Matáyɔ 5 - Ɔngana á Kɛ̌kɛ

Yéso aogoisaga gǔ á mamba

¹ Mbenɔ nde Yéso ɗáɔni usɛsɛ á ɓakpa, áoɗapha gǔ á mamba, áoika kó. Ɓagoigi nɛkɛ ɓáɔsɛkeɗa bíbí akɛ,

² mpɔ áokpanga goisaga aɓɔ ɓe:

Ɓɔjɛmɛ á ɗoni

³ «Maseye ka ɓundɔ ɓá na ɓuyɛnɛ á ka měma ka nyɔngɔ nde koɓoamɛ á na koba ande aɓɔ!

⁴ Maseye ka ɓunde ɓáogáma, ka nyɔngɔ nde Mokonga aɛkɔmbɛande iɓo á ngamɔ!

⁵ Maseye ka ɓato-aphɔngɔ, ka nyɔngɔ nde ɓátɔande mokonda nde Mokonga ɗɛ́ɓɔku.

⁶ Maseye ka ɓunde ɓá na nja n'ɛnyɔta á koɗoni, ka nyɔngɔ nde ɓákutande.

⁷ Maseye ka ɓunde ɓáǒkuia ɓadaɓɔ ngomi, ka nyɔngɔ nde Mokonga aékuiande phɔtɔ ngomi.

⁸ Maseye ka ɓato á měma ánjá, ka nyɔngɔ nde ɓámɔnande Mokonga.

⁹ Maseye ka ɓunde ɓáobikisa ɓujɛjɛ, ka nyɔngɔ nde Mokonga aɛɓɔphanande ɓɔ, ɓ'anakɛ.

¹⁰ Maseye ka ɓunde ɓakpa ɓáǒtambisaga ka nyɔngɔ á koɗoni nga, koɓoamɛ á na koba ande aɓɔ.

¹¹ Maseye ka ɓenu, mbenɔ nde ɓáonóbóma, ɓáonótambisaga, ɓáonógeea ájeɗe na ɓátekea anu na nyɔngɔ á mbɛa ka nyɔngɔ ani.

¹² Gúani jaí na maseye, ka nyɔngɔ nde ɛkɔmi nɛnu ángbó ana koba. Nga, ɓondɔ unge ɗáɓáetambisigi ɓaɔtu-nyɔngɔ ndea Mokonga á mosá anu.

Mɔnɛi na owanga

¹³ Ɓonde mɔnɛi á ka mokonda. Cɔ, aoɓá mɔnɛi na nna ɔɛkɛmisa, ɓábisande kema sina kau ka gea áɛkɛmisɛ? Nna ye na kantíti. Akeni maka í ka nsɛngɛ, ɓakpa ɓáɗɛtɛɛgɛ.

¹⁴ Ɓonde owanga á ka mokonda. Ntanga-nji nde ɓáphɛ̌ki gǔ á mamba, nnaɔtɔka nɛ̌sɔmɛani.

¹⁵ Ɓákáotoɓoa ɔbɛa ka bisa kusi á mbungu, ɓá ndiu obisa ka ngeɔ ka gea te, ábɛnyɛ ka phɔa ɓakpa ɓunde ɓá suɓi éndu.

¹⁶ Kaɓondɔ, ambe owanga nenu ábɛnyɛ mosá á ɓakpa, ɓáɔnɛ ekuma nɛnu na ánjá. Mpɔ ɓámbebɛ Abanu mmbɔ á na koba.

Ɓɔphɛi ka nyɔngɔ ɛ́ɔphi

¹⁷ Ɓókokanisiɛmbɛ gea nebiki ɔngbɔa ɛɔphi ndea Mósa na ɓɔphɛi ndea ɓaɔtu-nyɔngɔ ndea Mokonga. Kébiki k'aphe á ngbɔa í. Nebiki ndiu k'aphe á kpeengeanisa í.

¹⁸ Nenóngoɗi ɗoni gea te, mosá á sungiaga á koba na mokonda, nna tanda na miki á nyɔngɔ moci kaɓɛ phaeka í, nnde aimikande k'ɛɔphi na ka ɓî nyɔngɔ bui atɔtɔkɛanande.

