Yakɔ́ɓɔ 3 - Ɔngana á Kɛ̌kɛ

Akeni amba eɗáka mbenɔ á yɔnga

¹ Ɓaya, ɓókoɓikɛmbɛ k'ékuma á goisaga nga ɓooúba gea, ɓátenande nyɔngɔ nɛsu ɓagoisigi akpɛ kɔ̌nyɛ́nya ɓakpa ɓuangbo.

² Nga, ɓesu ɓɔbu ɓeogea nyɔngɔ ájeɗe-jeɗe. A gǎkɛ oɓá nkpa na nnaɔyɔngaga nyɔngɔ ájeɗe-jeɗe ande nkpa nde akeni, mmbé aɔtɔka amba nyama akɛ bui.

³ Ɓî ɓeobisa gbútuka á ngɔa k'aphenɔkɔ á ɓaphalási ande ka gea te, ɓásɔɔ́kɛ na ɓɛɔtɔka sɔndɔa aɓɔ ɔma bui.

⁴ A phɔtɔ ɓea koko ka iɓo. Nanga ángbóta, maiphianɔ n'aotiɓaga, ɓásɔndɔa tɔ ú na nkái ka gǎ ně nci nde mɔɓi akondi.

⁵ Eɗáka a phɔtɔ phaeka á nyama ábɔa. A gǎkɛ nto á ébeba na nyɔngɔ ángbóngbo. Ɔ́nani phɔtɔ nsa ábɔa ɓî aotoɓoa osaa ángbó.

⁶ Eɗáka a ɓea nsa. Aɓiki na ɓojeɗe á etéte bui. Ɓî eɗáka a suɓi á nyama asu, ɓojeɗe bui a phɔtɔ suɓi asu. Kaɓondɔ, aomúja nkpa buakɛ. Ande nsa nde aontoɓoa nkpa ka enda akɛ bui, nsa ndɔ atóki ka nji á ɓasí.

⁷ Nkpa aɔtɔka tuga á ɓanyama ɗanga-ɗanga, ɓunde ɓáoɗaa, ɓambǔ, na ɓasú. Yɛ, ɗáetugi tɔ ɗoni.

⁸ Nna gǎkɛ na nkpa nde aɔtɔka n'atugi eɗáka: Ande kema ájeɗe nde nnaǒsimbia. Ana cengu nde aokusa.

⁹ Ɓeombeba Mɔkɔta nɛsu na Abasu n'eɗáka, ɓe phɔtɔ ɔ̌sɛmɛaga ɓakpa nde Mokonga ɗáeconji ka keongi akɛ n'eɗáka.

¹⁰ Obebɔ, na sɛmɛaga, a tɔ otóka k'aphenɔkɔ ndɔ tɔ. Ɓaya, kákeni áɓɛ ɓó.

¹¹ Cɔ, ntogɔ moci aojuanisa iɓo ánjá, n'iɓo ájeɗe?

¹² Cɔ, ɓaya, me á eɓombi aɔtɔka n'agɔmbisi mpuwa? Me á mpuwa aɔtɔka n'agɔmbisi eɓombi? Ntogɔ moci nnaojuanisa iɓo ánjá, n'índe ájeɗe.

Kɔɓɔɔngɛ nde aotóka mɔtɛ á Mokonga

¹³ Cɔ, ani mmbé ande múbaphi na mɔɔngɛ sɔsɔɓɛ anu? Áphangiɛ ú ka tambea akɛ ánjá na k'ékuma nɛkɛ nnde aogea ka ɓɔphɔngɔ na kɔɓɔɔngɛ.

¹⁴ Ɓo ndiu oɓá na nsengo ájeɗe na měma á eteɓa, ɓókǒbebɛmbɛ ka mbɛa gea, ɓo na kɔɓɔɔngɛ.

¹⁵ Nga, kɔɓɔɔngɛ ɓíndɔ, nnaotóka na koba. A ndiu á ka mokonda, á kokpa phɛɛ na á koketi.

¹⁶ Nga, ɔma nde nsengo na měma á eteɓa aɓei, eongo a phɔtɔ ɓei n'etéte á ɓojeɗe bui.

¹⁷ Kɔɓɔɔngɛ nde atóki gǎkɛ na koba, ande phɔ́ á ɗoni, a phɔtɔ na ɓujɛjɛ, ɓɔphɔngɔ, á ɔ́ka mɔphɛ á ɓakpa, atúmi na ngomi, aɔtɔtɔkisa ɓonjánja, nna n'oɓayɔ na maibe.

¹⁸ Ɓunde ɓáɔbɛɗanaga ka bisa á ɓujɛjɛ ka mpɛphɛ aɓɔ, ɓáokona ka ɓujɛjɛ. Ɗungu nde ɓáɗunguande ande enda á koɗoni.