Lóka 4 - Ɔngana á Kɛ̌kɛ

Nketi antombigi Yéso

¹ Mbusa índɔ Yéso áotóka na Yɔɔdáni n'atúmi na Měma á kanga ɓojeɗe. Měma ndɔ áɔnsɔndɔɛa ka nkanda.

² Kó, Nketi áontombaga esa nkama gena (40). Cɔ, ka ɓ'esa ndɔ bui, Yéso na nna tanda oeaga. Mbusa índɔ, nja áɔmbɛɗa.

³ Nketi áongea: «Aoɓá n'onde Muna-Mokonga, sosea phɔ́ ɛtɛ nde áɓɛ mokati.»

⁴ Yéso â gǎkɛ onsikisia te: «Ɓuku á Mokonga agie, nkpa nna tɔ oenda k'éea.»

⁵ Nketi áɔmɛɛa mosá, áonɗáphisa gǔ á mamba, mɔngɔ ímoci, áɔmɔnisa koɓoamɛ bui á ka mokonda.

⁶ Aongea: «Nekophande kɔkɔta á koɓoamɛ nde bubui, na ɓoombia í bui. Nga, nndɔ bui ɗáɓámopi. Eme aámbé ne tɔ ogaba ka nkpa nde nekondi.

⁷ Cɔ, aoɓá n'ogbuki muanku mosá ani, bubui áɓá tɔ akɔ.»

⁸ Yéso â gǎkɛ onsikisia: «Ɓuku á Mokonga agie: ‹Gbúka tɔ muanku akɔ mosá á Mɔkɔta nɛkɔ Mokonga. Ɔ́mbɛɗaneɛgɛ tɔ yɛ sasakɛ.›»

⁹ Nketi â goto ɔmɛɛa mosá na Yɛusalɛ́ma, áonɗaphisa gǔ éndu á Mokonga. Áongea: «Aoɓá n'onde Muna-Mokonga ɗoni, ómaka phɔ́ ka oɗo.

¹⁰ Nga, Ɓuku á Mokonga agi: ‹Ěsoseande ɓamalaéka nɛkɛ, ɓákoambɛ.

¹¹ Ɓákoambande ka njaga aɓɔ gea te, ecinji akɔ kaɓɛtɛkanɛmbɛ k'ɛ́tɛ.›»

¹² Yéso áonsikisia te: «Ɓuku á Mokonga agi phɔtɔ: ‹Kontombɛgɛ mɔnɔ Mɔkɔta nɛkɔ Mokonga.›»

¹³ Ɓî nketi agɔɓi ye tombaga ndɔ bui, â ye tɔ onɗeketa, áoga oɓondea esa nɛngbo.

Yéso akpangi bɛɗanaga ekuma nɛkɛ ka Galiláya

¹⁴ Yéso áoja na Galiláya, ɓukpɛkpɛ á Měma á kanga ɓojeɗe n'atúmi ka měma akɛ, mbino akɛ áɔɛmba ka nji bui á ka mpɛphɛ.

¹⁵ Áogoisaga k'éndu á madondanɔ ndea Ɓayúda ka nyɔngɔ á Mokonga, ɓakpa ɓɔbu ɓáonɗokomisa.

Yága á Yéso ka Najalɛ́ti

¹⁶ Mbusa á wa, áoga na Najalɛ́ti ɔma nde ɗáɓámmɔtisi. Esa á saɓáto, áongia k'éndu á madondanɔ ndea Ɓayúda ka nyɔngɔ á Mokonga ɓíndɔ ɗátú ogeaga. Mpɔ, áoma ka tanga.

¹⁷ Ɓáomopha ɓuku ndea Isáya. Áoúkua ú, áodonda ɔma nde ɓáɗundu:

¹⁸ «Měma á Mɔkɔta amɔgɔni, amɔsɔmbu ka tɔ̌miaga á ɓato á ɓuyɛnɛ Mbino-Ánjá. Â phɔtɔ omoteka ka úbisa á ɓato á mekakɔ esa á juana aɓɔ na koɗa iso á ɓakeíme-íme, na phúia á ɓakusi ka kɔkɔɓɛ,

¹⁹ na tɔ̌mia á saga á ngomi ndea Mɔkɔta.»

²⁰ Wa, áoikita ɓuku ndɔ, áomopha mbɛɗanigi á k'éndu á madondanɔ ndea Ɓayúda ka nyɔngɔ á Mokonga, áoika ka phɛá aɓɔ. Ɓakpa ɓɔbu ɓáontúmia n'íso,

²¹ Yéso áǒngoɗea ɓe: «Kesande nyɔngɔ ndɔ ɓɔɔ́ki atɔtɔkɛani.»

²² Nyɔngɔ nɛkɛ áɔ̌ɓɔngɛa ɓakpa ɓɔbu ɓunde ɗáɓáɔmɔ́ka nga, ɓoabi ndɔ ɗátú á ketangaɔ. Ɓáoúsianaga: «Nna phɔ́ muna Yɔsɛ́phu aámbé?»

²³ Mpɔ Yéso áǒsikisia ɓoabi: «Ɗoni, ómongoɗeani phɔ́ mɛní ndee: ‹Nsaku, ósakoa sasakɔ.› Cɔ, gea phɔ́ wani nyɔngɔ ndɔ ɓɛtɔ́ɔ́ki n'ogi na Kapɛɛnaúmu nga, wani ande nji nɛkɔ.»

