Lóka 18 - Ɔngana á Kɛ̌kɛMɛní á nke á kekusa na nteni-nyɔngɔ 1 Yéso ɗěngoɗi ɓagoigi nɛkɛ mɛní ka úbisa aɓɔ te, akeni ɓámɛmɛ Mokonga esa bubui kángá phúia á měma. 2 Mɛní kau ungee: «Nteni-nyɔngɔ moci ɗáiki ka ntanga-nji moci. Ɗánáomɓánga Mokonga, ɗá phɔtɔ ɔ̌ɓɛnjiaga ɓakpa. 3 Nke á kekusa moci ɗáiki phɔtɔ ka ntanga-nji ndɔɔ. Nke ndɔ ɗáogaga mɔtɛ á nteni-nyɔngɔ. Áongea ɓe: ‹Tena nyɔngɔ nɛmɔ na nkpa nde ɓɛmɔ̂ na yɛ ka nyɔngɔ.› 4 Esa ásii áɔnyɛ́nya, nteni-nyɔngɔ n'aɔkpɛma. Mpɔ, áoianaga ka měma akɛ ɓe: ‹Ɗoni, kéomɓánga Mokonga, ne phɔtɔ ɔ̌ɓɛnjiaga ɓakpa. 5 Nɛɛlí gǎkɛ na nyɔngɔ ndea nke á kekusa ndee. Kaɓondɔ, netenande nyɔngɔ ndɔ ka gea te, kabikɛ ye k'aphe á boma ani mɔ̌ na nyɔngɔ nɛkɛ.›» 6 Mpɔ, Mɔkɔta Yéso áogea: «Ɔ́kani nyɔngɔ ndɔ nteni-nyɔngɔ ajeɗe a tɔ yɔngi. 7 Ande gea, Mokonga kátenɛku gǎkɛ nyɔngɔ ndea ɓakpa nɛkɛ, ɓundɔ aɛsɔmbu, ɓî ɓáogáma mosá akɛ keiphe n'esa? Aphiphiande kángá enga aɓɔ? 8 Nenogie, atenande nyɔngɔ nɛɓɔ mbangɔ. Eme Muna-Nkpa gǎkɛ, mbenɔ á ja ani ka mokonda, nědondande ɓato á ɓeekea na ɓá phɔ́tɔ ɓei?» Mophaisáyɔ na mphendisigi-manjanja 9 Yéso ɗáyɔngi mɛní nde ka ɓakpa ɓunde ɗáɓáogea ɓánde ɓato á koɗoni na ɓáǒtondea ɓadaɓɔ. Mɛní kau aungee: 10 «Ɓakpa ɓaɓɛ ɗáɓáɗáphi ka ngia k'éndu á Mokonga k'aphe á mɛma á Mokonga. Moci ɗátú Mophaisáyɔ, ɓaangbo gǎkɛ mphendisigi-manjanja. 11 Mophaisáyɔ áǒmesia, áɔmɛma Mokonga ka měma akɛ sasakɛ ɓe: ‹Hoo Mokonga! Nekosikisíí ɓosegi nga, ké ɓea ɓakpa ɓuangbo ɓunde ɓánde ɓakukuɓa, ɓato á kanga koɗoni, ɓato á iɛɓɛ. Nekosikisíí phɔtɔ ɓosegi gea, ké ɓea mphendisigi-manjanja ndee. 12 Eme gǎkɛ, neoika mɔngɔ iɓɛ ka pɔsɔ moci kángá á eaga ka nyɔngɔ á mɛma á Mokonga. Ka phaeka moci á nkama, ɛ́tɔi nɛmɔ bui, neokopha.› 13 Mphendisigi-manjanja gǎkɛ, áomamaga ɗanga, kángá táisa iso akɛ na koba, áɔ̌ɓɛtaga k'égogo na ɓɔmbɛ, áogea te: ‹Hoo Mokonga! Ómokuia ngomi, nende nto á ɓojeɗe.