¹⁹ Cɔ, nkpa nde aotingiaga ka ɓaniki ɛ́ɔphi nde, na phɛá á ɓadakɛ gea ɓágeɛ phɔtɔ ɓó, aɓande miki á nkpa ka koɓoamɛ ndea Mokonga. Nkpa nde a gǎkɛ oamba ú, na phɛá ɓadakɛ gea ɓágeɛ phɔtɔ ɓó, aɓande mokongo á nkpa ka koɓoamɛ á na koba.

²⁰ Nenógie, akoɓá koɗoni anu na kányɛ́nyi nnde á ɓaɗundu-ɛɔphi na Ɓaphaisáyɔ, ɓókóngiɛku ka koɓoamɛ á na koba.

Ɓɔphɛi ka nyɔngɔ á esúia

²¹ Ɗóɓoɔ́ki gea, ɗáɓáengoɗi ɓatatasu te: Kommowɛmbɛ nkpa nga, mmbé aommowa nkpa, ɓánjúsande ka ntua á tena á nyɔngɔ.

²² Cɔ, eme nenóngoɗi ɓe: Nkpa buakɛ mmbé aɔmɓɛɛa dakɛ, akeni ɓánjusɛ ka ntua á tena á nyɔngɔ. Mmbé aombóma dakɛ te: ‹Kóúbapha!›, akeni júsa akɛ ka ntua ángbó á tena á nyɔngɔ ndea Ɓayúda. Mmbé aongea dakɛ te: ‹Ona ganja!›, akeni ɓámmakeɛ k'ɛɛmbɛ á nsa nnde nnaoimika.

²³ Aoɓá n'obiki na ɛkɔmi nɛkɔ k'ɛtɛ-ɔ́phɛ́ɔ, n'okanisi te dakɔ ana nyɔngɔ n'oɓɛ,

²⁴ akeni óɗeketɛ phɔ́ ɛkɔmi nɛkɔ mosá á ɛtɛ-ɔ́phɛ́ɔ, ógɛ ɔ́ɓɔngisiɛgɛ nyɔngɔ nɛkɔ na dakɔ. Mpɔ ósikianɛgɛ goto ka gǎ opha á Mokonga ɛkɔmi kau.

²⁵ Aoɓá n'ona nyɔngɔ na nkpa, kamisaga ɔ́kana na yɛ na ɓo phɔ́tɔ k'aphe. Ka gea te, kakojúsɛmbɛ mɔtɛ á nteni-nyɔngɔ na nteni-nyɔngɔ kákobisɛku ka njaga á nto-émani ka gea kakomakeɛmbɛ suɓi á mekakɔ.

²⁶ Nekongoɗi ɗoni, kótókɛku kó na kógɔɓɛi phenda imɔna bui nde ajigi.

Ɓɔphɛi ka nyɔngɔ á otungɔ

²⁷ Ɗóɓoɔ́ki ɓî ɗáɓáyɔngi gea te: ‹Kotunganɛmbɛ mɔnɔ.›

²⁸ Eme nenóngoɗi te: Nkpa buakɛ mmbé aɔmɔnjia nke n'íso ótungɔ, agɔɓi ye n'anɛɓɛi nke ndɔ ka měma.

²⁹ Aoɓá iso akɔ á nci á mǔku aunge aokongisa ka ɓojeɗe, ambe óphongotɛ ú, ómakɛ ɗanga n'oɓɛ. Akeni ɓúngisa gbútuka moci á nyama, kángá á makea á nyama akɔ bui k'ɛɛmbɛ á nsa nde nnaoimika.

³⁰ Aoɓá njaga akɔ á mǔku aunge aokoɓoteaga ka ɓojeɗe, tena ú cé! Ómakɛ ɗanga n'oɓɛ. Akeni ɓúngisa gbútuka moci á nyama, kángá á makea á nyama akɔ bui k'ɛɛmbɛ á nsa nde nnaoimika.

³¹ Ɗáɓági te: ‹Nkpa nde aon'yá nkakɛ, akeni ámophɛ nke ndɔ ɓaoɓa á keyé.›

³² Cɔ, eme nenóngoɗi gǎkɛ te, aoɓá nkpa n'an'yé nkakɛ na kátungani, antunganisi ye tɔ, aoɓá n'aɔmani goto. Aoɓá nkpa n'amɓu nke nde ɓán'yé, atungani phɔtɔ.

