Matáyɔ 9 - Ɔngana á Kɛ̌kɛ

Yéso anamisi nkpa na nnaoemana

¹ Yéso áokambea ka koko. Áojaba etǔ, áojúa ka ntanga-nji nɛkɛ.

² Ɓakpa ɓáombikia na nɗɔti n'aɗe k'éka. Ɓî Yéso aɔni ye ɓeekea á ɓakpa ndɔ, áongoɗea nkpa ndɔ gea: «Mukuamɔ, koɓangɛ mɔnɔ, ɓojeɗe nɛkɔ aímiki.»

³ Ka ɓaɗundu-ɛɔphi ɓáɔyɔnga sɔsɔɓɛ aɓɔ te: «Nkpa nde aombóma Mokonga.»

⁴ Ɓî Yéso aúbi ye kanisia aɓɔ, áogea te: «Ɓona kanisia ájeɗe ka nyɔngɔ eke suɓi á měma anu?

⁵ Kema sina nde aáphǒ ka yɔnga te: ‹Ɓojeɗe nɛkɔ aímiki›, na yɔnga: ‹Ma! Ótambɛ!›?

⁶ Ka gea ɓóúbɛ te, eme Muna-Nkpa, nena kɔkɔta á ima á ɓojeɗe ka mokonda ndee.» Mpɔ áongoɗea nkpa ndɔ te: «Ma, ɔ́bɛɗɛ eka nɛkɔ, ójɛ mɔtɛ-akɔ.»

⁷ Nkpa ndɔ áoma, áoja mɔtɛ-akɛ.

⁸ Mbenɔ nde usɛsɛ á ɓakpa ɓáɔni nyɔngɔ ndɔ, ɓáoɓá na kɔɓɔɓɔkɔ, ɓáombeba Mokonga ka opha á ɓakpa ɓukpɛkpɛ ɓíndɔ.

Yéso amɔphani Matáyɔ

⁹ Ka gǎ á Yéso, áɔmɔna nkpa moci n'aiki ka ntua á phendisaga á manjanja, ina akɛ: Matáyɔ. Yéso áongoɗea te: «Ómoɓea!» Matáyɔ áoma, áomɓea.

¹⁰ Ɓî ɗátúoeaga k'éndu ndea Matáyɔ, ɓaphendisigi-manjanja ɓásii, na ɓato á ɓojeɗe ɓáobika koika kimoci na yɛ na ɓagoigi nɛkɛ.

¹¹ Ai ɓî Ɓaphaisáyɔ ɓáɔni ɓó, ɓáǒúsia ɓagoigi nɛkɛ te: «Ka nyɔngɔ sina nde ngoisigi nɛnu aoeaga kimoci na ɓaphendisigi-manjanja na ɓato á ɓojeɗe?»

¹² Ɓî Yéso aɔ́ki ɓó, áǒsikisia te: «Ɓakpa nde ɓánáosamba ɓáná na siki á nsaku. Ɓunde ɓáosamba ɓáunge ɓána siki akɛ.

¹³ Gǎni ɓóianegɛ nyɔngɔ nde Mokonga ɗáyɔngi te: ‹Nekondi měma á ngomi nna ɔphɛ́ɔ á ɓanyama› nga, kébiki k'aphe á ɔphana ɓato á ɓonjánja. Nebiki ndiu ka ɔphana á ɓato á ɓojeɗe.»

Músiɔ ka nyɔngɔ á ika kángá á eaga ka nyɔngɔ á mɛma á Mokonga

¹⁴ Cɔ, ɓagoigi ndea Yoáni-Mɓatisi ɓáombikia Yéso, ɓáomúsia te: «Ka nyɔngɔ éke nde ɓesu na Ɓaphaisáyɔ ɓeoikaga kángá á eaga ka nyɔngɔ á mɛma á Mokonga na ɓagoigi nɛkɔ ɓáná gǎkɛ ogea ɓo?»

¹⁵ Yéso áǒsikisia te: «Ɓato-ɛ́kɛka ɓáikimbɛ mɔnɔ na ngomi na mǒko-ɛ́kɛka a kimoci na ɓɔ? Ɓɛɛndɔ! Ɓáikande kángá á eaga ka nyɔngɔ á mɛma á Mokonga mbenɔ nde ɓámphúiande mǒko-ɛ́kɛka ka ɔlɔ aɓɔ.

¹⁶ Nna na nkpa nde aɔtɔka phopha bɔngɔ á kɛ̌kɛ na phaeka á bɔngɔ á kala nga, aoɓá n'agi ɓó, nnde á kɛ̌kɛ anyɔande nnde á kala. Nyɔɔka kau áɔɓá ángbó.

¹⁷ Goto, ɓánáoɗukia divai á kɛ̌kɛ suɓi á mboso á kala nde ɓáɓɔngisigi na mpoko á nyama, mmbe abomokande, divai áoɗuukana. Akeni ndiu ɗukia divai á kɛ̌kɛ suɓi á mboso á kɛ̌kɛ. Kaɓondɔ, ɓáambande divai na mboso ánjá.»

