Yakɔ́ɓɔ 2 - Ɔngana á Kɛ̌kɛ

Ɓókoɓɛmbɛ n'oɓayɔ

¹ Cɔ, ɓaya, ɓenu íɓundɔ ɓomɓeeki Mɔkɔta nɛsu Yéso Kiísito, mɛna-ɓoombia, ɓókoɓɛmbɛ ǒɓaya ɓakpa ɓunɛngbo suɓi á ɓeekea nɛnu.

² Ianagani phɔ́ ka nyɔngɔ ndee: Nto á ɛtɔi moci angí ka madondanɔ nɛnu n'aɔ́li nsoɓe á láté, bɔngɔ nɛkɛ na ánjá phɛɛ. Múki â phɔtɔ ongia, bɔngɔ nɛkɛ n'abomokigi.

³ Kaɓɛ na ɓonsesi ánjá nkpa ndɔ angímá mosá n'aɔ́li bɔngɔ ánjá na ngoɗea akɛ: «Oɓɛ ika nɛkɔ wani unge aánjá.» Ɓóongoɗea múki te: «Oɓɛ gǎ óikɛ ndiu nɛkɔ kó n'omamege kaɓɛ n'okondi éphuía ka oɗo, k'ɔ́ma á bisia ecinji ani.»

⁴ Cɔ, nndɔ ɓogi ka ɓenu sisanu nna phɔ́ oɓayɔ ungɔ? Ɓókóteni phɔ́ nyɔngɔ na mɔphɛ ájeɗe?

⁵ Cɔ, ɓadani ékondi, ɔ́kani phɔ́! Nna phɔ́ Mokonga aámbé ɗáɛsɔmbu ɓaúki á ka mokonda gea, ɓáɓɛ ɓatɔi suɓi á ɓeekea na ɓátɔɛ phɔtɔ koɓoamɛ nde ɗáɛɓɔku ɓunde ɓánkondi?

⁶ Cɔ, ɓenu gǎkɛ, ɓǒtóndea ɓaúki! Nna phɔ́ ɓatɔi ɓáunge ɓáonótambisaga na tɔnga anu ka ntua á tena á nyɔngɔ?

⁷ Nna phɔtɔ ɓɔ ɓáunge ɓáobóma ina ánjá nde Mokonga ɗánóphi?

⁸ Cɔ, a gǎkɛ oɓá na ɓɔtɔtɔkisi ɛɔphi á ka koɓoamɛ ndea Mokonga, ámbé ɓogi ánjá. Nga ɓáɗundu suɓi á Ɓuku gea: «Nkonda dakɔ ɓíndɔ ǒkondi sasakɔ.»

⁹ Ɓo ye gǎkɛ oɓá n'oɓayɔ ámbé ɓogi ɓojeɗe. Ɓátenande nyɔngɔ nɛnu akpɛ n'ɛɔphi ka nyɔngɔ nde ɓoɓuni ú.

¹⁰ Nga, aoɓá nkpa n'aɓúni ɛɔphi moci nanga áamba nndɔ nɛngbo, ande mɓuni-ɛɔphi bubui.

¹¹ Nga, mmbé agi: «Kotunganɛmbɛ.» Agi phɔtɔ: «Kommowɛmbɛ nkpa.» Cɔ, kaɓɛ na kótungani, n'ommowe gǎkɛ nkpa, oɓúni tɔ ɛɔphi.

¹² Ambe yɔngɛa anu na tambea anu áɓɛ ɓea ɓakpa nde ɓátenande nyɔngɔ nɛɓɔ ka ɓeana n'ɛɔphi nde aotókisa ka kɔkɔɓɛ.

¹³ Kaɓɔndɔ, ɓátenande nyɔngɔ á ɓunde ɓáná na ngomi á ɓadaɓɔ kángá á ngomi. Nkui-ɓakpa ngomi káɓɛku gǎkɛ na kɔɓɔɓɔkɔ ka tena á nyɔngɔ.

Ɓeekea kángá á tambea ánjá, aku

¹⁴ Cɔ, ɓaya, ana kantíti sina kaɓɛ nkpa n'agi te, amɓeeki Mokonga na ká gǎkɛ otambea ánjá? Ɓeekea ndɔ aɔtɔka n'anamisi?

¹⁵ Aoɓá muna-amakɔ, kaɓɛ áwákɔ n'aka ɓuyɛnɛ á ngɔ́mbɛ na kema á koea esa bui.

¹⁶ Ana kantíti sina ka ɓenu moci ngoɗea akɛ: «Ógaye, gǎ ɔ́ɔ́lanɛgɛ ngɔ́mbɛ á tokisa phiɔ, óeɛgɛ ókutɛ!» na kómophi ka kema nde aonenga ka enda?

¹⁷ A phɔtɔ ɓó, ɓeekea á kanga ɓá na tambea ánjá aku.

¹⁸ Cɔ, aoɓá nkpa n'ayɔngande gǎkɛ te: «Oɓɛ, omɓeeki Mokonga, eme gǎkɛ nɛɔtɔtɔkisa ekuma ánjá.» Eme, nensikisiande ɓe: «Ɔ́mɔɔnisa phɔ́ ɓeekea nɛkɔ á kanga tɔtɔkisa ekuma ánjá. N'eme nɛkɔɔnisande ɓeekea nɛmɔ k'ékuma ánjá nde nɛɔtɔtɔkisa.

¹⁹ Oɓeeki gea Mokonga a tɔ moci? Aánjá. Ɓaketi ɓá gǎkɛ tɔ oɓeekea nndɔ, na ɓáɔɛkanaga.»

²⁰ Mbóbó nde ca! Okondi úba á gea te, ɓeekea á kanga tɔtɔkisa ékuma ánjá, nna na kantíti?

²¹ Cɔ, ɓókóokanisia ɓî Mokonga ɗámbisi Abalaámu, tatasu á ka měma áɓɛ nto á koɗoni? Ɗámbisi ɓo ka nyɔngɔ á tambea akɛ ánjá ɓî ɗámbisi anakɛ Isáka k'ɛ́tɛ-ɔ́phɛ́ɔ.

²² Nga, ɔɔni ɓî ɓeekea nɛkɛ ɗáojúkana na tɔtɔkisa á ekuma. Kaɓondɔ, ekuma áokpengeanisa ɓeekea.

²³ A tɔ ɓíndɔ ɗágeani suɓi á Ɓuku á Mokonga gea: Abalaámu ɗámɓeeki Mokonga, áoɓá nto á koɗoni k'íso akɛ. Ka nyɔngɔ índɔ unge, Mokonga ɗámɔphani dakɛ.

²⁴ Nga, nkpa buakɛ ande nto á koɗoni mosá á Mokonga ka nyɔngɔ á tɔtɔkisa ekuma, nna tɔndɔ ka nyɔngɔ á ɓeekea.

²⁵ Ɗátú phɔtɔ ɓó ka nke-íɛɓɛ Laába k'ékuma nde ɗági ka ɓakpa nde Mokonga ɗáeteki ka sɔna á nji na nyɛ́nyisa á ɓɔ k'aphe nɛngbo ka tisa á ɓɔ. Kaɓondɔ, Mokonga áɔmɔphana nto á koɗoni.

²⁶ Nga, ɓî nyama kángá ɛ́phɛu aku ye tɔ, ɓeekea kángá ékuma aku phɔtɔ.