Ɓaɛphɛ́sɔ 5 - Ɔngana á Kɛ̌kɛ

Enda suɓi á owanga

¹ Ɓî ɓonde ɓaniki ékondi ndea Mokonga, akeni tambea anu ákengeanɛ na Yɛ.

² Kaɓondɔ, ambe ekondi áɓɛ nsɔndɔi ka enda anu ɓíndɔ Kiísito ɗásókondi, áosókuia, áoɓá ɓea ɛkɔmi na phɛ́a á su ánjá nnde amɓɔngɛi Mokonga.

³ Ɓî ɓonde ɓato á k'ékombo ndea Mokonga, nyɔngɔ ájeɗe, ɓea iɛɓɛ, ɓɔjɔɔkiɔ, na mɔphɛ á kema, nna ánjá áɔ́kɛkanɛ ka ɔlɔ anu.

⁴ Ɓókóyɔngɛgɛ mɔnɔ nyɔngɔ á soni, nyɔngɔ á kobóbó na nyɔngɔ nde ajɔɔkani. Ambe ɓónsegɛ ndiu Mokonga ka ɛmɛmi nɛnu.

⁵ Úbani gea, ɓato á iɛɓɛ, ɓato á ɓɔjɔɔkiɔ, ɓato á kuma (ande gea ɗokomisa á ɓamokonga á mbɛa) nna na ka ɓɔ mmbé aɓande na ɓotukɔ ka koɓoamɛ ndea Kiísito na Mokonga.

⁶ Nkpa kanódemɛmbɛ na nyɔngɔ á jǎi-jǎi. Nga, ka nyɔngɔ índɔ unge, esúia ndea Mokonga ěguiande ɓakpa nde ɓánáɔmɔ́ka.

⁷ Kaɓondɔ, ɓókóɓɛmbɛ tanda kimoci na ɓɔ.

⁸ Mosá, ɗóɓotú suɓi á kaiphiɔ. Kɛ̌kɛnde gǎkɛ, ka nyɔngɔ á ɔngana anu na Mɔkɔta, ɓo ye tɔ suɓi á owanga. Ɓî aɓó, tambeani ɓea ɓato á owanga.

⁹ Nga, owanga aobikisa ɓonjánja bui, koɗoni na ɗoni.

¹⁰ Káɓáni kema nde áɔmɓɔngɛa Mɔkɔta.

¹¹ Ɓókǒngisɛmbɛ mɔnɔ ka nyɔngɔ nde ɓáogea suɓi á kaiphiɔ. Ɓókóbuniɛgɛmbɛ gǎkɛ nyɔngɔ kau.

¹² Nga, kema nde ɓakpa ndɔ ɓáogea ka ɓɔsɔmɛa, ande soni ka tɔ̌miaga í.

¹³ Mbenɔ nde ɓáká ye gǎkɛ ogbukumiaga kema ndɔ, econji í ánjá áɔsɛnɛka ka owanga.

¹⁴ Nga, kema bui nde aɔɔnɛkana base ande owanga. Kaɓondɔ unge ɓági: «Jujúka oɓɛ ímbɔ oka tɔ̌, Jujúka ka kukuwa ka ɔlɔ á ɓasí, na Kiísito abɛnyande gǔ akɔ.»

¹⁵ Cɔ, óengani ánjá ka tambea anu. Ɓókóɓɛmbɛ ɓea ɓabóbó, ɓáni ndiu ɓea ɓato á kɔɓɔɔngɛ.

¹⁶ Úbani kɔbɛɗaneaga mbenɔ nde anójiganei nga, ɓeoenda ka matú ájeɗe.

¹⁷ Kaɓondɔ unge, ɓókóbóbókɛmbɛ, úbani ndiu ánjá mɔphɛ á Mɔkɔta.

¹⁸ Makana kanɔ́bɛɗɛmbɛ nga, ɛbɛɗi á makana aomúja nkpa. Akeni ndiu, ɓótúmɛ na Měma á kanga ɓojeɗe.

¹⁹ Yɔngɛanagani nyɔngɔ nde a suɓi á Jabúi. Embɔ á suɓi á měma, némbeani Mɔkɔta embɔ á ɓuku á Jabúi ka beba akɛ suɓi á měma anu.

²⁰ Nsegani Abɛ Mokonga esa bui ka kema bubui, k'ína á Mɔkɔta nɛsu Yéso Kiísito.

Ɓɔphɛi ka phɔa ɓake-éyamani na ɓamunyaɓɔ

²¹ Ɔ́kanani na ɗokomisanani ka nyɔngɔ á ika kusi á kɔkɔta ndea Kiísito.

²² Ambe ɓake ɓáikɛ kusi á kɔkɔta á ɓamunyaɓɔ ɓíndɔ ɓá kusi á kɔkɔta ndea Mɔkɔta.

²³ Nga, mǒko ana kɔkɔta gǔ á nkakɛ ɓíndɔ Kiísito ana kɔkɔta gǔ á kanisa. Kiísito sasakɛ ande Namisi á kanisa nnde ande nyama akɛ.

²⁴ Ambe ɓake ɓáikɛ kusi á kɔkɔta ndea ɓamunyaɓɔ ka kema bui ɓíndɔ kanisa a kusi á kɔkɔta ndea Kiísito.

²⁵ Ɓenu ɓǒko, ókondani ɓake anu ɓíndɔ Kiísito akondi kanisa, áokuia ú

²⁶ ka gea, ásokoseɛ kanisa mosá á Mokonga: Áosokosea ú na yɔnga.

²⁷ Ɗákondi gea, kanisa áɔnɛkanɛ mosá akɛ n'ana ɓoombia phɛɛ, kángá: nkiki, kisɛki, na kema ájeɗe-jeɗe nɛngbo. Ɗákondi gea, kanisa áɓɛ á kanga ɓojeɗe na kángá ɔyɛyɔ.

²⁸ A phɔtɔ ɓó, ambe ɓǒko ɓáekondɛ ɓake aɓɔ ɓíndɔ ɓákondi nyama aɓɔ sasaɓɔ. Nga, mmbé ankondi nkakɛ, aékondi phɔtɔ sasakɛ.

²⁹ Nna na nkpa nde aɔtɔka na akangei nyama akɛ sasakɛ. A ndiu oisa na amba í, ɓíndɔ Kiísito aoamba kanisa.

³⁰ Nga, ɓende gbútuka á nyama akɛ.

³¹ A tɔ ɓíndɔ Ɓuku á Mokonga agi: «Ka nyɔngɔ índɔ unge, mǒko ansagande abakɛ na amakɛ, ɓájúkanande na nkakɛ, ɓɔbu ɓaɓɛ ɓáɓande nyama moci.»

³² Mokongo á nyɔngɔ á ɗoni ungɔ aɛsɔmɛani suɓi á yɔnga ndɔɔ. Eme nenóngoɗi gea, wani ande nyɔngɔ á Kiísito na kanisa.

³³ Cɔ, a gǎkɛ tɔ ɓó ka ɓenu: Ambe mǒko buakɛ ánkondɛ nkakɛ ɓíndɔ ěkondi sasakɛ na ambe nke ánɗokomisɛ munyakɛ.