Yakɔ́ɓɔ 1 - Ɔngana á Kɛ̌kɛ

Nsesɔ

¹ Eme Yakɔ́ɓɔ mbɛɗanigi ndea Mokonga na Mɔkɔta Yéso Kiísito nenósambei. Nenóɗundui ɓenu ɓato á k'ékuna nkama na iɓɛ (12) ɓunde ɓophanjekani ka mokonda.

² Ɓaya, ɓáni na maseye phɛɛ mbenɔ nde ɓoongia ka tombaga ɗanga-ɗanga.

³ Nga, ɓooúba gea, aoɓá na ɓongí ka tombaga kángá á ɗeketa á ɓeekea á Mokonga, ɓoɓande na moíngí.

⁴ Ambe moíngí ndɔ áɓɛ base ka gea, ɓɔ́mɔtɛ ka měma, ɓóɓɛ na ɓukpɛkpɛ kángá á kisɛki moci na kángá úka ka kema.

⁵ Cɔ, kaɓɛ ka ɓenu n'aúki kɔɓɔɔngɛ, ámmɛmɛ Mokonga na amophande ú. Nga, Mokonga aámbé aóɓopha ɓakpa ɓɔbu na měma mo kángá á oɓayɔ.

⁶ Ámɛmɛ ndiu ú na měma á ɓeekea, kángá á ngǎka. Nga, mmbé ana ngǎka, ande ɓea kɛtɛmbɔ á iɓo k'óɓenge, nnde maiphianɔ aoémisaga nci gbɔgbɔ.

⁷ Nkpa ɓea mmbɔ, kakanisiɛmbɛ gea aɔtɔka n'atɔi ka kema mɔtɛ á Mɔkɔta,

⁸ ka nyɔngɔ nde, ana mɔphɛ iɓɛ, nna phɔtɔ na měma á esimbia ka tambea akɛ.

Múki na ntɔi

⁹ Múki áɓɛ na maseye nga, Mokonga anɗokomisi.

¹⁰ Ntɔi áɓɛ gǎkɛ na maseye nga, Mokonga andidisi. Ntɔi a ɓea mayá á me nde aɔphɔ́phɔka.

¹¹ Nga, maní aojuana, áɔmɓɛta me ndɔ akpɛ, mayá na kasa í áɔɔmɔkaka, áotitikana. Ɓonjánja akɛ, áosia. A phɔtɔ ɓó ka ntɔi nga, akuwande n'a phɔ́tɔ suɓi á ekuma nɛkɛ.

Phiphia á tombaga

¹² Maseye ka nkpa nde aophiphia tombaga nga, a ye ɔtɔka, atɔande kekombó nde Mokonga ɛ̌ɔku ɓunde ɓánkondi, n'ande enda á mɛyɔ.

¹³ Aoɓá nkpa n'asuɓi á tombaga, kayɔngɛmbɛ gea: «Mokonga aámbé aomotombaga.» Nga, ɓákáɔtɔka na ɓántombigi Mokonga gea ágeɛ ɓojeɗe. Yɛ, nna gǎkɛ ɔtɔka n'antombigi nkpa.

¹⁴ Mɔphɛ ájeɗe á nkpa na nkpa aunge a ndiu omɓotea na ngísisa akɛ ka tombaga.

¹⁵ Mɔphɛ ájeɗe ndɔ a ye ɔmɔta áɔɓɔkɔta ɓojeɗe. Ɓojeɗe a ye ɔmɔta áɔɓɔkɔta kukuwa.

¹⁶ Cɔ, ɓaya, ɓókǒdemisɛmbɛ.

¹⁷ Nga, nkɛɓɛa bui, n'egabɔ ánjá bui aotóka na koba mɔtɛ á Mokonga, Nconji á owanga á na koba. Yɛ nnaǒketia ɓea iii á kema n'aǒgaiaga.

¹⁸ K'ékondi nɛkɛ sasakɛ, ɗásóphi enda suɓi á yɔnga nɛkɛ nnde ande ɗoni. Ka gea, ɓéɓɛ ɓoata á kema bubui nde ɗáconji.

Akeni ɔ́ka á nyɔngɔ na tɔtɔkisa í

¹⁹ Ɓadani ékondi, kanisiani phɔ́ nyɔngɔ ndee: Ambe nkpa buakɛ, áɓɛ aphǒ ka ɔ́kapha. Áɓɛ gǎkɛ aɗǒ ka yɔnga na ka ɓɛá.

²⁰ Nga, nto á esúia nnaɔtɔtɔkisa koɗoni mosá á Mokonga.

²¹ Kaɓondɔ, tókisani kema nde aɔjɔɔkisa měma na kokae ásii bui nnde ɓoně. Ɓeekeani ndiu na édidisa nyɔngɔ nde Mokonga akoni ka měma anu nga, nndɔ ana ɓukpɛkpɛ á amisa anu ka měma.

²² Ɓókoikiɛmbɛ tɔ ɔ́ka á nyɔngɔ ndea Mokonga, tɔtɔkisani ndiu ú ka gea, ɓókǒdemɛmbɛ sasanu.

²³ Nga, aoɓá nkpa n'a tɔ ɔ́ka ú, kángá á tɔtɔkisa í, áoɓá ɓea nkpa n'aɔɛnjia keongi akɛ ka kiyɔa.

²⁴ Mbusa á yɛ ɛ́ɔnjia, áoga, áoɓosea etéte akɛ.

²⁵ Cɔ, mmbé aoúba cɔca ánjá ɛɔphi á kanga ɓojeɗe ndea Mokonga, nnde ɗásotókisi ka kɔkɔɓɛ, na tétemisa í, nnaoɓosea nnde aɔɔ́ka, a ndiu ɔtɔtɔkisa ú ɓíndɔ ɛɔphi asosi. Kaɓondɔ, aɓande na maseye ka kema bui nde aɔtɔtɔkisa.

²⁶ Kaɓɛ nkpa n'agi te ande mokiísito á ɗoni, na nna gǎkɛ koamba yɔngɛa akɛ, ědemi sasakɛ, kanisa nɛkɛ a tɔ á jǎi.

²⁷ Kanisa ánjá na á kanga ɓɔjɔɔkiɔ k'íso á Abɛ Mokonga, ande amba á ɓaniki á jiga, na ɓake á kekusa suɓi á tambaga nɛɓɔ. Goto, teani ɓojeɗe á ka mokonda.