Matáyɔ 16 - Ɔngana á Kɛ̌kɛ

Ɓaphaisáyɔ na Ɓasadukáyɔ ɓáɔmɛma ketangaɔ ka Yéso

¹ Ɓaphaisáyɔ na Ɓasadukáyɔ ɗáɓámbîmisi Yéso, ka tombaga akɛ. Ɓáɔmɛma gea, áephangiɛ mphangiɔ á ketangaɔ ka ubisa aɓɔ ɗoni gea, Mokonga aámbé anteki.

² Yéso â gǎkɛ ǒsikisia te: «Ɔgɔgɔ, ɓoogea mama, esa akoɗokanande ánjá nga, koba atani.

³ Kamɓimba, ɓoogea: ‹Kesande mbua aɔkande nga, koba anjɛnjɛmani na akpangi índa.› Cɔ, ɓooúba engekisa etéte á koba, ɓókó gǎkɛ oúba engekisa mphangiɔ á matú!

⁴ Ɓato á ɛɓɔkɔti nde ɓánde ɓato á ɓojeɗe, ɓato á kanga ɓeekea á Mokonga! Ɓɔ, ɓáɔmɛma ɔna á mphangiɔ á ketangaɔ. Cɔ, ɓákáɔnɛku gǎkɛ mphangiɔ nɛngbo na nna tɔndɔ nndɔ á Yɔ́na.» Mpɔ Yéso áǒɗeketa, áoga nɛkɛ.

Cacu ndea Ɓaphaisáyɔ na Ɓasadukáyɔ

⁵ Mbenɔ nde ɓagoigi ɗáɓájabi kubi á etǔ, ɗáɓáɓosei bɛɗa á mokati.

⁶ Yéso áǒngoɗea te: «Óengani na cacu ndea Ɓaphaisáyɔ na Ɓasadukáyɔ.»

⁷ Ɓagoigi ɓáɔyɔngaga ngǔngu aɓɔ gea: «Ayɔngi ɓo, ka nyɔngɔ nde ɓékébɛɗi mokati ee?»

⁸ Yéso áoúba kanisia aɓɔ, áǒgea: «Eke nde ɓooianaga sɔsɔɓɛ anu gea: Ayɔngi ɓo, ka nyɔngɔ nde ɓéké na mokati ee? Ɓenu ɓato á ɓeekea ábɔa nde ca!

⁹ Ɓókóengekisimbɛ mɔnɔ? Ɓókóokanisia mokati ɓɔku ndɔ ɓakpa ɛlɛphu ɓɔku (5.000) ɗáɓáí na mɔɔmba á jɔ nde ɗóɓotúmisi na due í?

¹⁰ Ɓókó phɔtɔ okanisia mokati ngianjaga iɓɛ (7) ndɔ ɓǒko ɛlɛphu gena (4.000) ɗáɓáí, na mɔɔmba á jɔ nde ɗóɓotúmisi na due í?

¹¹ Eke nde ɓókóengekisa gea, ɗékétúɔyɔnga na ɓenu nyɔngɔ á mokati, mbenɔ ndɔ ɗénógi: Óengani na cacu ndea Ɓaphaisáyɔ na Ɓasadukáyɔ?»

¹² Mpɔ, ɓagoigi ɓáoengekisa gea, Yéso ɗákéngoɗi gea, ɓéɛnjiɛ na cacu nde ɓáɔɓɛɗanaga ně na mokati, a ndiu nyɔngɔ á ɓɔphɛi ndea Ɓaphaisáyɔ na Ɓasadukáyɔ.

Pɛ́tɛɛ ayɔngi base gea, Yéso ande Kiísito

¹³ Cɔ, Yéso áoga ka ntanga-nji á Kaisaíya-Philípi. Kó, áǒɓúsia ɓagoigi nɛkɛ te: «Ɓakpa ɓáɔyɔnga gea, Muna-Nkpa ande ani?»

