Matáyɔ 4 - Ɔngana á Kɛ̌kɛ

Tombaga á Yéso

¹ Mbusa á ɓatisa á Yéso, Měma á kanga ɓojeɗe áonsɔndɔɛa ka nkanda, ka gea nketi ántombɛgɛ.

² Mbusa á Yéso ika kángá á eaga ka nyɔngɔ á mɛma á Mokonga esa nkama gena (40), keiphe n'esa, nja áɔmbɛɗa.

³ Kó, Ntombigi áɔsɛkɛɗa bíbí á Yéso, áongoɗea: «Aoɓá n'onde Muna-Mokonga, sosea phɔ́ ɛtɛ nde, áɓɛ mokati.»

⁴ Yéso áonsikisia: «Ɓáɗundu suɓi á Ɓuku á Mokonga ɓe: ‹Nkpa nna tɔndɔ oenda ka nyɔngɔ á ea mokati, a ndiu ka nyɔngɔ bui nde Mokonga aɔyɔnga.›»

⁵ Mbusa, nketi áonga ně na Yɛusalɛ́ma, nji á kanga ɓojeɗe. Áombisa Yéso ka ntɔndɔ á endu á Mokonga,

⁶ áongoɗea Yéso: «Aoɓá n'onde Muna-Mokonga, ócicima phɔ́ ka oɗo. Ka nyɔngɔ nde, ɓáɗundu suɓi á Ɓuku á Mokonga gea: ‹Mokonga ěsoseande ɓamalaéka nɛkɛ ka phɔa akɔ, na ɓákokumbande ka njaga aɓɔ ka gea, ecinji akɔ kaɓɛtɛkanɛmbɛ k'ɛtɛ.›»

⁷ Mpɔ Yéso áongoɗea: «Ɓáɗundu phɔtɔ suɓi á Ɓuku á Mokonga gea: ‹Kóntombɛgɛ mɔnɔ Mɔkɔta Mokonga nɛkɔ.›»

⁸ Mbusa, nketi â goto onga na Yéso ka ntɔnga á mamba éndǎ. Kó, áɔmɔnisa koɓoamɛ bui á ka mokonda na ɓoombia í.

⁹ Áongoɗea Yéso te: «Nekophande kema nde bubui, akoɓá n'ogbuki muanku akɔ mosá ani ka ɗokomisa ani.»

¹⁰ Mpɔ Yéso áongea: «Tóka wa, Sɛtáni! Ɓáɗundu suɓi á Ɓuku á Mokonga ɓe: ‹Onɗokomisande Mɔkɔta, Mokonga nɛkɔ na yɛ sasakɛ tɔndɔ aámbé ombebande.›»

¹¹ Mpɔ, nketi áonsaga Yéso, ɓamalaéka ɓáobika ɔmbɛɗaneaga.

Ɓɔphɛi ndea Yéso ka Galiláya

¹² Cɔ, ɓî Yéso ɗáɔ́ki gea, ɓámmaki Yoáni-Mɓatisi ka mekakɔ, áoga na Galiláya.

¹³ Áotóka ka ntanga-nji á Najalɛ́ti, áoga oika ka ntanga-nji á Kapɛɛnaúmu, ka motii á etǔ Galiláya ka nji á Jebulúni na Naphutáli.

¹⁴ Cɔ, ɗágeani ɓo, ka tɔtɔkisa nyɔngɔ nde Isaya mɔtu-nyɔngɔ ndea Mokonga ɗáyɔngi gea:

¹⁵ «Nji á Jabulúni na Naphutáli, k'aphe nde age n'oɓenge, kubi á Yɔɔdáni. Nji á Galiláya ɔma nde ɓakpa nde ɓáná Ɓayúda ɓáiki ɓei!

¹⁶ Ɓakpa nde ɓáiki ka keiphe ɓáɔni owanga ángbó. Ɓakpa nde ɓáiki ka nji nde iimbiɔ á kukuwa a kau, owanga ángbó a ye ojegia.»

¹⁷ Ka mbenɔ ndɔ tɔ, Yéso áokpanga phɛá ɓe: «Kětiani tambea anu ájeɗe nga, koɓoamɛ ndea na koba a bíbí!»

Yéso aɛɓɔphani ɓagoigi gena á k'ama mosá-mosá

¹⁸ Yéso ɗátúotamba ka ɔɓɛɛ á etǔ Galiláya, áɔ̌ɓɔna ɓaɔphigi ɓaɓɛ, ɓato á ka sɔphɔ moci, na ɓáomaka moaɓɔ nɛɓɔ ka etǔ. Ina aɓɔ ɗátú: Simɔ́ni, mmbɔ ɓáɔmɔphana Pɛ́tɛɛ, na muna-makɛ Andeé.

¹⁹ Yéso áǒngoɗea: «Ómoɓeani nenóbisande ɓaɔphigi á ɓakpa.»

²⁰ Kɛ̌kɛndɔ tɔ, ɓáosaga moaɓɔ nɛɓɔ, ɓáomɓea.

²¹ Yéso áɔsɛkɛɗa mosá, â goto ɔ̌ɓɔna ɓato á komunamema ɓunɛngbo ɓaɓɛ, Yakɔ́ɓɔ na muna-amakɛ Yoáni, ɓana Jɛbɛdáyɔ. Ɓɔ, ɗáɓátú ka koko kimoci na abaɓɔ Jɛbɛdáyɔ na ɓáɔɓɔngisiaga moaɓɔ nɛɓɔ. Yéso áɔ̌ɓɔphana.

²² Kɛ̌kɛndɔ tɔ, ɓáoɗeketa koko, n'abaɓɔ, ɓáomɓea.

Yéso aogoisaga na amisa á ɓakpa

²³ Yéso ɗátɔmbigi nji bui á ka Galiláya, n'aogoisaga suɓi éndu nɛɓɔ á madondanɔ ndea Ɓayúda ka nyɔngɔ á Mokonga na phɛá Mbino-Ánjá á koɓoamɛ. Kó, ɗáoamisa esambɔ ɗanga-ɗanga na kiɗɔti ka ɔlɔ á ɓakpa.

²⁴ Ɓoombia akɛ áɔɔ́kɛkana ka nji á Sulía bui. Ɓáombikia Yéso na ɓato á esambɔ ɗanga-ɗanga, na ɓunde ɓáotambanga na kukuwa ɗanga-ɗanga: kukuwa á ɓansombo, kukuwa á egǎ, na ɓaɗɔti. Yéso áǒamisa ɓɔbu.

²⁵ Usɛsɛ á ɓakpa ɓáomɓea na ɓátóki ka nji ndee: Galiláya, Yɛusalɛ́ma, Yudɛ́a, Ntanga-nji nkama, na kubi á Yɔɔdáni.