Matáyɔ 21 - Ɔngana á Kɛ̌kɛYéso angí ka Yɛusalɛ́ma (Ɔna phɔtɔ Mkɔ 11.1-11 ; Lók 19.28-40 ; Yoá 12.12-19 ) 1 Ɓî Yéso na ɓagoigi nɛkɛ ɗáɓábîmisi Yɛusalɛ́ma, ɓáojúa bíbí á nji Bɛtɛphágɛ, ka mamba á Mijɛitúni, áǒteka ka ɓagoigi nɛkɛ ɓaɓɛ mosá. 2 Aǒngoɗea te: «Gǎni ka nji ndɔ a mosá anu. Ɓondondande kɛ̌kɛnde mponda moci na ɓámɓɔi n'aiki kimoci n'anakɛ. Ókoɗani ɓóóbikɛ ně mɔtɛ-amɔ. 3 Aoɓá nkpa n'anóúsi, ɓônsikisia gea: ‹Mɔkɔta aámbé aɛ́ɔphanei.› Anɗeketande ágɛ kɛ̌kɛnde.» 4 Cɔ, nndɔ bui áojúa ka gea te nyɔngɔ nde mɔtu-nyɔngɔ ndea Mokonga ayɔngi, átɔtɔkɛanɛ: 5 «Óngoɗea ɓato á ka Sayúni te: Égani phɔ́! Mɔkɔta nɛnu abiki mɔtɛ-anu. Ande nto á aphɔngɔ, akǎmbi gǔ á nka-mponda na mponjo á mponda, miki á mponda.» 6 Ɓagoigi nɛkɛ, ɓáoga ɔtɔtɔkisa kema nde Yéso atóesosei. 7 Ɓáǒbika na nka-mponda na mponjo á mponda na ɓáoyi ngɔ́mbɛ nɛɓɔ gǔ aɓɔ, Yéso áoikiɗia ú. 8 Usɛsɛ á ɓakpa ɓáɔɔyia ngɔ́mbɛ nɛɓɔ k'aphe. Ɓuangbo ɓáotena ntabe á me, ɓáɔɔyia k'aphe. 9 Usɛsɛ á ɓakpa nde ɗáɓáotamba mosá á Yéso na mbusa akɛ, ɓáokoga te: «Obebɔ ka Mosuko á Daúdi! Mokonga ábisɛ njaga akɛ gǔ á nkpa nde aobika k'ína á Mɔkɔta! Obebɔ ka Mokonga na koba!» 10 Mbenɔ nde Yéso ɗángí ka Yɛusalɛ́ma, ɓakpa ɓáoagatana. Ɓáogea: «Nkpa sina mmbé?» 11 Ɓundɔ ɗáɓátambi kimoci na Yéso ɓáǒsikisia te: «Ande Yéso mɔtu-nyɔngɔ ndea Mokonga, nto á Najalɛ́ti á ka Galiláya.» Yéso angí k'éndu á Mokonga (Ɔna phɔtɔ Mkɔ 11.15-19 ; Lók 19.45-48 ; Yoá 2.13-22 ) 12 Ɓî Yéso angí k'éndu á Mokonga, áǒɓeaga ɓasombisigi na ɓasombigi-nkumba. Áokpúngbumisa mɛja ndea ɓaanganisigi imɔna na kankaanga ndea ɓasombisigi-ɓamboe. 13 Mbusa, áǒgea ɓakpa ndɔ te: «Ɓáɗundu suɓi á Ɓuku ndea Mokonga ɓe: ‹Endu nɛmɔ ɓáɔphanande endu ɛ́mɛmi.› Cɔ, ɓenu ɓô ndiu obisa ú ɔma á dondanaga á ɓakukuɓa.» 14 Wandɔ, ɓakeíme-íme na ɓaɗɔti ɓáɔngɛndɛa Yéso suɓi éndu á Mokonga, áǒamisa. 15 Cɔ, ka ɔna ketangaɔ nde Yéso ɗági, na nkogo á ɓaniki k'éndu á Mokonga: «Obebɔ ka Mosuko á Daúdi!» Nndɔ áɔ̌ɓɛisa ɓagbɛga á ɓatoɓeigi-phɛ́a na ɓaɗundu-ɛɔphi. 16 Kaɓondɔ, ɓáomúsia Yéso: «Ɔɔ́ki nyɔngɔ ndɔ ɓáɔyɔnga ndɔ?» Áǒsikisia te: «Eya! Ɓókótangimbɛ mɔnɔ tanda nyɔngɔ nde suɓi á Ɓuku á Mokonga? Nyɔngɔ kau ú: Ɗóphangi gea, aphenɔkɔ á ɓaniki na ɓambɛnjɛ akobebande.» 