Lóka 3 - Ɔngana á Kɛ̌kɛ

Ekuma ndea Yoáni-Mɓatisi

¹ Nyɔngɔ nde ɗátú ka saga á ko nkama na ɓɔku á koɓoamɛ ndea moamɛ angbóngbó Tibɛlíɔ Kaisáa, Pɔntíɔ Pilátɔ ɗátú mɔkɔta ka Yudɛ́a. Galiláya ɗátú kusi á kɔkɔta á Ɛlɔ́dɛ. Itulɛ́a na Taakɔníti ɗátú kusi á kɔkɔta á Philípɔ, muna-amakɛ na Ɛlɔ́dɛ. Abilɛ́nɛ ɗátú kusi á kɔkɔta á Lisanía.

² Anási na Kayápha ɗáɓátú ɓagbɛga á ɓatoɓeigi-phɛ́a. Ka saga ndɔ, nyɔngɔ á Mokonga áɔngɔna Yoáni muna-Jakaía ka nkanda, áoɓá mɔtu-nyɔngɔ ndea Mokonga.

³ Áɔtɔmba nji bui á ka mpɛphɛ á Yɔɔdáni n'aɔ̌phɛa ɓakpa ɓe: «Kětiani tambea anu ájeɗe, ɓánoɓatisɛ, mpɔ Mokonga áímɛ ɓojeɗe nɛnu.»

⁴ Cɔ, nnde ande tɔtɔkɛana á nyɔngɔ nde Isáya mɔtu-nyɔngɔ ndea Mokonga ɗáɗundu gea: «Nkpa moci aoaba n'ɛsɔ akpɛ ka nkanda ɓe: Ɓɔngisiagani aphe ndea Mɔkɔta! Mamisani k'akɛ aphe kau, dɛ!

⁵ Ěmbé bui ɓátúmisande. Mamba, n'etondoo bui ɓásɛngɛande. Ɔma nde aphe ěgbúki, ɓámamisande dɛ! Ɔma á etia-etia, ɓáɓɔngisande.

⁶ Kaɓondɔ, ɓakpa ɓɔbu ɓáɔnande gǎkɛ ɓoamia ndea Mokonga.»

⁷ Cɔ, usɛsɛ á ɓakpa ɓáobika mɔtɛ á Yoáni ka ɓatisa aɓɔ. Yɛ â gǎkɛ ǒngoɗea ɓe: «Ɛɓɔkɔti á kaɓokosa nde ca! Ani mmbé anoúbisi tea esúia ndea Mokonga nnde abiki?

⁸ Tɔtɔkisani pɛ ekuma ánjá ka úbisa gea ɓokěti ye tambea anu ájeɗe. Ɓókóikiɛmbɛ égea sasanu te, tatasu ande Abalaámu. Cɔ, nenóngoɗi gea, Mokonga ana ɓukpɛkpɛ á gaía á ɓ'ɛtɛ nde, áomesia ɛɓɔkɔti ndea Abalaámu.

⁹ Ɓábisi ye tɔ eoka ka ɓokû á me. Me buakɛ mmbé nnaɔgɔmbisa mbuka ánjá, ɓámbiande, ɓáomaka ka nsa.»

¹⁰ Usɛsɛ á ɓakpa ɓáomúsia: «Ɓégeɛ gǎkɛ ɓo?»

¹¹ Yoáni áǒsikisia: «Nkpa nde ana ngɔ́mbɛ iɓɛ, ámophɛ mmbé nna na kau. Mmbé a gǎkɛ n'eea, ágeɛ phɔtɔ ɓó.»

¹² Ɓaphendisigi-manjanja, ɓâ phɔtɔ obika k'aphe á oɓatisɔ. Ɓáongea Yoáni: «Ngoisigi, ɓégeɛ nɛsu ɓo?»

¹³ Yoáni áǒsikisia: «Ɓókophendisɛmbɛ imɔna kɔnyɛ́nya nnde ɓánósosi phendisa í.»

¹⁴ Ɓato émani ɓâ phɔtɔ omúsia: «Ɓesu gǎkɛ ɓégeɛ ɓo?» Áǒsikisia ɓundɔ te: «Ɓókǒphendisɛmbɛ ɓakpa imɔna ka mbɛa. Ɓókomutɛmbɛ nkpa kema na tɔnga phɔtɔ nkpa kitɔngi á mbɛa. Endani tɔndɔ k'óphendɔ nɛnu.»

¹⁵ Mpɔ ɓakpa ɓɔbu ɓunde ɗáɓáoɓondeaga kema nde atɔtɔkɛanande, ɓáoúsianaga ka měma aɓɔ ka phɔa Yoáni: «Ayo, Yoáni nna phɔ́ Kiísito?»

¹⁶ Yoáni â gǎkɛ ǒsikisia ɓakpa ɓɔbu gea: «Eme neonóɓatisa nɛmɔ ka iɓo. Nkpa moci a gǎkɛ obika mbusa ani n'amɔnyɛ́nyi ka ɓukpɛkpɛ. Kékeni koɗa á ngoi á ɓiato nɛkɛ. Yɛ aámbé anóɓatisande ka Měma á kanga ɓojeɗe na ka nsa.»

