Matáyɔ 10 - Ɔngana á Kɛ̌kɛ

Sɔmbɔa á ɓateki nkama na ɓaɓɛ (12) ndea Yéso

¹ Yéso áɔ̌ɓɔphana ɓagoigi nɛkɛ nkama na ɓaɓɛ (12), áǒɓopha ɓukpɛkpɛ á ɓeaga ɓansombo na amisa etéte á ngobo na kiɗɔti bui.

² Cɔ, ina á ɓateki ndɔ aunge: Simɔ́ni, mmbɔ ɗáɓánsǔ Pɛ́tɛɛ na muna-amakɛ Andeé, Yakɔ́ɓɔ na muna-amakɛ Yoáni ɓana Jɛbɛdáyɔ.

³ Philípɔ na Batɔlɔmáyɔ, Tɔmá na Matáyɔ mmbɔ mphendisigi-manjanja, Yakɔ́ɓɔ muna Alpháyɔ na Tadɛ́yɔ,

⁴ Simɔ́ni manei-nji na Yúda-Isikaliɔ́ta, mmbɔ ɗántɔngi Yéso.

Yéso aeteki ɓateki nɛkɛ

⁵ Yéso áǒteka ɓateki ndɔ nkama na ɓaɓɛ (12). Âkɔ̌ɔkusaga ɓe: «Ɓókóngiɛ mɔnɔ ka nji á ɓato á ɓojeɗe. Goto ɓókongiɛ mɔnɔ ka ntanga-nji moci ndea Ɓasamalía.

⁶ Gǎni ndiu ka Ɓaisilaɛ́li ɓunde ɓá ɓea ɓamɔgɔgɔ na ɓáɓungigi.

⁷ Ɔ́tɔ̌miagani ɓakpa k'aphe gea: ‹Koɓoamɛ á na koba a ye tɔ bíbí.›

⁸ Óamisani ɓasambi, ójujúkisani ɓasí, ósokoseani ɓato á sǔ, óɓeagani ɓansombo. Ɓɔtɔi k'écici, gabani phɔtɔ k'écici.

⁹ Ɓókobɛɗɛmbɛ ka kema ɓea láté na imɔna suɓi á njombi nɛnu.

¹⁰ Ɓókobɛɗɛmbɛ maiɓɔta á tamba ně, ngɔ́mbɛ á k'égogo iɓɛ, ɓiato, motumbɔ nga, mbɛɗanigi akenanigi n'ea nɛkɛ.

¹¹ Aoɓá na ɓokiɗi ka ntanga-nji moci, kaɓɛ nji, nkaɓani nkpa nde anóseseande na ikani mɔtɛ-akɛ na ka ɓî ɓɔmɛande.

¹² Mbenɔ nde ɓoongia k'éndu, yɔngani gea: ‹Ikani ka ɓujɛjɛ.›

¹³ Endu nde ɓáonósesea kau, ambe ɓujɛjɛ nɛnu áikɛ gǔ aɓɔ. A gǎkɛ oɓá na ɓákánosesi, ɓujɛjɛ nɛnu ánojííɛ.

¹⁴ Aoɓá na ɓákánosesi, kaɓɛ ɔ́ka anu, júanani k'ɔ́ma ndɔ, ɓóciciɛ mpusu á oɗo bui nde a k'écinji anu.

¹⁵ Nenóngoɗi ɗoni te, tena á nyɔngɔ á nji ndɔ, anyɛ́nyande nnde á Sɔdɔ́ma na Gɔmɔ́la.»

Tambaga nde abikaeka ka ɓagoigi ndea Yéso

¹⁶ «Cɔ, ɔ́kani phɔ́! Nenóteki ɓea ɓamɔgɔgɔ ka ɔlɔ á ɓanyama ɓea ɓamabianga. Ɛ́ngɛphani ɓea njɔka, ɓóɓɛ ɓaphɔngɔ ɓea mboe.

¹⁷ Ɔ́ɛnjiani ánjá nga, ɓakpa ɓánɔtɔngande ka ntua á tena á nyɔngɔ na ɓinda anu k'éndu á madondanɔ ndea Ɓayúda ka nyɔngɔ á Mokonga.

¹⁸ Ɓánojúsande mosá á ɓakɔta na ɓaamɛ ka nyɔngɔ ani, ka gea ɓɔ́tɔ̌miɛgɛ nyɔngɔ ani mosá aɓɔ na mosá á ɓundɔ ɓáná Ɓayúda.

¹⁹ Mbenɔ nde ɓánojúsande ka ntua á tena nyɔngɔ, ɓókoianɛgɛmbɛ gea: ‹Ɓɛyɔngande ɓo? Na ɓɛyɔngande kema sina?› Nga, ɓánoúbisande nnde ɓɔyɔngande ka mbenɔ ndɔ.

²⁰ Nnde ɓɔyɔngande kátókɛku ka ɓenu. Měma á Abanu unge ayɔngande suɓi anu.

²¹ Nkpa antɔngande muna-amakɛ ka gea, ɓámmowɛ. Na ɓaniki ɓáɓande ɓaɓiɓia á ɓaɓɔkɔti aɓɔ, na kusisa aɓɔ.

²² Ɓakpa ɓɔbu ɓánokangeande ka nyɔngɔ ani. Nkpa nde aphiphiande gǎkɛ tambaga ndɔ na ka sungiaga í, mmbɔ aámbé aamande.»