¹⁴ Ɓáonsikisia gea: «Ɓakpa ɓuangbo ɓáɔyɔnga gea, onde Yoáni-Mɓatisi, ɓuangbo, onde Elía, ɓuangbo, Yɛɛmía, ɓuangbo, onde ka ɓaɔtu-nyɔngɔ ndea Mokonga.»

¹⁵ Mpɔ, Yéso áǒɓúsia: «Cɔ, ɓenu gǎkɛ, ɓogi te nende ani?»

¹⁶ Simɔ́ni-Pɛ́tɛɛ áonsikisia: «Oɓɛ, onde Kiísito, Muna-Mokonga mmbé aoenda.»

¹⁷ Yéso áongoɗea: «Maseye k'oɓɛ Simɔ́ Muna-Yɔ́na ka nyɔngɔ nde, nna nkpa aámbé akophangi nyɔngɔ nde base, a ndiu tɔ Abɛ mmbé á na koba.

¹⁸ Eme neongoɗi gǎkɛ ɓe: Onde Pɛ́tɛɛ, na gǔ á ɛtɛ ndee, aunge nɛphɛkande kanisa nɛmɔ, ɓukpɛkpɛ á kukuwa kágeɛku ú na ka kema.

¹⁹ Nekophande phembekete á koɓoamɛ á na koba. Kema bui nde oyánde ka mokonda, ɓáyánde ú na koba. Kema bui nde ooɓeekea ka mokonda, ɓáɓeekeande phɔtɔ ú na koba.»

²⁰ Mpɔ áǒimisia ɓagoigi nɛkɛ akpɛ gea, ɓákangoɗeɛmbɛ mɔnɔ nkpa gea te, ande Kiísito.

Yéso aúbisi nyɔngɔ á kukuwa na jujúka akɛ

²¹ Ka mbenɔ ndɔ, Yéso áokpanga úbisa á ɓagoigi nɛkɛ base gea: «Akeni négɛ na Yɛusalɛ́ma na tambaga ka njaga á ɓagbɛga, ɓagbɛga á ɓatoɓeigi-phɛ́a na ɓaɗundu-ɛɔphi. Ɓámokusisande, esa á ko isaɔ, nejujukande ka kukuwa.»

²² Mpɔ, Pɛ́tɛɛ áonga na Yéso ka mpɛphɛ, áokpanga phekeaga akɛ te: «Mɔkɔta, ambe Mokonga ákoambɛ, nyɔngɔ ndɔ katɔtɔkɛanɛmbɛ k'oɓɛ!»

²³ Yéso áǒpháia ka Pɛ́tɛɛ, áongea: «Já nɛkɔ mbusa ani, Sɛtáni nde ca! Onde ephiphi ájeɗe k'éme nga, kanisia akɔ nna ɓea Mokonga, a ndiu tɔ á kokpa.»

²⁴ Mpɔ Yéso áǒngoɗea ɓagoigi nɛkɛ: «Aoɓá nkpa n'akondi ɓeá ani, ěyɛ sisakɛ, ákumbɛ moyangɔ nɛkɛ, ámoɓeɛ.

²⁵ Ka nyɔngɔ nde, mmbé akondi amisa á enda akɛ, aɓúngisande. Mmbé a gǎkɛ oɓeekea ɓúngisa á enda akɛ ka nyɔngɔ ani, atɔande goto ú.

²⁶ Cɔ, ana kantíti sina aoɓá nkpa n'atɔi kema bubui á ka mokonda n'aɓúngisi ndiu enda akɛ, ɛtɔi ndɔ anengande k'éke? Ekende ɓɛɔtɔka na ɓemphendi na Mokonga ka anganisa na enda?

²⁷ Cɔ, Muna-Nkpa, abikande ka ɓophombia ndea Abɛ, kimoci na ɓamalaéka nɛkɛ. Mpɔ, amphendande nkpa na nkpa ka ɓeana na tambea akɛ.

²⁸ Nenóngoɗi ɗoni gea, ka ɓunde ɓá wani, ɓákákuwɛku mosá á ɔna á Muna-Nkpa, n'aobika ɓea Moamɛ.»