¹⁷ «Abɛɗi ungɔ ka njaga akɛ ka pɛca á mponga. Â gǎkɛ obisa mponga ka tɛta, â ndiu otóɓoa tɔnɛ í ka nsa nde nnaoímika.»

¹⁸ Ɓondɔ unge Yoáni ɗátú ɔ̌phɛaga ɓakpa mɔngɔ ásii Nyɔngɔ Ánjá ndea Mokonga.

¹⁹ Mbusa, Yoáni áomphekeaga Moamɛ Ɛlɔ́dɛ ka nyɔngɔ nde ɗámukí Ɛlɔdía, nka muna-amakɛ phɔtɔ na ka nyɔngɔ ájeɗe-jeɗe nde ɗági.

²⁰ Gǔ índɔ, Ɛlɔ́dɛ â goto ogea ɓojeɗe, áommakea Yoáni ka mekakɔ.

Ɓatisa á Yéso

²¹ Mbusa á Yoáni ɓatisa á ɓakpa ɓɔbu ɓunde ɗáɓátú wa, â phɔtɔ omɓatisa Yéso. Cɔ, ɓî Yéso ɗáɔmɛma, koba áokoɗokana,

²² Měma á kanga ɓojeɗe áodida gǔ akɛ n'aǒphangisia ɓea mboe. Ɛsɔ áɔɔ́kɛkana n'atóki na koba, áogea: «Ɔɓɛ, onde miki nɛmɔ ékondi. Nena maseye ka phɔakɔ.»

Ina á ɓato á k'ékombo ndea Yéso

²³ Yéso ɗátú na ɓasaga ɓea nkama isaɔ (30) ɓî akpangi ekuma nɛkɛ. Ɓakpa ɗáɓáoúba te, ande Muna Yɔsɛ́phu, mmbɔ muna Ɛlí,

²⁴ mmbɔ muna Matáti, mmbɔ muna Láwi, mmbɔ muna Mɛ́lki, mmbɔ muna Yána, mmbɔ muna Yɔsɛ́phu,

²⁵ mmbɔ muna Matatía, mmbɔ muna Amɔ́si, mmbɔ muna Naúmu, mmbɔ muna Ɛsíli, mmbɔ muna Nágɛ,

²⁶ mmbɔ muna Máti, mmbɔ muna Matatía, mmbɔ muna Simɛ́i, mmbɔ muna Yɔsɛ́ki, mmbɔ muna Yɔ́da,

²⁷ mmbɔ muna Yɔána, mmbɔ muna Lɛ́sa, mmbɔ muna Jɛubabɛ́li, mmbɔ muna Saltiɛ́li, mmbɔ muna Nɛ́i,

²⁸ mmbɔ muna Mɛ́lki, mmbɔ muna Ádi, mmbɔ muna Kɔsámu, mmbɔ muna Ɛlmadámu, mmbɔ muna Ɛ́li,

²⁹ mmbɔ muna Yɔsúa, mmbɔ muna Ɛliɛjɛ́ɛ, mmbɔ muna Yɔímu, mmbɔ muna Matáti, mmbɔ muna Láwi,

³⁰ mmbɔ muna Simɛɔ́ni, mmbɔ muna Yúda, mmbɔ muna Yɔsɛ́phu, mmbɔ muna Yɔnámu, mmbɔ muna Ɛliakímu,

³¹ mmbɔ muna Mɛlɛ́a, mmbɔ muna Mɛ́na, mmbɔ muna Matáta, mmbɔ muna Natáni, mmbɔ muna Daúdi,

³² mmbɔ muna Yɛ́sɛ, mmbɔ muna Ɔbɛ́di, mmbɔ muna Boáji, mmbɔ muna Salmɔ́ni, mmbɔ muna Nasɔ́ni,

³³ mmbɔ muna Aminadábu, mmbɔ muna Adimíni, mmbɔ muna Aáni, mmbɔ muna Ɛsilɔ́ni, mmbɔ muna Pɛlɛ́si, mmbɔ muna Yúda,

³⁴ mmbɔ muna Yakɔ́ɓɔ, mmbɔ muna Isáka, mmbɔ muna Abalaámu, mmbɔ muna Tɛ́la, mmbɔ muna Naɔ́li,

³⁵ mmbɔ muna Sɛlúgu, mmbɔ muna Lɛ́u, mmbɔ muna Pɛlɛ́gi, mmbɔ muna Ɛbɛ́li, mmbɔ muna Sɛ́la,

³⁶ mmbɔ muna Kainána, mmbɔ muna Aluphakisádi, mmbɔ muna Sɛ́mu, mmbɔ muna Nɔ́a, mmbɔ muna Lamɛ́ki,

³⁷ mmbɔ muna Mɛtusɛ́la, mmbɔ muna Ɛnɔ́ki, mmbɔ muna Yaɛɛ́di, mmbɔ muna Maalɛ́li, mmbɔ muna Kainána,

³⁸ mmbɔ muna Ɛnɔ́si, mmbɔ muna Sɛ́ti, mmbɔ muna Adámu, mmbé ɓa Mokonga.