Matáyɔ 12 - Ɔngana á Kɛ̌kɛ

Yéso, Mɔkɔta á saɓáto

¹ Ka mbenɔ ndɔ, Yéso ɗáɔnyɛ́nya ka ciko á nganɔ esa á saɓáto. Nja áɔ̌bɛɗa ɓagoigi nɛkɛ, ɓáɔkɔɗaga mbuka, ɓáoea.

² Ɓî Ɓaphaisáyɔ ɓáɔni ɓó, ɓáongoɗea Yéso: «Ɔ́na, ɓagoigi nɛkɔ ɓági kema nde ɓáimisíí gea í k'ésa á saɓáto. Nga, ɓábɛɗi ekuma esa á saɓáto!»

³ Yéso áǒsikisia te: «Ɓókótangimbɛ mɔnɔ nyɔngɔ nde Daúdi na ɓakpa nɛkɛ ɗáɓági, ɓî ɗátú na nja?

⁴ Ɗáɓángi suɓi éndu ndea Mokonga, ɓáoea mokati nde ɗáɓábisi ka Mokonga, nanga mokati ndɔ, ɗákátú nɛɓɔ, tɔndɔ ka ɓatoɓeigi-phɛ́a sasaɓɔ.

⁵ Ɓókótangimbɛ goto suɓi á ɓuku ɛ́ɔphi ndea Mósa gea, esa á saɓáto, ɓatoɓeigi-phɛ́a ɓunde ɓáɔɓɛɗanaga suɓi éndu ndea Mokonga, ɓáotingiaga ɛɔphi á saɓáto, kángá nndɔ ɓá á ɓojeɗe ka ɓɔ.

⁶ Nenóngoɗi gǎkɛ gea, nkpa nde awani, aangbóngbó phɛɛ kɔnyɛ́nya endu ndea Mokonga.

⁷ Atúoɓá na ɓoúbi kantíti á nyɔngɔ nde Ɓuku á Mokonga ayɔngi: ‹Nekóndi tɔndɔ ɓáekuiɛ ɓakpa ngomi, na nna tɔndɔ toɓoa á phɛ́a.› Ɓókótóeyeyɛku ɓakpa nde ɓákátú na nyɔngɔ.

⁸ Nga, eme Muna-Nkpa, nende Mɔkɔta á saɓáto.»

Yéso anamisi nkpa nde njaga akɛ aphɛphi

⁹ Yéso atóki wa, áoga ongia k'éndu á madondanɔ ndea Ɓayúda ka nyɔngɔ á Mokonga.

¹⁰ Suɓi éndu á ɛmɛmi ndɔ, nkpa moci ɗátú wa, njaga akɛ n'aphɛphi. Mpɔ Ɓaphaisáyɔ ɓáokaɓa aphe á tɔnga á Yéso. Kaɓondɔ, ɓáomúsia te: «Ɛɔphi asósosi gea, ɓéamisɛ ɓasambi esa á saɓáto?»

¹¹ Mpɔ Yéso áǒsikisia: «Ka ɓenu sina mmbé atúoɓá n'ana mɔgɔgɔ nɛkɛ moci, n'agui k'étia esa á saɓáto, aúkande phúia akɛ suɓi í?

¹² Cɔ, nkpa ana kantíti kɔnyɛ́nya mɔgɔgɔ. Kaɓondɔ, ɛɔphi nɛsu asosi gea á kema ánjá esa á saɓáto.»

¹³ Mpɔ Yéso áongoɗea nkpa ndɔ gea: «Nanoa njaga akɔ!» Nkpa ndɔ áonanoa njaga akɛ, áoɓá ánjá ɓea njaga ímbɔ ɓaangbo.

¹⁴ Wandɔ, Ɓaphaisáyɔ ɓáojuana, ɓáoga odondana ka kaɓa aphe á kusisa á Yéso.

Yéso ande mbɛɗanigi nde Mokonga ɗánsɔmbu

¹⁵ Ɓî Yéso ɗáúbi ye gea ɓáogea ɓámmowɛ, áotóka wa. Ɓakpa ɓásii ɓáomɓea, áǒamisa ɓasambi ɓɔbu.

¹⁶ Â gǎkɛ ǒimisia akpɛ gea, ɓákaengoɗeɛmbɛ ɓakpa base gea, yɛ ande ani.

¹⁷ Ɗáyɔngi ɓó ka gea, nyɔngɔ nde Isáya mɔtu-nyɔngɔ ndea Mokonga ɗáyɔngi átɔtɔkɛanɛ:

¹⁸ «Mokonga ayɔngi: mɔnani mbɛɗanigi nɛmɔ, mmbé ɗɛ́nsɔmbu, néonkonda phɛɛ, nena maseye ka yɛ. Nebisande Měma ani ka yɛ, aɛ́tɔ̌miande ɓato á k'ékuna bui koɗomi nɛmɔ.

