Lóka 9 - Ɔngana á Kɛ̌kɛ

Teka á ɓateki nkama na ɓaɓɛ (12)

¹ Mbusa, Yéso áǒdondanisa ɓateki nkama na ɓaɓɛ (12), áǒɓopha kɔkɔta na ɓukpɛkpɛ á ɓeaga á ɓansombo ɓɔbu na amisa á ɓasambi.

² Mpɔ áǒteka ka tɔ̌miaga á nyɔngɔ á koɓoamɛ ndea Mokonga na amisa á ɓasambi.

³ Áǒngoɗea ɓe: «Ɓókobɛɗɛmbɛ ka kema ka tamba. Kaɓɛ motumbɔ, maiɓɔta, mokati na imɔna. Nkpa na nkpa kaɓɛmbɛ na ngɔ́mbɛ á k'égogo iɓɛ.

⁴ Endu nde ɓáonósesea kau, ikani suɓi í na ka ɓî ɓɔmɛande.

⁵ Cɔ, aoɓá ɓato á ka ntanga-nji na ɓáyé sesea anu, tókani ka ntanga-nji ndɔ, ɓóciciɛ mpusu á oɗo bui nde a k'écinji anu ka úbisa aɓɔ gea te, nyɔngɔ ěguiaeka.»

⁶ Mpɔ, ɓateki ɓáoga na ɓáɔtɔmiaga Mbino-Ánjá ndea Mokonga nji ka nji, ɓâ phɔtɔ ǒamisa ɓato á esambɔ k'ɔ́ma bui.

Ianaga ndea Ɛlɔ́dɛ ka phɔa Yéso

⁷ Ɓî Ɛlɔ́dɛ moamɛ á ka Galiláya ɗáɔ́ki nyɔngɔ nde ɗágeani, áoianaga, nga ɓakpa ɓuangbo ɗáɓáogea te: «Yoáni-Mɓatisi ɗájujúki ka kukuwa.»

⁸ Ɓuangbo ɓáogea: «Elía, aámbɔ asɛnɛki.» Ɓuangbo ɓâ goto ogea: «Ka ɓaɔtu-nyɔngɔ á kala ndea Mokonga aámbɔ ajujúki ka kukuwa.»

⁹ Mpɔ, Ɛlɔ́dɛ áoianaga gea: «Eme aámbé ɗétenisi mɔ̌ á Yoáni. Cɔ, ani mmbɔ nɛɔɔ́ka nyɔngɔ ásii ka phɔakɛ ɓo?» Kaɓondɔ, áokaɓa ɔna akɛ.

Ísa á usɛsɛ á ɓakpa

¹⁰ Ka ja aɓɔ, ɓateki ɓáɔntɔmiaga Yéso kema bui nde ɗáɓági. Mpɔ Yéso áɔ̌bɛɗa, áoga na ɓɔ sasaɓɔ bǎ á ntanga-nji nde ɓáɔphana Bɛtɛsaída.

¹¹ Ɓî ɓakpa ɗáɓáúbi gǎkɛ ɓó, ɓâ tɔ omɓea kó. Yéso áǒsesea, áɔ̌tɔ̌miaga nyɔngɔ á koɓoamɛ ndea Mokonga, â phɔtɔ ǒamisa ɓundɔ ɗáɓá na siki á ɓoamia.

¹² Ɓî esa akpangi gɔgɔmana, ɓagoigi nkama na ɓaɓɛ (12) ɓáɔsɛkɛɗa bíbí á Yéso, ɓáongoɗea: «Cɔ, ójisa ɓakpa, ɓágɛ ka nji na ka motumbe nde a bîbíbí, ka kaɓaga eea n'éndu, nga wani ɓe ka nkanda.»

¹³ Yéso â ndiu ǒgea: «Ɓenu sasanu ɓáunge óɓophani kema á koea.» Ɓáonsikisia te: «Ɓe tɔndɔ na mokati ɓɔku na ɓasú ɓaɓɛ. Cɔ, okondi ɓégesombɛ eea ka ɓakpa nde ɓɔbu?»

¹⁴ Ɗáɓátú wa, ɓǒko ɓea ɛlɛphu ɓɔku (5.000). Wa, Yéso áǒgea ɓagoigi nɛkɛ: «Óikisani ɓakpa etúnda moci-moci á ɓakpa nkama ɓɔku (50).»

