Matáyɔ 24 - Ɔngana á Kɛ̌kɛ

Yéso aúbisi nyɔngɔ á ngbɔɔkana éndu á Mokonga

¹ Ɓî Yéso ɗájúani suɓi éndu á Mokonga, ɓagoigi nɛkɛ ɓáombîmisia ɓáongea te: «Ɔ́na phɔ́ etéte nde ɗáɓáphɛ̌ki n'éndu á Mokonga!»

² Mpɔ Yéso áǒgea te: «Ɓɔɔna kema ndɔ bui? Nenóngoɗi ɗoni gea, nna n'ɛtɛ nde aikande gǔ á dakɛ, bui angbɔɔkanande.»

Tambaga á ka mbenɔ á sungiaga á mokonda

³ Ɓî Yéso ɗáiki gǔ á mamba á Mijɛitúni, ɓagoigi nɛkɛ ɓáombîmisia, ɓáongoɗea ka mpɛphɛ te: «Ósongoɗea phɔ́ mbenɔ sina, nndɔ ageanande. Goto, mphangiɔ sina nde aúbisaeka mbenɔ á jua akɔ na á sungiaga á mokonda?»

⁴ Yéso áǒsikisia te: «Ɛ́ngɛphani! Nkpa kanódemɛmbɛ.

⁵ Nga, ɓakpa ɓásii ɓábikande k'ína ani, ɓáogea: ‹Eme aámbé, nende Kiísito.› Ɓáedemagande ɓakpa ɓásii phɛɛ.

⁶ Ɓoɔ́kande ndu émani bíbí, na mbino émani á ɗanga. Ɓókoɓángɛ mɔnɔ gǎkɛ. Nga, nndɔ bui akeni átɔtɔkɛanɛ. Káɓɛku gǎkɛ sungiaga á mokonda ungɔ.

⁷ Ɓato á k'ékuna moci ɓámanande na ɓato á k'ékuna nɛngbo, koɓoamɛ moci amanande na koɓoamɛ nɛngbo. Monganya na ɓaningina aɓande ka nji ɗanga-ɗanga.

⁸ Kema ndɔ bui aɓande ɓea ɓoaé á k'ama mosá-mosá.

⁹ Ɓánɔtɔngande ka tambisaga na mowa anu. Ɓakpa ɓɔbu ɓánokangeande ka nyɔngɔ á ina ani.

¹⁰ Ka mbenɔ ndɔ, ɓakpa ɓásii ɓásagande ɓeekea nɛɓɔ. Ɓátɔnganande na kangeana.

¹¹ Ɓaɔtu-nyɔngɔ á mbɛa ɓásii ɓákiɗianande, ɓáǒdema ɓakpa ɓásii.

¹² Mpɔ ɓojeɗe aɛmbande, ekondi á ɓakpa ɓásii asiande.

¹³ Nkpa nde aphiphiande gǎkɛ tambaga ndɔ na ka sungiaga í, mmbɔ aámbé aamande ka měma.

¹⁴ Ɓáphɛande Mbino-Ánjá á koɓoamɛ ka Mokonda bui ka gea, ɓakpa ɓɔbu ɓáɗigimisɛ ú. Mpɔ sungiaga áojua.

Tambaga ángbó

¹⁵ Ɓɔmɔnande mmbé ɓáɔmɔphana: ‹Kema á soni nnde aɔjɔɔkisa endu á Mokonga›, mmbɔ Daniɛ́lɛ mɔtu-nyɔngɔ ndea Mokonga ɗáyɔngi nyɔngɔ akɛ, ɓámbisande k'ɔ́ma á kanga ɓojeɗe. (Cɔ, oɓɛ ímbe ootanga óengekisa ye ánjá!)

¹⁶ Ambe ɓunde ɓáɓande na Yudɛ́a ɓáteɛ gǔ á mamba.