¹⁹ Kásanaeka na nkpa, kákogɛeka, nna gǎkɛ na nkpa nde aɔ́kaeka ɛsɔ akɛ k'aphe.

²⁰ Káɓúnɛku manganga nde ěgbuki, káimɛku ɔbɛa nde owanga í a phɔ́tɔ n'aojegia ábɔa. Ageaeka tɔ ɓó, na ka ɓî koɗoni amamagaeka.

²¹ Na ɓakpa ɓɔbu ɓunde ɓáná Ɓayúda, ɓánseɓeande.»

Cina á ɓukpɛkpɛ ndea Yéso

²² Cɔ, ɓáombikia Yéso na nkpa moci, mmbé ɓansombo ɗáɓámbisi keíme-íme na kauma. Yéso áonamisa nkpa ndɔ, áokpanga yɔnga na ɔnapha.

²³ Usɛsɛ á ɓakpa ɓɔbu ɓundɔ ɗáɓátú wa, ɓáoyayama, ɓáogea te: «Nna phɔ́ Mosuko á Daúdi aámbé?»

²⁴ Ɓî Ɓaphaisáyɔ ɓáɔ́ki gǎkɛ nyɔngɔ ndɔ, ɓáogea: «Mogaa nde aǒjuanisa ɓansombo ka kɔkɔta á Bɛljɛbúli, mɔkɔta á ɓansombo.»

²⁵ Yéso ɗáúbi kanisia ndea Ɓaphaisáyɔ, áǒgea: «Aoɓá ɓato á ka koɓoamɛ moci na ɓákatanigi ngǔngu aɓɔ, koɓoamɛ nɛɓɔ áoújukana. Aoɓá ɓakpa á ka ntanga-nji moci, kaɓɛ ekombo moci na ɓákatanigi ngǔngu aɓɔ, ntanga-nji ndɔ na ekombo ndɔ, káɓɛku ye ɓei.

²⁶ Cɔ, aoɓá Sɛtáni n'aomɓeaga Sɛtáni, a tɔ ǒmanisa sasakɛ, koɓoamɛ ndeakɛ amamande ɓo?

²⁷ Ɓenu ɓogi te, neǒphumba ɓansombo ka kɔkɔta á Bɛljɛbúli, cɔ, ani mmbé aeɓophi ɓakpa nɛnu kɔkɔta á phumba á ɓansombo? Nga, ɓakpa nɛnu sasaɓɔ ɓáunge ɓáogea, ɓogi ájeɗe.

²⁸ Eya, eme, ne gǎkɛ ǒphumba ɓansombo ka kɔkɔta á Měma á Mokonga. Nndɔ ande base gea, koɓoamɛ ndea Mokonga a ye tɔ sɔsɔɓɛ anu.

²⁹ Nna na nkpa nde aɔtɔka ngia k'éndu ndea nto á ɓukpɛkpɛ na uta akɛ nkumba nɛkɛ, aoɓá na kámɓóegembɛ phɔ́ nto á ɓukpɛkpɛ ndɔɔ! A ye omɓóaga, mpɔ áomuta nkumba nɛkɛ.

³⁰ Nkpa nde nna nkɛkɛɔ nɛmɔ, ande mɓiɓia nɛmɔ. Nkpa nde nnaomoenga ka dondanisaga á ɓakpa, ande mphanjigi ɓakpa.

³¹ Kaɓondɔ unge nenógie, Mokonga aímande ɓojeɗe nɛɓɔ bui na mbóma nde ɓakpa ɓáombóma Mokonga. Nkpa nde a gǎkɛ ombóma Měma á kanga ɓojeɗe, Mokonga káímɛku ɓojeɗe nɛkɛ.

³² Nkpa nde aɔyɔnga ájeɗe ka phɔa á Muna-Nkpa, Mokonga aímande ɓojeɗe nɛkɛ. Nkpa nde a gǎkɛ ɔyɔnga ájeɗe ka phɔa á Měma á kanga ɓojeɗe, Mokonga káímɛku ɓojeɗe nɛkɛ, nanga áɓá ka mokonda nde, nanga ka mokonda índɔ aobika.

Ɓáomúba me ka mbuka akɛ

³³ Me anjánjá, aámbé aɔgɔmbisa mbuka ánjá. Me ájeɗe, aɔgɔmbisa mbuka ájeɗe nga, ɓá tɔ omúba me ka mbuka akɛ.

³⁴ Cɔ, benu ɛɓɔkɔti á kaɓokosa nde ca! Ɓɔ́kɔ́ɔtɔka na ɓɔyɔngi nyɔngɔ nde aánjá nga, ɓo ɓakpa ɓájeɗe. Nga, nyɔngɔ nde atúmi ka měma á nkpa, aunge aɔyɔnga ú.

³⁵ Nkpa anjánjá aophúia kema ánjá nde a suɓi á měma ánjá. Nkpa ajeɗe a gǎkɛ ophúia kema ájeɗe nde asuɓi á měma ájeɗe.