Yéso anamisi nke na jujúkisa á nseka ka kukuwa

¹⁸ Mbenɔ nde Yéso, ɗáɔyɔnga na ɓagoigi ndea Yoáni, mɔkɔta moci Moyúda áombikia, áongbukia muanku, áongea te: «Nseka nɛmɔ aɗusukani tɔ kɛ̌kɛnde. Bika óbisɛ njaga akɔ gǔ akɛ na aendande.»

¹⁹ Yéso áoma, áomɓea kimoci na ɓagoigi nɛkɛ.

²⁰ Nke moci mmbé ɗátúotambaga na kukuwa-ɛ́yɛna ka ɓasaga nkama na iɓɛ (12), áombikia Yéso ɓí na ngɔngɔ, áodunga ɛɔkɔ á bɔngɔ ndea Yéso.

²¹ Nga, ɗáɔyɔnga sisakɛ te: «Aoɓá na nedungi tɔ ka bɔngɔ nɛkɛ, ámbé neamande.»

²² Yéso áǒpháia mbusa, áɔmɔna, áongoɗea te: «Nseka nɛmɔ, bisa měma akɔ, ɓeekea nɛkɔ akoamisi.» Ka mbenɔ ndɔ tɔ, nke ndɔ áoama.

²³ Ka jua á Yéso k'éndu ndea mɔkɔta ndɔ, áǒdonda ɓasugu-mbengu na usɛsɛ á ɓakpa na ɓáagatani bíbí á gǎ úmba akɛ.

²⁴ Yéso áǒngoɗea te: «Tókani wani nga, nseka káku, aka tɔ̌.» Ɓáoikia tɛbɛa akɛ.

²⁵ Mbusa á usɛsɛ á ɓakpa júana na nsɛngɛ, Yéso áongia k'éndu, áondunga nseka ndɔ ka njaga, nseka áǒmesia.

²⁶ Mbinɔ ndɔ, áɔɛmba kekanga ndɔ bui.

Yéso aeamisi ɓakeíme-íme ɓaɓɛ

²⁷ Mbenɔ nde Yéso amɛi, ɓakeíme-íme ɓaɓɛ ɓáomɓea na ɓáokogaga gea: «Mosuko á Daúdi hoo, ósokuia phɔ́ ngomi ee!»

²⁸ Ɓî ajú ye, áongia k'éndu, ɓáɔsɛkɛɗa ka mpɛphɛ akɛ. Mpɔ áǒúsia te: «Ɓoɓeeki gea te nɛɔtɔka tɔtɔkisa nndɔ?» Ɓáonsikisia te: «Eya, Mɔkɔta!»

²⁹ Áobisa njaga akɛ k'íso aɓɔ, áogea: «Mokonga ágeɛ ka ɓenu ɓíndɔ ɓoɓeeki.»

³⁰ Mpɔ iso áǒkoɗokana. Yéso áɔ̌kɔkɔmɛa na nyɔngɔ gea: «Ɓókongoɗeɛ mɔnɔ nkpa.»

³¹ Ɓâ ndiu oga kɔɛmbisa kema nde Yéso agi kekanga ndɔ bui.

Yéso anamisi kaúma

³² Ɓî ɓakeíme-íme ɓáge ye, ɓáombikia Yéso na kaúma moci n'ana kukuwa á ɓansombo.

³³ Mbusa á Yéso ɓeaga á ɓansombo ndɔ, kaúma áokpanga yɔnga. Usɛsɛ á ɓakpa ɓáoyayama, ɓáɔyɔnga te: «Ɓɛ́kɛ́ɔnimbɛ mɔnɔ ɓende suɓi á Isilaɛ́li!»

³⁴ Ɓaphaisáyɔ ɓâ gǎkɛ ɔyɔnga te: «mɔkɔta á ɓansombo aámbé amophi Yéso ɓukpɛkpɛ á juanisa á ɓansombo.»

Yéso ana ngomi á ɓakpa

³⁵ Yéso ɗáɔtɔmba nji na ntanga-nji bui n'aǒgoisaga ɓakpa suɓi éndu á madondanɔ ndea Ɓayúda ka nyɔngɔ á Mokonga, n'aɔphɛa Mbino-Ánjá á koɓoamɛ, n'aoamisa etéte á ngobo na kiɗɔti bui.

³⁶ Ɗáǒkuia usɛsɛ á ɓakpa nde ɗéɓɔni ngomi nga, ɓakpa ndɔ ɗáɓáɛli, ɓáoɓá kángá ɓukpɛkpɛ ɓea ɓamɔgɔgɔ kángá á mɓondigi.

³⁷ Yéso áǒngoɗea ɓagoigi nɛkɛ te: «Ɗúngú aásii, ɓabɛɗanigi ɓákáɓiki gǎkɛ.

³⁸ Mɛmani Mokonga mɛna-ɗungu áetekɛ ɓaɓɛdanigi ɓuangbo ka ɗungua.»