Matáyɔ 8 - Ɔngana á Kɛ̌kɛ

Yéso anamisi nto á sǔ

¹ Ɓî Yéso ɗáodida mamba, usɛsɛ á ɓakpa ɓáomɓea.

² Cɔ, nto á sǔ moci, áɔsɛkɛɗa ka mpɛphɛ á Yéso, áogbuka muanku mosá akɛ, áongea: «Mɔkɔta, aoɓá n'okondi, ɔɔtɔka n'omosokosei.»

³ Yéso áonanoa njaga, áondunga, áongea te: «Cɔ, nekondi, neosokosei.» Kɛ̌kɛndɔ, nkpa ndɔ áoama ka sǔ nɛkɛ.

⁴ Mpɔ, Yéso áongoɗea: «Ɔ́ka phɔ́, kɔ́ntɔ̌miɛ mɔnɔ nkpa nyɔngɔ ndɔ. Gǎ ndiu óphangisiɛ sasakɔ ka ntoɓeigi-phɛ́a, óphúiɛ phɛ́a ka Mokonga ɓíndɔ Mósa ɗásosi ka gea, ɓakpa ɓɔbu ɓáengekisɛ gea oami.»

Amisa á mbɛɗanigi ndea mɔkɔta á ɓato émani ndea Ɓalɔ́ma

⁵ Ɓî Yéso ɗáongia ka Kapɛɛnaúmu, mɔkɔta á ɓato émani á Ɓalɔ́ma áobika bíbí akɛ, áonɗengemisaga,

⁶ áogeae: «Mɔkɔta, mbɛɗanigi nɛmɔ aɗe k'éka n'endu, nnaoemana, aotambaga phɛɛ.»

⁷ Mpɔ Yéso áongoɗea te: «Negande onamisa.»

⁸ Mɔkɔta á ɓato émani ndɔ áonsikisia: «Mɔkɔta, kékeni óngiɛ k'éndu nɛmɔ. Yɔnga gǎkɛ tɔ nyɔngɔ moci, na mbɛɗanigi nɛmɔ aamande.

⁹ Nga eme, nena ɓakɔta íɓundɔ ɓá gǔ ani, ne phɔtɔ na ɓato émani nde ɓá kusi á kɔkɔta nɛmɔ. Neongoɗea ka ɓɔ: ‹Gǎ!› Áoga. Neongoɗea ka ɓɔ: ‹Bika!› Áobika. Neongoɗea mbɛɗanigi nɛmɔ: ‹Gea ɓe!› Áogea ɓó.»

¹⁰ Ɓî Yéso aɔ́ki nyɔngɔ ndɔ, áoyayama na áǒngoɗea ɓunde ɗáɓátúomɓea: «Nenóngoɗi ɗoni gea, kɛ́mɔnimbɛ mɔnɔ nkpa sɔsɔɓɛ á Ɓaisilaɛ́li n'ana ɓeekea ángbó ɓea nnde á mmbee.»

¹¹ «Nenóngoɗi base gea: Ɓakpa ɓásii ɓábikande ka toka n'Okomo, n'Oyonga, ɓáeagande kimoci na Abalaámu, Isáka na Yakɔ́ɓɔ ka koɓoamɛ á na koba.

¹² Cɔ, ɓunde ɗáɓákeni ngia ka koɓoamɛ ndɔ, ɓáemakande ka keiphe na nsɛngɛ. Kó, ɓágámaeka na ea á minyɔ.»

¹³ Mpɔ Yéso áongoɗea mɔkɔta á ɓato émani ndɔ te: «Gǎ mɔtɛ-akɔ, átɔtɔkɛanɛ k'oɓɛ ɓíndɔ oɓeeki!» Kɛ̌kɛndɔ tɔ, mbɛɗanigi á mɔkɔta ndɔ áoama.

Yéso aéamisi ɓasambi ɓásii

¹⁴ Mbusa, Yéso áoga k'éndu ndea Pɛ́tɛɛ. Kó, áondonda ama-nkakɛ na Pɛ́tɛɛ n'aɗe k'éka, nyama akɛ n'ájó.

¹⁵ Yéso áondunga ka njaga, jóngá á nyama ndɔ áonsia. Nke ndɔ áoma, áokpanga únaneaga akɛ.

¹⁶ Ɔgɔgɔ, ɓáombikia Yéso na ɓato á kukuwa á ɓansombo ɓásii. Yéso â tɔ ǒphumba ɓansombo ndɔ na yɔnga, â phɔtɔ ǒamisa ɓasambi ɓɔbu.

