Matáyɔ 18 - Ɔngana á Kɛ̌kɛ

Ani mmbé aɛ́nyɛ́nyi ɓadakɛ ka koɓoamɛ ndea na koba?

¹ Ka mbenɔ ndɔ, ɓagoigi ndea Yéso ɓáobika omúsia gea te: «Ani mmbé aɛ́nyɛ́ni ɓadakɛ ka koɓoamɛ á na koba?»

² Yéso áɔmɔphana miki abɔbɔa, áommamisa ka ɔlɔ aɓɔ,

³ na yɔnga te: «Nenóngoɗi ɗoni gea, aoɓá n'oɓókókěti tambea anu ájeɗe, ɓôɓá ɓea ɓaniki ɓábɔbɔa, ɓókóngiɛku ka koɓoamɛ á na koba.

⁴ Nkpa buakɛ mmbé ědidisande na ɓá ɓea miki abɔbɔa nde, aámbé aɛ́nyɛ́nyande ɓadakɛ ka koɓoamɛ á na koba.

⁵ Nkpa buakɛ mmbé aonsesea miki abɔbɔa ɓea mmbé k'ína ani, amosesi eme.

Kóngusɛmbɛ dakɔ ka ɓojeɗe

⁶ Nkpa nde a gǎkɛ ongusa ka ɓaniki nde ɓámoɓeeki suɓi á ɓojeɗe, atókeni ɓámɓɔɛɛ n'ɛtɛ ángbó ka kingo na makea akɛ ka oɓenge.

⁷ Ngomi ee! Ka ɓato á ka mokonda, ka nyɔngɔ á ephiphi ɗanga-ɗanga nde aǒgusa ka ɓojeɗe. Ephiphi ájeɗe káukɛku kiɗiana, a ndiu ngomi ka nkpa nde aɔmɓɛtɛkisa na dakɛ.

⁸ Akoɓá njaga n'ecinji akɔ n'aokongisa ka ɓojeɗe, tena ú ce! Ómakɛ ɗanga n'oɓɛ. Akeni k'óɓɛ ngia ka enda á ɗoni n'ona njaga moci na ecinji moci, kángá á ngia ka nsa á mɛyɔ n'ona njaga iɓɛ na ecinji iɓɛ.

⁹ Aoɓá iso akɔ moci n'aokongisa ka ɓojeɗe, phongota ú, ómakɛ ɗanga n'oɓɛ. Akeni k'óɓɛ óngiɛ ka enda á ɗoni n'ona iso moci, kángá á ɓá na iso iɓɛ, na maka akɔ ka ɛɛmbɛ á nsa nde nnaoímika.

Mɛní á mɔgɔgɔ n'aɓúngigi

¹⁰ Cɔ, ɛ́ngɛphani! Ɓókomɓɛnjiɛgɛmbɛ ka ɓaniki ábɔbɔa ndɔɔ, ka nyɔngɔ nde, nenóngoɗi ɗoni gea, ɓamalaéka nɛɓɔ ɓá tɔ esa bui mosá á Abɛ na koba. [

¹¹ Ka nyɔngɔ nde Muna-Nkpa ɗábiki kǒamisa ka měma ɓunde ɗáɓáɓúngigi.]

¹² Ɓookanisia ɓo? Aoɓá nkpa n'ana ɓamɔgɔgɔ mia moci (100), ka ɓɔ moci n'aɓúngigi, káeɗeketɛku ɓundɔ ɓuangbo nkama ngianjaga gena na ngianjaga gena (99) gǔ á mamba, áoga onkaɓa mmbɔ atóɓúngigi?

¹³ Nenóngoɗi ɗoni gea, akoɓá n'amɔni, aɓande na maseye ka phɔa á mɔgɔgɔ ndɔ, kɔnyɛ́nya ɓundɔ nkama ngianjaga gena na ngianjaga gena (99) ɓundɔ ɓákátóɓúngigi.

¹⁴ A gǎkɛ tɔ ɓó ka Abanu mmbɔ á na koba, nnaokonda ka ɓaniki ndɔ moci áɓungɛgɛ.

Ɓɔphɛi ka phɔa á mɓêki nde agi ɓojeɗe

¹⁵ Aoɓá dakɔ n'akogǐí ɓojeɗe, gǎ ómphangiɛ ɓojeɗe nɛkɛ na ɓo tɔ na yɛ ɓaɓɛ. Aoɓá n'akɔɔ́ki, ámbé onjisi goto k'ékita.

¹⁶ Cɔ, a gǎkɛ oɓá na kákɔɔ́ki, mbɛɗa nkpa moci, kaɓɛ ɓakpa ɓaɓɛ, ɓíndɔ Ɓuku á Mokonga ayɔngi gea: ‹Ambe nyɔngɔ bui ɓátenɛ ú k'ɛ́sɔ á ɓaɗigimisi ɓaɓɛ, kaɓɛ ɓasaɔ.›

¹⁷ Aoɓá gǎkɛ na káɛɓɔ́ki, tɔ̌mia nyɔngɔ nɛkɛ ka kanisa. Aoɓá n'ayé phɔtɔ ɔ́ka á kanisa, ntángá ɓea mphendisigi-manjanja, na nkpa nde nna mɓêki.

