Lóka 6 - Ɔngana á Kɛ̌kɛ

Yéso Mɔkɔta á saɓáto

¹ K'ésa á saɓáto moci, Yéso na ɓagoigi nɛkɛ, ɗáɓáɔnyɛ́nya ka ciko á nganɔ. Ɓagoigi nɛkɛ ɓáɔkɔɔa mbuka, ɓáotikimaga na njaga, ɓáoea ú.

² Ɓaphaisáyɔ ɓunɛngbo ɓáǒngoɗea: «Ɓɔɔbɛɗanaga ekuma k'ésa á saɓáto na ɓáimisíi ka ɓo?»

³ Yéso áǒsikisia: «Ai! Ɓókótangi ɓíndɔ Daúdi na ɓakpa nɛkɛ ɗáɓági nja n'ɛ̌bɛɗi?

⁴ Daúdi ɗángí k'éndu á Mokonga, áɔbɛɗa mokati ɔ́phɛ́ɔ áoea, â phɔtɔ ǒpha ɓakpa nɛkɛ. Mokati ndɔ ɗátú ndiu tɔ ka ɓatoɓeigi-phɛ́a ɓíndɔ ɛɔphi nɛsu ɗěsosi tɔ ɓɔ ka ea í.»

⁵ Mpɔ, Yéso â phɔtɔ ǒngoɗea: «Eme Muna-Nkpa aámbé nende Mɔkɔta á saɓáto.»

Amisa á nkpa njaga akɛ na káoemana

⁶ Ɗátú ye esa nɛngbo á saɓáto, Yéso áongia k'éndu á madondanɔ ndea Ɓayúda ka nyɔngɔ á Mokonga, áogoisaga. Nkpa moci ɗátú kuɓei, njaga akɛ á mǔku na káoemana.

⁷ Wandɔ, Ɓaphaisáyɔ na ɓaɗundu-ɛɔphi ɗáɓáɔmɔnjia Yéso bîbíbí ka úba ámbé anamisande ka ɓakpa esa á saɓáto, ka gea ɓáɓɛ na nyɔngɔ nde ɓántɔngande kau.

⁸ Wa, ɓî Yéso ɗáúbi kanisia nɛɓɔ á ɓɔsɔmɛa, áongoɗea nɗɔti ndɔ: «Ómesia, ómɛ mosá á ɓakpa.» Áǒmesia, áoma mosá aɓɔ.

⁹ Mpɔ Yéso áǒngoɗea: «Nenoúsi ɓe: Kema sina ɛɔphi nɛsu asosi gea í k'ésa á saɓáto? Kaɓɛ gea kema ánjá, kaɓɛ kema ájeɗe? Kaɓɛ amisa á nkpa, kaɓɛ kusa akɛ?»

¹⁰ Áɔ̌ɔnjia ɓakpa ɓɔbu ɓunde ɗáɓántimbi, áongoɗea nɗɔti: «Cɔ, nanoa njaga akɔ!» Áonanoa njaga akɛ, áoama.

¹¹ Mpɔ, esúia akpɛ â ye tɔ ɔ̌bɛɗa Ɓaphaisáyɔ na ɓaɗundu-ɛɔphi. Ɓáokpanga úsianaga: «Ɓengeande Yéso ɓo?»

Sɔmbɔa á ɓateki nkama na ɓaɓɛ (12)

¹² Ka matú ndɔ, Yéso áoga ka mamba k'aphe á mɛma á Mokonga. Áɔkɛisa esa k'ɛ́mɛmi.

¹³ Kamɓimba, áɔ̌ɔphana ɓagoigi nɛkɛ, áɔ̌sɔmbɔa ka ɓɔ nkama na ɓaɓɛ (12), â phɔtɔ ǒsua ɓateki.

¹⁴ Ina aɓɔ aungee: Simɔ́ni, mmbɔ Yéso ɗánsǔ Pɛ́tɛɛ, muna-amakɛ Andeé, Yakɔ́ɓɔ, Yoáni, Philípɔ, Batɔlɔmáyɔ,

¹⁵ Matáyɔ, Tɔmá, Yakɔ́ɓɔ muna Alpháyɔ, Simɔ́ni mmbé ɗáokaɓa tókisa á nji nɛɓɔ ka kɔkɔɓɛ,

¹⁶ Yúda muna Yakɔ́ɓɔ, na Yúda-Isikaliɔ́ta, mmbɔ ɗántɔngi Yéso.

Yéso aogoisaga na amisa á ɓato á esambɔ

¹⁷ Cɔ, Yéso áodida na ɓɔ, áomamaga ka ntánda. Wa, ɓagoigi ɗáɓádondani ɓásii. Usɛsɛ ángbó á ɓakpa na ɓátóki na Yɛusalɛ́ma na nji nɛngbo ndea Yudɛ́a, ɗáɓátú phɔtɔ wa, kimoci na ɓato á ka ntanga-nji á ka Tílɔ na Sidɔ́na.