¹⁷ Cɔ, nyɔngɔ ndɔ ɗátɔtɔkɛani ɓíndɔ Isáya mɔtu-nyɔngɔ ndea Mokonga ɗáyɔngi: «Yɛ ɗákumbi ɓoɗoko á tambaga asu na áokumba esambɔ nɛsu.»

Ɓakpa nde ɓaokonda ɓeá á Yéso

¹⁸ Ɓî Yéso ɗáɔni usɛsɛ á ɓakpa na ɓántimbi, áǒsosea ɓagoigi nɛkɛ ɓájabɛ kubi á etǔ.

¹⁹ Nɗundu-ɛɔphi moci áɔsɛkɛɗa ka mpɛphɛ akɛ, áongea: «Ngoisigi, nekoɓeande ɔma bubui nde ogande.»

²⁰ Yéso áongoɗea: «Ɓanyama ɓea ɓakɛnsɛngɛ ɓá na kubu, ɓambǔ ɓá na iɓɔ. Cɔ, Muna-Nkpa, nna gǎkɛ na ɔma á tɔ̌.»

²¹ Mbusa índɔ, ka ɓagoigi nɛkɛ moci áongoɗea te: «Mɔkɔta, ómososea, négɛ némúmbɛ phɔ́ abɛ.»

²² Yéso â gǎkɛ ongoɗea: «Ómoɓea, óɗeketa ɓakpa nde ɓáku ɓéúmbɛ ɓakpa nɛɓɔ íɓunde ɓáku.»

Yéso aphɔngisi sumbu

²³ Mpɔ Yéso áokambea ka koko, ɓagoigi nɛkɛ ɓáomɓea.

²⁴ Mɔngɔ ímoci, sumbu akpɛ áosinda k'étǔ, iɓo áongia suɓi á koko. Yéso ɗá gǎkɛ oɗa.

²⁵ Ɓagoigi ɓáɔsɛkɛɗa bíbí akɛ ɓáonjujukisa na ngoɗea akɛ: «Mɔkɔta, ósoamisa, ɓesi!»

²⁶ Yéso áǒsikisia te: «Ɓato á ɓeekea ábɔa nde ca! Eke nde ɓomáoɓanga?» Yéso áoma, áokea sumbu na iɓo, kekanga áɔphɔnga phioo!

²⁷ Ɓɔbu ɓáoyayama na gea: «Nkókó á nkpa sina mmbé! Nga, Sumbu n'etǔ a phɔtɔ ɔmɔ́ka.»

Yéso aéamisi ɓakpa ɓaɓɛ á kukuwa á ɓansombo

²⁸ Ɓî ɓájabi ye kubi á etǔ, ka nji ndea Ɓagɛdáli, ɓakpa ɓaɓɛ á kukuwa á ɓansombo, ɓáotóka ka bóta, ɓáoga odondana na yɛ. Ɓakpa ndɔ ɗáɓákái phɛɛ, nkpa ɗáká ye okinia nyɛ́nya k'aphe ndɔɔ.

²⁹ Ɓato á kukuwa ndɔ ɓáokoga: «Muna-Mokonga hoo! Ekende ɓen'oɓɛ kau ee? Obiki osotambisaga mbenɔ nɛsu na ka kpeengeanimbɛ?»

³⁰ Wa, ekombo ángbó á ɓangɛa ɗáɓátúoeaga ɗanga na ɓɔ.

³¹ Ɓansombo ɓáonɗengemisaga Yéso gea te: «Aoɓá n'osóɓǐgi, ósososea pɛ ɓéngiɛ suɓi á ekombo ndosi.»

³² Yéso áǒgea: «Gǎni!» Ɓansombo ɓáǒjuana ɓakpa ɓaɓɛ ndɔ, ɓáongia suɓi á ɓangɛa ndɔɔ. Kɛ̌kɛndɔ, ekombo bui á ɓangɛa ɓáodida mamba mbangɔ, ɓáoga oguia k'étǔ, ɓáosia ɓɔbu kó!

³³ Ɓaɓondigi-ɓangɛa ɓáotea, ɓáoga mbangɔ ka ntanga-nji ka tɔ̌miaga á nyɔngɔ nde ɗágeani ka phɔa ɓakpa ɓaɓɛ ndɔ ɗáɓátú na ɓansombo.

³⁴ Mpɔ, ɓakpa ɓɔbu á ka ntanga-nji ndɔ, ɓáombikia Yéso, ɓî ɓámɔni ye, ɓáonɗengemisaga gea, átokɛ ka nji nɛɓɔ.