Yakɔ́ɓɔ 5 - Ɔngana á Kɛ̌kɛ

Ɓɔphɛi ka ɓatɔi

¹ Cɔ, ɓenu ɓatɔi ɔ́mɔɔ́kani phɔ́ kɛ̌kɛnde! Tóɓokeani ngamɔ na ɓóɓengɛ ka nyɔngɔ á tambaga nde ɓoɓande suɓi í.

² Ɛtɔi nɛnu aújúkani, ɓansɛngɛ ɓáí bɔngɔ nɛnu.

³ Láté na imɔna nɛnu ana ɓánkɛngɛɔ. Ɓánkɛngɛɔ ndɔ, ande mphangiɔ á uja á nyama anu n'akɛkɛtande nyama anu ɓea nsa. Nga, ɓɔtɔi ásii k'ésa á sungiaga á mokonda.

⁴ Cɔ, ɓókótóephendi ɓabɛɗanigi á ka ciko nɛnu ɓíndɔ akeni. Ntaɓo á ɓabɛɗanigi ka nyɔngɔ á oɓayɔ ndɔ ɓotógi ka phɔaɓɔ atɔ́ɔ́kɛkani ka kɛcuɛ ndea Mɔkɔta, Mɛna-ɓukpɛkpɛ.

⁵ Ɓobomi kpɔngbɔ n'eɗáka ka enda anu ka mokonda. Ɓooɓondeaga kukuwa suɓi á ɓɔɛngɔ ɓea ɓanyama á etuge nde ɓánɔnigi na ɓáoɓondeaga tena aɓɔ.

⁶ Ɗóɓoteni akpɛ nyɔngɔ ndea ɓakpa ɓunde ɓáká na nyɔngɔ na mowa aɓɔ, ɓɔ ɗáɓákáeunisi.

Ambe ɓá na měma á phiphia ka mbenɔ á tambaga

⁷ Cɔ, ɓaya, phiphiani na ka ɓî Mɔkɔta abikande. Bisani kanisia anu ka ngubi ɓî aɔɔ́kanɛaga ɗúngú á mbó á ka ciko nɛkɛ. Yɛ aɔɔ́kanea ɔká á mbua á k'ama mosá-mosá na nnde á ka sungiaga.

⁸ Ɓáni phɔtɔ na měma áɗoko ka ɔ́kanea. Ɓáni na nténdé nga, Mɔkɔta a ye tɔ bíbí á bika.

⁹ Ɓaya, ɓɔ́kɔngɔngɔnɛanɛgɛmbɛ ka gea ɓákátenɛmbɛ nyɔngɔ nɛnu nga, nteni-nyɔngɔ a ye tɔ k'íso á mpume.

¹⁰ Ɓaya, ókanisiani phɔ́ ɓaɔtu-nyɔngɔ ndea Mokonga ɓunde ɗáɓáɔyɔnga k'ína á Mɔkɔta, ɓî ɗáɓáphiphíí suɓi á tambaga. Ɓenu, ɓáni phɔtɔ ɓó.

¹¹ Maseye áɓɛ ka ɓunde ɓáphiphíí tambaga. Ɗɔ́ɓɔɔ́ki nyɔngɔ á měma áɗoko ndea Yɔ́bu. Ɓooúba kema nde Mɔkɔta ɗági ka phɔakɛ mbusa í. Nga, Mɔkɔta atúmi na ngomi na ɓonjánja.

¹² Cɔ, ɓaya, mosá á kema bui, ɓɔ́kɔɔphɛmbɛ k'ína á mokonda, kaɓɛ nnde á na koba, kaɓɛ ka kema moci. Aoɓá na ɓoɓeeki, ɓeekeani tɔ ɗoni á ɗoni. A gǎkɛ oɓá na ɓoyé, yáni tɔ ɗoni á ɗoni ka gea te, Mokonga katenɛmbɛ nyɔngɔ nɛnu akpɛ.

¹³ Aoɓá ka ɓɛnu moci n'aotambaga, ámɛmɛ Mokonga. Aoɓá n'ana maseye, ánnembeɛ embɔ óbebɔ.

¹⁴ Aoɓá ka ɓenu moci n'aosamba, áɛɓɔphanɛ ɓagbɛga á kanisa ka gea te, ɓámɛmɛ Mokonga ka phɔakɛ na siá akɛ gamba k'ína á Mɔkɔta.

¹⁵ Mɛma á Mokonga suɓi á ɓeekea anamisande nsambi na Mɔkɔta ammamisande na íma ɓojeɗe nɛkɛ kaɓɛ n'atógi ú.

¹⁶ Cɔ, Phúiani kaɓu nde nkpa na nkpa atú ně ka dakɛ. Nkpa na nkpa ámɛmɛ phɔtɔ Mokonga ka phɔa dakɛ ka gea ɓóamɛ. Nga, ɛmɛmi á nto á koɗoni ana ɓukpɛkpɛ phɛɛ.

¹⁷ Cɔ, Elía mɔtu-nyɔngɔ ndea Mokonga ɗátú nkpa ɓea ɓesu. Ɗátétemisi mɛma á Mokonga gea, mbua kaɔkɛmbɛ. Mbua ɗákáɔki ka ɓasaga ɓasaɔ na gbútuka.

¹⁸ Â goto ɔmɛma, mpɔ, mbua áɔɔka, oɗo áophúia ɗúngú.

¹⁹ Ɓaya, aoɓá ka ɓenu n'aɓúngigi k'aphe ájeɗe, nkpa ɓaangbo â gǎkɛ onkiɗianisa k'aphe ánjá.

²⁰ Úbani gea: Mmbé ankiɗianisi nto á ɓojede k'aphe ánjá, anamisande ka kukuwa na ɓáímande ɓojeɗe nɛkɛ ásii.