²³ Aoɓá na ɓáonótambisaga ka ntanga-nji moci, ɓôtea ka ntanga-nji nɛngbo. Nenóngoɗi ɗoni gea, ɓɔ́kɔ́gɔɓɛku tɔmba á ntanga-nji bui á ka Isilaɛ́li na Muna-Nkpa kábikimbɛ.

²⁴ «Nna tanda na ngoigi nde aɔtɔka n'anyɛ́nyi ngoisigi nɛkɛ. Nna tanda na mbɛɗanigi mmbé aɔtɔka n'anyɛ́nyi mɔkɔta ékuma nɛkɛ.

²⁵ Ambe ngoigi áɓɛ ɓea ngoisigi nɛkɛ, mbɛɗanigi áɓɛ ɓea mɔkɔta ékuma nɛkɛ. Aoɓá na ɓámɔphani mɔkɔta á ekombo k'ína Bɛljɛbúli, ɓáɛɓɔphanande ɓato á k'ékombo nɛkɛ k'ína ájeɗe phɛɛ.»

Akeni ɓánga á Mokonga tɔndɔ

²⁶ «Ɓókǒɓángɛmbɛ ɓakpa ndɔɔ. Kema bui nde ɓáobuniaga, angoɗokanande na nnde ɓáogea ka ɓɔsɔmɛa, aubukanande.

²⁷ Ambe ɓóyɔngɛ sɔmani, nyɔngɔ nde neonongoɗea ka kaiphiɔ. Nnde neonongoɗea ka kɔsɔ-kɔsɔ, yɔngani ú ka ntanga.

²⁸ Ɓókǒɓángɛmbɛ ɓundɔ ɓáomowa nyama, ɓákátɔkɛ gǎkɛ mowa měma. Mɓángani ndiu Mokonga mmbé aɔtɔka n'akusisi nyama na měma ka ɛɛmbɛ á nsa nde nnaoímika.

²⁹ Esombi á ɓaciɔɗɔ ɓaɓɛ a kusi phɛɛ nna ɓo? Nanga ɓó, ka ɓɔ moci nnaɔtɔka n'agu ka oɗo Abanu Mokonga na káubi.

³⁰ Cɔ, ɓenu gǎkɛ nanga sɛkamɔ̌ anu ɓá phɔtɔ otanga bui.

³¹ Ɓî aɓó, ɓókoɓángɛmbɛ nga, ɓɔ̌nyɛ́nyi ɓaciɔɗɔ ndɔ ɓɔbu.»

Ɓeekea á Yéso kaɓɛ yá akɛ mosá á ɓakpa

³² «Nkpa buakɛ mmbé amoɓeekeande mosá á ɓakpa gea ande ngoigi nɛmɔ, aámbé eme nemɓeekeande phɔtɔ mosá á Abɛ á na koba ka gea, mmbɔ ande ɓ'ámɔ.

³³ Mmbé gǎkɛ amoyande mosá á ɓakpa, aámbé eme phɔtɔ nen'yande mosá á Abɛ mmbɔ á na koba.»

Ɓakpa ɓákatanagande ka nyɔngɔ á Yéso

³⁴ «Ɓókokanisiɛ mɔnɔ gea, nebiki ka mokonda k'aphe á bisa ɓujɛjɛ. Kébiki ka aphe á bisa ɓujɛjɛ. Nebiki ndiu ka aphe émani.

³⁵ Nebiki onkatanisa moganda n'abakɛ, nseka n'amakɛ, nke-ambasa na nyamɔtɔ akɛ nke.

³⁶ Ɓaɓiɓia ndea nkpa, ɓá tɔ ɓato á k'ékombo nɛkɛ sasakɛ.

³⁷ Nkpa nde ankondi abakɛ kaɓɛ amakɛ kɔmɔnyɛ́nya, kámokeni ně. Mmbé ankondi moganda kaɓɛ nsɛka nɛkɛ kɔmɔnyɛ́nya, kámokeni ně.

³⁸ Nkpa nde kákondi kumba á moyangɔ nɛkɛ ka ɓeá ani, kámokeni ně.

³⁹ Mmbé aokonda amba á enda akɛ, aɓúngisande ú. Mmbé aɓungisande gǎkɛ enda akɛ ka nyɔngɔ ani, atɔande ú.»

Ophendɔ ka ɓato á osasɔ

⁴⁰ «Nkpa nde anósesi, amosesi. Nkpa nde amosesi, ansesi mmbé amoteki.

⁴¹ Nkpa nde ansesi mɔtu-nyɔngɔ ndea Mokonga ka nyɔngɔ nde ande mɔtu-nyɔngɔ ndea Mokonga, atɔande ophendɔ nde akenani ka mɔtu-nyɔngɔ ndea Mokonga. Nkpa nde ansesi nto á koɗoni ka nyɔngɔ nde ande nto á koɗoni, atɔande ophendɔ nnde akenani ka nto á koɗoni.

⁴² Nenóngoɗi ɗoni gea, mmbé aomopha cǎ moci á iɓo ádɛdɛ̌ ka ɓakpa ɓábɔbɔbɔa nde moci sɔsɔɓɛ á ɓagoigi nɛmɔ, ka nyɔngɔ nde yɛ ande ngoigi nɛmɔ, atɔande ophendɔ nɛkɛ.»