Matáyɔ 27 - Ɔngana á Kɛ̌kɛ

Ɓánge na Yéso mɔtɛ á Pilátɔ

¹ Cɔ, mama í ka mɔkɛsuɛ, ɓagbɛga á ɓatobeigi-phɛ́a, ɓagbɛga á ka nji ɗáɓádondanigi, ka bisa á moangɔ á kusisa á Yéso.

² Mbusa á ɓoaga akɛ, ɓáonga ně mosá á Pilátɔ, mɔkɔta nde amamei nji á Yudɛ́a.

Yúda ěkpati

³ Cɔ, Yúda, mmbɔ ɗántɔngi Yéso aɔni ye na ɓáteni nyɔngɔ ndea Yéso akpɛ, áɔ̌ɓɛia ka měma. Áǒsikisia ɓagbɛga á ɓatoɓeigi-phɛ́a na ɓagbɛga á ka nji, imɔna nkama isaɔ (30) ndɔɔ.

⁴ Aǒngoɗea te: «Negi ɓojeɗe, ka kusisa nkpa nde nna na ɓojeɗe!» Ɓáonsikisia gea: «Ɓéké na nyɔngɔ kíndɔ, nndɔ ande nyɔngɔ nɛkɔ sasakɔ!»

⁵ Yúda áomaka imɔna ndɔ suɓi éndu á Mokonga, áoga ǒkpata.

⁶ Cɔ, ɓagbɛga á ɓatoɓeigi-phɛ́a ɓáɔbɛɗa imɔna ndɔ, ɓáogea te: «Kákeni ɓébisɛ imɔna nde suɓi á jɔ á ɛkɔmi á endu á Mokonga, ka nyɔngɔ nde, ande ophendɔ á magia á nkpa.»

⁷ Cɔ, mbusa aɓɔ ɔ́kana, ɓáɔbɛɗa imɔna ndɔ, ɓáosomba ciko á mɓɔngisigi-mbungu, ka bisa í ngbangbata ka umbaga á ɓakɛni.

⁸ Ka nyɔngɔ índɔ unge, ɗáɓáɔphani ciko ndɔ: «ciko á magia» na ka kesande.

⁹ Mpɔ nyɔngɔ ndɔ Yɛɛmía mɔtu-nyɔngɔ ndea Mokonga ɗáyɔngi áɔtɔtɔkɛana gea: «Ɗáɓábɛɗi imɔna nkama isaɔ (30), nndɔ Ɓaisilaɛ́li ɗáɓáɔ́kani ka phenda ka phɔakɛ,

¹⁰ na somba á ciko ndea mɓɔngisigi-mbungu, ɓíndɔ Mɔkɔta ɗámososi.»

Ɓámbiki na Yéso mosá á Pilátɔ

¹¹ Cɔ, ɓî ɗáɓánge na Yéso mosá á mɔkɔta Pilátɔ, Pilátɔ áomúsia te: «Oɓɛ, onde moamɛ ndea Ɓayúda?» Yéso áonsikisia te: «Oɓɛ ámbé ɔyɔngi.»

¹² Mbenɔ nde ɓakɔta á ɓatobeigi-phɛ́a na ɓagbɛga á ka nji ɗáɓáɔntɔnga, kěsikisiɛ gǎkɛ ka nyɔngɔ.

¹³ Cɔ, Pilátɔ â goto omúsia te: «Moko! Kómaɔɔ́ka nyɔngɔ nde ɓáɔkɔtɔnga ně kuungaáni ee?»

¹⁴ Yéso kánsikisiɛ ka nyɔngɔ. Kaɓondɔ, mɔkɔta áoyayama phɛɛ.

Pilátɔ ateni akpɛ nyɔngɔ á kukuwa á Yéso

¹⁵ Cɔ, ka jaí bui á Pasáka, mɔkɔta ɗáɛmbani na koɗa á nto á mekakɔ moci, mmbé ɓakpa ɗáɓáonkonda.

¹⁶ Ka matú ndɔ, ɗátú na nto á mekakɔ moci n'aombi phɛɛ, ina akɛ Yéso Balába.

