Matáyɔ 23 - Ɔngana á Kɛ̌kɛ

Ɓɔphɛi ka phɔa á Ɓaphaisáyɔ na ɓaɗundu-ɛɔphi

¹ Mpɔ Yéso áǒngoɗea usɛsɛ á ɓakpa na ɓagoigi nɛkɛ gea:

² «Ekuma á ɓaɗundu-ɛɔphi na Ɓaphaisáyɔ ande tɔ̌miaga base ɛɔphi ndea Mósa.

³ Kaɓondɔ, ɔ́kani na tɔtɔkisa á kema bubui nde ɓáonóngoɗea. Ɓókóɓeɛmbɛ gǎkɛ tambea aɓɔ ka nyɔngɔ nde tambea aɓɔ, atingani na nyɔngɔ nde ɓáɔyɔnga.

⁴ Ɓáoɓóaga nkumba áɗoko nnde aákpɛ ka kumba í. Ɓáobisa ú k'ɛkɔta á ɓǒko, ɓɔ gǎkɛ ɓákáɓɛ tanda na kanisia á enga ɓǒko ka nkumba ndɔɔ.

⁵ Goto, ɓáogea kema nɛɓɔ bui ka gea te ɓakpa ɓáɛɓɔnɛ. Ɓáɔ̌ɓɔɛa phaeka á bɔngɔ ágbae kaɓɛ k'éndóndó, kaɓɛ ka njaga nnde ɓáɗundu kau nyɔngɔ moci-moci á Mokonga. Nkanjo nɛɓɔ an'ɛɔkɔ á koaga.

⁶ Ɓáokonda ika k'ɔ́ma á mosá ka mbenɔ á jaí, na k'éndu á madondanɔ ndea Ɓayúda ka nyɔngɔ á Mokonga.

⁷ Ɓákondi gea te ɓáɓɛǒsesea n'obebɔ k'ɔ́ma nde ɓakpa ɓáɓiki, ɓɛ́ɓɔphanɛ ɓɔ: ‹Ɓagoisigi›.

⁸ Ɓenu gǎkɛ, ɓókóɓeekeɛmbɛ ɓánɔɔphanɛ: ‹Ɓagoisigi›. Nga, ɓenu ɓɔbu ɓonde ɓato á komunamema na ɓona ngoisigi moci tɔndɔ.

⁹ Ɓɔ́kɔmɔphanɛ mɔnɔ gǎkɛ nkpa ka mokonda nde: ‹Abɛ›. Nga, Abanu a tɔ moci mmbé á na koba.

¹⁰ Ɓákanɔ́ɔphanɛmbɛ tanda: ‹Ɓakɔta›. Nga, ɓo tɔ na Mɔkɔta moci, Kiísito.

¹¹ Nto angbóngbó ka ɔlɔ anu akeni áɓɛ ndiu mbɛɗanigi nɛnu.

¹² Mmbé aǒtáisa, ɓándidisande. Mmbé a gǎkɛ ǒdidisa, ɓántáisande.

Yéso aɔnisi odemayɔ ndea ɓaɗundu-ɛɔphi na Ɓaphaisáyɔ

¹³ Ngomi anu ɓaɗundu-ɛɔphi na Ɓaphaisáyɔ. Ɓona maibe! Ɓǒɗakea ɓakpa aphe á ngia ka koɓoamɛ ndea na koba na ɓenu ɓókóongia sasanu kau. Ɓókóokonda gea ɓunde ɓána mɔphɛ á ngia ɓángiɛ. [

¹⁴ Ngomi anu ɓaɗundu-ɛɔphi na Ɓaphaisáyɔ. Ɓona maibe! Ɓǒúta ɓake á kekusa nkumba nɛɓɔ bui, goto ɓɔɔmɛma éndǎ ka gea ɓakpa ɓánɔɔnɛ. Kaɓondɔ unge ɓátenande nyɔngɔ nɛnu akpɛ phɛɛ!]

