Matáyɔ 17 - Ɔngana á Kɛ̌kɛ

Keongi á Yéso ěkěti

¹ Mbusa á ɓ'esa ngianjaga (6), Yéso áɔ̌bɛɗa Pɛ́tɛɛ, Yakɔ́ɓɔ na muna-amakɛ Yoáni, áɔ̌sɔndɔɛa gǔ á mamba nde akoi, ɓáoɓá sasaɓɔ.

² Kó, keongi á Yéso áǒketia mosá aɓɔ, áɔbɛnya ɓea maní. Ngɔ́mbɛ nɛkɛ áobusumana ɓea owanga.

³ Mpɔ, Mósa na Elía ɓáɔ̌sɛnɛkɛa, ɓáɔyɔngaga na Yéso.

⁴ Pɛ́tɛɛ áongoɗea Yéso te: «Mɔkɔta, aánjá ka ɓesu ika wani. Aoɓá n'okondi, nɛphɛkande ɛma isaɔ wani: Moci k'oɓɛ, moci ka Mósa na moci ka Elía.»

⁵ N'a phɔ́tɔ ɔyɔnga, iimbiɔ á egugu nde ana owanga áǒgbukumia. Ɛsɔ áɔɔ́kɛkana k'egugu ndɔ ɓe: «Mmbé ande Miki nɛmɔ á ekondi, nena maseye ka yɛ phɛɛ. Mɔ́kani yɛ.»

⁶ Ɓî ɓagoigi ɓáɔ́ki ɛsɔ ndɔ, ɓáoɓá na kɔɓɔɓɔkɔ phɛɛ, ɓáoguwa ka oɗo na ɓákpúngbúmanigi.

⁷ Yéso â gǎkɛ ǒbîmisia, áǒdunga, áǒsosea: «Máni, ɓókoɓángɛ mɔnɔ.»

⁸ Mpɔ ɓáotáisa iso aɓɔ, ɓákámɔnɛ ye nkpa ɓaangbo, tɔndɔ Yéso sasakɛ.

⁹ Ka dida aɓɔ mamba, Yéso áǒsosea te: «Ɓókontɔ̌miɛ mɔnɔ nkpa nyɔngɔ á mphaniɔ nde, na ka ɓî Muna-Nkpa ajujukande ka kukuwa.»

¹⁰ Mpɔ ɓagoigi ɓáomúsia Yéso: «Ka nyɔngɔ sina nde ɓaɗundu-ɛɔphi ɓámáɔyɔnga te, akeni phɔ́ Elía ábikɛ?»

¹¹ Yéso áǒsikisia: «Eya, Elía akeni na bika ka gea, áɓɔngisiɛ nyɔngɔ bui.

¹² Cɔ, nenóngoɗi gǎkɛ te: Elía a ye biki, ɓakpa ɗáɓákánengekisi, ɓâ ndiu ongea na kema bui nde ɗáɓákondi. Ɓondɔ tɔ unge ɓɔ, ɓántambisagande Muna-Nkpa.»

¹³ Mpɔ, ɓagoigi ɓáoengekisa gea, ɗáǒngoɗea nyɔngɔ ka phɔa á Yoáni-Mɓatisi.

Yéso anamisi miki moci na an'egǎ

¹⁴ Mbenɔ nde Yéso na ɓagoigi nɛkɛ ɓákiɗi ɔma nde usɛsɛ á ɓakpa ɓáɓei, nkpa moci áombikia Yéso, áongbukia muanku,

¹⁵ áongoɗea: «Mɔkɔta, nkuia miki nɛmɔ ngomi. Yɛ, aotambaga phɛɛ na kukuwa á egǎ. Mbenɔ nde aontena, mɔngɔ ásii áommaka ka nsa, nɛngbo ka iɓo.

¹⁶ Nembikima ně ka ɓagoigi nɛkɔ, ɓákátɔkima gǎkɛ amisa akɛ.»

¹⁷ Yéso áonsikisia gea: «Ɓenu ɛɓɔkɔti ájeɗe á kanga ɓeekea á Mokonga nde ca! Neikande na ɓenu ka mbenɔ ángaáni? Mbenɔ ángaáni nde nenóphiphiande? Cɔ, mbikani kani na miki ndɔ koni.»

¹⁸ Yéso áonkeea nsombo ndɔ, áonjuana miki ndɔ, ka mbenɔ ndɔ tɔ, miki áoama.

¹⁹ Mbusa, ɓagoigi ɓáɔsɛkɛɗa bíbí á Yéso, ɓáomúsia ka mpɛphɛ gea: «Ka nyɔngɔ sina nde ɓékétɔki phúia á nsombo ndɔ?»

²⁰ Yéso áǒsikisia gea: «Ka nyɔngɔ nde ɓeekea anu aábɔa phɛɛ. Nenóngoɗi ɗoni gea, atúoɓá na ɓo tɔ na ɓeekea ábɔa ɓea mbuka á aladáli, ɓotóngoɗeande mamba ndee: ‹Tówa wani, ógɛ kó!› Atógande, ka kema kátóúkɛku tɔtɔkɛana ka njaga anu. [

²¹ Ka phumba á nkoko á nsombo nde, akeni tɔ na ɛmɛmi na ika kángá á eaga ka nyɔngɔ mɛma á Mokonga.]»

Yéso a goto ɔtɔmia nyɔngɔ á kukuwa na jujúka akɛ

²² Esa moci, Yéso na ɓagoigi ɓɔbu ɗáɓádondani kimoci na Galiláya, Yéso áǒgea: «Ɓámbisande Muna-Nkpa, ka njaga á ɓakpa.

²³ Ɓɔ, ɓánkusisande. K'ésa á ko isaɔ, ajujukande ka kukuwa.» Ɓagoigi ɓáɔɓɛa phɛɛ.

Pɛ́tɛɛ na Yéso ɓáphendi manjanja á endu ndea Mokonga

²⁴ Mbenɔ nde Yéso na ɓagoigi nɛkɛ ɓákiɗi ka Kapɛɛnaúmu, ɓaphendisigi-manjanja á endu ndea Mokonga, ɓáɔnsɛkɛɗɛa Pɛ́tɛɛ, ɓáomúsia: «Ngoisigi nɛnu nnaophenda manjanja á endu ndea Mokonga ee?»

²⁵ Pɛ́tɛɛ áonsikisia: «Eya, aophendaga.» Ɓî Pɛ́tɛɛ angí k'éndu, Yéso â phɔ́ okpanga ngoɗea akɛ: «Simɔ́ni, okanisi ɓo? Ɓ'ani ɓunde ɓaamɛ á ka mokonda nde ɓáǒphendisa manjanja: Ɓaniki á nji? Ɓakɛni?»

²⁶ Pɛ́tɛɛ áonsikisia gea: «Ɓakɛni.» Yéso áongoɗea: «Ande gea ɓaniki á nji ɓánáophenda ka kema.

²⁷ Cɔ, ɓékéokonda ɓɛisa á ɓakpa ndee. Kaɓondɔ, gǎ k'étǔ, ómakeɛ kɔ̌ɓɔ, sú nde ɔɔmɔpha k'ama mosá-mosá, kóɗa aphenɔkɔ akɛ. Kó, odondande imɔna moci, bɛɗa ú, óɓophɛ ka phenda á manjanja ínɛmɔ na ndeakɔ.»