17 Mpɔ, Yéso áǒɗeketa ɓakpa ndɔ, áoga na Bɛtanía, áoɗá kó. Yéso asɛmɛigi me (Ɔna phɔtɔ Mkɔ 11.12-14 , 20-24 ) 18 Mama í kamɓimba, Yéso áoja ka Yɛusalɛ́ma, nja áɔmbɛɗa. 19 Áɔɔna me nde ɓáɔɔphana mtini ka mpɛphɛ á aphe, áokétea ú, â gǎkɛ odonda na kágɔmbi. Aɔnsɛmɛaga me ndɔ te: «Kɔ́gɔmbɛeka.» Mɔngɔ moci, me ndɔ áɔɔmɔkaka. 20 Ɓî ɓagoigi ɓáɔni ketangaɔ ndɔ, ɓáoyayama, ɓáɔyɔnga te: «Me nde aɔmɔkaki mɔngɔ ímoci ɓo?» 21 Yéso áǒngoɗea: «Nenóngoɗi ɗoni gea, aoɓá na ɓona ɓeekea kángá á ngǎka, ɓókógeɛku tɔndɔ kema sumbî negi ka me ndee. Ɓɔtɔkande gǎkɛ ngonɗea á mamba nde phɔtɔ: ‹Phúikana sua, ógɛ guiɛ k'óɓe nge›, nndɔ atɔtɔkɛanande. 22 Aoɓá na ɓona ɓeekea, Mokonga anóphande kema bui nde ɓɔɔmɛma suɓi á ɛmɛmi.» Músiɔ ka nyɔngɔ á kɔkɔta ndea Yéso (Ɔna phɔtɔ Mkɔ 11.27-33 ; Lók 20.1-18 ) 23 Mbenɔ nde Yéso angí k'éndu á Mokonga, áokpanga phɛá. Wa, ɓagbɛga á ɓatoɓeigi-phɛ́a na ɓagbɛga á ka nji á Ɓayúda, ɓáɔsɛkɛɗa bíbí á Yéso, ɓáomúsia te: «Ogi nnde na kɔkɔta sina? Ani mmbé akophi kɔkɔta á gea kema nde?» 24 Mpɔ Yéso áǒsikisia te: «Eme phɔtɔ nena músiɔ moci ka ɓenu. Aoɓá na ɓomosikisíí, mpɔ néonóngoɗea kɔkɔta sina nde nɛɔtɔtɔkisa ketangaɔ ně. 25 Ani mmbé ɗámophi Yoáni kɔkɔta á ɓatisa. Ande Mokonga, kaɓɛ n'ande ɓakpa?» Ɓâ gǎkɛ okpanga yɔngaga sɔsɔɓɛ aɓɔ te: «Aoɓá na ɓegi te: ‹Mokonga aámbé ɗánteki›, ámbé asoúsiande gea: ‹Ka nyɔngɔ éke nde ɗóɓokómɓeeki gǎkɛ Yoáni?› 26 ‹Aoɓá na ɓegi gǎkɛ atóki ka ɓakpa, kaɓɛ ánjá,› nga, ɓeoɓanga usɛsɛ á ɓakpa ɓî kanisia aɓɔ ɓɔbu ande gea te: ‹Yoáni ande mɔtu-nyɔngɔ ndea Mokonga.›» 27 Kaɓondɔ, ɓáonsikisia Yéso: «Ɓékéoúba.» Yɛ, â gǎkɛ ǒngoɗea: «Eme gǎkɛ kénongoɗeɛku cina á kɔkɔta nde nɛɔtɔtɔkisa ně.» Mɛní á ɓaganda ɓaɓɛ 28 Yéso áotútuisa yɔnga áogea: «Ɓogi gǔ á mɛní nde ɓo? Nkpa moci ɗátú na ɓaganda nɛkɛ ɓaɓɛ. Áongoɗea mmbé ɓa k'ama mosá-mosá te: ‹Mukuamɔ, gǎ phɔ́ ɔ́bɛɗanɛgɛ kesande ka ciko á mujabíbu.› 29 Áonsikisia abakɛ te: ‹Kéokonda.› Mbusa, áoketia kanisia akɛ, áoga. 30 Abaɓɔ â goto tɔ ongonɗea mmbɔ ɓa ko ɓaɓɛ nyɔngɔ ndɔɔ. Mmbɔ áosikisia te: ‹Eya abɛ, negande.