¹⁵ Ngomi anu ɓaɗundu-ɛɔphi na Ɓaphaisáyɔ. Ɓona maibe! Ɓooga tamba ɔma bui ka mokonda na k'óɓenge ka tɔá mɓêki moci tɔndɔ. Mbusa á tɔá akɛ, ɓóombisa nto á koɓoamɛ ndea Sɛtáni, mɔngɔ iɓɛ kɔnɔ́nyɛ́nya.

¹⁶ Ngomi anu ɓasɔndɔi íɓunde ɓókóɔɔnapha! Ɓoogea te: ‹Aoɓá nkpa n'aɔphí k'ína éndu á Mokonga, nndɔ nnaogea kema. Aoɓá gǎkɛ n'aɔphí k'ína á láté nnde a suɓi éndu á Mokonga, áɔgɔnana.›

¹⁷ Ɓabóbó á ɓakeíme-íme nde ca! Káu sina nde ana kantíti kɔnyɛ́nya nɛngbo, kaɓɛ láté nde a suɓi éndu ndea Mokonga, kaɓɛ endu á Mokonga nnde aosokosea láté?

¹⁸ Ɓo phɔtɔ ogea te: ‹Aoɓá nkpa n'aɔphí k'ína á ɛtɛ-ɔ́phɛ́ɔ, nndɔ nnaogea kema a gǎkɛ oɓá nkpa n'aɔphí k'ína á ɔphɛ́ɔ nde a ka ɛtɛ-ɔ́phɛ́ɔ, ambe átɔtɔkisɛ ɛɔphi nɛkɛ.›

¹⁹ Ɓakeíme-íme nde ca! Kema sina nde aánjá phɛɛ, ɔphɛ́ɔ ndɔ? Ɛtɛ-ɔ́phɛ́ɔ nde aosokosea ɔphɛ́ɔ?

²⁰ Kaɓondɔ, nkpa nde aɔɔpha k'ína á ɛtɛ-ɔ́phɛ́ɔ, aɔphí k'ɛtɛ-ɔ́phɛ́ɔ na kema bui nde a gǔ í.

²¹ Nkpa nde aɔɔpha k'ína éndu á Mokonga, aɔphí phɔtɔ k'ína á Mokonga mmbé aiki suɓi í.

²² Nkpa nde a ndiu ɔɔpha k'ína á koba, aɔphí k'ína á kankaanga á kɔkɔta ndea Mokonga na k'ína á Mokonga mmbé aikiɗíí.

²³ Ngomi anu ɓaɗundu-ɛɔphi na Ɓaphaisáyɔ. Ɓonde ɓato á maibe! Ɓoomopha Mokonga phaeka á nkama á kasa ɓea ɓoili. Ɓô ndiu ɔɓɛnjiaga ɓɔphɛi ánjá ɛ́ɔphi ɓea: Koɗoni, ɓonjánja na ɓá na ɓeekea kángá anganisa. Atókeni ɓɔ́tɔtɔkisɛ nndɔ kángá á ɓosea ɛɔphi angbo.

²⁴ Ɓasɔndɔi ɓunde ɓɔ́kɔ́ɔnapha nde ca! Ɓɔɔkɛndɛa makana nɛnu ka phúia ɓampapha, ɓô ndiu kommia nyama angbóngbó ɓea ngamia!

²⁵ Ngomi anu ɓaɗundu-ɛɔphi na Ɓaphaisáyɔ. Ɓonde ɓato á odemayɔ! Ɓoosokosaga mpɛphɛ á cǎ n'ɔphɛphɛ nde kádúumani, suɓi í n'atúmi ndiu na kema á kuɓa na nnde á mɔphɛ ájeɗe nɛnu.

²⁶ Ɓenu ɓakeíme-íme á Ɓaphaisáyɔ nde ca! Sokosani phɔ́ suɓi á cǎ, mpɔ mpɛphɛ í â phɔtɔ ɔsɛnga.

²⁷ Ngomi anu ɓaɗundu-ɛɔphi na Ɓaphaisáyɔ, ɓato á maibe! Ɓo ɓea bóta nde ɓásǐ na ɗɔphɛ ábu. Nci á na nsɛngɛ aophenuaga ánjá suɓi í n'atúmi na nkua á ɓasí n'etéte á ɓɔjɔɔkiɔ ɗanga-ɗanga.

