Lóka 1 - Ɔngana á Kɛ̌kɛ

Ngia ka nyɔngɔ nde a suɓi á ɓuku

¹ Mɔkɔta Tɛɔphílɔ, Ɓakpa ɗanga-ɗanga ɗáɓákengi ɗundua nyɔngɔ á Mɔkɔta, nnde ɗágeani sɔsɔɓɛ asu.

² Ɗáɓáúsigi nyɔngɔ ndɔ ka ɓaɗigimisi ɓundɔ ɗáɓáɔni kema bui ka nkpangeɔ í, ɓáoɓá ɓabɛɗanigi á tɔ̌miaga nyɔngɔ á Mokonga.

³ Cɔ! Eme nebɛɗi phɔtɔ moangɔ á cɔca á cina á nyɔngɔ bui ka gea, néúbɛ, mpɔ néoɗunduiɛ ú ánjá mɔkɔta Tɛɔphílɔ.

⁴ Netógi ɓó, ka gea, óengekisɛ koɗoni á nyɔngɔ nde ɓátóogoisigi.

Éme á ketangaɔ ndea Ɛlijabɛ́ti

⁵ Ka matú á Ɛlɔ́dɛ, moamɛ á ka Yudɛ́a, nkpa moci ɗátú ntoɓeigi-phɛ́a ina akɛ Jakaía. Yɛ, ɗátú ka ketoto ndea Abíya. Nkakɛ Ɛlijabɛ́ti ɗátú k'ékombo ndea Alɔ́ni.

⁶ Ɓɔbu ɓaɓɛ ɗáɓátú ɓato á koɗoni k'íso á Mokonga. Ɗáɓáotambea ɓíndɔ ɛɔphi bui ndea Mɔkɔta ayɔngi, na tɔtɔkisa á kema bui nde Mokonga ɗáososea kángá kisɛki.

⁷ Ɗáɓákátú gǎkɛ na miki nga, Ɛlijabɛ́ti ɗátú ngomba. Ɗáɓátú phɔtɔ ɓɔbu ɓaɓɛ ɓaphomi phɛɛ.

⁸ Cɔ, esa moci, Jakaía ɗáɔbɛɗanaga ekuma nɛkɛ á ntoɓeigi-phɛ́a mosá á Mokonga. Nga, ɗátú esa á ketoto nɛkɛ ka toɓoa á phɛ́a.

⁹ Ɓíndɔ ɗátú asii á ɓatoɓeigi-phɛ́a, ɓana-mɛlɔɛ ɗáɓángúi tɔ yɛ gea te, ángiɛ suɓi éndu ndea Mokonga ka toɓoa á ngaɛ́ á esomba.

¹⁰ Ɓî ɗáɔbɛɗanaga ekuma á toɓoa á ngaɛ́, ɓakpa ɓásii ɗáɓátú ɔmɛma Mokonga ka nsɛngɛ.

¹¹ Wa, malaéka nde ɓa Mɔkɔta, áɔnsɛnɛkɛa Jakaía, áomama ka njaga á mǔku á ɛtɛ-ɔ́phɛ́ɔ á toɓoa á ngaɛ́.

¹² Ɓî Jakaía amɔni malaéka, áoyayama, áoɓá na kɔɓɔɓɔkɔ.

¹³ Malaéka áongea te: «Jakaía, koɓángɛmbɛ nga, Mokonga aɔ́ki ɛmɛmi nɛkɔ. Nkakɔ Ɛlijabɛ́ti, amɓɔkɔtande k'akɔ miki-mǒko. Onsuande Yoáni.

¹⁴ Abikande k'akɔ na maseye phɛɛ, ɓakpa ɓásii ɓáguande jaí ka ɓɔkɔtɛana akɛ.

¹⁵ Nga, aɓande nto á ɓoombia k'íso á Mɔkɔta. Kánoɛeka tanda divai na etéte á makana bui. Atúmande na Měma á kanga ɓojeɗe n'a phɔ́tɔ suɓi á sɔphɔ á amakɛ.

¹⁶ Ějisande Ɓaisilaɛ́li ɓásii ka Mokonga, Mɔkɔta nɛɓɔ.

