Matáyɔ 22 - Ɔngana á Kɛ̌kɛ

Yéso aɔtɔmia mɛní á jaí éyamani

¹ Yéso ɗáengoɗi goto ɓakpa nyɔngɔ ka mɛní áǒgea:

² «Koɓoamɛ á na koba akengeani na Moamɛ moci mmbé ɗáɓɔngisigi ka anakɛ jaí á eyamani.

³ Áǒteka ɓabɛɗanigi nɛkɛ k'aphe á ɔphana á ɓakpa ɓunde ɗáɓáeɓɔphani ka jaí ndɔ. Ɓakpa ndɔ ɓákakondɛ gǎkɛ bika.

⁴ Áǒteka ɓabɛɗanigi ɓuangbo na sosea aɓɔ te ɓáyɔngɛ: ‹Nětenisi ɓǔku á ngɔmbɛ na ɓampɔnjɔ á nyama ɗanga-ɗanga na ɓánɔnigi phɛɛ. Ɓe ye gi kema bui. Bikani ka jaí éyamani.›»

⁵ Ɓakpa kau ɓákáɓɛ gǎkɛ na ka mɔphɛ í, ɓáoga k'ékuma nɛɓɔ: Moci ka ciko nɛkɛ, ɓaangbo ka sombisaga nkumba nɛkɛ.

⁶ Ɓuangbo, ɓáǒdunga ɓabɛɗanigi, ɓáǒtambisaga, ɓáǒma.

⁷ Moamɛ, áɔɓɛa phɛɛ. Áǒteka ɓato émani nɛkɛ ka gǎ kɔnda ɓundɔ ɗáɓáemowe ɓabɛɗanigi nɛkɛ na toɓoa á nji nɛɓɔ kó!

⁸ Mpɔ áǒngoɗea ɓabɛɗanigi nɛkɛ te: «Cɔ, eea á ɛkɛka a ye biɗi. Ɓakpa nde ɓáɛɓɔphani gǎkɛ ka jaí ɓákákenani ně.

⁹ Kaɓondɔ, gǎni ka makani á aphe ángbóngbó ɓɔ́ɓɔphanɛ ɓunde ɓǒdondande kó ka nyɔngɔ á jaí.»

¹⁰ Ɓabɛɗanigi ndɔ ɓáoga ka makani á aphe ángbóngbó ndɔ, ɓáǒdondanisa ɓakpa ɓɔbu, ɓunde ɗáɓáedondi, ɓánjá na ɓunde ɓájeɗe. Mpɔ endu ɛ́kɛka áotúma na ɓakpa ndɔ ɓáɛɓɔphani.

¹¹ Ɓî moamɛ angí ye k'éndu ɛ́kɛka ka ɔna ɓato á ɛkɛka, áɔmɔna nkpa moci mmbé ɗákáɔ́li ngɔ́mbɛ ɛ́kɛka,

¹² áongea te: «Moko, ongi wani na kɔ́ɔ́li ngɔ́mbɛ ɛ́kɛka ka ɓo?» Nkpa ndɔ kásikisiɛ tanda nyɔngɔ moci.

¹³ Moamɛ áǒngoɗea ɓabɛɗanigi nɛkɛ te: «Mɓóagani nkpa nde k'écinji na ka njaga, ɓómmakɛ na nsɛngɛ ka keiphe. Kondɔ unge agámande na ea á minyɔ.»

¹⁴ Mpɔ Yéso áogea te: «Ɓunde ɓáɛɓɔphani ɓáɓiki phɛɛ. Ɓunde gǎkɛ ɓáɛsɔmbu ɓákáɓiki.»

Ɓaphaisáyɔ ɓáomúsia Yéso ka nyɔngɔ á ophendɔ á manjanja

¹⁵ Mpɔ Ɓaphaisáyɔ ɓáoga onca Yéso ka ɛkɛa akɛ mɛ̌kɔ ka gea, ɓánkoɗɛ ka yɔngɛa akɛ sisakɛ.

¹⁶ Ɓáǒteka ka ɓagoigi nɛɓɔ kimoci na ɓakpa ndea moamɛ Ɛlɔ́dɛ. Ɓáongoɗea Yéso te: «Ngoisigi, ɓeoúba gea onde nto á ɗoni na ǒphangiaga ɓakpa nyɔngɔ á ɗoni ka ɓeá á Mokonga. Kóna kɔɓɔɓɔkɔ á mɔphɛ á ɓakpa na kóoɓongeaga kɔkɔta á ɓakpa.

¹⁷ Ɔ́sɔtɔmia phɔ́ kanisia akɔ ka nyɔngɔ nde, aoɓá n'ande ɗoni kaɓɛ mbɛa gea: Ɛɔphi nɛsu asosi phenda á manjanja ka moamɛ angbóngbó á Ɓalɔ́ma?»

¹⁸ Yéso ɗáúbi ye kanisia aɓɔ ájeɗe, áǒgea te: «Ɓato á maibe nde ca! Ɓoomotombaga ka ɓo?

¹⁹ Cɔ, ómophangiani phɔ́ imɔna á ngɔa nde akeni ka phenda á manjanja.» Ɓáomphangia imɔna moci á ngɔa.

²⁰ Mpɔ Yéso áǒɓúsia te: «Keongi, na ina nde ɓáɗundu wani, ande á ani?»

²¹ Ɓáonsikisia te: «Ande á moamɛ angbóngbó á Ɓalɔ́ma.» Mpɔ Yéso áǒgea te: «Mophani Kaisáa kema nɛkɛ, ɓómophɛ phɔtɔ Mokonga kema ínɛkɛ.»