¹⁷ Mmbé aɓande ka ntɔndɔ éndu nɛkɛ, kákiɛmbɛ mɔnɔ ka gǎ bɛɗa nkumba nɛkɛ suɓi éndu.

¹⁸ Mmbé aɓande ka ciko, kajɛmbɛ na nji ka bɛɗa á bɔngɔ nɛkɛ.

¹⁹ Ngomi k'ésa ndɔ ka ɓama-kaeme na ɓama-mbɛnjɛ!

²⁰ Mɛmani Mokonga ka gea, ɓókoteɛ mɔnɔ ka mbenɔ á ɓɛjɔ, kaɓɛ k'ésa á saɓáto.

²¹ Nga, ka mbenɔ ndɔ, tambaga ángbó nde káɓimbɛmɔnɔ ɓî mokonda ákpangɛ na ka kɛ̌kɛ. Na tambaga nɛngbo ɓíndɔ káɓáeka ye.

²² Atú oɓá Mokonga na kángbîmisi mbenɔ kau, ámbé ka ɓakpa kátóamɛeka. Angbîmisande gǎkɛ ú ka nyɔngɔ á ɓakpa ndɔ ɗáɛsɔmbu.

²³ A gǎkɛ oɓá nkpa n'anɔ́tɔ̌mi te: ‹Kiísito awani!› kaɓɛ: ‹A kosi›, ɓókǒɓeekeɛmbɛ.

²⁴ Nga, ɓakiísito á mbɛa, na ɓaɔtu-nyɔngɔ á mbɛa, ɓákiɗianande, ɓáɔtɔtɔkisa ketangaɔ na mphangiɔ ángbó phɛɛ ka dema á ɓunde Mokonga aɛsɔmbu.

²⁵ Cɔ, ɔ́kani phɔ́! Ɗégɔɓi ye na nenóngoɗi nyɔngɔ nde bui mosá.

²⁶ A gǎkɛ oɓá na ɓánongoɗi gea: ‹Aámbé a ka nkanda!›, ɓókógɛ mɔnɔ kó. Kaɓɛ na ɓánogi: ‹Aámbé aɛsɔmɛani wani›, ɓókómɓeekeɛmbɛ.

²⁷ Muna-Nkpa abikande ɓea phenua á mbua na koba nde aobenya ka toka n'okomo, áoga n'oyonga.

²⁸ Ɔma nde mǒnda á nyama aogua, aunge ɓandia ɓáodondanaga ɓei.

Ja á Muna-Nkpa

²⁹ Cɔ, mɔngɔ ímoci mbusa á matú á tambaga, maní aɓande kaiphiɔ, songe kábɛnyɛku, ɓasɛɛngɔa ɓáguande. Na kema ákpɛkpɛ bui nnde á na koba, aɗengande.

³⁰ Mphangiɔ á Muna-Nkpa asɛnɛkande na koba na ɓukpɛkpɛ ángbó. Cɔ, ɓato á ka mokonda ɓɔbu ɓátaɓokanagande. Ɓámɔnande Muna-Nkpa n'akiɗiani k'egugu á na koba na ɓukpɛkpɛ na ɓophómbia.

³¹ Ɛsɔ á mbengu ángbó aɔ́kɛkanande, n'aetekande ɓamalaéka nci gena á ka mokonda: Ɓáedondanisande ɓundɔ Mokonga ɗáɛsɔmbu ka mokonda bui.

Mɛní á me nde ɓáɔmɔphana mtini

³² Engekisani phɔ́ mɛní á me nde ɓáɔmɔphana mtini: Ɓɔ ye ɔɔna gea, ntabi í n'akpangi tɛisa nsô á kasa, ɓôúba te, matú á okame a ye tɔ bíbí.

³³ Ɓo ye ɔɔna nyɔngɔ ndɔ bui n'atɔtɔkɛani, úbáni gea Muna-Nkpa a ye tɔ bíbí, amame ka kǐo á endu.