¹⁸ Ɓɔbu ɗáɓábiki ɔmɔ́ka Yéso na ka amisa á kukuwa nɛɓɔ. Ɓato á kukuwa á ɓansombo ɗáɓáami phɔtɔ.

¹⁹ Ɓakpa ɓɔbu ɗáɓáokáɓa bǒwa akɛ nga, ɓukpɛkpɛ á ɓoamia ɗáotóka ka yɛ na amisa aɓɔ ɓɔbu.

Ɓɔjɛmɛ na tambaga

²⁰ Yéso áɔ̌ɔnjia ɓagoigi nɛkɛ áǒngoɗea: «Maseye ka ɓenu ɓato á ɓuyɛnɛ nga, koɓoamɛ ndea Mokonga ande anu.

²¹ Maseye ka ɓenu íɓundɔ ɓookuwa na nja kɛ̌kɛnde nga, ɓokutande. Maseye ka ɓenu íɓunde ɓoogáma kɛ̌kɛnde nga, ɓɔtɛbande.

²² Maseye ka ɓenu ɓî ɓakpa ɓáonókangea, ɓáonóphaphea, ɓáonóbóma, ɓáonóyága ka nyɔngɔ ani, eme Muna-Nkpa.

²³ Gúani jaí k'ésa ndɔ, ɓɛ́kágáni na maseye nga, ɓoɓande n'ophendɔ ángbó na koba. Nga, ɓondɔ unge ɓatataɓɔ ɗáɓěsoni ɓaɔtu-nyɔngɔ ndea Mokonga.

²⁴ Ngomi ka ɓenu ɓatɔi! Nga, ɓo ye tɔí ɓonjánja ínɛnu bui.

²⁵ Ngomi ka ɓenu íɓunde ɓona eea ásii kɛ̌kɛnde nga, nja anóguiande. Ngomi ka ɓenu íɓundɔ ɓɔɔtɛba kɛ̌kɛnde nga, ɓoɓande ka kekusa na ngamɔ.

²⁶ Ngomi ka ɓenu íɓundɔ ɓáonógama, ka nyɔngɔ á kema ánjá nde ɓoogea nga, ɓondɔ unge ɓatataɓɔ ɗáɓáǒgeea ɓaɔtu-nyɔngɔ á mbɛa.

Ekondi ka ɓaɓíɓia

²⁷ Nenóngoɗi ɓenu íɓunde ɓɔɔmɔɔ́ka: Ókondani ɓaɓíɓia anu, geani ánjá ka ɓunde ɓánokangei.

²⁸ Bisani njaga gǔ á ɓunde ɓáɔnɔsɛmɛaga, mɛmani Mokonga ka phɔa ɓakpa nde ɓáonókpetekea na nyɔngɔ ka mbɛa.

²⁹ Ɓáɔkɔɓɛta ka ngaga moci, mpháia phɔtɔ ngaga ímbɔ ajigi. Kaɓɛ nkpa n'abɛɗi ngɔ́mbɛ nɛkɔ á phiɔ, nɗeketea phɔtɔ ngɔ́mbɛ á k'égogo.

³⁰ Nkpa nde aɔkɔmɛma kema, mopha ú. Aoɓá nkpa n'akouti kema nɛkɔ, kogeɛmbɛ ye áosikisiɛ.

³¹ Nnde ɓokondi ɓakpa ɓágeɛ ka phɔa anu, geani phɔtɔ ɓó ka phɔa ɓɔ.

³² Aoɓá na ɓǒkondi tɔ ɓunde ɓánokondi, obebɔ sina ɓoseɓeande? Ka nyɔngɔ nde ɓato á ɓojeɗe ɓá phɔtɔ ǒkonda ɓunde ɓékondi.

³³ Aoɓá na ɓo tɔ ogea ánjá ka ɓunde ɓáonógeea ánjá obebɔ sina ɓoseɓeande? Ka nyɔngɔ nde ɓato á ɓojeɗe ɓá phɔtɔ ogea ɓó.

³⁴ Aoɓá na ɓɔ̌ɛkisi tɔ ɓundɔ ɓoseɓei gea ɓánojisiande, obebɔ sina ɓoseɓeande? Nga, ɓato á ɓojeɗe ɓá phɔtɔ ɔ̌ɛkisa ɓadaɓɔ ɓato á ɓojeɗe ka gea ɓésikisiɛ tɔndɔ nndɔ ɓátɔɛkisi.