¹⁷ Ɓî ɓakpa ɗáɓádondanigi, Pilátɔ áǒɓúsia: «Ɓokondi nénkoɗɛ kanu nkpa sina, Yéso Balába, kaɓɛ Yéso mmbɔ ɓáɔmɔphana Kiísito ndɔ?»

¹⁸ Nga, Pilátɔ ɗáúbi gea, ɗáɓántɔgi Yéso ka nyɔngɔ á nsengo.

¹⁹ Cɔ, ɓî Pilátɔ ɗáiki ka kankaanga á tena á nyɔngɔ, nkakɛ áontekisia mbino gea: «Kǒngisɛ mɔnɔ ka nyɔngɔ ndea nto á koɗoni ndɔ nga, kesande kǐpha netambigi phɛɛ ka njeki ka nyɔngɔ akɛ.»

²⁰ Mpɔ ɓakɔta á ɓagbɛga á ɓatoɓeigi-phɛ́a na ɓagbɛga á ka nji ɓáǒphɛa ɓakpa gea, ɓámɛmɛ koɗa á Balába, na ɓánkusɛ ndiu Yéso.

²¹ Mpɔ mɔkɔta Pilátɔ, áǒúsia: «Ka ɓakpa nde ɓá ɓaɓɛ, ka ɓɔ sina mmbé ɓokondi nénkoɗɛ kanu sɔsɔɓɛ á ɓɔ?» Ɓáonsikisia te: «Balába!»

²² Mpɔ, Pilátɔ â goto kǒúsia: «Cɔ, nengeande Yéso mmbɔ ɓáɔmɔphana Kiísito n'eke?» Ɓáonsikisia ɓɔbu gea: «Nkɔkɛagani gǔ á moyangɔ!»

²³ Â goto kǒúsia te: «Cɔ, ɓojeɗe sina nde atógi?» Ɓɔ, ɓâ gǎkɛ ɔyɔnga n'ɛsɔ akpɛ phɛɛ gea: «Nkɔkɛagani gǔ á moyangɔ!»

²⁴ Ɓî Pilátɔ ɗáɔni te kátɔkɛku ye n'agi kema, na oyombɔ á ɓakpa n'aǒyamea, áɔbɛɗa iɓo, áosokosa njaga akɛ mosá á ɓakpa ɓɔbu, n'aɔyɔnga gea: «Mengombo á nkpa nde, nna k'éme, a ye tɔ ka ɓenu!»

²⁵ Ɓakpa ɓɔbu ɓáosikisia te: «Ambe mengombo akɛ áɓɛ gǔ asu na ɓaniki nɛsu!»

²⁶ Mpɔ, Pilátɔ áonkoɗisa kaɓɔ Balába, â gǎkɛ omɓindisa Yéso, áonɗeketa ka gea, ɓánkɔkɛɛgɛ gǔ á moyangɔ.

Ɓato émani ɓáɔntɛbɛaga Yéso

²⁷ Mbusa, ɓato émani ndea mɔkɔta Pilátɔ ɓáondunga Yéso, ɓáonga ně k'éndu ndea mɔkɔta, ɓato émani ɓáodondanaga ɓɔbu, ɓáontimba.

²⁸ Ɓáomphúia ngɔ́mbɛ nɛkɛ, ɓáɔmɔ́lisa nkanjo ánjɛ.

²⁹ Ɓáomakea ka mɔ̌ akɛ kúku ɓínde á ɓakɔta, na ɓáɓɔngisigi na ngenge. Ɓáɔmbɛɗisa motumbɔ á manganga ka njaga á mǔku. Ɓáogbuka muanku mosá akɛ, ɓáɔntɛbɛaga na gea akɛ te: «Moamɛ ndea Ɓayúda samba!»

³⁰ Ɓáonsúia soki, ɓáɔbɛɗa motumbɔ á manganga ndɔ, ɓáɔmɓɛta ně ka mɔ̌.

³¹ Mbusa á tɛbɛaga á Yéso, ɓáomphúia nkanjo ánjɛ ndɔ, ɓáɔmɔ́lisa goto ngɔ́mbɛ nɛkɛ, ɓáonga ně ka kɔkɛaga akɛ gǔ á moyangɔ.

