Ɓaɛphɛ́sɔ 6 - Ɔngana á Kɛ̌kɛ

Ɓaniki na ɓaɓɔkɔti aɓɔ

¹ Ɓenu ɓaniki, ɔ́ɓɔ́kani ɓaɓɔkɔti anu ɓíndɔ Mɔkɔta akondi. Nndɔ unge akeni ka ɓenu.

² «Nɗokomisa abakɔ n'amakɔ.» Nnde ande ɛɔphi á k'ama mosá-mosá na mɔkɔ ka gea:

³ «Oogea ɓó, nyɔngɔ nɛkɔ bui atambande ánjá na oendande saga ásii ka mokonda.»

⁴ Ɓenu ɓaɓɔkɔti, ɓókǒɓɛisɛmbɛ ɓaniki nɛnu. Ɔ́mɔtisani na goisaga aɓɔ ɓɔphɛi nde Mɔkɔta abisi.

Ɓakɔɓɛ na ɓakɔta nɛɓɔ

⁵ Ɓenu ɓakɔɓɛ, ɓáni kusi á ɓakɔta nɛnu á ka mokonda, óɗokomisani na ɓánga aɓɔ kángá á maibe, ɓíndɔ ɓoombɛɗaneaga Kiísito.

⁶ Ɓókóɓɛmbɛ tɔ ɔbɛɗanaga ámbé ɓánómamei ka ékondisaga na ɓɔ. Tɔtɔkisani ndiu mɔphɛ á Mokonga na měma mo, ɓea ɓakɔɓɛ á Kiísito.

⁷ Ɔ́bɛɗaneagani ɓakɔta nɛnu na měma mo, ɓea Kiísito aámbé ɓɔɔmbɛɗaneaga, nna ɓakpa.

⁸ Kanisiani gea, nkpa na nkpa mmbé aogea ɓonjánja, nanga áɓá nkɔɓɛ, káɓi nkɔɓɛ, Mɔkɔta amphendande ka ɓeana na ɓonjánja nde ɗági.

⁹ Ɓenu ɓakɔta, ógeeani phɔtɔ ɓakɔɓɛ nenu ánjá. Ɓókǒagatisɛmbɛ. Úbani gea, ɓenu na ɓakɔɓɛ nɛnu Mɔkɔta nɛnu a tɔ mo. Yɛ, ana koba nna n'oɓayɔ.

Nkumba émani nde Mokonga aobikisa

¹⁰ Cɔ, ka sungiaga, ógbagisanagani phɛɛ suɓi á Mɔkɔta na ɓukpɛkpɛ phɛɛ ndea Mɔkɔta.

¹¹ Ɔ́lani nkumba émani nde Mokonga abikisi. Mpɔ, ɓóǒsimbia ka tombaga ndea Nketi.

¹² Nga, ɓesu ɓékéomana na ɓakpa, ɓe ndiu omana na měma nde ɓáɔɔphana ɓakɔta á n'ego na oɗo. Ɓɔ, ɓá gǎkɛ tɔ ɓakɔta á mokonda á kaiphiɔ. Ɓeomana na ɓansombo ɓunde ɓáotamba ɔma bui ɓea maphopho.

¹³ Ɓî a ɓó, bɛɗani nkumba émani bui ndea Mokonga ka gea, ɓóubɛ kǒsimbia ka mana na mɓiɓia k'ésa ájeɗe nde aobika. Mbusa á gɔɓɛa emani unge ɓomamande akpɛ.

¹⁴ Cɔ, mamani akpɛ! Ɗoni áɓɛ ɓea angeɗe nɛnu, koɗoni áɓɛ ɓea ngɔ́mbɛ á k'égogo á nto émani.

¹⁵ Moíngi ka tɔ̌miaga á Mbino-Ánjá á ɓujɛjɛ, áɓɛ ɓea ɓiato nɛnu.

¹⁶ Ɓeekea á Mokonga, áɓɛ nguɓa nɛnu esa bui: Nnde aímande nsɔ́a á nsa ndea nketi.

¹⁷ Bɛɗani ɓoamia á ka měma ɓea kekombó á ngɔa na Mbino-Ánjá ɓea píndí nde Měma á kanga ɓojeɗe abikisi.

¹⁸ Mɛmani Mokonga kángá ɗeketa. Mɛmani mbenɔ bui ka ɓukpɛkpɛ á Měma. Phɛani tɔ̌ kángá ɛla k'ɛ́mɛmi ka phɔa ɓakpa ɓɔbu ndea Mokonga.

¹⁹ Mɛmani phɔtɔ ka phɔani ka gea, Mokonga ámopɛ nténdé ka ɓoabi nde akeni, ɓî nɛɔtɔmiaga Mbino-Ánjá nɛkɛ nde ɗásɔmi.

²⁰ Nende ntɔnganisi á Mbino-Ánjá, ka nyɔngɔ í unge ne ka mekakɔ. Kaɓondɔ, mɛmani Mokonga gea, nɛ́tɔmiɛgɛ ú na nténdé ɓíndɔ akenani ně.

Mɔkɔ á ka sungiaga

²¹ Dasu ékondi Tikíkɔ, ande mbɛɗanigi anjánjá ndea Mɔkɔta. Yɛ aámbé anóngoɗeagande nyɔngɔ nɛmɔ bui ka gea te, ɓóúbɛ enda ani a ɓo.

²² Nenteki mɔtɛ-anu ka tɔ̌mia anu mbino asu na gbagisaga anu ka měma.

²³ Ambe Mokonga Abasu na Mɔkɔta nɛsu Yéso Kiísito, áeɓophɛ ɓadasu ɓakiísito ɓɔbu ɓujɛjɛ, ekondani, na měma á ɓeekea.

²⁴ Ambe ɓonjánjá-ékondi ndea Mokonga áɓɛ ka ɓakpa ɓɔbu ɓunde ɓánkondi Mɔkɔta nɛsu Yéso Kiísito n'ekondi nde nnaosía.