtanía, kimoci na ɓagoigi nɛkɛ nkama na ɓaɓɛ (12).

Yéso asɛmɛigi me

¹² Aɓi ye mama í, ɓî Yéso na ɓagoigi ɗáɓátú otóka na Bɛtanía, nja áɔmbɛɗa.

¹³ Aɔɔna ɗanga, kasa á me nde ɓáɔɔphana mtini. Áoga kɔɔnjia bíbí nga, ɗátúoúba te agɔmbi. Akiɗi ye, â tɔ ɔɔna kasa kángá á mbuka nga, ɗákátú matú á gɔmba í.

¹⁴ Mpɔ, Yéso áɔnsɛmɛaga me ndɔ te: «Nkpa káɛeka ye tanda mbuka akɔ.» Ɓagoigi ɓáɔɔ́ka sɛmɛaga ndɔɔ.

Yéso ěɓǐgi ɓasombisigi nkumba suɓi éndu ndea Mokonga

¹⁵ Mbusa, Yéso na ɓagoigi nɛkɛ, ɓáokiɗia ka Yɛusalɛ́ma. Yéso áongia k'éndu ndea Mokonga, áǒɓeaga ɓasombisigi na ɓasombigi-nkumba. Áokpúngbumisaga mɛja ndea ɓaánganisigi-imɔna, na kankaanga ndea ɓasombisigi-ɓamboe.

¹⁶ Ɗáoimisia gea ka ɓakpa ɓákakumbɛ nkumba na nyɛ́nya ně ka ntanga á endu ndea Mokonga.

¹⁷ Mpɔ, áɔ̌phɛa ɓe: «Ɓáɗundu suɓi á Ɓuku ndea Mokonga ɓe: ‹Ɓáɔphanande endu nɛmɔ, endu ɛ́mɛmi á Mokonga ka ɓato á ka nji bui.› Cɔ, ɓenu ɓô ndiu obisa ú ɔma á dondanaga á ɓakukuɓa?»

¹⁸ Ɓî ɓagbɛga á ɓatoɓeigi-phɛ́a na ɓaɗundu-ɛɔphi ɓáɔ́ki ye ɓó, ɓáokaɓa kusa á Yéso. Ɗáɓátú omɓánga Yéso ka nyɔngɔ nde, goisaga nɛkɛ ɗɛ́ɓɔngɛi usɛsɛ á ɓakpa ɓásii phɛɛ.

¹⁹ Aɓi ye ɔgɔgɔ, Yéso na ɓagoigi nɛkɛ ɓáotóka ka ntanga-nji ndɔɔ.

Yéso aogoisaga nyɔngɔ á ɛmɛmi

²⁰ Mama í kamɓimba, ɓî Yéso na ɓagoigi ɗáɓátú ɔnyɛ́nya k'aphe, ɓáɔɔna me ndɔ Yéso ɗásɛmɛigi n'aɔmi na mǐgi akɛ bui.

²¹ Mpɔ, Pɛ́tɛɛ áokanisia ɓî Yéso ɗánsɛmɛigi me ndɔɔ. Áongoɗea te: «Ngoisigi, énga phɔ́ me ndɔ ɔnsɛmɛigima, aɔmi buakɛ pɔ!»

²² Yéso áǒngoɗea: «Mɓeekeani Mokonga.

²³ Nenóngoɗi ɗoni gea, aoɓá nkpa n'angoɗi mamba nde, áogea: ‹Phúikana súa, ógɛ guiɛ k'óɓenge.› Aoɓá na nna na ngǎka ka měma akɛ n'aɓeeki gǎkɛ te, ɓoabi nɛkɛ atɔtɔkɛanande, aɓande tɔ ɓó.

²⁴ Kaɓondɔ unge nenóngoɗi te, kema bui nde ɓɔɔmɛma, ɓeekeani gea te, ɓo ye tɔ ně nga, Mokonga anophande.

²⁵ A phɔtɔ oɓá na ɓomame ka mɛma á Mokonga, na ɓona nyɔngɔ na nkpa, ímani ɓojeɗe nde ɓánogǐí ka gea te, Abanu mmbé á na koba áímɛ phɔtɔ ɓojeɗe nɛnu. [

²⁶ Cɔ, a gǎkɛ oɓá na ɓókóoíma ɓojeɗe nde ɓakpa ɓánogǐí, Abanu mmbé á na koba káímɛku tanda ɓojeɗe ínɛnu.]»

Ianaga ka nyɔngɔ á cina á kɔkɔta ndea Yéso

²⁷ Mbusa, Yéso na ɓagoigi nɛkɛ, ɓâ goto oga na Yɛusalɛ́ma. Ɓî Yéso ɗátúotamba ka ntanga á endu á Mokonga, ɓagbɛga á ɓatobeigi-phɛ́a, ɓaɗundu-ɛɔphi na ɓagbɛga, ɓáombikia Yéso,

²⁸ ɓáomúsia te: «Ka kɔkɔta sina nde ɔɔtɔtɔkisa kema nde? Ani mmbé akophi kɔkɔta ndɔ?»

²⁹ Yéso áǒsikisia: «Nenoúsiande tɔ músiɔ moci. Ɓo ye omosikisia, mpɔ néonóngoɗea kɔkɔta sina nde nɛɔtɔtɔkisa ně.

³⁰ Ani mmbé ɗámophi Yoáni kɔkɔta á ɓatisa. Ande Mokonga, kaɓɛ n'ande ɓakpa? Cɔ, ómosikisiani!»

³¹ Mpɔ, ɓáoianaga ngǔngu aɓɔ, ɓáogea: «Aoɓá na ɓegi te: ‹Mokonga aámbé ɗánteki›, ámbé asoúsiande gea: ‹Ka nyɔngɔ éke nde ɗóɓókómɓeeki gǎkɛ Yoáni?›

³² Aoɓá na ɓegi gǎkɛ atóki ka ɓakpa, kaɓɛ ánjá.» Nga, usɛsɛ á ɓakpa ɓɔbu ɗáɓátúoúba gea te, Yoáni ande mɔtu-nyɔngɔ ndea Mokonga ɗoni.

³³ Kaɓondɔ, ɓáonsikisia Yéso: «Ɓékéoúba.» Mpɔ, Yéso áǒngoɗea: «Eme gǎkɛ, kénongoɗeɛku cina á kɔkɔta nde nɛɔtɔtɔkisa ně.»