Ɓáɔnkɔkɛaga Yéso gǔ á moyangɔ

³² Ka juana á ɓato émani, ɓáodondana na nto á ka nji Kuɛ́nɛ, ina akɛ Simɔ́ni, ɓato émani ɓáonkumbisa moyangɔ ndea Yéso.

³³ Ɓáokiɗia k'ɔ́ma nde ɓáɔɔphana Gɔlgɔ́ta, ande gea: «Ɔma á gangata.»

³⁴ Wa, ɓáomopha Yéso divai na ɓádaɗu na kema á k'onoa nɛngbo nnde aájia phɛɛ. Yéso áokengea, â gǎkɛ áɔkpɛma noa í.

³⁵ Mbusa á kɔkɛaga akɛ ka moyangɔ, ɓáɔɓɛta ɓana-mɛlɔɛ, ka gabisanaga á ngɔ́mbɛ nɛkɛ.

³⁶ Mbusa, ɓáoika wa ka amba akɛ.

³⁷ Ɓáobisa gǔ á mɔ̌ akɛ, gáo ábɔa na ɓáɗundu kantíti á tena á nyɔngɔ nɛkɛ akpɛ ɓe: «MMBE ANDE YÉSO, MOAMƐ NDEA ƁAYÚDA.»

³⁸ Ɓâ phɔtɔ ɔ̌kɔkɛaga ka moyangɔ kimoci na yɛ, ɓakukuɓa ɓaɓɛ kimoci na Yéso, moci ka njaga akɛ á mǔku na ɓaangbo ka njaga akɛ á nkei.

³⁹ Ɓakpa nde ɗáɓáɔnyɛ́nya wa, ɗáɓáombóma, na kɔngɔmiaga akɛ na mɔ̌

⁴⁰ ɓáogea: «Oɓɛ, ɗókondi ngbɔa endu á Mokonga na phɛ̌ka í k'ésa isaɔ, cɔ, óamisa sasakɔ! Aoɓá n'onde Muna-Mokonga, kia phɔ́ ka moyangɔ!»

⁴¹ Ɓakɔta á ɓatoɓeigi-phɛ́a, ɓaɗundu-ɛɔphi na ɓagbɛga ɓâ phɔtɔ ɔntɛbɛaga na gea:

⁴² «Ɗáeamisi ɓakpa ɓuangbo, nna gǎkɛ ɔtɔka n'ěamisi sasakɛ ee! Ande moamɛ ndea Ɓaisilaɛ́li, ambe ákiɛ pɛ kɛ̌kɛnde ka moyangɔ, mpɔ ɓemɓeekeande.

⁴³ Ɗáobisa měma akɛ ka Mokonga. Cɔ, kaɓɛ Mokonga n'ankondi ánamisɛ kɛ̌kɛnde! Nga, ɗági te: ‹Nende Muna-Mokonga.›»

⁴⁴ Ɓakukuɓa nde ɗáɓɛ̌kɔkɛigi ka moyangɔ kimoci na Yéso, ɓâ phɔtɔ onsungisiaga ɓó.

Kukuwa á Yéso

⁴⁵ Kpangá ka kantende, keiphe ɗágbukumi mokonda bui ka mbenɔ isaɔ.

⁴⁶ Ka mbenɔ á ko isaɔ í, Yéso áɔyɔnga akpɛ gea: «Ɛlɔ́i, Ɛlɔ́i, lama sabakatáni!» Ande gea te: «Mokonga nɛmɔ, Mokonga nɛmɔ. Omoɗeketi ka ɓo?»

⁴⁷ Ka ɓakpa nde ɗáɓátú wa, ɓî ɗáɓáɔ́ki nyɔngɔ ndɔ, ɓáogea: «Nkpa nde, amɔphani Elía!»

⁴⁸ Kaɓɔ moci áoga mbangɔ, áɔbɛɗa siphɔngɔ, áoubia ka divai nde aángai-ngai. Áokpatikisa ka manganga, áonɗaphisia Yéso gea, ámumɛ ú.

⁴⁹ Ɓuangbo ɓâ gǎkɛ ɔyɔnga te: «Ɗeketa, ɓɛ́ɔnɛ phɔ́, ámbé Elía abikande onamisa!»

⁵⁰ Yéso â goto okoga, áɔɗɔɛa.

