Matáyɔ 28 - Ɔngana á Kɛ̌kɛ

Yéso ajujúki ka kukuwa

¹ Mbusa á saɓáto, ka koɗokana á esa á yenga, Malía á ka Magadála na Malía ɓaangbo, ɓáoga ɔɔnjia bóta.

² Mɔngɔ moci, ɓaningina akpɛ áobika nga, malaéka nde ɓa Mɔkɔta ɗádidi ka toka na koba, áobika otiɓa ɛtɛ ndɔ ka mpɛphɛ, áoika gǔ í.

³ Keongi akɛ ɗáophénuaga biɛ, biɛ, biɛ! Ngɔ́mbɛ nɛkɛ ɗátú ábu phɛɛ.

⁴ Kó, ɓato á emani, ɓundɔ ɗáɓáoɓondeaga bóta, ɓáoɓá na kɔɓɔɓɔkɔ phɛɛ, nyama aɓɔ áɔɛkana, ɓáoɓá ɓea ɓakpa na ɓáku.

⁵ Malaéka â gǎkɛ ǒngoɗea ɓake ndɔ te: «Ɓenu, ɓókoɓɛmbɛ na kɔɓɔɓɔkɔ nga, neoúba gea, ɓoonkaɓa Yéso, mmbɔ ɗáɓánkɔkɛigi gǔ á moyangɔ.

⁶ Nna ye wani, ajujúki ka kukuwa, ɓíndɔ ɗáyɔngi. Cɔ, bikani ɓɔ́ɔnɛ ɔma nde ɓátóbisi mǒnda akɛ.

⁷ Kamisagani, gǎ ngoɗea á ɓagoigi nɛkɛ gea: ‹Ajujúki sɔsɔɓɛ á ɓasí, agě mosá anu na Galiláya, na kó unge ɓɔmɔnande.› Nndɔ unge nenóngoɗi.»

⁸ Cɔ, ɓake ndɔ ɓáokamisaga tóka ka bóta, ɓáoɓá na kɔɓɔɓɔkɔ na maseye phɛɛ, ɓáoga mbangɔ ka tɔ̌mia á ɓagoigi ndea Yéso nyɔngɔ ndɔɔ.

⁹ Ka mbenɔ ndɔ tɔ, Yéso áobika odondana na ɓɔ. Áǒsesea: «Sambani.» Ɓake ndɔ ɓáɔnsɛkɛɗɛa, ɓáondunga Yéso k'écinji, ɓáonɗokomisa.

¹⁰ Mpɔ Yéso áǒngoɗea: «Ɓɔ́kɔɓɛmbɛ na kɔɓɔɓɔkɔ. Gǎni ɓɔ́tɔmiɛ ɓana-ayi ɓágɛ na Galiláya, na kó unge ɓámɔɔnande.»

Ɓato émani ɓáge ɔtɔmiaga mbino

¹¹ Na ɓake ndɔ ɓá phɔ́tɔ k'aphe, ka ɓato émani nde ɗáɓáoɓondeaga bóta, ɓáoja na ntanga-nji ka tɔ̌mia á ɓagbɛga á ɓatoɓeigi-phɛ́a nyɔngɔ bui nde ɗágeani.

¹² Ɓagbɛga á ɓatoɓeigi-phɛ́a na ɓagbɛga á ka nji ɓáodondana, ɓáɔɔ́kana, ɓáǒɓopha ɓato émani imɔna ásii phɛɛ,

¹³ na ngoɗea aɓɔ te: «Ɓɔyɔngande gea, ɓagoigi nɛkɛ ɓábikima kǐpha, ɓáoúɓa mǒnda akɛ na ɓe ka tɔ̌.

¹⁴ Aoɓá mɔkɔta n'aɔ́ki nyɔngɔ ndɔ, ámbé ɓesu ɓɛyɔngagande na yɛ bîbíbí gea, ɓákanógeɛmbɛ ájeɗe.

¹⁵ Ɓato émani ɓáɔbɛɗa imɔna ndɔ, ɓáogea ɓíndɔ ɗáɓáɛphɛí. Nyɔngɔ ndɔ áɔɛmba ka ɔlɔ á Ɓayúda na ka kesande.»

Yéso aɛsɛnɛkɛi ɓagoigi nɛkɛ

¹⁶ Cɔ, ɓagoigi nkama na moci (11) ndɔ, ɓáoga na Galiláya ka mamba nde Yéso ɗáephangi.

¹⁷ Ɓî ɗáɓámɔni, ɓáonɗokomisa, ɓagoigi ɓunɛngbo ɗáɓátú gǎkɛ na ngǎka.

¹⁸ Mpɔ Yéso áobika ka mpɛphɛ aɓɔ, áǒngoɗea te: «Ɓámopi kɔkɔta bui á na koba na nnde á ka mokonda.

¹⁹ Cɔ, gǎni ka ɓato á ekuna bui, ɓókětiɛ ɓɔ ka ɓá ɓagoigi, ɓóǒɓatisɛ ɓɔ k'ína á Abɛ, k'ína á Anakɛ, na k'ína á Měma á kanga ɓojeɗe.

²⁰ Ɓógoisɛgɛ ɓɔ amba á nyɔngɔ bubui nde ɗénósosi. Na úbani gea, ne kimoci na ɓenu esa bui na ka sungiaga á mokonda.»