Yakɔ́ɓɔ 4 - Ɔngana á Kɛ̌kɛ

Kákeni seɓea nyɔngɔ á ka mokonda

¹ Cɔ, ngíní na sani sɔsɔɓɛ anu atóki súwani? Nna phɔ́ otóka ka mɔphɛ ájeɗe nde aomana suɓi anu?

² Ɓookonda tɔá á kema, ɓókó gǎkɛ ɔtɔa. Ɓonde ɓato á kaiso na nsengo, ɓókó gǎkɛ ɔtɔka na ɓɔtɔí ka kema. Ɓoomana na sana kángá á tɔá kema nde ɓona mɔphɛ í. Ɓókóɔtɔa kema nde ɓona siki í nga, ɓókóɔmɛma ú mɔtɛ á Mokonga.

³ Aoɓá na ɓɔmɛmi, ɓókótɔɛku. Ka nyɔngɔ nde, ɓɔɔmɛma na mɔphɛ ájeɗe ka ɓungisa í ka tɔtɔkisa á mɔphɛ anu sasanu.

⁴ Ɓato á kanga ɓeekea nde ca! Ɓókóoúba gea, aoɓá nkpa n'abisi mɔphɛ akɛ ka nyɔngɔ á ka mokonda, ande mɓiɓia ndea Mokonga? Mmbé akondi bisa mɔphɛ akɛ ka kema á ka mokonda ande mɓiɓia ndea Mokonga.

⁵ Ɓomá ndiu okanisia te, nyɔngɔ nde a suɓi á Ɓuku á Mokonga ande á jǎi-jǎi ɓî agi te: «Mokonga nna phɔ́ na nsengo ka phɔa Měma akɛ nnde ɗábisi suɓi asu?»

⁶ Yɛ gǎkɛ, asophi ɓonjánja-ékondi nɛkɛ ángbó phɛɛ, ɓíndɔ Ɓuku á Mokonga ayɔngi phɔtɔ gea: «Mokonga nnaɔɔ́kana na ɓato á ɓemboko, a ndiu ǒɓopha ɓato á édidisa, ɓonjánja-ékondi nɛkɛ.»

⁷ Kaɓondɔ, ódidisani mosá á Mokonga, ɓón'yegɛ nketi na ateande áoga ɗanga.

⁸ Mbîmisiani Mokonga, yɛ anóbîmisiande phɔtɔ. Ɓato á ɓojeɗe, sokoseani njaga anu. Ɓato á mɔphɛ ɗanga-ɗanga, sokoseani měma anu.

⁹ Ɓáni suɓi á oiyɔ na ngamɔ ka nyɔngɔ á tambaga anu. Kětiani tɔa nɛnu ka ngamɔ na maseye nɛnu k'óiyɔ.

¹⁰ Ódidisani mosá á Mɔkɔta, na yɛ anotáisande.

Kotenɛmbɛ nyɔngɔ ndea dakɔ

¹¹ Ɓaya, ɓókoyɔngɛanɛmbɛ ájeɗe. Mmbé aɔn'yɔngɛa dakɛ ájeɗe, kaɓɛ tena á nyɔngɔ nɛkɛ, ayɔngɛi ɛɔphi ájeɗe na tena á nyɔngɔ í. O ye gǎkɛ otena nyɔngɔ ɛ́ɔphi mmbe ǒbisi ye tɔ nteni-nyɔngɔ. Kó ye nto á amba ɛ́ɔphi.

¹² Nga, Mokonga, yɛ sasakɛ aámbé aobikisa ɛɔphi n'aɔtɔka n'ateni nyɔngɔ. Yɛ aámbé ana ɓukpɛkpɛ á amisa na újá. Cɔ, oɓɛ onde ani ka tena á nyɔngɔ ndea dakɔ?

Ɓókoɓɛmbɛ na ɓemboko

¹³ Cɔ, ɔ́kani phɔ́, ɓenu íɓunde ɓoogea: «Kesande, kaɓɛ mama, ɓegande ka ntanga-nji ndɔ, ɓéoika kó ka saga moci, ɓesómbisande nkumba, ɓɛ́ɔtɔa imɔna.»

¹⁴ Cɔ, ɓókóoúba enda anu ndea mama nga, ɓo tɔ ɓea eɓundu nde aokiɗiana ka mbenɔ ábɔa, mbusa, áondia.

¹⁵ Atókeni gǎkɛ ɓɔ́yɔngɛ ɓe: «Aoɓá Mɔkɔta n'akondi, ɓeendande na ɓɛtɔtɔkisande nnde kaɓɛ nndɔ.»

¹⁶ Cɔ, ɓenu gǎkɛ ɓona ɓemboko n'ěbeba. Nndɔ bui aájeɗe.

¹⁷ Mmbé aoúba gea á ɓonjánja na nna gǎkɛ ogea ú, agi ɓojeɗe.