Lóka 5 - Ɔngana á Kɛ̌kɛ

Yéso aɛɓɔphani ɓagoigi á k'ama mosá-mosá

¹ Esa ímoci Yéso ɗáiki ka motii á etǔ Gɛnɛjaɛ́ti. Usɛsɛ á ɓakpa ɓáɔmɓɔkanisa nga, ɗáɓátúokonda ɔ́ka Nyɔngɔ á Mokonga.

² Wa, Yéso áɔɔna koko iɓɛ ka motii á iɓo, nndɔ ɓaɔphigi ɗáɓátóki suɓi í. Ɓɔ gǎkɛ, ɗáɓátú ɔɓɔngisia moaɓɔ nɛɓɔ.

³ Mpɔ Yéso áokambea ka koko ndɔ moci nnde á Simɔ́ni, áɔmmɛma yɛ, átútuisɛ koko ɗanga ábɔa n'ɔɓɛɛ. Yéso áoika ka koko, áǒgoisaga usɛsɛ á ɓakpa.

⁴ Agɔɓi ye yɔnga, áongoɗea Simɔ́ni: «Cɔ, tútuisa phɔ́ koko ka kiba, ɓómakɛ moaɓɔ nɛnu k'éphenga.»

⁵ Simɔ́ni áongea: «Ngoisigi, ɓekisima tambaga kala na ka ɓî esa age osa, ɓékékambɛ tanda. Cɔ, ka nyɔngɔ nde omososi, nemakande moaɓɔ.»

⁶ Ɓî ɓámaki ye ú, ɓasú ɓáotá ɓásii phɛɛ. Moaɓɔ nɛɓɔ áokpanga kakokanaga.

⁷ Mpɔ, ɓáɔ̌ɔphana ɓadaɓɔ na njaga gea, ɓábikɛ na koko nɛɓɔ ka enga aɓɔ. Ɓábiki ye, ɓáotúmisa koko bui, púu! Koko iɓɛ ndɔ n'akpangi ye tɔta.

⁸ Simɔ́ni Pɛ́tɛɛ aɔni ye ɓó, áogbúka muanku akɛ mosá á Yéso, áongea: «Mɔkɔta, tóka ka mpɛphɛ ani nga, nende nto á ɓojeɗe.»

⁹ Nga, kɔɓɔɓɔkɔ ɗámbɛdi yɛ na ɓadakɛ ɓɔbu ka nyɔngɔ á ɓasú ɓásii ndɔ ɗáɓáté ka moaɓɔ.

¹⁰ Yakɔ́ɓɔ na Yoáni, ɓana Jɛbɛdáyɔ ɓadakɛ na Simɔ́ni, ɓɔ phɔtɔ ɗáɓátú na kɔɓɔɓɔkɔ kimoci na yɛ. Cɔ, Yéso áongoɗea Simɔ́ni: «Koɓɛmbɛ na kɔɓɔɓɔkɔ. Kpanga á kɛ̌kɛnde, oɓande mɔ́phigi á ɓakpa.»

¹¹ Mpɔ, ɓáodunduisa koko kubi, ɓáoɗeketa bui, ɓáomɓea Yéso.

Yéso annamisi nto á sǔ

¹² Mbenɔ nde Yéso ɗátú ka nji moci, nsambi áombikia. Nsambi ndɔ ɗátú na sǔ nde ɗáɛmbí nyama akɛ bui! Amɔni ye Yéso, áɔgɔtɔma na ka ɓî endóndó akɛ age ogbondoa oɗo, áonɗengemisaga ɓe: «Mɔkɔta, aoɓá n'okondi, ɔɔtɔka n'omosokosei.»

¹³ Yéso áonanoa njaga, áɔndunga, áongoɗea te: «Cɔ, nekondi, neosokosei.» Kɛ̌kɛndɔ tɔ, sǔ áontóka.

¹⁴ Mpɔ, Yéso áongoɗea te: «Kɔntɔ̌miɛ mɔnɔ nkpa. Gǎ ndiu óphangisiɛ mosá á ntoɓeigi-phɛ́a na opha akɛ ɔphɛ́ɔ ɓíndɔ Mósa asosi ka nyɔngɔ á sokosea nto á sǔ. Nndɔ áɓɛ mphangiɔ ka ɓɔ gea oami.»

¹⁵ Ɓoombia ndea Yéso â gǎkɛ ondanda phɛɛ. Usɛsɛ á ɓakpa ɓásii ɓáombikia k'aphe á ɔ́ka nyɔngɔ nɛkɛ na amisa á kukuwa nɛɓɔ.

¹⁶ Yéso ɗá gǎkɛ ogaga ka nkanda ka mɛma á Mokonga.

Amisa á nɗɔti

¹⁷ Esa ímoci, ɓî Yéso ɗáogoisaga, Ɓaphaisáyɔ na ɓagoisigi-ɛɔphi ɗáɓáiki ka mpɛphɛ akɛ. Ɗáɓátóki ka nji ɗanga-ɗanga á ka Galiláya n'índe á ka Yudɛ́a na á ka Yɛusalɛ́ma. Ɓukpɛkpɛ á Mɔkɔta Mokonga ɗátú suɓi akɛ ka amisa á ɓasambi.

¹⁸ Wa, ɓakpa ɓáobika na ɓánkumbigi nɗɔti k'éka. Ande gea, nyama akɛ bui na nnaoemana. Ɓáokaɓa, ɓángisɛ mosá á Yéso suɓi éndu.