³⁴ Nenóngoɗi ɗoni gea, ɛɓɔkɔti nde kásiɛku kema ndɔ bui na kákiɗianimbɛ.

³⁵ Koba na mokonda, anyɛ́nyande. Nyɔngɔ nɛmɔ gǎkɛ unge kányɛ́nyɛku.

Mokonga tɔndɔ aámbé aoúba mbenɔ á sungiaga

³⁶ Ka nyɔngɔ á esa ndɔ na mbenɔ ndɔ, nna na nkpa nde aoúba ú. Kaɓɛ ɓamalaéka na koba, kaɓɛ eme Muna-Nkpa, tɔndɔ Abɛ.

³⁷ Nyɔngɔ nde ɗányɛ́nyi ka matú ndea Nɔ́a, aunge aɓande phɔtɔ ka matú á bika á Muna-Nkpa.

³⁸ Nga, ka matú ndɔ, mosá á tuma á iɓo phɛɛ, ɓakpa ɗáɓáoeaga, ɓáonoa, ɓáɔɔmana na ɔmanisa á ɓaniki nɛɓɔ na ka ɓî Nɔ́a ɗángí suɓi á koko ángbó.

³⁹ Ɗáɓákáosenda ka kema, na ka ɓî iɓo ɗátúmi phɛɛ áǒmia ɓɔbu. Aɓáeka tɔ ɓó esa nde Muna-Nkpa abikaeka.

⁴⁰ Cɔ, ɓǒko ɓaɓɛ ɓáɓande ka ciko: Ɓámbɛɗande moci, ɓáonɗeketa ɓaangbo.

⁴¹ Ɓake ɓaɓɛ ɓágogande mbuka ka etae: Ɓámbɛɗande moci, ɓáonsaga ɓaangbo.

⁴² Cɔ, ɛ́ngɛphani nga, ɓókóoúba esa nde Mɔkɔta nɛnu abikaeka.

⁴³ Ɔ́kani ánjá! Ɗátúoɓá mɛna-endu n'aúbi esa nde nkukuɓa amúɓiande, ámbé ɗáphɛi tɔ̌ ka gea nkukuɓa ndɔ kángiɛmbɛ k'éndu nɛkɛ.

⁴⁴ Kaɓondɔ unge, ɓenu phɔtɔ ɔ́ɓɔngisiagani nga, Muna-Nkpa abikande ka mbenɔ nde ɓókóosenda.

Mɛní á mbɛɗanigi anjánjá na mbɛɗanigi ajeɗe

⁴⁵ Cɔ, mbɛɗanigi sina mmbé aanjánjá n'aoúbapha mmbé mɔkɔta nɛkɛ amophi ophangɔ gǔ á ɓabɛɗanigi ɓuangbo ka gabea ɓɔ eea ka mbenɔ nde ɓákondi?

⁴⁶ Maseye ka mbɛɗanigi ndɔ, mbenɔ nde mɔkɔta nɛkɛ aoja, áondonda n'aobɛɗanaga ekuma ndɔɔ.

⁴⁷ Nenóngoɗi ɗoni gea, mɔkɔta amophande ophangɔ á nkumba nɛkɛ bui.

⁴⁸ Cɔ, a gǎkɛ oɓá n'ande mɓɛɗanigi ajeɗe, ěgeande sisakɛ: ‹Mɔkɔta aíphi phɛɛ!›

⁴⁹ Áokpanga ɓinda á ɓadakɛ íɓunde aobɛɗanaga na ɓɔ, aeagande na noa kimoci na ɓato á ɓoita.

⁵⁰ Cɔ, Mɔkɔta nɛkɛ ajúande k'ésa nde kátúosenda na ka mbenɔ nde nnaoúba.

⁵¹ Mɔkɔta nɛkɛ amɔnisande ka ɓɔngɔ na ɓinda akɛ ɓea ɓato á maibe na bisa akɛ k'ɔ́ma nde agámande na ea á minyɔ.