³⁵ Nna ɓó. Ókondani ndiu ɓaɓíɓia anu. Ógeeani ánjá. Ɔɛkisani kángá á seɓea á jisia anu. Mpɔ, ophendɔ nɛnu áoɓá ángbó. Ɓóoɓá ɓana-Mokonga Mmbé ana kɔkɔta bui. Nga yɛ, aanjánjá ka ɓundɔ ɓáná n'obebɔ na ɓunde ɓá ájeɗe.

³⁶ Cɔ, ókuiani ɓakpa ngomi ɓíndɔ Abanu aǒkuia ɓakpa ngomi.

Ɓáni na inyamɛ sɔsɔɓɛ anu

³⁷ Ɓókotenɛmbɛ nyɔngɔ á nkpa ka gea, ɓákatenɛmbɛ nyɔngɔ ínɛnu. Ɓókotenɛmbɛ nyɔngɔ á ɓakpa ka gea, ɓákatenembɛ nyɔngɔ ínɛnu akpɛ. Ímani ɓojeɗe nde ɓakpa ɓági ka phɔanu ka gea, ɓáímɛ ɓojeɗe ínɛnu.

³⁸ Ógabeani ɓakpa, ɓánógabeande, ɓáotúmisa njombi nɛnu púu! Ɓáophikiɗia, áoɗuukanaga. Cǎ nde ǒgabea ɓakpa ně, a tɔ unge Mokonga aogabeande ně.»

³⁹ Cɔ, Yéso â phɔtɔ ǒngoɗea mɛní ndee: «Keíme-íme aɔtɔka n'amphangi dakɛ keíme-íme aphe? Ɓákáguiɛ phɔ́ ɓɔbu ɓaɓɛ k'ejimba?

⁴⁰ Nga, ngoigi nnaɔnyɛ́nya ngoisigi nɛkɛ. Aoɓá ka ɓagoigi n'agoigi ánjá, aɓande ɓea ngoisigi nɛkɛ.

⁴¹ Cɔ, eke nde ɔɔni gbɛɛkɛsɛ k'íso á dakɔ na kó gǎkɛ ɔɔna gbútuka á me nde a k'íso akɔ?

⁴² Ɔɔtɔka n'ongoɗi muna-amakɔ: ‹Muna ayí, gea nɛ́ophúiɛ gbɛɛkɛsɛ nde a k'íso akɔ.› Oɓɛ gǎkɛ, kɔ́ɔɔna gbútuka á me ndɔ a k'íso akɔ? Nto á maibe nde ca! Tókisa phɔ́ gbútuka á me nde a k'íso akɔ. Mpɔ, ɔ́ɔɔnapha ánjá, ka gea ótokisɛ ye tɔ gbɛɛkɛsɛ nde a k'íso á muna-amakɔ.

Ɓáengekisande měma ánjá na měma ájeɗe ɓo?

⁴³ Me anjánjá nnaɔgɔmbisa mbuka ájeɗe na me ájeɗe nnaɔgɔmbisa mbuka ánjá.

⁴⁴ Ɓá tɔ omúba me ka mbuka akɛ. Ɓánáɔkɔɗa eɓombi ka cía. Ɓáná phɔtɔ ɔkɔɗa moyamba ka tómbá.

⁴⁵ Nga, nkpa anjánjá aophúia nyɔngɔ ánjá suɓi á kema ánjá á ka měma akɛ. Nkpa ajeɗe aophúia nyɔngɔ ájeɗe suɓi á kema ájeɗe á ka měma akɛ. Nga, aphenɔkɔ a tɔ ɔyɔnga nyɔngɔ nde atúmi ka měma á nkpa.

Gea á kema nde Mɔkɔta asosi

⁴⁶ Eke nde ɓɔɔmɔɔphanea: ‹Mɔkɔta, Mɔkɔta!› Na ɓókóogea kema nde nenóngoɗi?

⁴⁷ Nkpa nde aobika mosá ani, na aɔmɔɔ́ka, áogea kema nde nensosi, nenóphangiande nkpa nde akengeani na yɛ.

⁴⁸ A ɓea nkpa moci mmbé ɗáphɛ̌ki endu, áotongea oɗo, áondisa, áocuma ɓ'étimo, cu! Tuma abiki, mǔku-iɓo áɔɓɛta endu, kaɗengisɛ tanda, ka nyɔngɔ nde, ɗáphɛ̌ki ú ánjá gǔ ɛ́tɛ.

⁴⁹ Cɔ, mmbɔ aɔmɔɔ́ka, na nnaogea ɓíndɔ nensosi, akengeani na nkpa moci n'aphɛ̌ki endu, na kándǐsi etimo ánjá. Mǔku-iɓo aɓɛti ye endu ndɔ, mɔngɔ ímoci áɔngbɔɔkana! Áoújukana bubui.»