²⁴ «Nenóngoɗi ɗoni gea: Nna na mɔtu-nyɔngɔ ndea Mokonga mmbé ɓánsesimbɛ mɔnɔ ánjá ka nji nɛkɛ á ɓɔkɔtɛana.

²⁵ Eya, ka saga ndea Elía, ɓake á kekusa ɗáɓáɓiki phɛɛ ka Isilaɛ́li. Mbua ɗákáɔɔka ka ɓasaga ɓasaɔ na gbutuka. Monganya áogua ka mokonda bui.

²⁶ Nna na ka ɓɔ nde Mokonga ɗánteki Elía mɔtɛ-akɛ, â tɔ onteka mɔtɛ á nke á kekusa ɓa ka Jaɛpáta, nji á Sidɔ́na.

²⁷ Ka saga á Ɛlísa mɔtu-nyɔngɔ ndea Mokonga, ɓato á sǔ ɗáɓáɓiki suɓi á Ɓaisilaɛ́li. Nna na ka ɓɔ mmbé ɗáami, na nna tɔndɔ Namáni, nto á ka Sulía.»

²⁸ Ɓî ɓáɔ́ki ye ɓó, ɓɔbu ɓáɔɓɛa phɛɛ suɓi éndu á madondanɔ ndea Ɓayúda ka nyɔngɔ á Mokonga.

²⁹ Ɓáǒmesia, ɓáonjuanisa Yéso ka ngba á ntanga-nji, ɓáontáisa gǔ á mamba nde ɗáɓáphɛ̌ki Najalɛ́ti kau, ka gea ɓántingisiɛ ka ěmbé.

³⁰ Yɛ â gǎkɛ ǒsoɗokana, áoga nɛkɛ.

Amisa á nto á kukuwa á ɓansombo

³¹ Mpɔ, Yéso áodida ka ntanga-nji moci á ka Galiláya nnde ɓáɔɔphana Kapɛɛnaúmu. Áǒgoisaga ɓakpa k'ésa á saɓáto.

³² Ɓɔ, ɓáotangaaga phɛɛ, nga goisaga nɛkɛ ɗátú na kɔkɔta kau.

³³ Cɔ, nkpa moci ɗátú k'éndu á madondanɔ ndea Ɓayúda ka nyɔngɔ á Mokonga, ɓansombo na ɓámbɛɗi. Aokoga akpɛ.

³⁴ «Hoo! Yéso ɓa Najalɛ́ti ekende ɓeogi ně? Obiki kosótindisa? Neokoúba, onde Nto á kanga ɓojeɗe ndea Mokonga.»

³⁵ Yéso áǒkea ɓansombo: «Kɔ́ɓani! Juanani ka nkpa ndee!» Mpɔ, ɓansombo ɓáontenea nkpa ndɔ ka oɗo gbu! Mosá á ɓakpa ɓɔbu. Ɓansombo ɓáontóka. Kema kangeɛ nkpa ndɔɔ.

³⁶ Ɓakpa ɓɔbu ɓáoyayama, ɓáoúsianaga: «Ogiɓóo! Nyɔngɔ sina nde? Mogáa nde ěɓǐgi ɓansombo? Nna kɔkɔta akpɛ unge? Ɓansombo ɓátóki ka nyama á nkpa ɓende?»

³⁷ Ɓondɔ unge ɓoombia á Yéso, áondanda ka nji ndɔ bui.

Yéso aǒamisa ɓato á esambɔ

³⁸ Yéso ajúani ye k'éndu á madondanɔ ndea Ɓayúda ka nyɔngɔ á Mokonga, áoga k'éndu ndea Simɔ́ni. Ama-nkakɛ na Simɔ́ni ɗátú na jónga akpɛ. Ɓáɔmmɛma Yéso, ágeɛ ka kema ka phɔakɛ.

³⁹ Cɔ, Yéso áɔgɔtɔma gǔ akɛ, áokeea jónga, jónga ndɔ áosia. Kɛ̌kɛndɔ, nke ndɔ áoama, áoúnanaga ka ɓɔ.

⁴⁰ Ka gǎ á maní, ɓakpa ɓáombikia Yéso na ɓasambi ɗanga-ɗanga. Áǒbisia njaga moci-moci, áǒamisa.

⁴¹ Ɓansombo ɓâ phɔtɔ ojuana ɓásii na ɓáokoga: «Onde Muna-Mokonga!» Yɛ, â ndiu ǒkeea, áǒdakanisa, ka nyɔngɔ nde, ɗáɓáúbi gea, Yéso ande Kiísito.

Yéso aɔphɛa suɓi éndu á madondanɔ ndea Ɓayúda ka nyɔngɔ á Mokonga

⁴² Ka koɗokanaga á esa, Yéso áoga ka nkanda. Ɓakpa ɓásii ɓâ gǎkɛ onkaɓa, ɓáondonda, ɓáongea: «Kósoɗeketɛmbɛ.»

⁴³ Â gǎkɛ ǒgea: «Mokonga amoteki gea, nɛ́tɔ̌miɛgɛ phɔtɔ Mbino-Ánjá á koɓoamɛ nɛkɛ ka nji nɛngbo.»

⁴⁴ Mpɔ, Yéso áotútuisa ɓɔphɛi á Mbino-Ánjá k'éndu á madondanɔ ndea Ɓayúda ka nyɔngɔ á Mokonga bui ndea ka Yudɛ́a.