Matáyɔ 3 - Ɔngana á Kɛ̌kɛ

Ɓɔphɛi ndea Yoáni-Mɓatisi

¹ Ka matú ndɔ, Yoáni-Mɓatisi ɗáju ka nkanda ndea Yudɛ́a áɔphɛa ɓe:

² «Kětiani tambea anu ájeɗe, ka nyɔngɔ nde koɓoamɛ ndea Mokonga a bíbí!»

³ Cɔ, Yoáni aámbé Isáya mɔtu-nyɔngɔ ndea Mokonga ɗáyɔngi nyɔngɔ akɛ, áogeae: «Nkpa aoaba n'ɛsɔ akpɛ ka nkanda ɓe: Ɓɔngisiagani aphe ndea Mɔkɔta! Mamisani aphe kau dɛ!»

⁴ Yoáni ɗáɔ́li ngɔ́mbɛ nde ɗáɓáɓɔngisi na sáá á ngamia, áɔ̌ɓɔɛa angeɗe á mpokɔ ka cina á kuju. Yɛ, ɗáoea ɓaáphaa na ɓoki á k'osaa.

⁵ Cɔ, ɓakpa á ka Yɛusalɛ́ma, na ɓato á ka Yudɛ́a na ɓato á ka nji nɛngbo bîbíbí á iɓo Yɔɔdáni ɗáɓáoga mɔtɛ á Yoáni.

⁶ Ɓáoɓeekea ɓojeɗe nɛɓɔ, mpɔ Yoáni áǒɓatisa ɓɔbu ka iɓo Yɔɔdáni.

⁷ Cɔ, Ɓaphaisáyɔ na Ɓasadukáyɔ ɓásii, ɗáɓámbikíí Yoáni-Mɓatisi, ka gea áeɓatisɛ, áǒngoɗea: «Ɛɓɔkɔti á kaɓokosa nde ca! Ani mmbé ɗánophangi aphe á tea á esúia ndea Mokonga nnde a bíbí á bika?

⁸ Tɔtɔkisani pɛ ekuma ánjá ka úbisa gea ɓosagi ɓojeɗe nɛnu.

⁹ Ɓókokanisiɛmbɛ gea, nnde ɓooianaga sasanu ka měma anu gea te: ‹Abalaámu ande tatasu›, sungíi ungɔ. Nenóngoɗi gea, Mokonga aɔtɔka gaiya á ɓ'ɛtɛ nde ɓáɓɛ ɓasuko á Abalaámu.

¹⁰ Cɔ, ɓábisi ye eoka ka tenaga á mǐgi-mǐgi á ɓame. Me buakɛ mmbé nnaɔgɔmbisa mbuka ánjá, ɓámbiande na maka akɛ ka nsa.

¹¹ Eme, neonóɓatisa ka iɓo ka phangia base gea, ɓosagi ɓojeɗe nɛnu. Mmbé a gǎkɛ obika mbusa ani, anoɓatisande na Měma á kanga ɓojeɗe na nsa. Yɛ, amɔnyɛ́nyi ka ɓoombia, kékeni na phúia ɓiato nɛkɛ.

¹² Yɛ, abɛɗi ungɔ ka njaga akɛ, aɔɓɔngisiaga ɔma. Atundagande nganɔ, áobisa k'égbóngbó nɛkɛ, â gǎkɛ ɔɛkɛkisaga mapɛpɛ í ka nsa nde nnaoimika.»

Ɓatisa á Yéso

¹³ Ka mbenɔ ndɔ, Yéso áokiɗia ka Yɔɔdáni ka toka akɛ na Galiláya ka gea, Yoáni ámɓatisɛ.

¹⁴ Yoáni â gǎkɛ ɔkpɛma, áongoɗea Yéso: «Oɓɛ aámbé okeni ɓatisa ani. Cɔ, obiki mɔtɛ-amɔ ka ɓo?»

¹⁵ Yéso áonsikisia te: «Ɓeekea phɔ́ tɔtɔkisa nndɔ kɛ̌kɛnde nga, akeni ɓégeɛ ɓó, ka tɔtɔkisa á kema nde Mokonga akondi. Mpɔ, Yoáni áoɓeekea ɓatisa akɛ.»

¹⁶ Mbusa á ɓatisa á Yéso, áojuana ka iɓo. Mɔngɔ moci koba áokoɗokana ka phɔakɛ. Yéso áɔmɔna Měma á kanga ɓojeɗe n'aodida gǔ akɛ ɓea mboe.

¹⁷ Wa, ɛsɔ áɔɔ́kɛkana n'atóki na koba gea: «Mmbé ande miki nɛmɔ á ekondi, nena maseye ka phɔakɛ.»