Lóka 11 - Ɔngana á Kɛ̌kɛ

Mɛmani Mokonga ɓe

¹ Esa moci, Yéso ɗáɔmɛma Mokonga k'ɔ́ma moci. Ɓî agɔɓi ye, ka ɓagoigi moci áomúsia: «Mɔkɔta, ósogoisaga ɛmɛmi ɓíndɔ Yoáni-Mɓatisi ɗégoisigi ɓagoigi nɛkɛ.»

² Yéso áǒngoɗea: «Mbenɔ nde ɓɔɔmɛma, yɔngani ɓe: Abɛ, Ina akɔ áɓɛ n'obebɔ. Koɓoamɛ nɛkɔ ábikɛ.

³ Ósopha eea nde akeni ka ɓesu kesande.

⁴ Íma ɓojeɗe nɛsu nga, ɓesu sasasu ɓe phɔtɔ oíma ka ɓakpa ɓɔbu ɓojeɗe nde ɓasogǐí. Kosóɗeketɛmbɛ ka mbenɔ á tombaga.»

⁵ Â goto ǒngoɗea ɓe: «Aoɓá ka ɓenu n'ana dakɛ, n'agě ondonda k'ésa angɛndi dakɛ áongea: ‹Dani ɔ́mɔɛkisa phɔ́ ɓamokati ɓasaɔ

⁶ nga, ka ɓadani moci amodondi, n'atóki tamba. Cɔ, ké na ka kema nde neomopha.›

⁷ Aoɓá mmbɔ a suɓi éndu na ansikisíí te: ‹Kómoagatisɛmbɛ nga, kɛ̌kɛnde nephembeketi ye kǐo. Eme na ɓaniki nɛmɔ ɓěnanu. Ké ye ɔtɔka na němesi ka opha akɔ mokati.›

⁸ Cɔ, nenógie, nanga kěmesi ka opha akɛ nga ande dakɛ, amophande tɔ kema bui nde ana siki í nga, anagatisi kángá á soni.

⁹ Kaɓondɔ unge nenóngoɗi, mɛmani, ɓánophande. Káɓágani, ɓɔɔnande. Gbondoagani kǐo, ɓánoúkuiande.

¹⁰ Nga, nkpa buakɛ mmbé aɔmɛma ɓámophande. Mmbé aokáɓaga, aɔnande. Mmbé aogbondoaga kǐo, ɓámúkuiande.

¹¹ Aba-miki sina sɔsɔɓɛ anu aɔtɔka n'amophi anakɛ njɔka n'ammɛmi ndiu sú?

¹² Aɔmmɛma eke, amophande nkoto?

¹³ Ɓenu gǎkɛ, nanga ɓî ɓonde ɓato ájeɗe, ɓo tɔ oúba gabea á ɓ'ananu kema ánjánja. Cɔ, Abanu mmbé á na koba, anɔ́nyɛ́nyi ɗoni k'égabɔ. Aeɓophande phɔtɔ Měma nɛkɛ á kanga ɓojeɗe ɓunde ɓáɔmmɛma.»

Yéso nnaɔɔngana na ɓansombo

¹⁴ Yéso ɗáǒjuanisa ɓansombo suɓi á kaúma. Ɓî ɓansombo ndɔ ɓájuani ye, kaúma ndɔ áokpanga yɔnga. Usɛsɛ á ɓakpa ɓáotangaaga phɛɛ.

¹⁵ Ɓunɛngbo gǎkɛ, ɓáogea: «Yéso aǒjuanisa ɓansombo ka ɓukpɛkpɛ á Bɛljɛbúli, mɔkɔta ndea ɓansombo.»

¹⁶ Ɓunɛngbo ɓáontombaga ka kaɓa mphangiɔ ɓáúbɛ gea, Yéso atóki na koba ɗoni.

¹⁷ Yéso aúbi ye kanisia nɛɓɔ, áǒgea te: «Aoɓá ɓato á ka koɓoamɛ moci na ɓákatanigi, koɓoamɛ ndɔ áoújukana, endu ndɔ áɔngbɔɔkana.

¹⁸ Aoɓá Sɛtáni n'aǒmanisa sasakɛ, koɓoamɛ nɛkɛ amamande ɓo? Negi ɓó nga, ɓogi te neǒjuanisaga ɓansombo ka ɓukpɛkpɛ á Bɛljɛbúli.

¹⁹ Aoɓá n'ande ɗoni gea te, neǒjuanisa ɓansombo ka ɓukpɛkpɛ á Bɛljɛbúli, cɔ, ani mmbé aéɓophi gǎkɛ ɓakpa nɛnu ɓukpɛkpɛ á juanisa á ɓansombo? Ka nyɔngɔ índɔ unge ɓakpa nɛnu ɓátenande nyɔngɔ nɛnu.

²⁰ Cɔ, eme gǎkɛ, ɓî neǒjuanisa ɓansombo ka ɓukpɛkpɛ á miki á njaga á Mokonga, ande gea, koɓoamɛ ndea Mokonga anódondi.

