Matáyɔ 6 - Ɔngana á Kɛ̌kɛ

Gabea á ɓato á ɓuyɛnɛ

¹ Ɛ́ngɛphani! Ɓókogeɛ mɔnɔ kema ánjá mosá á ɓakpa ka gea, ɓɔ́ɔnɛkanɛ. Ámbé Abanu mmbɔ á na koba kánophendɛku.

² Mbenɔ nde oomopha nto á ɓuyɛnɛ kema, kɔɓɛtɛ mɔnɔ ɓongungu ka gea ɓakpa ɓákɔɔnɛ sumbia ɓî ɓato á maibe ɓámɔnɔ ogea k'éndu á madondanɔ ndea Ɓayúda ka nyɔngɔ á Mokonga na k'aphe ka gea ɓakpa ɓáebebɛ. Nenóngoɗi ɗoni gea, ɓágoɓi na ɓátɔi ophendɔ nɛɓɔ.

³ Aoɓá gǎkɛ, n'omophi nto á ɓuyɛnɛ kema, kákeni njaga á mǔku áúbɛ nnde njaga á nkei agi.

⁴ Ambe ɔpha á ɓato á ɓuyɛnɛ kema ka ɓɔsɔmɛa, mpɔ Abakɔ mmbɔ aɔɔna kema nde oogea ka ɓɔsɔmɛa, akophendande.

Ɓɔphɛi ka phɔa ɛmɛmi

⁵ Mbenɔ nde ɓɔɔmɛma, ɓókoɓɛmbɛ mɔnɔ ɓea ɓato á maibe ɓunde ɓámɔnɔ okonda mɛma na ɓámamege k'éndu á madondanɔ ndea Ɓayúda ka nyɔngɔ á Mokonga na k'aphe ka gea ɓakpa ɓɛ́ɓɔnɛ. Nenóngoɗi ɗoni gea, ɓá ye tɔi ophendɔ nɛɓɔ.

⁶ Oɓɛ gǎkɛ, aoɓá n'ogea ɔ́mɛmɛ, ngia suɓi éndu nɛkɔ, óphatiɛ kǐo, ɔ́mmɛmɛ abakɔ mmbé a kó ka ɓɔsɔmɛa. Abakɔ mmbɔ aɔɔna kema ndɔ oogea ka ɓɔsɔmɛa, akophendande.

⁷ Mbenɔ nde ɓɔɔmɛma, ɓɔ́kɔ́ɓɛmbɛ mɔnɔ osikiaga nyɔngɔ moci ɓea ɓato á kanga ɓeekea. Ɓɔ, ɓáokanisia te aoɓá na ɓáyɔngi ásii aunge Mokonga aɔ́kande ɛmɛmi nɛɓɔ.

⁸ Ɓókǒkengeɛ mɔnɔ, ka nyɔngɔ nde Abanu aoúba mɔphɛ anu mosá á mɛma akɛ.

⁹ Cɔ, mɛmani ndiu ɓe: Abasu, ímbɔ ona koba, ambe ɓáɗokomisɛ ina akɔ phɛɛ.

¹⁰ Ambe koɓoamɛ nɛkɔ ábikɛ. Ambe mɔphɛ nɛkɔ átɔtɔkɛanɛ ka mokonda ɓíndɔ á na koba.

¹¹ Ósopha eea nde akeni ka ɓesu kesande.

¹² Íma ɓojeɗe nɛsu, ɓíndɔ ɓesu ɓe phɔtɔ oíma ka ɓundɔ ɓásogǐí ɓojeɗe.

¹³ Kosóɗeketɛmbɛ ngia ka tombaga, ósoamisa ndiu na Nketi. [Nga koɓoamɛ, ɓukpɛkpɛ na ɓoombia ande akɔ ka saga na saga. Áɓɛ ɓó.]

¹⁴ Nga, aoɓá n'oími ɓojeɗe nde ɓakpa ɓákogǐí, Abakɔ ímbɔ ana koba, aímande phɔtɔ ɓojeɗe nɛkɔ.

¹⁵ A gǎkɛ oɓá na kóími ɓojeɗe nde ɓakpa ɓákogǐí, Abakɔ káímɛku ɓojeɗe nɛkɔ.

Ɓɔphɛi ka nyɔngɔ á ika kángá á eaga ka nyɔngɔ á mɛma á Mokonga

¹⁶ Aoɓá na ɓoiki kángá á eaga ka nyɔngɔ á mɛma á Mokonga, ɓókóphindɛgɛmbɛ mɔnɔ kiki anu ɓea ɓato á maibe. Nga, ɓɔ, ɓáophindaga kiki aɓɔ ka ubisa ɓakpa gea ɓáiki kángá á eaga ka nyɔngɔ á mɛma á Mokonga. Nenóngoɗi ɗoni gea, ɓá ye tɔi ophendɔ nɛɓɔ.