³⁶ Nenóngoɗi base gea, esa á tena á nyɔngɔ, ɓáeúsiagande ɓakpa ka phɔa yɔnga á jǎi-jǎi nde ɗáɓáɔyɔngaga.

³⁷ Nga, ka yɔnga akɔ sasakɔ tɔ unge ɓákotangande nto á kanga ɓojeɗe, na ka yɔnga nɛkɔ tɔ unge ɓátenande nyɔngɔ nɛkɔ akpɛ.»

Mɛma á mphangiɔ á ketangaɔ

³⁸ Mpɔ ka ɓagoisigi-ɛɔphi na ka Ɓaphaisáyɔ ɓáongoɗea Yéso te: «Ngoisigi, ɓekondi phɔ́ ɓɛkɔɔnɛ n'ogi mphangiɔ á ketangaɔ.»

³⁹ Yéso áǒsikisia te: «Ɓato á k'ɛɓɔkɔti ájeɗe nde na ɓato á kanga ɓeekea á Mokonga nde, ɓáokaɓa mphangiɔ á ketangaɔ! Mphangiɔ nɛngbo kátɔtɔkɛanɛku ka ɓenu, na nna tɔ nndɔ á Yɔ́na mɔtu-nyɔngɔ ndea Mokonga.

⁴⁰ Cɔ, ɓea ɓíndɔ Yɔ́na ɗááɗe esa isaɔ keiphe n'esa suɓi á sɔphɔ á sú angbóngbó, a phɔtɔ ɓó unge Muna-Nkpa aáɗande esa isaɔ keiphe n'esa suɓi á oɗo.

⁴¹ Esa á tena á nyɔngɔ, ɓato á ka Nináwe ɓábikande ɔnɔtɔnga ɓenu ɓato á k'ɛɓɔkɔti nde ka nyɔngɔ nde ɓɔ, ɗáɓákěti tambea aɓɔ ájeɗe ka ɔ́ka á ɓɔphɛi ndea Yɔ́na. Cɔ, mmbé awani, anyɛ́nyi Yɔ́na.

⁴² Goto, k'ésa á tena nyɔngɔ ndɔ, nke-moamɛ á ka nji Sɛ́ba abikande na tɔnga á ɓato á k'ɛɓɔkɔti nde, ka nyɔngɔ nde yɛ, ɗátóki kekanga á ɗanga phɛɛ ka bika ɔ́ka nyɔngɔ á kɔɓɔɔngɛ ndea Sɔlɔmɔ́nɔ. Cɔ, mmbé awani, anyɛ́nyi Sɔlɔmɔ́nɔ!»

Ja á nsombo nde ɓátómphumbi

⁴³ «Mbenɔ nde nsombo aojuana suɓi á nkpa, áoga okaɓa ɔma á gǎ umbia ka nkanda, káɔnɛ.

⁴⁴ Mpɔ, áǒgea sasakɛ te: ‹Nesikianagande k'éndu nɛmɔ nnde ɗétóki kau.› A ye oja, áodonda endu ndɔ jǎi, na ɓáphuu, na ɓábɔngisi.

⁴⁵ Mpɔ, áoga ɔ̌bɛɗa ɓadakɛ ɓansombo ngianjaga iɓɛ (7) ɓunde ɓá ajeɗe phɛɛ kɔnyɛ́nya yɛ. Ɓáobika ongia ɓɔbu kimoci, ɓáoika wa. Nkpa ndɔ aɓande ajeɗe phɛɛ kɔnyɛ́nya mosá. Aɓande phɔtɔ ɓó ka ɓato á k'ɛɓɔkɔti ajeɗe á ka matú ndee.»

Amakɛ na Yéso na ɓana-amakɛ na Yéso

⁴⁶ Yéso n'a phɔ́tɔ ɔyɔnga na usɛsɛ á ɓakpa, amakɛ na ɓana-amakɛ ɓáokiɗia, ɓáomamaga ka nsɛngɛ, na kaɓa aphe ka yɔngaga na yɛ.

⁴⁷ Nkpa moci áongoɗea Yéso te: «Ɔ́na, amakɔ na ɓana-amakɔ ɓámamege na nsɛngɛ, ɓáokaɓa aphe á yɔngaga n'oɓɛ.»

⁴⁸ Yéso gǎkɛ, áonsikisia nkpa ndɔ te: «Ani mmbé ande ayi? Na ɓ'ani ɓunde ɓánde ɓana-ayi?»

⁴⁹ Áǒphangia ɓagoigi nɛkɛ njaga, áɔyɔnga gea: «Ayi na ɓ'ana-ayi ɓáungee.

⁵⁰ Nga, nkpa buakɛ mmbé aogea kema nde Abɛ mmbé á na koba akondi, yɛ aámbé ande muna-ayi, áwáni na ayi.»