Matáyɔ 1 - Ɔngana á Kɛ̌kɛ

Ina á ɓato á k'ɛɓɔkɔti nde Yéso aɓɔkɔtɛani kau

¹ Cɔ, ɔnani ina á ɓatatakɛ na Yéso-Kiísito, mosuko á Daúdi, mosuko á Abalaámu.

² Abalaámu ɗámɓɔkɔti Isáka. Isáka áɔmɓɔkɔta Yakɔ́ɓɔ. Yakɔ́ɓɔ áɔmɓɔkɔta Yúda na ɓana-amakɛ.

³ Yúda áɔmɓɔkɔta Phalɛ́si na Jɛɛ́a ama ɓaniki ndɔ ɗátú Tamáli. Phalɛ́si áɔmɓɔkɔta Ɛsilɔ́ni. Ɛsilɔ́ni áɔmɓɔkɔta Alámu.

⁴ Alámu áɔmɓɔkɔta Aminadábu. Aminadábu áɔmɓɔkɔta Nasɔ́ni. Nasɔ́ni áɔmɓɔkɔta Salɔmɔ́ni.

⁵ Salɔmɔ́ni áɔmɓɔkɔta Bɔási, amakɛ na Bɔási ɗátú Laába. Bɔási áɔmɓɔkɔta Ɔbɛ́di, amakɛ na Ɔbɛ́di ɗátú Lúta. Ɔbɛ́di áɔmɓɔkɔta Yɛ́sɛ.

⁶ Yɛ́sɛ áɔmɓɔkɔta moamɛ Daúdi. Cɔ, moamɛ Daúdi áomɓɔkɔta Sɔlɔmɔ́nɔ, amakɛ na Sɔlɔmɔ́nɔ ɗátú nkakɛ na Ulía.

⁷ Sɔlɔmɔ́nɔ áɔmɓɔkɔta Lɔbɔámu. Lɔbɔámu áɔmɓɔkɔta Abíya. Abíya áɔmɓɔkɔta Asáphu.

⁸ Asáphu áɔmɓɔkɔta Yɔsɔpháti. Yɔsɔpháti áɔmɓɔkɔta Yɔlámu. Yɔlámu áɔmɓɔkɔta Ojía.

⁹ Ojía áɔmɓɔkɔta Yɔtámu. Yɔtámu áɔmɓɔkɔta Aáji. Aáji áɔmɓɔkɔta Ɛjɛkía.

¹⁰ Ɛjɛkía áɔmɓɔkɔta Manásɛ. Manásɛ áɔmɓɔkɔta Amɔ́si. Amɔ́si áɔmɓɔkɔta Yɔsía.

¹¹ Yɔsía áɔmɓɔkɔta Yɛkɔnía na ɓana-amakɛ ka mbenɔ nde ɗáɓěge na Ɓaisilaɛ́li ka kɔkɔɓɛ na Babɛ́li.

¹² Mbusa á gǎ na ɓɔ ka kɔkɔɓɛ, Yɛkɔnía áɔmɓɔkɔta Satiɛ́li. Satiɛ́li áɔmɓɔkɔta Jɔɔɓaɓɛ́li.

¹³ Jɔɔɓaɓɛ́li áɔmɓɔkɔta Abiúdi. Abiúdi áɔmɓɔkɔta Ɛliakímu. Ɛliakímu áɔmɓɔkɔta Ajɔ́ɔ.

¹⁴ Ajɔ́ɔ áɔmɓɔkɔta Sadɔ́ki. Sadɔ́ki áɔmɓɔkɔta Akímu. Akímu áɔmɓɔkɔta Ɛliúdi.

¹⁵ Ɛliúdi áɔmɓɔkɔta Ɛlɛajái. Ɛlɛajái áɔmɓɔkɔta Matáni. Matáni áɔmɓɔkɔta Yakɔ́ɓɔ.

¹⁶ Yakɔ́ɓɔ áɔmɓɔkɔta Yɔsɛ́phu, munyakɛ na Malía, mmbé ɗámɓɔkɔti Yéso mmbɔ ɓáɔmɔphana Kiísito.

¹⁷ Cɔ, ka ɓɔbu ɗáɓátú ɛɓɔkɔti nkama na gena (14) kpanga ka Abalaámu, na gǎ jua ka Daúdi. Goto ɛɓɔkɔti nkama na gena (14) kpanga ka Daúdi na gǎ jua ka mbenɔ á gǎ na ɓɔ ka kɔkɔɓɛ na Babɛ́li. Goto ɛɓɔkɔti nkama na gena (14) kpanga á gǎ na ɓɔ na Babɛ́li, na ka sungiaga á ɓɔkɔtɛana á Kiísito.

Ɓɔkɔtɛana á Yéso Kiísito

¹⁸ Cɔ, ɓɔkɔtɛana á Yéso Kiísito ɗátú ɓe: Yɔsɛ́phu ɗántɔmi Malía, amakɛ na Yéso. Yɔsɛ́phu na kádondanimbɛ na yɛ, Malía áokumba éme ka ɓukpɛkpɛ á Měma á kanga ɓojeɗe.

¹⁹ Yɔsɛ́phu, mǒko nɛkɛ á mbanje ɗátú gǎkɛ nto á koɗoni. Ɗákákondi kusa akɛ na soni mosá á ɓakpa, áokonda ɗeketa á Malía ka ɓɔsɔmɛa.

²⁰ Mbenɔ nde Yɔsɛ́phu ɗáoianaga nyɔngɔ ndɔ, Malaéka ndea Mɔkɔta áɔnsɛnɛkɛa ka njeki, áongoɗea: «Yɔsɛ́phu mosuko á Daúdi, kɔ́ɓɛ́mbɛ na kɔɓɔɓɔkɔ ka ɓoa á nkakɔ Malía nga, akumbi éme ndɔ ka ɓukpɛkpɛ á Měma á kanga ɓojeɗe.

²¹ Amɓɔkɔtande miki-mǒko, onsuande ina akɛ Yéso. Yɛ aámbé aeamisande ɓakpa nɛkɛ ka ɓojeɗe nɛɓɔ.»

²² Nyɔngɔ ndɔ bui ɗátɔtɔkɛani ka tɔtɔkisa á nyɔngɔ nde Mɔkɔta ɗán'yɔngisi Mɔtu-nyɔngɔ ndea Mokonga gea:

²³ «Nseka akumbande éme. Amɓɔkɔtande miki-mǒko, ɓámɔphanande Ɛmanuɛ́li.» Ande gea te: «Mokonga a kimoci na ɓesu.»

²⁴ Ka jujúka á Yɔsɛ́phu, áogea ɓíndɔ Malaéka ndea Mɔkɔta ɗánsosi. Áomɓoa nkakɛ Malía.

²⁵ Ɗákádondani gǎkɛ na yɛ na ka ɓî Malía ɗámɓɔkɔti miki-mǒko, mmbɔ Yɔsɛ́phu ɗánsu Yéso.