¹⁷ Cɔ, oɓɛ gǎkɛ, mbenɔ nde ooika kángá á eaga ka nyɔngɔ á mɛma á Mokonga, akeni ósokosɛ iso akɔ na óǒsia nkoki ka mɔ̌

¹⁸ ka gea ɓakpa ɓákáúbɛmbɛ gea te oiki kángá á eaga ka nyɔngɔ á mɛma á Mokonga. Abakɔ sisakɛ mmbɔ á kó ka ɓɔsɔmɛa aúbande. Abakɔ mmbé aɔɔna kema nde oogea ka ɓɔsɔmɛa, akophendande.

Akeni ɓóbisɛ ɛtɔi nɛnu na koba

¹⁹ Ɓókǒtundukisiɛgɛmbɛ ɛtɔi ka mokonda ndee, ka nyɔngɔ nde ɓansɛngɛ na ɓánkɛngɛɔ ɓáújande ú, ɓakukuɓa ɓáɓunande endu ka uɓa í.

²⁰ Tundukisagani ndiu ɛtɔi nɛnu na koba, kuɓî ɓansɛngɛ na ɓánkɛngɛɔ ɓákáújɛku ú, ɓakukuɓa ɓákáɔtɔka ɓúna éndu ka uɓa í.

²¹ Nga, ɔma nde ɛtɔi nɛkɔ a ɓei, wandɔ unge měma akɔ aɓande phɔtɔ.

Iso ande owanga á ka nyama

²² Iso, ande ɔbɛa á ka nyama. Aoɓá iso akɔ n'aánjá, nyama akɔ áoɓá k'owanga.

²³ A gǎkɛ oɓá iso akɔ n'ana kukuwa, nyama akɔ áoɓá ka kindi. Aoɓá owanga nde a suɓi akɔ n'ande kindi, kindi kau aɓande kindi á kindi.

Kákeni bisa á mɔphɛ ka kema iɓɛ mɔngɔ ímoci

²⁴ Nna na nkpa nde aɔtɔka bɛɗaneaga á ɓakɔta ɓaɓɛ. Nga, ankangeande moci, áonkonda ɓaangbo. Kaɓɛ na nna ɓó, ajúkanande na moci, áomɓɛnjiaga ɓaangbo. Kɔ́ɔtɔka bɛɗaneaga á Mokonga na bɛɗaneaga á imɔna mɔngɔ moci.

Akeni ɓá na nseɓeɔ ka Mokonga

²⁵ Cɔ, kaɓondɔ unge nenóngoɗi gea: ‹Ɓókóianɛgɛmbɛ ka nyɔngɔ á enda anu, ka nyɔngɔ á kema á k'oea, á noa na á ɔla.› Nga, enda anyɛ́nyi eea na nyama áɔnyɛ́nya ngɔ́mbɛ, nna ɓo?

²⁶ Ɔ́ɛnjiani phɔ́ ɓambǔ á ka mpɛna! Ɓánáokonanaga, ɓánáoɗungua, ɓánáobisa eea k'égbóngbó. Abanu mmbé á na koba a gǎkɛ kǒisa. Cɔ, ɓenu ɓɔ́kɔ́ɛnyɛ́nyi phɔ́?

²⁷ Ka ɓenu moci sina mmbé ka ianaga akɛ sisakɛ aɔtɔka n'ayamei mbenɔ ábɔa ka enda akɛ?

²⁸ Ka nyɔngɔ sina nde ɓooianaga ka nyɔngɔ á ngɔ́mbɛ? Ɔnani phɔ́ maya á k'osaa nde ɓî atɛi kema ánjá, nnaɔbɛɗanaga, nnaophopha.

²⁹ Nenóngoɗi, nanga ɓî Sɔlɔmɔ́nɔ ɗá n'ɛtɔi nɛkɛ bui, ɗákáɔ́li gǎkɛ ngɔ́mbɛ ánjá ɓea ka maya ndee.

³⁰ Mokonga aɔɔ́lisa maya á k'osaa nde asuwa ka kesande, mama í ɓáomaka ka nsa. Ɓenu ɓato á ɓeekea ábɔa, ɓákánɔɔ́lisae phɔ́ ánjá phɛɛ?

³¹ Ɓókóianɛgɛmbɛ gea: ‹Ekende ɓeande? Ekende ɓenoande? Ekende ɓɛɔ́lande?›

³² Ɓato á kanga ɓeekea ɓáunge ɓáokaɓaga kema ndɔ bui. Abanu mmbɔ á na koba aoúba kema bui nde ɓo na siki í.

³³ Kaɓani phɔ́ koɓoamɛ na koɗoni ndea Mokonga. Mpɔ, anóphande kema bubui nde anójiganei.

³⁴ Ɓókoianɛgɛmbɛ ka nyɔngɔ á kema ndea mama. Kema ndea mama, akeni tɔ ka mama. Esa n'esa akeni tɔ na nyɔngɔ ínɛkɛ.