Lóka 24 - Ɔngana á Kɛ̌kɛ

Jujúka á Yéso ka kukuwa

¹ Esa á yenga ka koɗokanaga á esa, ɓake ɗáɓáge ka bóta na ɓákumbi ɔphɔ á su ánjá, na nkoki nde ɗáɓáɓɔngisigi,

² ɓáodonda etae nde ɗáɓábisi ka ngia k'aphe á bóta na ɓáingitisi.

³ Ɓáongia suɓi í, ɓákádondɛ ye mǒnda á Mɔkɔta Yéso.

⁴ Ɓáoyayama phɛɛ ka nyɔngɔ ndɔ. Mɔngɔ moci ɓǒko ɓaɓɛ ɓáɔ̌sɛnɛkɛa, cɛɗɛ! Na ɓáɔ́ligi ngɔ́mbɛ á phenuaga phɛɛ.

⁵ Wa, ɓake ndɔ ɓáoɓá na kɔɓɔɓɔkɔ, ɓáɔgɔtɔma. Mpɔ ɓǒko ndɔ ɓáǒngoɗea gea: «Ɓoonkaɓa nkpa nde aoenda ka ɔlɔ á ɓasí ka ɓo?

⁶ Nna wani a ye jujúki ndiu ka kukuwa. Kanisiani phɔ́ nyɔngɔ nde ɗánɔtɔ̌mi ɓî ɗátú phɔ́tɔ na Galiláya gea:

⁷ ‹Ambe ɓámbisɛ Muna-Nkpa ka njaga á ɓato á ɓojeɗe, ɓánkɔkɛɛ ka moyangɔ na ájujúkɛ ka kukuwa k'ésa á ko isaɔ.›»

⁸ Mpɔ ɓake ndɔ ɓáokanisia nyɔngɔ nde Yéso ɗáyɔngi.

⁹ Ɓáotóka ka bóta na gǎ tɔ̌miaga mbino nde bui ka ɓagoigi nkama na moci (11) na ɓuangbo ɓɔbu.

¹⁰ Ɓake ndɔ ɗáɓátú: Malía Magadála, Yɔána, Malía ama-Yakɔ́ɓɔ na ɓake ɓuangbo ɓunde ɗáɓátú kimoci na ɓɔ. Ɗáɓětɔ̌migi ɓateki mbino ndɔ,

¹¹ ɓateki ɓákáɓeekeɛ gǎkɛ nyɔngɔ ndɔ, ɗáɓáokanisia te, ande nyɔngɔ á jǎi-jǎi.

¹² Mpɔ Pɛ́tɛɛ áoma, áoga mbangɔ ka bóta. Wa, áogbúta ka kɛngɛɗia ú, â tɔ ɔɔna jǎi á ngɔ́mbɛ. Mbusa á wa, áoja mɔtɛ-akɛ n'aotangaaga ka nyɔngɔ ndɔ ɗányɛ́nyi.

Yéso sɔsɔɓɛ á ɓagoigi ɓaɓɛ k'aphe á Ɛmáu

¹³ Cɔ, k'ésa ndɔ tɔ, ɓagoigi ɓaɓɛ ɓáoga ka nji moci nnde ɓáɔɔphana Ɛmáu. Nji ndɔ, ɗangamana í ɗátúɔbɛda mbenɔ iɓɛ á tamba ka jua na Yɛusalɛ́ma.

¹⁴ Wa, ɓáɔyɔngaga sɔsɔɓɛ aɓɔ ka nyɔngɔ bui nde ɗányɛ́nyi.

¹⁵ Ɓî ɗáɓáikíí yɔngaga na ianaga, Yéso sisakɛ áɔsɛkɛɗa bíbí aɓɔ, áoga kimoci na ɓɔ,

¹⁶ iso aɓɔ, ɗáɔmɔna, ɓákánengekisɛ gǎkɛ.

¹⁷ Mpɔ Yéso áǒúsia gea: «Nyɔngɔ sina nde ɓɔmaɔyɔngaga na ɓo ka tamba?» Wa, ɓáomama na ɓáphindigi kiki.