¹⁵ Ɓagoigi ɓáoɓeekea, ɓáǒikisa ɓakpa ka oɗo.

¹⁶ Ɓî Yéso abɛɗi mokati ɓɔku na ɓasú ɓaɓɛ ndɔ, áɔɛnjia na koba, áonsega Mokonga ka nyɔngɔ á eea ndɔɔ. Áoɓúnaga ú, áǒɓopha ɓagoigi ka gabea usɛsɛ á ɓakpa.

¹⁷ Ɓɔbu ɓáoeaga, ɓáokuta. Mbusa í, ɓagoigi ɓáɔkɔngɔa phúnju-phúnju á due í, ɓáotúmisa jɔ nkama na iɓɛ (12).

Pɛ́tɛɛ aɓeeki gea Yéso ande Kiísito

¹⁸ Esa moci, Yéso ɗáɔmɛma Mokonga k'ɔ́ma á ɓɔsɔmɛa, yɛ na ɓagoigi nɛkɛ. Wa, áǒɓúsia te: «Usɛsɛ á ɓakpa nde ɓáogea te, nende ani?»

¹⁹ Ɓagoigi ɓáonsikisia te: «Ɓakpa ɓuangbo ɓáogea, onde Yoáni-Mɓatisi. Ɓuangbo ɓáogea Elía. Ɓuangbo ɓâ goto ogea, ka ɓaɔtu-nyɔngɔ á kala ndea Mokonga aámbé ajujúki ka kukuwa.»

²⁰ Yéso â goto ǒɓúsia: «Cɔ, ɓenu gǎkɛ ɓogi nende ani?» Mpɔ Pɛ́tɛɛ áonsikia te: «Onde Kiísito mmbé ɓa Mokonga.»

Yéso atɔ̌mi kukuwa na jujúka akɛ

²¹ Mpɔ, Yéso áǒimisia akpɛ gea, ɓákangoɗeɛ mɔnɔ ka nkpa nyɔngɔ ndɔɔ.

²² Â phɔtɔ ǒɓúbisa: «Akeni eme Muna-Nkpa nétambɛgɛ phɛɛ, ɓagbɛga, ɓagbɛga á ɓatobeigi-phɛ́a na ɓaɗundu-ɛɔphi ɓámoyɛgɛ na kusisa ani. Mpɔ k'ésa á ko isaɔ, nejujukande ka kukuwa.»

²³ Â phɔtɔ ǒngoɗea ɓɔbu ɓe: «Aoɓá nkpa n'akondi ɓeá ani, akeni ěyɛ sisakɛ, ákumbɛ moyangɔ nɛkɛ esa bui, ámoɓeɛ.

²⁴ Nga, nkpa nde akondi amisa á enda akɛ, aɓúngisande ú. Mmbé a gǎkɛ oɓúngisa ú ka nyɔngɔ ani, aamisande enda akɛ.

²⁵ Cɔ, ana kantíti sina aoɓá nkpa n'atɔi nkumba bui á ka mokonda n'aɓúngisi ndiu enda akɛ, kaɓɛ n'ětúkatúki sisakɛ?

²⁶ Aoɓá nkpa n'aku na soni ka phɔani na ka phɔa ɓɔphɛi nɛmɔ, eme Muna-Nkpa, nenkuiande phɔtɔ soni esa nde nebikaeka ka ɓoombia nɛmɔ na nnde á Abɛ, na nnde á ɓamalaéka á kanga ɓojeɗe.

²⁷ Ɗoni! Nenóúbisi gea, ka ɓakpa nde ɓá wani, ɓákákuwɛku na ɓákáɔni koɓoamɛ ndea Mokonga.»

Úbikana á ɓoombia á Yéso

²⁸ Mbusa á ɓ'esa ngianjaga isaɔ (8), Yéso áɔ̌bɛɗa Pɛ́tɛɛ, Yoáni na Yakɔ́ɓɔ, áoɓamba na ɓɔ mamba k'aphe á mɛma á Mokonga.

²⁹ Ɓî ɗáɔmɛma, keongi akɛ áǒketia mosá aɓɔ, ngɔ́mbɛ nɛkɛ áoɓá ábu, áophenuaga biɛ! biɛ!