²¹ Mbenɔ nde nkpa akpɛkpɛ n'ana nkumba á emani aoamba endu nɛkɛ, ande gea te nkumba nɛkɛ aiki ka ɓujɛjɛ.

²² A gǎkɛ oɓá nto á ɓukpɛkpɛ kɔnyɛ́nya yɛ n'ambiki í, áonkínda, áomuta nkumba á emani ndɔ yɛ abisíí měma, â phɔtɔ ogaba nkumba bui nde amutí.

²³ Nkpa buakɛ mmbé káɔngani n'eme, ande mɓiɓia ani. Mmbé nnaomoenga ka dondanisaga, aophanja.

Ɓansombo ɓánjíí goto nkpa

²⁴ Mbenɔ nde ɓansombo ɓáojuana ka nkpa, ɓáoga ka nkanda ka kaɓaga ɔma á ɓuiki. Ɓî ɓákáɔni, ɓáǒgea sasaɓɔ: ‹Cɔ, ɓejande mɔtɛ-asu suɓi éndu nɛsu nnde ɓetóki kau.›

²⁵ Ka ja aɓɔ, ɓáodonda endu na ɓáphǔ na ɓáɓɔngisi.

²⁶ Mpɔ, ɓáoga ɔ̌bɛɗa ɓadaɓɔ ɓansombo ɓundɔ ɓájeɗe kɔ̌nyɛ́nya ɓɔ mɔngɔ ngianjaga iɓɛ (7). Ɓâ ye tɔ oga oika wa. Mbusa í, nkpa ndɔ ɗátú na ɓansombo ndɔ, â ye tɔ oɓá ajeɗe phɛɛ kɔnyɛ́nya mosá.»

Maseye á ɗoni

²⁷ Mbenɔ nde Yéso ɗáɔyɔnga nyɔngɔ ndɔ, nke moci n'aka usɛsɛ, áongoɗea n'ɛsɔ akpɛ gea: «Maseye ka nke ndɔ ɗáɔɓɔkɔti na úngisa akɔ.»

²⁸ Yéso â gǎkɛ ǒsikisia gea: «Maseye a ndiu ka ɓundɔ ɓáɔɔ́ka nyɔngɔ á Mokonga na tɔtɔkisa í.»

Nyɔngɔ á kesande anyɛ́nyi nnde á kala

²⁹ Ɓî usɛsɛ á ɓakpa ɗáɓámɓombotaneigi, Yéso áǒgea: «Ɛɓɔkɔti ndea kesande aájeɗe. Ɓáokaɓa négeɛ ka ɓɔ ketangaɔ. Ɓáɔnande tɔ ketangaɔ moci, nnde akengeani n'índe á Yɔ́na.

³⁰ Nga, ɓî Yɔ́na ɗátú mphangiɔ á ketangaɔ ka ɓato á ka Nináwe, ɓondɔ unge eme Muna-Nkpa neɓande k'ɛ́ɓɔkɔti ndea kesande.

³¹ Esa á tena á nyɔngɔ, nke moamɛ ndea Sɛ́ba ɛ̌tɔngaeka ɓato á k'ɛ́ɓɔkɔti ndee, áotena nyɔngɔ nɛɓɔ akpɛ nga, ɗátóki ka nji á ɗanga phɛɛ kuɓî mokonda age osungiaga k'aphe á ɔ́ka á nyɔngɔ á kɔɓɔɔngɛ ndea moamɛ Sɔlɔmɔ́nɔ. Kɛ̌kɛnde gǎkɛ, nyɔngɔ á kesande anyɛ́nyi nnde á Sɔlɔmɔ́nɔ.

³² Esa á tena á nyɔngɔ, ɓato á ka Nináwe ɓɛ́tɔngaeka ɓato á k'ɛ́ɓɔkɔti ndee. Ɓáotena nyɔngɔ nɛɓɔ akpɛ nga, ɗáɓákěti tambea aɓɔ ɓî ɗáɓáɔ́ki ɓɔphɛi ndea Yɔ́na. Kɛ̌kɛnde gǎkɛ, nyɔngɔ á kesande anyɛ́nyi nnde á Yɔ́na.»

Iso ande ɔbɛa á ka nyama á nkpa

³³ «Nna na nkpa nde aotoɓoa ɔbɛa ka sɔmɛa í, kaɓɛ ka gbukumia í na mbeka. Ɓá ndiu ɔbɛɛngisa ka ngeɔ ka gea te, ɓunde ɓáongia ɓáɔnɛ bɛnya í.

³⁴ Iso akɔ ande ɔbɛa á ka nyama akɔ. Aoɓá iso akɔ na ánjá, nyama akɔ bui áɔbɛnya. A gǎkɛ oɓá n'íso akɔ na ájeɗe, nyama akɔ áoɓá ka kaiphiɔ.

³⁵ Ɓî a ɓó, ɛ́ngɛpha ka gea, bɛnya nde a suɓi akɔ kěketiɛmbɛ ka kaiphiɔ.

³⁶ Aoɓá nyama akɔ bui n'aɔbɛnya, na kau nna ka kaiphiɔ, aɓande na bɛnya ɓea ɓî ɔbɛa aokojegisia bɛnya í.»

