Matáyɔ 19 - Ɔngana á Kɛ̌kɛ

Ɓɔphɛi ndea Yéso gǔ á keye

¹ Ɓî Yéso agɔɓi ye ɓɔphɛi ndɔ, áɔmɛa ka Galiláya, áoga na Yudɛ́a, kubi a Yɔɔdáni.

² Usɛsɛ ángbó á ɓakpa ɓáomɓea, â kǒamisa ɓasambi kó.

³ Ɓaphaisáyɔ ɓuangbo ɓáombikia ka tombaga akɛ, ɓáomúsia gea: «Ɛɔphi nɛsu asosi gea, mǒko án'yɛ tɔ nkakɛ ka nyɔngɔ bui?»

⁴ Yéso áǒsikisia: «Ɓókótangimbɛ nyɔngɔ nde suɓi á Ɓuku á Mokonga: ‹Ka nkpangeɔ, Ababisa ɗáncɔnji mǒko na nke,

⁵ mpɔ, Mokonga áogea: Ka nyɔngɔ índɔ unge, mǒko anɗeketande abakɛ n'amakɛ, ɓáojúkana na nkakɛ, ɓɔbu ɓaɓɛ ɓáɓande nkpa mo.›

⁶ Kaɓondɔ, ɓáká ye ɓakpa ɓaɓɛ, ɓá ndiu nkpa mo. Cɔ, nkpa kakatanisɛmbɛ kema nde Mokonga ajúki.»

⁷ Ɓaphaisáyɔ ɓâ goto omúsia: «Cɔ, ka nyɔngɔ sina nde Mósa ɗásosi gǎkɛ gea, akeni mǒko ámophɛ nkakɛ ɓaoɓa á keyé mbenɔ á ya akɛ?»

⁸ Yéso áǒsikisia: «Mósa ɗánososi yá á ɓake ɓanu ka nyɔngɔ á gbaga á měma anu. Ɗákákpangi gǎkɛ ɓó.

⁹ Nenóngoɗi gea, aoɓá nkpa n'an'yé nkakɛ na nna tɔ ka nyɔngɔ á gua n'etoa, áomɓoa nke ɓaangbo, nkpa ndɔ, a ye tɔ nto á otungɔ.»

¹⁰ Mpɔ ɓagoigi nɛkɛ ɓáongea te: «Nyɔngɔ á nke na mǒko a ye oɓá ɓondɔ, kákeni ye pɛ mǒko ndɔ ámukɛ nke.»

¹¹ Yéso áǒsikisia te: «Nna ɓakpa ɓɔbu ɓáunge ɓáɔtɔka na ɓáɓeeki nyɔngɔ ndee, tɔndɔ ɓundɔ Mokonga aeɓophi gǎkɛ ɓukpɛkpɛ á ɓeekea í.

¹² Ana nyɔngɔ ɗanga-ɗanga nde aǒimisia ɓǒko uká á ɓake. Nga, ɓuangbo ɓáɓɔkɔtɛani kángá á ɓukpɛkpɛ á uká á nke, ɓǒko ɓuangbo ɓáunge ɓétǒngu, ɓuangbo ɓákáǒɓuka ɓake ka nyɔngɔ á bɛɗaneaga á Mokonga ka koɓoamɛ á na koba. Nkpa nde aɔtɔka ɓeekea á ɓukpɛkpɛ á ɓɔphɛi nde, áɓeekeɛ ú.»

Yéso abisi njaga gǔ á ɓaniki

¹³ Ɓakpa ɓáǒbika na ɓaniki ka gea Yéso áebisiɛ njaga na mɛma ka phɔaɓɔ, ɓagoigi ɓâ gǎkɛ ǒphekeaga ɓakpa ndɔɔ.

¹⁴ Yéso â gǎkɛ ogea: «Óɗoani ɓaniki ɓásɛkɛɗɛ bíbí ani, ɓókǒimisiɛmbɛ nga, koɓoamɛ ndea na koba a ka ɓunde ɓá ɓea ɓaniki.»

¹⁵ Mpɔ, áobisa njaga gǔ aɓɔ, áotóka wa.