¹⁷ Ammɛande Mɔkɔta mosá, atambande na měma á ɓukpɛkpɛ ɓíndɔ Elía mɔtu-nyɔngɔ ndea Mokonga ɗátú ně. Abikande k'aphe á ɔnganisa á ɓaɓɔkɔti na ɓ'anaɓɔ, ɓaɗakekanigi-kecue ɓáúbaphande ɓea ɓato á koɗoni. Abisande měma ánjá suɓi á ɓakpa ka ɓondea á Mɔkɔta nɛɓɔ.»

¹⁸ Mpɔ Jakaía áongoɗea malaéka: «Kema sina nde amoúbisande nyɔngɔ ndɔ nga, eme na nkani ɓe ye tɔ ɓaphomi?»

¹⁹ Malaéka áonsikisia: «Eme nende Gabiliɛ́li, neomamaga mosá á Mokonga ka bɛɗaneaga akɛ. Yɛ, aámbé amoteki ka ngoɗea akɔ nyɔngɔ ánjá ndee.

²⁰ Cɔ, oɓande kaúma. Ɔyɔngaeka tɔ esa nde nyɔngɔ ndɔ bui atɔtɔkɛanaeka nga, kóɓeeki nyɔngɔ nɛmɔ. Nyɔngɔ ndɔ bui atɔtɔkɛanande ka mbenɔ nde Mokonga aangí.»

²¹ Wa, ɓakpa ɓunde ɗáɓátú omɓondea Jakaía, ɓáotangaaga ka nyɔngɔ sina nde ɗáíphí k'éndu á Mokonga.

²² Â gǎkɛ ojuana na ká ye ɔyɔnga na ɓɔ. Mpɔ, ɓáoúba gea, aɔni mphangiɔ k'éndu ndea Mokonga. Â tɔ ɔyɔnga na ɓɔ na njaga, áojiga kauma.

²³ Matú ékuma nɛkɛ así ye, áoja mɔtɛ-akɛ.

²⁴ Mbusa á esa ábɔa, nkakɛ Ɛlijabɛ́ti áokumba éme, áǒbuniaga ně ka ɓasonge ɓɔku. Áɔyɔnga ka yɛ sasakɛ:

²⁵ «Cɔ, ɔna kema nde Mɔkɔta agi ka phɔani kesande, amophúi soni ka nkíndí á ɓakpa.»

Áɓɛ k'éme ɓíndɔ ɔyɔngi

²⁶ Ka songe á ko ngianjaga á éme ndea Ɛlijabɛ́ti, Mokonga áonteka malaéka Gabiliɛ́li ka ntanga-nji moci Najalɛ́ti ndea ka Galiláya.

²⁷ Áoga mɔtɛ á nseka moci ina akɛ Malía, mmbé mǒko moci k'ékombo ndea moamɛ Daúdi, ina akɛ Yɔsɛ́phu aámbé ɗántɔ́mi.

²⁸ Malaéka ndɔ áongia mɔtɛ á Malía, áonsesea: «Samba! Oɓɛ aámbé Mɔkɔta nɛmɔ akobisíí měma. Yɛ, a kimoci n'oɓɛ.»

²⁹ Malía áoyayama ka nyɔngɔ ndɔ, áoianaga, kantíti á nsesɔ ndɔɔ.

³⁰ Mpɔ Malaéka áongoɗea ɓe: «Malía, kóɓɛmbɛ na kɔɓɔɓɔkɔ nga, Mokonga akobisíí měma.

³¹ Cɔ, okumbande éme, ɔmɓɔkɔtande miki-mǒko, onsuande Yéso.

³² Aɓande na ɓoombia. Ɓámɔphanande phɔtɔ Muna-Mokonga Mmbé ana kɔkɔta bui. Mɔkɔta Mokonga amophande phɔtɔ koɓoamɛ ndea tatakɛ Daúdi.

³³ Aɓande moamɛ ndea Ɓaisilaɛ́li esa bubui, koɓoamɛ nɛkɛ káɓɛku na sungiaga.»

³⁴ Malía áomúsia malaéka: «Nyɔngɔ ndɔ atɔtɔkɛanande ɓo, ɓî kédondanimbɛ mɔnɔ na mǒko?»

³⁵ Malaéka áonsikisia te: «Měma á kanga ɓojeɗe adidande, áoika gǔ akɔ. Mokonga, Mmbé ana kɔkɔta bui, aogbukumiande n'iimbiɔ á ɓukpɛkpɛ nɛkɛ. Kaɓondɔ unge mmbé ɔmɓɔkɔtande aɓande nto á kanga ɓojeɗe, ɓámɔphanande phɔtɔ Muna-Mokonga.