›» 14 Mpɔ, Yéso áǒngoɗea: «Cɔ, negie, mphendisigi-manjanja ɗáji mɔtɛ-akɛ, na ye tɔ nto á koɗoni k'íso á Mokonga, nna Mophaisáyɔ. Nga, nkpa buakɛ mmbé aǒɗokomisa, aámbé ɓándidisande. Nkpa nde a gǎkɛ ǒdidisa, aámbé ɓánɗokomisande.» Yéso na ɓaniki ɓábɔbɔbɔa (Ɔna phɔtɔ Mat 19.13-15 ; Mkɔ 10.13-16 ) 15 Ɓakpa ɗáɓámbikíí Yéso na ɓaniki ɓábɔbɔbɔa ka gea, ábisɛ njaga gǔ aɓɔ. Ɓagoigi ɓáɔni ye ɓó, ɓáǒphekeaga ɓakpa ndɔɔ. 16 Yéso gǎkɛ, áɔ̌ɓɔphana ɓaniki, mpɔ áǒgea ɓagoigi ɓe: «Óɗeketani ɓaniki ɓábɔbɔbɔa ɓábikɛ mɔtɛ-amɔ, ɓókǒimisiɛmbɛ. Nga, koɓoamɛ ndea Mokonga a ka ɓakpa ɓunde ɓá ɓea ɓaniki. 17 Nenóngoɗi ɗoni gea, nkpa nde káɓeeki nyɔngɔ á koɓoamɛ ndea Mokonga ɓea miki, kángiɛku tanda kó.» Kema nde akeni ka tɔá á enda á mɛyɔ (Ɔna phɔtɔ Mat 19.16-30 ; Mkɔ 10.17-31 ) 18 Mɔkɔta á Ɓayúda moci ɗámúsi Yéso áogea: «Ngoisigi anjánjá, negeande ɓo ka gea, néɓɛ na enda á mɛyɔ?» 19 Yéso áonsikisia ɓe: «Ɔmɔɔphani Nto-anjánja ka ɓo? Mokonga sasakɛ tɔndɔ aámbé aanjánja. 20 Cɔ, oúba ɛɔphi nde: kómmowɛmbɛ nkpa, kotunganɛmbɛ, koúɓɛmbɛ, kon'yɔngɛɛ mɔnɔ nkpa mbɛa, nɗokomisa abakɔ n'amakɔ.» 21 Nkpa ndɔ áogea: «Ɗénekpangi amba ɛ́ɔphi ndɔ bui ka koniki ani.» 22 Yéso aɔ́ki ye nyɔngɔ ndɔ, áongoɗea: «Aojigíí goto kema moci. Sombisa nkumba nɛkɔ bui, ógabeɛ ɓato á ɓuyɛnɛ imɔna í. O ye ogea ɓó, mpɔ ôɓá na nkumba na koba. Mbusa, bika ómoɓeɛ.» 23 Nkpa ndɔ aɔ́ki ye nyɔngɔ ndɔ, áoɓá na ɓɔmbɛ, nga ɗátú ntɔi phɛɛ. 24 Ɓî Yéso ɗámɔni n'ana ɓɔmbɛ áɔyɔnga gea: «Amɔ̂ tɔ akpɛ ka ɓatɔi ngia ka koɓoamɛ ndea Mokonga. 25 Eya, nna akpɛ ka ngamia ngia ka kubu á mǔphe, a ndiu akpɛ phɛɛ ka ntɔi ngia ka koɓoamɛ ndea Mokonga.» 26 Ɓakpa nde ɗáɓáɔmɔ́ka Yéso, ɓáɔyɔnga ɓe: «Ani mmbé aɔtɔka n'aami ka měma?» 27 Yéso áǒsikisia: «Kema bui nde nkpa nna ɔtɔtɔkisa, Mokonga aámbé aɔtɔtɔkisa.» 