Lóka 15 - Ɔngana á Kɛ̌kɛ

Mɔgɔgɔ nde ɗáɓungigi aɔnɛkani

¹ Ɓaphendisigi-manjanja na ɓato á ɓojeɗe ɓásii, ɗáɓáombîmisiaga Yéso ka ɔ́ka nyɔngɔ nɛkɛ.

² Ɓaphaisáyɔ na ɓaɗundu-ɛɔphi ɓâ gǎkɛ ɔngɔngɔnaga sɔsɔɓɛ aɓɔ. Ɓáogea: «Mogaa nde aǒsesea ɓato á ɓojeɗe. A phɔtɔ oeaga na ɓɔ!»

³ Mpɔ, Yéso áǒngoɗea mɛní ndee:

⁴ «Ka ɓenu sina, aoɓá mɔgɔgɔ n'amɓúngíí nanga áɓá na ɓɔ mia moci (100), nnaɔtɔka n'ěɗeketi ɓundɔ ɓájigi ka mbunja ka nkaɓɔ akɛ na ka ɓî amɔnande?

⁵ A ye ɔmɔna, áoɓá na maseye, áonkumba k'ɛkɔta,

⁶ áonsikianaga ně mɔtɛ-akɛ. Mpɔ, áɔ̌ɓɔphana ɓadakɛ na ɓamasambé akɛ, áǒgea ɓe: ‹Ɓéguɛni jaí nga, nɛmɔni mɔgɔgɔ nɛmɔ, mmbɔ atóɓungigi.›

⁷ Nenógie, ɓondɔ unge aɓande maseye ángbó na koba, aoɓá nto á ɓojeɗe moci n'akěti tambea akɛ ájeɗe, kɔ̌nyɛ́nya ɓakpa nkama ngianjaga gena na ngianjaga gena (99) ɓunde ɓáká na siki á kětia tambea aɓɔ.

Mɛní á imɔna moci nnde ɗáɓúngi

⁸ Cɔ, aoɓá nke moci n'ana imɔna nkama (10), moci n'amɓúngíí, atoɓoande ɔbɛa, áophua endu ka kaɓa í na moíngí na ka ɓî aɔnande.

⁹ A ye ɔɔna, áɔ̌ɓɔphana ɓadakɛ na ɓamasambé akɛ, áǒgea: ɓéguɛni jaí. Nga, nɛɔni imɔna ndɔ atómoɓúngíí.

¹⁰ Nenógie, ɓondɔ unge ɓamalaéka ndea Mokonga ɓáguande jaí ka nyɔngɔ á nto á ɓojeɗe moci n'akěti tambea akɛ.»

Mɛní á ɓaganda ɓaɓɛ

¹¹ Yéso â goto ogea: «Nkpa moci ɗátú na ɓaganda ɓaɓɛ.

¹² Mmbé miki áongoɗea abakɛ: ‹Abɛ, ómopa keɓu ínɛmɔ.› Abaɓɔ áǒgabea ɛtɔi nɛkɛ.

¹³ Mbusa á esa ábɔa, mmbɔ miki áoɓóaga nkumba nɛkɛ bui, áoga ně ka nji á ɗanga. Kó, áoɓúngisa nkumba ndɔ bui jǎi-jǎi.

¹⁴ Mbusa á gɔɓa á nkumba ndɔ bui, monganya áogua ka nji ndɔɔ. Miki áoɓá ka ɓuyɛnɛ.

¹⁵ Áoga okaɓa ekuma mɔtɛ á nkpa moci á ka nji ndɔɔ. Nkpa ndɔ áonteka ka ciko, k'aphe á isa á ɓangɛa nɛkɛ.

¹⁶ Yɛ, â ye tɔ na siki á ea tɔnɛ nde ɓangɛa ɗáɓátú oea. Kaɓɛ gǎkɛ na nkpa nde ɗáomopha kema.