³⁰ Kɛ̌kɛndɔ tɔ, ɓáɔ̌ɓɔna ɓǒko ɓaɓɛ na ɓáɔyɔngaga na Yéso. Ɓǒko ndɔ ɗáɓátú Mósa na Elía.

³¹ Ɗáɓásɛnɛki suɓi á ɓoombia á na koba. Ɗáɓáɔyɔngaga na Yéso ka nyɔngɔ á ɓî Yéso atɔtɔkisande moangɔ nɛkɛ á kukuwa na Yɛusalɛ́ma.

³² Cɔ, Pɛ́tɛɛ na ɓadakɛ tɔ̌ ɗɛ́bɛɗi phɛɛ. Ɓî ɗáɓájujúki, ɓáɔɔna ɓoombia á Yéso na ɓǒko ɓaɓɛ ndɔ ɓî ɗáɓámamege na yɛ.

³³ Ɓî ɓǒko ɓaɓɛ ndɔ ɓákpangi ye ɗeketana na Yéso, Pɛ́tɛɛ áongoɗea: «Ngoisigi, aánjá ɓéikɛ wani. Cɔ, ɓɛ́phɛ̌kɛ ɛma isaɔ: Moci k'óɓɛ, moci ka Mósa, moci ka Elía.» Ande gea te, Pɛ́tɛɛ ɗákáengekisi nyɔngɔ nde ɗáɔyɔnga.

³⁴ Cɔ, ɓî ɗá phɔ́tɔ ɔyɔnga, egugu áobika, áǒgbukumia. Ɓagoigi ɓáoɓá na kɔɓɔɓɔkɔ ɓî ɓáɔni iimbiɔ á egugu n'ěgbukumi.

³⁵ Mpɔ, ɛsɔ áɔɔ́kɛkana k'égugu ndɔ te: «Mmbé ande miki nɛmɔ mmbé ɗénsɔmbu. Mɔ́kani yɛ.»

³⁶ Mbusa á ɔ́ka ɛsɔ ndɔ, ɓâ ye tɔ ɔmɔna Yéso sasakɛ. Mbusa índɔ ɓagoigi ɓáɔkɔ́ɓa phio! Kángá á tɔ̌mia á nkpa ka kema ndɔ ɗáɓáɔni.

Amisa á nto á kukuwa á ɓansombo

³⁷ Mama í, ɓî Yéso na ɓagoigi nɛkɛ ɗáɓádidi mamba, ɓáodondana na usɛsɛ á ɓakpa ɓásii.

³⁸ Sɔsɔɓɛ á usɛsɛ ndɔ, mǒko moci áɔyɔnga akpɛ áogea: «Ngoisigi neoɗengemisigi, mɔna ka miki nɛmɔ, nga a tɔ ngɔmu.

³⁹ Ɓansombo ɓáontenaga phɛɛ, na ɓá phɔtɔ onkogisaga, ɓáonsugaga akpɛ na ka ɓî phû aophúphutaga k'aphenɔkɔ akɛ. Ɓáontambisaga, ɓáonɗeketa k'akpɛ.

⁴⁰ Něɗengemisigima ɓagoigi nɛkɔ gea, ɓétokisɛ ɓansombo ndɔ. Ɓákáɛtɔkɛ.»

⁴¹ Mpɔ Yéso áogea: «Hoo! Ɓenu ɛɓɔkɔti á kanga ɓeekea nde ca! Ka mbenɔ kǔngaáni nde neikande na ɓenu? Ka mbenɔ kǔngaáni nde nenóphiphiande? Cɔ, mbika na miki nɛkɔ wani.»

⁴² Ɓî miki ɗáɔsɛkɛɗa bíbí á Yéso, ɓansombo ɓáommaka ka oɗo, ɓáonsuga akpɛ phɛɛ. Yéso áǒkeea, áonamisa miki, áonsikisia abakɛ.

⁴³ Kaɓondɔ, ɓakpa ɓɔbu ɓáotangaaga ɓukpɛkpɛ á Mokonga. Ɓâ phɔtɔ otangaaga kema bui nde Yéso ɗági. Mpɔ, Yéso áǒngoɗea ɓagoigi nɛkɛ:

Yéso atɔ̌mi goto kukuwa akɛ

⁴⁴ «Koɗani kecue anu ánjá ka nyɔngɔ nde nɛɔnɔtɔmia kɛ̌kɛnde. Eme Muna-Nkpa, ɓámobisande ka njaga á ɓakpa.»