¹⁹ Ɔma á nyɛ́nya ɗákátú gǎkɛ ɓei, ka nyɔngɔ á usɛsɛ á ɓakpa. Kaɓondɔ, ɓáonɗapha ně bákijɔ. Ɓáophɔ́a ɔma moci, ɓáondidisa nɗɔti ndɔ n'a tɔ k'éka ka nkíndí á ɓakpa mosá á Yéso suɓi éndu. Ɓáonkisa ka nkíndí á ɓakpa, mosá á Yéso.

²⁰ Aɔni ye ɓeekea nɛɓɔ, Yéso áongea nɗɔti te: «Moko, ɓojeɗe nɛkɔ aímiki.»

²¹ Mpɔ, ɓaɗundu-ɛɔphi na Ɓaphaisáyɔ ɓáoianaga: «Mogaa nde ande ani ka yɛ bóma á Mokonga ɓende? Ani mmbé aɔtɔka n'aími ɓojeɗe na nna tɔndɔ Mokonga sasakɛ?»

²² Ɓî Yéso, ɗáúbi ianaga aɓɔ, áǒngoɗea ɓe: «Ka nyɔngɔ sina nde ɓona nkókó á ianaga nde suɓi á měma anu?

²³ Kema sina nde aáphǒ ka yɔnga í: ‹Ɓojeɗe nɛkɔ aímiki›, na yɔnga: ‹Má! Ótambɛ!›?

²⁴ Ka gea ɓóúbɛ te, eme Muna-Nkpa, nena kɔkɔta á íma á ɓojeɗe ka mokonda.» Mpɔ, áǒpháia, áongoɗea nɗɔti te: «Má! Bɛɗa eka nɛkɔ, ósikianɛgɛ mɔtɛ-akɔ.»

²⁵ Kɛ̌kɛndɔ, áoma mosá á ɓakpa ɓɔbu, áɔbɛɗa eka nde atóɗé kau, áosikianaga mɔtɛ-akɛ n'aombeba Mokonga.

²⁶ Ɓakpa ɓɔbu ɓáotangaaga, ɓáoɓá na kɔɓɔɓɔkɔ, ɓâ gǎkɛ ombeba Mokonga, ɓáogea: «Ai! Ɓɛɔni ketangaɔ kesande.»

Yéso amɔphani Láwi

²⁷ Mbusa á wa, Yéso áojuana, áɔmɔna mphendisigi-manjanja, ina akɛ Láwi, n'aiki ka ntua á phendisaga á manjanja. Yéso áongoɗea: «Ómoɓeá!»

²⁸ Wa, Láwi áoɗeketa bui, áoma, áomɓea.

²⁹ Mbusa, Láwi áɔɓɔngisiaga jaí mɔtɛ-akɛ ka phɔa Yéso. Áǒdondanisa ɓakpa ɓásii na ɓadakɛ ɓaphendisigi-manjanja. Ɓáoika k'ɔ́ma á eaga.

³⁰ Mpɔ, Ɓaphaisáyɔ na ɓadaɓɔ ɓaɗundu-ɛɔphi, ɓáɔ̌ngɔngɔnɛaga ɓagoigi ndea Yéso: «Kanyɔngɔ sina nde ɓooeaga na noa kimoci na ɓaphendisigi-manjanja na ɓato á ɓojeɗe ɓunɛngbo?»

³¹ Yéso â gǎkɛ ǒsikisia te: «Ɓasambi ɓáunge ɓána siki á nsaku. Nna ɓunde ɓánáosamba.

³² Kébiki k'aphe á ɔphana á ɓato á ɓonjánja. Nebiki ndiu ka ɔphana á ɓato á ɓojeɗe gea, ɓákětiɛ tambea aɓɔ.»

Moangɔ á Yéso ka kema á kala

³³ Ɓaphaisáyɔ ɓáomúsia Yéso: «Ɓagoigi ndea Yoáni na ɓundeasu ɓáoikaga kángá á eaga ka nyɔngɔ á mɛma á Mokonga. Cɔ, ekende ɓundeakɔ, ɓá gǎkɛ oeaga na noa?»

³⁴ Yéso áǒsikisia: «Ɓato á ɛkɛka ɓáikimbɛ mɔnɔ kángá á eaga na mǒko-ɛ́kɛka a kimoci na ɓɔ? Ɓɛɛndɔ.

³⁵ Esa kájumbɛ ɓî ɓándungaeka mǒko-ɛ́kɛka. Wandɔ unge, ɓáikaeka kángá á eaga.»

³⁶ Yéso â phɔtɔ ǒngoɗea mɛní ndee: «Nna na nkpa nde aɔnyɔa phaeka á bɔngɔ á kɛ̌kɛ ka jukanisa í na bɔngɔ á kala. Aogea ɓó, áotúkatúka nndɔ á kɛ̌kɛ. Nndɔ á kala kágamanɛku na phaeka índɔ á kɛ̌kɛ.

³⁷ Ka asii ndeasu ɓánáoɗukia divai á kɛ̌kɛ suɓi á mboso á kala nde ɓáɓɔngisigi na mpoko á nyama. Oogea ɓó, mbenɔ nde divai aɔɛma áoboma mboso. Divai na mboso bui áoújukana.

³⁸ Akeni ndiu ɗukia á divai á kɛ̌kɛ suɓi á mboso á kɛ̌kɛ.

³⁹ Nkpa aye onoa divai á kala, kakondɛ ye nnde á kɛ̌kɛ. Â ye tɔ ogea, divai á kala unge aánjá.»