³⁶ Nga, Ɛlijabɛ́ti, nto á k'ékombo nɛkɔ, a phɔtɔ na éme á miki-mǒko ka kophomi akɛ. Mmbɔ ɓátúma ɔmɔphana ngomba, ana éme á ɓasonge ngianjaga (6).

³⁷ A tɔ ɓó, ka nyɔngɔ nde, kema bubui a tɔ ɔtɔtɔkɛana ka Mokonga.»

³⁸ Mpɔ Malía áoɓeekea: «Nende mbɛɗanigi nde ɓa Mɔkɔta. Átɔtɔkɛanɛ k'éme ɓíndɔ ɔyɔngi.» Wa, malaéka áoga.

Njokoa á miki ka sɔphɔ á amakɛ

³⁹ Ka ɓ'esa ndɔ tɔ, Malía áoma, áokamisaga gǎ ka ntanga-nji á mamba-mamba á Yudɛ́a.

⁴⁰ Áongia k'éndu ndea Jakaía, áonsesea Ɛlijabɛ́ti.

⁴¹ Ɓî Ɛlijabɛ́ti aɔki nsesɔ ndea Malía, miki ímbɛkɛ áonjokoa akpɛ ka sɔphɔ akɛ. Kaɓondɔ, Ɛlijabɛ́ti áotúma na Měma á kanga ɓojeɗe,

⁴² áɔyɔnga akpɛ gea: «Mokonga akophi ɓosegi kɔ̌nyɛ́nya ɓake ɓɔbu. Ɓosegi ndɔ a phɔtɔ ka miki ndɔ a ka sɔphɔ akɔ.

⁴³ Cɔ, nende ani ka gea, ama-Mɔkɔta nɛmɔ abiki mɔtɛ-amɔ?

⁴⁴ A ɓondɔ nga, kɛ̌kɛnde, ɓíndɔ nɛɔ́ki nsesɔ ndeakɔ, miki anjoku na maseye ka sɔphɔ ani.

⁴⁵ Maseye phɔtɔ k'óɓɛ ímbɔ oɓeeki nyɔngɔ bui nde Mɔkɔta akongoɗi nga, atɔtɔkɛanande.»

Embɔ ndea Malía

⁴⁶ Cɔ, Malía áɔɔ́tɔa gea: «Nenɗokomisi Mɔkɔta ka měma,

⁴⁷ měma ani ana maseye phɛɛ ka Namisi nɛmɔ Mokonga,

⁴⁸ nga, amɔɛnji na ngomi, eme mbɛɗanigi nɛkɛ á jǎi-jǎi. Eya, kpanga á kesande ɛɓɔkɔti n'ɛɓɔkɔti ɓámɔɔphanande Ama-ɓosegi,

⁴⁹ ka nyɔngɔ nde, Mɛna-Ɓukpɛkpɛ amogǐí kema ángbó. Ina akɛ a tɔ Nto á kanga ɓojeɗe,

⁵⁰ ngomi nɛkɛ aendande ka saga na saga ka ɓundɔ ɓáomɓánga.

⁵¹ Amesi njaga akɛ á ɓukpɛkpɛ, ěphanji ɓato á éɗokomisa ka měma.

⁵² Ětókisi ɓaamɛ ka kankaanga á kɔkɔta, áǒsamboa ɓakusi.

⁵³ Ěkutisi ɓato á nja na kema ánjá, â gǎkɛ ǒjisa ɓatɔi kángá á kema.

⁵⁴ Ěengi Ɓaisilaɛ́li, ɓabɛɗanigi nɛkɛ, kángá ɓosea ɓonjánja nɛkɛ,

⁵⁵ ka Abalaámu, k'ɛ́ɓɔkɔti n'ɛɓɔkɔti nɛkɛ esa bubui, ɓíndɔ ɗɛ́ɔku ɓatatasu.»

⁵⁶ Cɔ, Malía áoika mɔtɛ á Ɛlijabɛ́ti ɓea ɓasonge ɓasaɔ. Mbusa, áoja mɔtɛ-akɛ.

Miki ndɔ Yoáni aɓande ɓo?

⁵⁷ Ka mbenɔ á ɓoaé nɛkɛ, Ɛlijabɛ́ti áɔmɓɔkɔta miki-mǒko.

⁵⁸ Ɓamasambe akɛ na ɓaɓɔkɔti akɛ, ɓáɔ́ki ye ɓíndɔ Mɔkɔta ankui ngomi phɛɛ, ɓáogua jaí kimoci na yɛ.