Ntɔi moci

¹⁶ Nkpa moci áombikia Yéso, áomúsia: «Ngoisigi, kema ánjá sina nde négeɛ ka gea, néɓɛ na enda á mɛyɔ?»

¹⁷ Yéso áonsikisia ɓe: «Ka nyɔngɔ éke nde oomúsia ka phɔa á kema ánjá? Nto anjánjá a tɔ mo. Aoɓá n'okondi ngia ka enda á mɛyɔ, cɔ, ámbá ɛɔphi.»

¹⁸ Nkpa ndɔ â goto oúsia: «Ɛɔphi sina?» Yéso áonsikisia: «Kómmowɛ mɔnɔ nkpa, kótunganɛ mɔnɔ, kóúɓɛ mɔnɔ, kóɗigimisɛ mɔnɔ nyɔngɔ á mbɛa ka nkpa,

¹⁹ nɗokomisa abakɔ n'amakɔ, nkonda dakɔ ɓíndɔ ǒkondi oɓɛ sasakɔ.»

²⁰ Moganda ndɔ áongoɗea: «Ɗékpangi ámbá ɛɔphi ndɔ bui. Cɔ, kema sina nde amojiganei goto?»

²¹ Yéso áongea te: «Aoɓá n'okondi ɓá nto anjánjá phɛɛ, gǎ ósombisɛ nkumba nɛkɔ bubui, óɓophɛ ɓato á ɓuyɛnɛ imɔna í, na oɓande n'ɛtɔi na koba. Mpɔ, bika ómoɓeɛ.»

²² Nkpa ndɔ aɔ́ki ye nyɔngɔ ndɔ, áoga n'aɓɛí, ka nyɔngɔ nde ɗátú ntɔi phɛɛ.

²³ Mpɔ Yéso áǒngoɗea ɓagoigi nɛkɛ: «Amɔ̂ tɔ akpɛ ka ɓatɔi ngia ka koɓoamɛ ndea Mokonga.

²⁴ Nenóngoɗi goto gea, aáphǒ ka ngamia ngia suɓi á kubu á mǔphe, a ndiu gǎkɛ akpɛ phɛɛ ka ntɔi ngia ka koɓoamɛ ndea Mokonga.»

²⁵ Ɓî ɓagoigi ɓáɔ́ki ye ɓó, ɓáoyayama phɛɛ, ɓáɔyɔngaga gea: «Ani mmbé aɔtɔka n'aami ka měma?»

²⁶ Yéso áǒenga jaa! Áǒgea: «Kema bui nde nkpa nna ɔtɔtɔkisa, Mokonga aámbé aɔtɔtɔkisa.»

²⁷ Mpɔ, Pɛ́tɛɛ áongoɗea Yéso: «Ɔ́na phɔ́, ɓesu ɓeɗeketi kema bui ka nyɔngɔ á ɓeá akɔ. Cɔ, ɓɛtɔande kema sina?»

²⁸ Yéso áǒngoɗea: «Nenóngoɗi ɗoni gea, mbenɔ nde Muna-Nkpa aikande ka kankaanga á ɓoombia ka mokonda nde abikande, ɓenu íɓunde ɗóɓomoɓǐ, ɓoikande phɔtɔ ka kankaanga nkama na iɓɛ (12) ka tena á nyɔngɔ á ekuna nkama na iɓɛ (12) ndea Isilaɛ́li.

²⁹ Na nkpa buakɛ mmbé ɗáɗeketi endu nɛɓɔ, ɓana-amakɛ, ɓ'áwákɛ, abakɛ, amakɛ, ɓaniki nɛkɛ, na ciko nɛkɛ ka nyɔngɔ ani, ɓátɔande ú kɔnyɛ́nya mɔngɔ mia moci (100), na tɔá phɔtɔ enda á mɛyɔ.

³⁰ Cɔ, ɓakpa ɓásii nde ɓá gǎkɛ kɛ̌kɛnde ɓato á k'ama mosá-mosá ɓáɓande ɓato á mbusa, na ɓato á mbusa, ɓáɓande ɓato á k'ama mosá-mosá.»