Ɓɔphɛi gǔ á ɔphá á nyɔngɔ

³³ Ɗóɓoɔ́ki ɓî ɗáɓáengoɗi ɓatatasu te: ‹Kɔɔphɛ mɔnɔ ka mbɛa. Tɔtɔkisa ndiu ɔphá nɛkɔ mosá á Mɔkɔta.›

³⁴ Eme nenóngoɗi gea, ɓókokengisiɛmbɛ ɔphá: Ɓɔ́kɔɔphɛ mɔnɔ k'ína á koba nga, ande kankaanga á koɓoamɛ ndea Mokonga,

³⁵ tanda ka mokonda nga, ande ɔma á bisa ecinji akɛ, tanda ka Yɛusalɛ́ma nga, ande ntanga-nji ndea Moamɛ angbóngbó.

³⁶ Kɔ̌yɔphisanɛgɛ mɔnɔ sasakɔ. Nga, kɔ́ɔtɔka n'okěti ka sɛkamɔ̌ akɔ ka ɓá ábusǔ kaɓɛ índa.

³⁷ Aoɓá n'oɓeeki, ɓeekea ka ɗoni. A gǎkɛ oɓá n'ongani, ngana ka ɗoni nga, nyɔngɔ nde aobika gǔ índɔ aotóka ka Nketi.

Ɓɔphɛi gǔ á gisia

³⁸ Ɗóɓoɔ́ki ɓî ɗáɓáyɔngi gea: ‹Dakɔ aoboma iso akɔ ôboma nɛkɛ, aotena minyɔ akɔ, ôtena nɛkɛ.›

³⁹ Eme nenóngoɗi gǎkɛ te nkpa aokogeeya ájeɗe, kogisiɛ mɔnɔ. Aoɓá n'akɔɓɛti ka ngaga á nci á mǔku, óphaia goto áɔɓɛtɛ k'índe á nci á nkei.

⁴⁰ Aoɓá nkpa n'aɔtɔngi ka uta akɔ ngɔ́mbɛ á k'egogo, nɗeketea phɔtɔ ngɔ́mbɛ nɛkɔ á phiɔ.

⁴¹ Aoɓá nkpa n'aogi ónkumbiɛ nkumba nɛkɛ ónɗeketeɛ ka kilɔmɛ́tɛɛ moci, gǎ ónɗeketeɛ ka kilɔmɛ́tɛɛ iɓɛ.

⁴² Aoɓá nkpa n'akɔmɛmi kema, mopha ú. Aoɓá n'akondi ɔ́nɛkisɛ, kɔnkpɛmɛɛmbɛ.

Ókondani ɓaɓiɓia nɛnu

⁴³ Ɗóɓoɔ́ki ɓî ɗáɓági te: ‹Nkonda dakɔ, ónkangeɛ ndiu mɓiɓia nɛkɔ.›

⁴⁴ Eme nenóngoɗi gǎkɛ te: ókondani ɓaɓibia nɛnu, ɓɔ́mɛmɛ ndiu Mokonga ka phɔa ɓundɔ ɓáonótambisaga.

⁴⁵ Ɓoogea ɓó, ɓóoɓá ɓana-Abanu mmbɔ á na koba. Nga, yɛ aɔɓɛtisa maní ka ɓakpa ɓánjá na ɓakpa ɓájeɗe na ɔkisa mbua ka ɓato á koɗoni na ɓunde ɓáká ɓato á koɗoni.

⁴⁶ Aoɓá na ɓǒkondi tɔ ɓundɔ ɓáonókonda, ɓooɓondea ophendɔ ka Mokonga ka ɓo? Ɓaphendisigi-manjanja ɓá phɔtɔ ogea ɓó.

⁴⁷ Aoɓá ɓana-amanu tɔ ɓáunge ɓǒsesea, kema ángbó sina nde ɓoogea? Ɓundɔ ɓánáomúba Mokonga, ɓá phɔtɔ ogea ɓó.

⁴⁸ Cɔ, ɓáni ɓato á kanga kisɛki ɓea Abanu mmbé á na koba kángá kisɛki.