⁴⁵ Ɗáɓákáengekisi gǎkɛ nyɔngɔ ndɔ, nga kantíti í ɗákátú ka ɓɔ base. Ɓáoɓánga úsia á Yéso ka nyɔngɔ ndɔɔ.

Ani mmbé ande mɔkɔta?

⁴⁶ Mbusa, ɓagoigi nɛkɛ ɓáopúa ka úba gea, ani mmbé ande mɔkɔta sɔsɔɓɛ aɓɔ.

⁴⁷ Ɓî Yéso ɗáúbi ye gǎkɛ nyɔngɔ nde ɗáɓáopúa kau, áɔmbɛɗa miki, áommesa bíbí akɛ.

⁴⁸ Aǒgea te: «Nkpa nde ansesi miki nde k'ína ani, amosesi phɔtɔ. Nkpa nde amosesi, ansesi phɔtɔ mmbé amoteki. Nga, nkpa nde aǒdidisa sɔsɔɓɛ anu aámbé ande mɔkɔta.»

Mmbé káokangi aogami

⁴⁹ Yoáni áongea: «Ngoisigi, ɓɛmɔni nkpa n'aǒɓeaga ɓansombo k'ína akɔ. Ɓeogea ɓénimisiɛ nga, nna ka ɓesu.»

⁵⁰ Yéso áonsikisia: «Ɓókonimisiɛmbɛ. Nga, aoɓá nkpa na nna mɓiɓia nɛnu, ámbé a ndiu nkpa nɛnu.»

Yága á Yéso ka Samalía

⁵¹ Ɓî esa á ja á Yéso na koba ɗá ye tɔ bíbí, Yéso áosuia mesa á tamba ka gǎ na Yɛusalɛ́ma.

⁵² Wa, áokpanga teka á ɓatɔmi-mbino mosá akɛ. Ɓáge ye, ɓáojúa ka nji moci á ɓato á ka Samalía, ka gea te, ɓáɓɔngisiɛgɛ k'akɛ ɔma.

⁵³ Ɓato á ka nji ndɔ, ɓákakondɛ sesea akɛ wa nga, ɗáoga na Yɛusalɛ́ma.

⁵⁴ Ɓî ɓagoigi, Yakɔ́ɓɔ na Yoáni ɓáubi ye ɓó, ɓáomúsia Yéso: «Mɔkɔta, okondi ɓɛ́mɛmɛ nsa, átókɛ na koba, ábikɛ ɛ̌kɛkisɛgɛ ɓɔ?»

⁵⁵ Mpɔ, Yéso áǒpháia kuɓî ɓáɔ, áǒpheneaga.

⁵⁶ Mpɔ, ɓâ ye tɔ oga ka nji nɛngbo.

Ɓeá á Yéso

⁵⁷ Na ɓá phɔ́tɔ k'aphe, nkpa moci áongea Yéso: «Nekoɓeande k'ɔ́ma bui nde ooga.»

⁵⁸ Yéso áongoɗea: «Ɓakɛnsɛngɛ ɓá na kubu. Ɓambǔ, ɓá na iɓɔ. Eme Muna-Nkpa ké gǎkɛ n'ɔma á maka kamonga.»

⁵⁹ Â phɔtɔ ongoɗea nkpa moci: «Ómoɓea!» Nkpa ndɔ áongoɗea: «Mɔkɔta, ómososea phɔ́ négɛ némúmbɛ abɛ.»

⁶⁰ Yéso áongoɗea: «Óɗeketa ɓakpa nde ɓáku ɓéúmbɛ ɓakpa nɛɓɔ íɓundɔ ɓáku. Oɓɛ gǎkɛ, gǎ ɔ́tɔ̌miɛgɛ nyɔngɔ á koɓoamɛ ndea Mokonga.»

⁶¹ Nkpa ɓaangbo áongoɗea: «Mɔkɔta, neoɓeande. Ómososea phɔ́, négɛ ɔkɔanɛ n'ékombo nɛmɔ.»

⁶² Yéso áongoɗea: «Nkpa nde aokpanga guba n'aɔɛnjia mbusa, kákeni áɓɛ mbɛɗanigi ka koɓoamɛ ndea Mokonga.»