Kitɔngi ka Ɓaphaisáyɔ na ɓaɗundu-ɛɔphi

³⁷ Ɓî Yéso ɗágɔɓi yɔnga, Mophaisáyɔ moci áɔmɔphanea eea mɔtɛ-akɛ. Wa, Yéso áongia, áoika ka mɛja.

³⁸ Mophaisáyɔ ndɔ, ɓî ɗáɔni gea, Yéso ɗákásokosi njaga mosá á eaga, áotangaaga.

³⁹ Mpɔ Mɔkɔta Yéso áongoɗea: «Cɔ, ɓenu Ɓaphaisáyɔ, ɓo tɔ osokosa cǎ n'ɔphɛphɛ ka ngɔngɔ í, měma anu n'atúmi gǎkɛ na kokae na ɓojeɗe.

⁴⁰ Ɓabóbó nde ca! Nkpa nde aɓɔngisigi ngɔngɔ á kema nna tɔndɔ yɛ aámbé aɓɔngisigi phɔtɔ suɓi í?

⁴¹ Cɔ, óɓophani ɓato á ɓuyɛnɛ kema nde a suɓi anu. Mpɔ, nyɔngɔ nɛnu bui â ye tɔ oɓá ánjá.

⁴² Ngomi ka ɓenu Ɓaphaisáyɔ! Ɓoongabea Mokonga phaeka moci á nkama á kema ábɔbɔbɔa nde aɔɛkɛmisaga eea. Ɓô ndiu ɔɓɛnjiaga koɗoni n'ekondi ndea Mokonga. Akeni ndiu ɓɔ́tɔtɔkisɛ nndɔ kángá á ɗeketa nndɔ á mosá.

⁴³ Ande ngomi ka ɓenu Ɓaphaisáyɔ, ɓo tɔ okonda ika ka kankaanga á mosá suɓi éndu á madondanɔ ndea Ɓayúda ka nyɔngɔ á Mokonga. Ɓokondi phɔtɔ ɓánoseseɛ ka ntanga.

⁴⁴ Ande ngomi ka ɓenu nga, ɓo ɓea bóta á kala, nnde ɓakpa ɓáotámbaga gǔ í na ɓáká ye oúba.»

⁴⁵ Wa, ka ɓaɗundu-ɛɔphi moci áongea: «Ngoisigi, ɔɔyɔnga ɓondɔ, ande gea osóbómi phɔtɔ.»

⁴⁶ Yéso áonsikisia: «Ngomi anu phɔtɔ ɓaɗundu-ɛɔphi nga, ɓǒkumbisa ɓakpa nkumba áɗoko ka kumba í, na ɓenu ɓókótanda okonda samboa kau na miki á njaga moci.

⁴⁷ Ngomi anu! Nga, ɓɔɔphɛkɛa bóta á ɓaɔtu-nyɔngɔ á kala ndea Mokonga, ɓundɔ ɓatatanu ɗáɓěme.

⁴⁸ Nndɔ aúbisi gea te, ɓoɓeekeani na ɓatatanu ka kema nde ɗáɓági nga, ɓɔ ɓáunge ɗáɓěme ɓaɔtu-nyɔngɔ ndea Mokonga. Ɓenu, ɓɔ̂phɛkɛa bóta aɓɔ.

⁴⁹ Nyɔngɔ ndɔ ungɔ Mokonga aengekisi ka kɔɓɔɔngɛ nɛkɛ: ‹Nětekisiande ɓaɔtu-nyɔngɔ nɛmɔ na ɓateki. Ɓémande ka ɓɔ na tambisaga á ɓunɛngbo.›

⁵⁰ Ka nyɔngɔ índɔ unge magia á ɓaɔtu-nyɔngɔ ndea Mokonga ɓɔbu, ɓundɔ ɗáɓěme ka kpanga á mokonda na kesande, a ka mɔ̌ á ɓato á k'ɛ́ɓɔkɔti ndea kesande.

⁵¹ Nndɔ ɗákpangi n'aɗǔkana á magia ndea Abɛ́li na ka ɓî magia ndea Jakaía ɗáɗuúkani. Eya, ɗáɓámowe Jakaía sɔsɔɓɛ á ɛtɛ-ɔ́phɛ́ɔ na ɔma á ɓoombia á suɓi éndu á Mokonga. Eya, nenóngoɗi, nyɔngɔ ndɔ bui a ka mɔ̌ á ɓato á k'ɛ́ɓɔkɔti ndee.

⁵² Ngomi anu ɓaɗundu-ɛɔphi! Ka nyɔngɔ nde ɓophembeketi kǐo á úbapha na ɓenu sisanu ɓókóongia kau. Ɓo ndiu ǒimisia ɓunde ɓá na siki á ngia.»

⁵³ Mbusa, Yéso áotóka ɓei. Ɓaɗundu-ɛɔphi na Ɓaphaisáyɔ ɓâ gǎkɛ okpanga ɓɛa phɛɛ, ɓáomúsiaga nyɔngɔ ásisǐ

⁵⁴ nga, ɗáɓáokáɓa gea te, áyɔngɛ ájeɗe, mpɔ ɓándungɛ.