28 Mpɔ, Pɛ́tɛɛ áongoɗea Yéso: «Ɔ́na phɔ́: ɓesu ɓeɗeketi kema bui ka nyɔngɔ á ɓeá akɔ.» 29 Yéso áǒngoɗea gea: «Eya! Nenóngoɗi ɗoni gea, nkpa nde aɗeketi mɔtɛ-akɛ, kaɓɛ nkakɛ, ɓana-amakɛ, ɓaɓɔkɔti akɛ na ɓ'anakɛ, ka nyɔngɔ á koɓoamɛ ndea Mokonga, 30 atɔande kema ásii ka matú ndee. Na ka matú nde abikaeka, aɓande na enda á mɛyɔ.» Yéso aɔtu kukuwa na jujúka akɛ ka kukuwa (Ɔna phɔtɔ Mat 20.17-19 ; Mkɔ 10.32-34 ) 31 Ɓî Yéso ɗédondanisi ɓagoigi nkama na ɓaɓɛ (12), ɗáengoɗi gea: «Ɔ́kani phɔ́! Ɓeotáia na Yɛusalɛ́ma. Kó unge atɔtɔkɛanande nyɔngɔ bui nde ɓaɔtu-nyɔngɔ ndea Mokonga ɗáɓáɗundu ka phɔani eme Muna-Nkpa. 32 Ande gea te, ɓámobisande ka njaga á ɓakpa ɓunde ɓáná Ɓayúda, ɓámɔtɛbɛagande, ɓámobómande, ɓámosúiagande soki. 33 Ɓámoɓindande na gbútu na kusa ani. Esa á ko isaɔ nejujukande ka kukuwa.» 34 Ɓagoigi gǎkɛ, ɓákaengekisɛ nyɔngɔ ndɔɔ. Nga, kantíti á nyɔngɔ ndɔ ɗákátú base. Ɗáɓákáengekisi phɔtɔ nyɔngɔ nde Yéso ɗáɔyɔnga. Ɓoamia á keíme-íme (Ɔna phɔtɔ Mat 20.29-34 ; Mkɔ 10.46-52 ) 35 Mbenɔ nde Yéso ɗábîmisi Yɛíkɔ, keíme-íme moci ɗáiki ka mpɛphɛ á aphe n'aɔmɛmaga. 36 Áɔɔ́ka usɛsɛ á ɓakpa na ɓáɔnyɛ́nya. Áǒúsia: «Kema sina ndɔ ee?» 37 Ɓakpa ɓáongoɗea: «Yéso ɓa Najalɛ́ti aámbé aɔnyɛ́nya.» 38 Mpɔ, keíme-íme áokoga: «Yéso Mosuko á Daúdi hoo! Ómokuia ngomi.» 39 Ɓakpa ɓunde ɗáɓáotamba mosá á Yéso ɓáomphekeaga gea te áphɔngɛ. Yɛ, â gǎkɛ otetemisa yɔnga akpɛ phɛɛ: «Mosuko á Daúdi hoo! Ómokuia ngomi ee.» 40 Yéso áomama, áososea gea ɓámbikɛ kakɛ na yɛ. Ɓî yɛ ajú ye bíbí akɛ, Yéso áomúsia, 41 «Okondi néogeeɛ ɓo?» Keíme-íme áogea: «Mɔkɔta, nekondi nɛ́ɔnaphɛ goto.» 42 Yéso áongoɗea: «Cɔ, ɔ́napha goto! Ɓeekea nɛkɔ akoamisi.» 43 Kɛ̌kɛndɔ tɔ, â goto ɔ̌napha. Áomɓea Yéso n'aombeba Mokonga. Ɓî ɓakpa ɓɔbu ɓáɔni ye ɓó, ɓâ phɔtɔ ombeba Mokonga. |
© 2021, Wycliffe Bible Translators, Inc.
Wycliffe Bible Translators, Inc.