¹⁸ Ka ɓɔ moci mmbé ɓáɔmɔphana Klɛɔ́pa áonsikisia gea: «Ɓato á ka Yɛusalɛ́ma ɓáúbi nyɔngɔ ndee. Ande gea te oɓɛ sisakɔ tɔ aámbé kóúbi nyɔngɔ nde anyɛ́nyi ka ɓ'esa nde suɓi á Yɛusalɛ́ma?»

¹⁹ Mpɔ Yéso â goto ǒsikisia te: «Nyɔngɔ sina?» Ɓáonsikisia te: «Nyɔngɔ nde anyɛ́nyima ka phɔa Yéso mmbé ɓá Najalɛ́ti. Yɛ, ɗátú mɔtu-nyɔngɔ akpɛkpɛ ndea Mokonga ka bɛɗanaga akɛ na ka yɔnga akɛ mosá á Mokonga na mosá á ɓakpa.

²⁰ Cɔ, ɓagbɛga á ɓatoɓeigi-phɛ́a na ɓagbɛga nɛsu ɗáɓántɔgi gea te ákuwɛ, ɓáɔnkɔkɛaga ka moyangɔ.

²¹ Nseɓeɔ nesu ɗátú gea te, yɛ aámbé aephúiande Ɓaisilaɛ́li ka kɔkɔɓɛ. Cɔ, gǔ índɔ bui, a ye esa isaɔ ɓî nyɔngɔ ndɔ atɔtɔkɛani.

²² Goto, ka ɓake á k'ékombo nɛsu ɓásopi ketangaɔ ka gǎ aɓɔ ka koɗokanaga ésa ka bóta,

²³ ɓákádondɛ gǎkɛ mǒnda á Yéso. Ɓake ndɔ ɓáoja ka ngoɗea asu gea: Ɓamalaéka ɓátóɛsɛnɛkɛi na ngoɗea ɓɔ gea: ‹Yéso aoenda.›

²⁴ Ka ɓunde ɗáɓátú kimoci na ɓesu ɓáoga ka bóta, ɓâ tɔ odonda ú ɓíndɔ ɓake ndɔ ɓátɔ́yɔngi. Ɓɔ, ɗáɓákámɔni gǎkɛ Yéso.»

²⁵ Mpɔ Yéso áǒngoɗea gea: «Ɓabóbó nde, ca! Měma anu aɗokomani ka ɓeekea nyɔngɔ bui nde ɓaɔtu-nyɔngɔ ndea Mokonga ɗáɓáyɔngi.

²⁶ Ande gea te kátókeni gǎkɛ Masíya átambɛgɛ ɓó na ángiɛ ka ɓoombia nɛkɛ?»

²⁷ Mpɔ Yéso áɔ̌tɔmiaga base nyɔngɔ nde ɗáɓáyɔngi ka phɔakɛ suɓi á Ɓuku á Mokonga buakɛ, kpanga k'índe á Mósa na tútuisa ka ɓuku bui á ɓaɔtu-nyɔngɔ ndea Mokonga.

²⁸ Ɓî ɓájú bíbí á nji nde ɗáɓáge kau, Yéso áǒtomba ɓea nkpa n'aoga ɗanga.

²⁹ Ɓagoigi ndɔ ɓáonimisia na yɔnga gea: «Ika kimoci na ɓesu nga, esa aye na gɔgɔmani, maní age.»

³⁰ Mpɔ Yéso áoika kimoci na ɓɔ ka mɛja, áobɛɗa mokati na bisa á njaga gǔ í, mpɔ áoɓúna ú na gabea ɓɔ.

³¹ Ɓî iso aɓɔ akoɗokani ye, mpɔ ɓáonengekisa Yéso. Mbusa á wa, ɓákámɔnɛ ye.

³² Mpɔ ɓáɔyɔngaga sɔsɔɓɛ aɓɔ gea: «Mpɔ měma asu áɓɛmaǒtoɓoaga ɓî atúɔsɔtɔmiaga k'aphe, kantíti á nyɔngɔ nde ɓáɗundu suɓi á Ɓuku á Mokonga!»

³³ Ka mbenɔ ndɔ tɔ, ɓáɔmɛɛkɛana ka ja na Yɛusalɛ́ma. Ɓáǒdonda ɓagoigi nkama na moci (11) na ɓáiki kimoci na ɓakpa ɓunɛngbo,

³⁴ ɓunde ɗáɓáɔyɔnga gea: «Eya, Mɔkɔta ajujúki tɔ ɗoni, nga Simɔ́ni amɔni ka yɛ.»