⁵⁹ Mbusa ésa ngianjaga isaɔ (8), ɓáoga ongusa ganja. Ɗáɓáogea, ɓánsuɛ ina á abakɛ Jakaía.

⁶⁰ Wa, amakɛ áǒngoɗea te: «Gbati! Ina akɛ áɓɛ tɔ Yoáni.»

⁶¹ Ɓáonsikisia gea te: «Nna na nkpa nde ina akɛ a gǎkɛ ɓó, k'ékombo nɛnu.»

⁶² Mpɔ, ɓáomúsia abakɛ na njaga gea te: «Ɓánsuande ina sina?»

⁶³ Jakaía áɔmɛma miki á gaó, áoɗundua kau ɓe: «Ina akɛ ande Yoáni.» Ɓakpa ɓɔbu ɓáotangaaga.

⁶⁴ Kɛ̌kɛndɔ, aphenɔkɔ n'ɛsɔ á Jakaía áoúkukana, áokpanga beba á Mokonga k'ɛ́sɔ akpɛ.

⁶⁵ Ɓakpa ɓɔbu á ka mpɛphɛ aɓɔ ɓáoɓá na kɔɓɔɓɔkɔ. Nyɔngɔ ndɔ áondanda ka nji á mamba-mamba á ka Yudɛ́a bui.

⁶⁶ Cɔ, ɓundɔ ɗáɓáɔ́ki nyɔngɔ ndɔ, ɓáoianaga phɛɛ, ɓáoúsianaga: «Miki ndɔ aɓande gǎkɛ ɓo?» Njaga á ɓukpɛkpɛ ndea Mɔkɔta áoɓá ka miki.

Embɔ ndea Jakaía ka ɔtɔa akɛ nyɔngɔ

⁶⁷ Mpɔ Jakaía, aba-miki, áotúma na Měma á kanga ɓojeɗe suɓi akɛ. Áɔɔ́tɔa nyɔngɔ ɓe:

⁶⁸ «Ɓosegi ka Mɔkɔta, Mokonga á Ɓaisilaɛ́li, nga, akiɗi ka enga ɓakpa nɛkɛ na tókisa aɓɔ ka kɔkɔɓɛ.

⁶⁹ Asóphi Namisi angbóngbó k'ékombo ndea mbɛɗanigi nɛkɛ Daúdi.

⁷⁰ A tɔ ɓíndɔ ɗátɔ̌mi kala k'aphenɔkɔ á ɓaɔtu-nyɔngɔ nɛkɛ.

⁷¹ Asóamisande na ɓaɓíɓia nɛsu, phɔtɔ ka njaga á ɓundɔ ɓásokangei.

⁷² Ka gea ékuiɛ ɓatatasu ngomi, kángá ɓosea ɔngana nɛkɛ á ɓonjánja.

⁷³ N'ande ɓíndɔ ɗáɔphí ka tatasu Abalaámu,

⁷⁴ gea, asóphúiande ka njaga á ɓaɓíɓia nɛsu ka gea, ɓɛ́mbɛɗaneɛgɛ kángá á kɔɓɔɓɔkɔ,

⁷⁵ ɓéɓɛ na ɓonjánja na koɗoni mosá akɛ ka enda asu bui.

⁷⁶ Oɓɛ gǎkɛ miki, ɓákɔɔphanande mɔtu-nyɔngɔ ndea Mmbé ana kɔkɔta bui, nga, ɔmmɛɛande Mɔkɔta mosá ka ɓɔngisiaga aphe nɛkɛ,

⁷⁷ na úbisa á ɓakpa nɛkɛ nyɔngɔ á ɓoamia á ka měma, n'aphe á íma ɓojeɗe nɛɓɔ.

⁷⁸ Nga, Mokonga nɛsu asókondi ka měma akɛ phɛɛ. Asóengi ɓea maní á kamɓimba ka toka na koba.

⁷⁹ Ka bɛnya gǔ asu, ɓesu íɓunde ɓe ka keiphe na kusi á iimbiɔ á kukuwa, na ka ubisa asu aphe á ɓujɛjɛ.»

⁸⁰ Cɔ, Yoáni áɔmɔta, áokakamana ka měma. Mpɔ, áoika ka nkanda, na ka ɓî agaeka ǒphangisia base ka Ɓaisilaɛ́li.