¹⁸ Nenóngoɗi ɗoni gea, kema bui nde ɓooyá ka mokonda, ɓayánde na koba, na kema bui nde ɓooɓeekea ka mokonda, ɓáɓeekeande ú na koba.

¹⁹ Nenóngoɗi goto ɗoni gea, aoɓá ɓakpa ɓaɓɛ sɔsɔɓɛ anu ka mokonda nde na ɓáɔ́kani ka mɛma á Mokonga nanga kema sina, Abɛ mmbɔ á na koba aeɓophande kema nde ɓámɛmi.

²⁰ Nga, ɔma nde ɓakpa ɓaɓɛ, kaɓɛ ɓasaɔ ɓáodondana k'ína ani, eme ne ka ɔlɔ aɓɔ.»

Mɛní á mbɛɗanigi nde nnaokonda íma á ɓojeɗe

²¹ Cɔ, Pɛ́tɛɛ áoga bíbí á Yéso, áomúsia: «Mɔkɔta, neímande ɓojeɗe nde muna-ayi aomogeea mɔngɔ ángaáni?» Áɓɛ tɔ mɔngɔ ngianjaga iɓɛ (7)?

²² Yéso áonsikisia: «Ɓɛɛndɔ, nna tɔ mɔngɔ ngianjaga iɓɛ (7). A ndiu mɔngɔ nkama ngianjaga iɓɛ (70) mɔngɔ ngianjaga iɓɛ (7).

²³ Cɔ, ka nyɔngɔ índɔ unge koɓoamɛ ndea na koba akengeani na mɛní ndee: Moamɛ moci ɗákondi áúbɛ nyɔngɔ á imɔna nɛkɛ nnde ɗáɛɛkisi ɓabɛɗanigi nɛkɛ.

²⁴ Ɓî ɗákpangi tanga í, ɓáombikia na mbɛɗanigi moci mmbé ɗátú na nyɔngɔ óphendɔ á imɔna ásii phɛɛ.

²⁵ Mbɛɗanigi ndɔ ɗákátú gǎkɛ na ka kema ka phenda á imɔna ndɔɔ. Kaɓondɔ, moamɛ áososea gea, ɓánsombisɛ yɛ ɓea nkɔɓɛ, ɓánsombisɛ phɔtɔ nkakɛ, ɓ'anakɛ na nkumba nɛkɛ bui nde ɗátú ně, ka phenda á nyɔngɔ nɛkɛ.

²⁶ Mbɛɗanigi ndɔ, áogbuka muanku akɛ mosá á moamɛ ndɔɔ, áonɗengemisaga ɓe: ‹Ómophiphia phɔ́ ka měma, nekophendande imɔna nɛkɔ bui.›

²⁷ Moamɛ ndɔ, áonkuia mbɛɗanigi nɛkɛ ngomi phɛɛ, Aoíma nyɔngɔ á ophendɔ na ɗeketa á mbɛɗanigi ndɔ ágɛ.

²⁸ Ka toka á mbɛɗanigi ndɔ wa, áodondana na ka ɓadakɛ ɓabɛɗanigi, mmbé ɗátú na nyɔngɔ á ophendɔ nɛkɛ á imɔna mia moci (100). Aondunga, áonkpáta ka kingo, áongea: ‹Phenda imɔna nɛmɔ!›

²⁹ Dakɛ mbɛɗanigi áogbuka muanku mosá akɛ, áonɗengemisaga gea: ‹Ómophiphia phɔ́ ka měma, nekophendande!›

³⁰ Mokô á imɔna kakondɛ, Áongisisa ka mekakɔ na ka ɓî amphendaeka imɔna ndɔɔ.

³¹ Ɓî ɓabɛɗanigi ɓunɛngbo ɗáɓáɔni kema ndɔ, ɓáɔɓɛa phɛɛ, ɓáoga ɔntɔmiaga mɔkɔta nɛɓɔ kema bui nde ɗágeani.

³² Mpɔ mɔkɔta áɔmɔphana mbɛɗanigi ndɔ, áongea: ‹Mbɛɗanigi ajeɗe nde ca! Netóími nyɔngɔ á ophendɔ nɛkɔ bui, ka nyɔngɔ nde otómoɗengemisigi.

³³ Atókeni phɔtɔ oɓɛ ónkuiɛ dakɔ ngomi, ɓíndɔ eme netóokui ngomi.›

³⁴ Mɔkɔta nɛkɛ áɔɓɛa phɛɛ, áombisisa mbɛɗanigi ndɔ ka njaga á ɓato á tambisaga, na ka ɓî aphendaeka imɔna nɛkɛ bui.»

³⁵ Yéso áotutuisa yɔnga ɓe: «Abɛ mmbɔ á na koba ageaeka tɔ ɓó, ka nkpa nde nnaokonda íma á ɓojeɗe ndea dakɛ ka měma akɛ bui.»