› Mbusa í, kagɛ gǎkɛ. 31 Cɔ, sɔsɔɓɛ á ɓaniki ndɔ ɓaɓɛ, ani mmbé ɗátɔtɔkisi mɔphɛ á abakɛ?» Ɓáonsikisia te: «Mmbɔ ɓa mosá.» Mpɔ Yéso áǒsikisia te: «Nenóngoɗi ɗoni gea, ɓaphendisigi-manjanja na ɓake á mambɔ, ɓángiande ka koɓoamɛ ndea Mokonga mosá anu. 32 Nga, Yoáni-Mɓatisi ɗábiki mɔtɛ-anu ka phangia anu aphe ánjá, ɓókomɓeekeɛ. Ɓaphendisigi-manjanja na ɓato á mambɔ ɓáunge ɗáɓámɓeeki ndiu. Nanga ɓî ɗɔ́ɓɔɔni ndɔ, ɗóɓókókěti gǎkɛ tambea anu ka ɓeekea akɛ.» Mɛní á ɓagubi ɓájeɗe (Ɔna phɔtɔ Mkɔ 12.1-12 ; Lók 20.9-19 ) 33 Yéso â goto ǒngoɗea ɓakpa ndɔ te: «Ɔ́kani phɔ́ goto mɛní nɛngbo: Áǒgea: Nkpa moci ɗákoni ciko á mujabíbu, áogáa ú. Áotongea okanga ka kama á mbuka í na kɛndɛa iɓo í. Áɔphɛka ngbángbá ka mɓondigi ciko. Aǒbisa ɓabɛɗanigi, áɔmɛa tamba. 34 Ɓî matú á ɗungu akpeengeani ye, áǒteka ɓabɛɗanigi nɛkɛ ka ɓabɛɗanigi ka ciko gea, ɓántekisiɛ keɓu ínɛkɛ. 35 Ka júa aɓɔ kó, ɓabɛɗanigi ka ciko ɓáǒdunga ɓabɛɗanigi ndɔ, ɓáɔmɓɛta ɓa k'ama mosá-mosá, ɓáommowa ɓa ko ɓaɓɛ, ɓáɔmɓɛta ɓa ko ɓasaɔ n'ɛtɛ, áokuwa. 36 Cɔ, mɛna-ciko ndɔ áǒteka ɓabɛɗanigi ɓuangbo ɓásii kɔ̌nyɛ́nya ɓundɔ á mosá. Ɓagubi ndɔ, ɓâ gǎkɛ tɔ ǒgeea ɓabɛɗanigi ndɔ ɓíndɔ ɗáɓěgǐí ɓundɔ á mosá. 37 Ka sungiaga, mɛna-ciko áonteka miki-mǒko nɛkɛ, áǒgea sisakɛ te: ‹Ɓámɔ́kande mukuamɔ.› 38 Ɓî ɓagubi ndɔ ɓámɔni ye gǎkɛ miki-mǒko ndɔ, ɓáɔyɔngaga sɔsɔɓɛ aɓɔ te: ‹Mɛnɛ á ɓotukɔ aámbɔ. Ɓégeni ɓémmowɛni, ɓéombeɛ ɓotukɔ ndee!› 39 Ɓáondunga miki ndɔ, ɓáonga ně na tá-ciko, ɓáommowa. 40 Cɔ, esa nde mɛna-ciko abikaeka, aegeaeka ɓagubi ndɔ ɓo?» 41 Ɓáonsikisia te: «Aemande ɓakpa ɓájeɗe ndɔ kángá á ngomi. Mbusa, áɔɔ́kana goto na ɓagubi ɓuangbo ɓunde ɓáɓande omopha keɓu á ɗungu nɛkɛ ka mbenɔ nde akondi.» 42 Mpɔ Yéso áǒgea te: «Ɓókótangimbɛ mɔnɔ suɓi á Ɓuku á Mokonga? ‹Ɛtɛ nde ɓaphɛki ɗáɓámaki, aunge a ye tɔ na kantíti. Nndɔ atóki mɔtɛ á Mɔkɔta, n'ande ketangaɔ ka ɓesu!› 43 Kaɓondɔ unge nenógie: Ɓánoútande koɓoamɛ ndea Mokonga na opha á ɓunde ɓágɔmbisande mbuka nde akenani. [ 44 Mmbé aogua gǔ á ɛtɛ aɓúnukagande, mmbé ɛtɛ a gǎkɛ onguia, angogande.]» 45 Ɓî ɓakɔta á ɓagbɛga á ɓatoɓeigi-phɛ́a na Ɓaphaisáyɔ ɗáɓáɔ́ki mɛní ndea Yéso, ɓáoengekisa gea aǒmakisiaga ɓɔ. 46 Kaɓondɔ, ɓáokaɓa aphe á dunga akɛ, ɓâ gǎkɛ oɓánga usɛsɛ á ɓakpa ɓundɔ ɗáɓámɓeeki gea, ande mɔtu-nyɔngɔ ndea Mokonga. |
© 2021, Wycliffe Bible Translators, Inc.
Wycliffe Bible Translators, Inc.