¹⁷ Mpɔ, áokpanga ianaga sasakɛ, áogea: ‹Ɓabɛɗanigi ndea abɛ, ɓáotua eea na ɓáɔɔna. Eme gǎkɛ, na neokuwa na monganya.

¹⁸ Cɔ, nɛmɛande, néoga ondonda abɛ, néonɗengemisa ɓe: Abɛ, ɗéngǐí Mokonga ɓojeɗe, nê phɔtɔ ogea ɓojeɗe mosá akɔ.

¹⁹ Kékeni ye ɓámɔɔphanɛ anakɔ, ómobisa ye tɔ ɓea ka ɓabɛɗanigi nɛkɔ.›

²⁰ Wa, áɔmɛa, áoga mɔtɛ á abakɛ. N'a phɔ́tɔ ɗanga, abakɛ áɔmɔna, áonkuia ngomi phɛɛ, áoga mbangɔ, áonkotoa, ka kingo, áomumbiaga phɛɛ.

²¹ Anakɛ áongoɗea: ‹Abɛ, ɗéngǐí Mokonga ájeɗe, nê phɔtɔ ogea ɓojeɗe mosá akɔ. Kékeni ye ɓámɔɔphanɛ anakɔ.›

²² Mpɔ, abakɛ áǒngoɗea ɓabɛɗanigi nɛkɛ gea: ‹Kamisagani! Ɓɔ́gɔbɛɗɛ bɔngɔ ánjá phɛɛ, ɓɔ́mɔ́lisɛ. Mmakeani phɔtɔ mbángá ka miki á njaga, na ɓiato k'écinji.

²³ Mbikani na mponjo á ngɔmbɛ nde anɔni, ɓóntenɛ, ɓéɛgɛni ánjá na gúa jaí.

²⁴ Nga, miki nɛmɔ atóku mɔnɔ, ajujúki gǎkɛ ka kukuwa. Ɗáɓúngigi mɔnɔ, nɛmɔni gǎkɛ.› Mpɔ, ɓáokpanga gúa á jaí.

²⁵ Ka mbenɔ ndɔ, miki ímbɔ phomi ɗátú ka ciko. Ká ja akɛ, ɓî abîmisi endu, áɔɔ́ka embɔ na mɓina.

²⁶ Kaɓondɔ, áɔmɔphana ka ɓabɛɗanigi moci. Áomúsia kantíti á eongo ndɔɔ.

²⁷ Mbɛɗanigi áonsikisia: ‹Mɔtɔ akɔ akiɗi. Abakɔ anteni mponjo á ngɔmbɛ nde anɔni. Nga, anakɛ akiɗi ka ɓujɛjɛ.›

²⁸ Miki ímbɔ phomi áɔɓɛa, áoyá ngia ka jaí. Kaɓondɔ, abakɛ áojuana, áonɗengemisaga, ángiɛ.

²⁹ Miki áonsikisia: ‹Hoo, abɛ! Ka ɓasaga ɓásii nde nɛɔkɔbɛɗaneaga, kétingimbɛ mɔnɔ tanda ɛsɔ akɔ. Cɔ, kómopimbɛ mɔnɔ tanda miki á mɛmɛ, gea néguɛ jaí na ɓadani.

³⁰ Cɔ, ɓî anakɔ akiɗi, mmbɔ aúji ɛtɔi nɛkɔ bui ka nyɔngɔ ótungɔ, yɛ aámbɔ ontenei mponjo á ngɔmbɛ nde anɔni!›

³¹ Abakɛ áongoɗea ɓe: ‹Miki nɛmɔ, ɓe tɔ n'oɓɛ esa bui. Nkumba nɛmɔ bui a phɔtɔ akɔ.

³² Akeni ɓéguɛ jaí na ɓéɓɛ na maseye ka nyɔngɔ nde, mɔtɔ akɔ atóku mɔnɔ, ajujúki gǎkɛ ka kukuwa. Atóɓúngigi mɔnɔ, nɛmɔni gǎkɛ.›»