³⁵ Mpɔ ɓagoigi ndɔ ɓáɔ̌tɔmiaga ɓɔ nyɔngɔ bui nde ɗányɛ́nyi k'aphe na ɓî ɗáɓánengekisi Yéso ka mbenɔ nde ɗátúoɓuna mokati.

Yéso aɛsɛnɛkɛi ɓagoigi nɛkɛ

³⁶ Cɔ, na ɓá phɔ́tɔ kɔtɔmiaga mbino ndɔ, Yéso áɔsɛnɛka sɔsɔɓɛ aɓɔ, cɛɗɛ! Áǒngoɗea gea: «Ɓáni na ɓujɛjɛ.»

³⁷ Ɓagoigi ndɔ ɓáoima, ɓáoɓá na kɔɓɔɓɔkɔ, ɓáokanisia te ɓáɔni oketi.

³⁸ Wa, Yéso áǒngoɗea gea: «Ɓoagatani ka ɓo? Měma anu ana ngǎka ka ɓo?

³⁹ Eme aámbé! Ɔ́nani phɔ́ njaga ani n'ecinji ani! Ómoɓaɓáni, ɓɔ́ɛnjiɛ, nga oketi nna na kesuku, nna phɔtɔ na nkua ɓínde ɓɔɔmɔɔna na neně.»

⁴⁰ Mbusa á nndɔ, áɔ̌ɓɔnisa njaga akɛ, n'ecinji akɛ.

⁴¹ Mpɔ ɓî ɗáɓá na ngǎka ka nyɔngɔ á maseye phɔtɔ na tangaaga, Yéso áǒɓúsia gea: «Ɓona kema á ko ea wani?»

⁴² Ɓáomopha gbútuka á sú na ɓáɓáɓi,

⁴³ áɔbɛɗa ú na ea í mosá aɓɔ.

⁴⁴ Mpɔ Yéso áǒngoɗea ɓagoigi nɛkɛ te: «Ɓɔɔni nyɔngɔ nde ɗénóngoɗi na ne phɔ́tɔ na ɓenu gea: Ambe kema bui nde ɗáɓáɗundu ka phɔani suɓi á ɓuku ndea Mósa, nnde á ɓaɔtu-nyɔngɔ ndea Mokonga na nnde á Jabúi átɔtɔkɛanɛ.»

⁴⁵ Wa, Yéso áoúkua úbapha aɓɔ na engekisa kantíti á nyɔngɔ nde ɓáɗundu suɓi á Ɓuku,

⁴⁶ na ngoɗea aɓɔ te: «A tɔ ɓíndɔ ɗáɓáɗundu gea: Masíya atambagande na jujúka ka kukuwa k'ésa á ko isaɔ.

⁴⁷ Goto ka ina akɛ unge ɓɛ̌phɛande ɓato á ka ekuna bui, kpanga ka Yɛusalɛ́ma gea te, ɓákětiɛ tambea aɓɔ, mpɔ Mokonga áímɛ ɓojeɗe nɛɓɔ.

⁴⁸ Ɓenu gǎkɛ ɓonde ɓaɗigimisi á nyɔngɔ ndee.

⁴⁹ Cɔ! Neonotekisia kema nde Abɛ atɔ́ɔku. Ikani tɔ suɓi á ntanga-nji, na ka ɓî ɓukpɛkpɛ ka toka n'ego anogbukumiande.»

Yéso atái na koba

⁵⁰ Mbenɔ nde Yéso ɗěge na ɓagoigi bǎ ntanga-nji, bíbí á nji Bɛtanía, wa, áɔmɛma Mokonga n'ěbisíí njaga.

⁵¹ Ɓî ɗáǒbisia njaga, mpɔ áǒɗangamisa na ɓɔ, ka táia akɛ na koba.

⁵² Ɓɔ, ɓáogbúka muanku aɓɔ mosá á Yéso, mpɔ ɓáosikianaga na Yɛusalɛ́ma na maseye phɛɛ.

⁵³ Ɗáɓátú mbenɔ ásii k'éndu á Mokonga ka beba akɛ.