⁵¹ Cɔ, ka mbenɔ ndɔ, ngɔ́mbɛ á suɓi éndu á Mokonga áɔnyɔka ka phaeka iɓɛ, k'égo áobika osungia kusi. Oɗo áoɗenga, okanga áobomokaga.

⁵² Bóta áoúkukanaga, ɓato á kanga ɓojeɗe ɓásii ɓáojujuka ka kukuwa.

⁵³ Ɓáojuana ka bóta, na mbusa á jujúka á Yéso ka kukuwa, ɓáongia ka Yɛusalɛ́ma, nji á kanga á ɓojeɗe, ɓakpa ɓásii ɓáɔ̌ɓɔna.

⁵⁴ Moamɛ á ɓato émani na ɓundɔ ɗáɓátú na yɛ ka amba á Yéso, ɓî ɓáɔni ɓaningina na kema bubui nde ɗágeani, ɓáoɓá na kɔɓɔɓɔkɔ phɛɛ, ɓáogea: «Ɗoni nkpa nde ɗátú Muna-Mokonga ɗoni!»

⁵⁵ Ɓake ɓásii ɗáɓátú wa, ɓunde ɗáɓáɔɔnjia ɗanga. Ɓɔ, ɗáɓátú ɓake nde ɗáɓátóki na Yéso na Galiláya na ɓáɔmbɛɗaneaga.

⁵⁶ Sɔsɔɓɛ á ɓake ndɔ, ɗátú Malía nseka á ka nji Magadála, Malía amakɛ na Yakɔ́ɓɔ na Yɔsɛ́phu, na ama ɓana Jɛbɛdáyɔ.

Yɔsɛ́phu amúmbi Yéso

⁵⁷ Aɓi ye ɔgɔgɔ, ntɔi moci ina akɛ Yɔsɛ́phu áokiɗia. Yɛ, ɗátú nto á ka ntanga-nji Aimatɛ́a.

⁵⁸ Áoga mɔtɛ á mɔkɔta Pilátɔ, áɔmɛma mǒnda á Yéso. Pilátɔ áososea gea, ɓámophɛ ú.

⁵⁹ Cɔ, Yɔsɛ́phu áɔbɛɗa mǒnda ndɔ, áoɓóaga ú na sanda nde nna na nkíkí.

⁶⁰ Áoúmba ú suɓi ka kubu ókanga á kɛ̌kɛ, nnde ɗátongi, ka phɔa akɛ sasakɛ. Áoingitisaga ɛtɛ ángbó ka ɗáká na aphe á iso á bóta, mpɔ áoga.

⁶¹ Malía nseka á ka Magadála na Malía ɓaangbo, ɗáɓáiki wa, k'ɔ́ma nde ɗáɔɛnjiana na bóta.

Ɓato émani ɓáoamba bóta á Yéso

⁶² Cɔ, mama í, mbusa á esa á ɓɔngisiaga á saɓáto, ɓagbɛga á ɓatoɓeigi-phɛ́a na Ɓaphaisáyɔ, ɓáoga kimoci mɔtɛ á mɔkɔta Pilátɔ,

⁶³ ɓáongoɗea te: «Mɔkɔta, ɓekanisi te, mbenɔ nde ndemigi ndɔ ɗáoenda, ɗáyɔngi te: ‹Mbusa á esa isaɔ, nejujukande ka kukuwa.›

⁶⁴ Ambe, ósoseɛ ɓáambɛ bóta ndɔ phɛɛ k'ésa isaɔ ka ɓanga gea, ɓagoigi nɛkɛ ɓákáúɓɛmbɛ mǒnda akɛ na ngoɗea á ɓakpa te: ‹Ajujúki ka kukuwa!› Ámbé odemayɔ índe á kɛ̌kɛ aɓande ájeɗe phɛɛ kɔnyɛ́nya nndɔ á mosá.»

⁶⁵ Pilátɔ áǒsikisia te: «Ɓato émani ɓáunge. Gǎni ɓóambɛ phɛɛ bóta ɓíndɔ akeni.»

⁶⁶ Ɓáoga ka bóta, ɓáoamba ú, mbusa ɓáophembeketea bóta n'etae ángbó, ɓáǒbisa ɓato émani ka amba á bóta ndɔɔ.