²² Ɓî ɓáɔ́ki tɔ nyɔngɔ ndɔ, ɓáoyayama phɛɛ. Mpɔ ɓáonɗeketa, ɓáoga.

Ɓaphaisáyɔ ɓáomúsia Yéso ka nyɔngɔ á jujúka ka kukuwa

²³ Esa ndɔ tɔ, Ɓasadukáyɔ ɓɔ, ɗáɓákátúoɓeekea nyɔngɔ á jujúka ka kukuwa, ɓáombîmisia Yéso ɓáomúsia te:

²⁴ «Ngoisigi, ɛɔphi ndea Mósa agi te: ‹Aoɓá mǒko n'aku kángá á ɓɔkɔta, muna-amakɛ angííande nke á kekusa ndɔ ka gea, ámɓɔkɔteɛ nkú ɓaniki.

²⁵ Cɔ, ɓǒko á komunamema ɗáɓátú ka ɔlɔ asu ngianjaga iɓɛ (7). Ánge ɗámuki nke, áokuwa kángá á ɓɔkɔta, áonɗeketea muna-amakɛ nke á kekusa ndɔɔ.

²⁶ Ɗátú tɔ ɓó ka mmbé ɓa ko baɓɛ, ɓa ko ɓasaɔ, na gǎ jua ka mmbé á ko ngianjaga iɓɛ (7), ɓɔbu ɓáokuwa kángá ɓɔkɔta.

²⁷ Mpɔ mbusa á kukuwa aɓɔ ɓɔbu, nke ndɔ â phɔtɔ okuwa.

²⁸ Cɔ, k'ésa á jujúka á ɓasí ka kukuwa, nke ndɔ aɓande nka ani? Nga, ɓɔbu ɗáɓámuki.›»

²⁹ Yéso áǒsikisia te: «Ɓǒdema sisanu nga, ɓókóoúba kaɓɛ Ɓuku á Mokonga kaɓɛ ɓukpɛkpɛ nɛkɛ.

³⁰ Nga, ɓî ɓasí ɓájujukande ka kukuwa, ɓǒko ɓákáeɓukɛku ye ɓake na ɓake ɓákáɔmanɛku ye nga, ɓáendande ɓea ɓamalaéka na koba.

³¹ Ande gea te, ɓókótangimbɛ mɔnɔ suɓi á Ɓuku á Mokonga nyɔngɔ á jujúka á ɓasí ka kukuwa? Ɗági:

³² ‹Nende Mokonga ndea Abalaámu, Isáka, na Yakɔ́ɓɔ. Ké Mokonga ndea ɓasí, ne ndiu á ɓakpa nde ɓáoenda.›»

³³ Usɛsɛ á ɓakpa ɓɔbu ɓunde ɗáɓáɔmɔ́ka, ɓáoyayama phɛɛ ka nyɔngɔ á ɓɔphɛi nɛkɛ.

Ɛɔphi sina nde anyɛ́nyi nɛngbo?

³⁴ Mbenɔ nde Ɓaphaisáyɔ ɗáɓáɔ́ki gea, Yéso aedakanisi Ɓasadukáyɔ, ɓáodondanaga.

³⁵ Ka ɓɔ moci n'ande ngoisigi-ɛɔphi, áɔnɛkɛa Yéso mɛ̌kɔ ka músiɔ, áongea te:

³⁶ «Ngoisigi, ɛɔphi sina nde anyɛ́nyi ɛɔphi nɛngbo bui?»

³⁷ Yéso áonsikisia te: «‹Nkonda Mɔkɔta-Mokonga nɛkɔ na měma akɔ bui, na enda akɔ bui, na úbapha akɔ bui.›

³⁸ Nndɔ unge ande ɛɔphi á k'ama mosá-mosá nnde anyɛ́nyi nɛngbo bui.

³⁹ Ɛɔphi á ko iɓɛ nnde akengeani ně ande: ‹Nkonda dakɔ ɓíndɔ ǒkondi sisakɔ.›

⁴⁰ Ɛɔphi bui ndea Mósa na ɓɔphɛi bui ndea ɓaɔtu-nyɔngɔ ndea Mokonga, atóki tɔ k'ɛɔphi iɓɛ ndɔɔ.»

Músiɔ ka nyɔngɔ á Kiísito

⁴¹ Ɓî ɓaphaisáiyɔ ɗáɓá phɔ́tɔ ka dondanaga, Yéso áǒɓúsia te:

⁴² «Kanisia sina nde ɓoně ka phɔa Kiísito? Aɓɔkɔtɛani k'ékombo sina?» Ɓáonsikisia te: «Ande mosuko á Daúdi.»

⁴³ Yéso áǒgea te: «Ka nyɔngɔ éke nde Měma á kanga ɓojeɗe amphangi Daúdi gea ámɔphanɛ Kiísito, ‹Mɔkɔta› nɛkɛ? Daúdi áogea:

⁴⁴ ‹Mɔkɔta-Mokonga angoɗi Mɔkɔta nɛmɔ: Ika nkɛkɛɔ á njaga ani á mǔku, na ka ɓî něbisande ɓaɓiɓia akɔ kusi á ecinji akɔ.›

⁴⁵ Cɔ, aoɓá gǎkɛ Daúdi n'aɔmɔphana ‹Mɔkɔta› Kiísito aɓande gǎkɛ mosuko á Daúdi ka ɓo?»

⁴⁶ Kaɓɛ gǎkɛ na ka ɓɔ moci mmbé ɗátɔki sikisia akɛ nyɔngɔ moci. Kpanga esa ndɔ tɔ, nna na ka ɓakpa mmbé ɗákengi úsia akɛ.