²⁸ Ɓo phɔtɔ ɓó nga, ɓíndɔ ɓakpa ɓáɔnɔɔna gǔ-gǔ ɓáokanisia te ɓonde ɓato á ɗoni, suɓi anu n'atúmi ndiu na maibe na ɓojeɗe.

²⁹ Ngomi anu ɓaɗundu-ɛɔphi na Ɓaphaisáyɔ, ɓato á maibe! Ɓɔ̌phɛkɛa ɓaɔtu-nyɔngɔ ndea Mokonga bóta kema ánjá, ɓɔɔtɔnda bóta á ɓato á koɗoni,

³⁰ na gea te: ‹Ɗátúoɓá na ɓeendi ka mbenɔ á ɓatatasu, ámbé ɗéɓékéɓeekeani na ɓɔ ka mowa ɓaɔtu-nyɔngɔ ndea Mokonga.›

³¹ Kaɓondɔ, ɓoɗigimisi sisanu gea, ɓonde ɓasukɔ á ɓakpa ndɔ ɗáɓěme ɓaɔtu-nyɔngɔ ndea Mokonga.

³² Aánjá, suiani tɔ ka gea ɓɔ́gɔɓɛɛ kema ndɔ ɓatatanu ɗáɓákpangi!

³³ Ɓanjɔka, ekombo á ɓakaɓokosa nde ca! Ɓookanisia gea ɓoúkaeka ka tena á nyɔngɔ nɛnu akpɛ k'ɛɛmbɛ á nsa nde nnaoímika ɓo?

³⁴ Kaɓondɔ unge ɔ́kani phɔ́: Nenótekisiande ɓaɔtu-nyɔngɔ ndea Mokonga, ɓato á kɔɓɔɔngɛ na ɓaɗundu-ɛɔphi. Ɓǒmande ka ɓɔ, ɓɔ́ɔ̌kɔkɛaga ɓuangbo gǔ á moyangɔ. Ɓǒɓindande ɓuangbo k'éndu á madondanɔ ndea Ɓayúda ka nyɔngɔ á Mokonga na ɓeaga aɓɔ ntanga-nji ka ntanga-nji.

³⁵ Cɔ, nyɔngɔ á magia á ɓakpa nde ɗáɗǔkani ka mokonda na ɓákági ɓojeɗe, aɓande gǔ anu kpanga ka Abɛ́li nto á koɗoni na ka ɓî ɗáge osungiaga ka Jakaíya, muna Baakíya, mmbɔ ɗóɓomowe k'éndu á Mokonga, sɔsɔɓɛ á ɔma á kanga ɓojeɗe na ɛtɛ-ɔ́phɛ́ɔ.

³⁶ Nenóngoɗi ɗoni gea, nyɔngɔ á magia ndɔ ɗáɗuukani bui, aɓande gǔ anu!

Yéso akui Yɛusalɛ́ma ngomi

³⁷ Yɛusalɛ́ma, Yɛusalɛ́ma! Oɓɛ aámbé ǒmowe ɓaɔtu-nyɔngɔ ndea Mokonga, óǒmowa n'etae ɓunde Mokonga akotekisíí. Mɔngɔ ángaáni nde netókondi dondanisa á ɓakpa nɛkɔ ka mpɛphɛ ani ɓea ama-gbɔ̌kɔ n'aódodanisa ɓ'anakɛ kusi á kepupe akɛ, kókondɛ gǎkɛ.

³⁸ Aánjá! Endu nɛkɔ ajigande esimɔ.

³⁹ Cɔ, nekongoɗi ɗoni gea: Kpanga á kɛ̌kɛnde, ɓókómɔɔnɛeka ye, na ka ɓî ɓɔyɔngande gea: ‹Mokonga ábisɛ njaga akɛ gǔ á nkpa nde abiki k'ína á Mɔkɔta.›»