Ɓaɛphɛ́sɔ 4 - Ɔngana á Kɛ̌kɛ

Júkana á kanisa suɓi á Kiísito

¹ Cɔ, eme aámbé ɓámomaki ka mekakɔ ka nyɔngɔ á bɛɗaneaga Mɔkɔta. Ɓî a ɓó, nenóɗengemisigi ɓe: Tambeani ɓíndɔ akeni ka mɔphani ndea Mokonga.

² Ɓáni na měma édidisa, ɓɔphɔngɔ na měma á phiphia, phiphianani n'ekondi.

³ Suiani ika suɓi á ɔngana nde Měma á kanga ɓojeɗe aobikisa ka ɓujɛjɛ nde anójúkanisi.

⁴ Nyama a tɔ moci na Měma moci. Mokonga ɗánɔɔphani phɔtɔ na nseɓeɔ moci.

⁵ Mɔkɔta a tɔ moci, ɓeekea moci, oɓatisɔ moci.

⁶ Mokonga a tɔ moci n'ande Aba ɓakpa ɓɔbu. Yɛ, a gǔ á ɓakpa ɓɔbu, aɔbɛɗanaga ka ɓakpa ɓɔbu, aiki ka ɓakpa ɓɔbu.

⁷ Nkpa na nkpa, sɔsɔɓɛ asu ana egabɔ nɛkɛ ɓíndɔ Kiísito angabei.

⁸ Ɓuku á Mokonga ayɔngi ɓe: «Ɓî ɗátái k'égo phɛɛ, ɗáɛbɛɗi ɓato á mekakɔ, ɗáeɓophi ɓakpa egabɔ.»

⁹ Cɔ, ɓági: «ɗátái», nndɔ ana kantíti sina? Ande gea te, Kiísito ɗádidi phɔ́ mosá kusi á oɗo ka mokonda.

¹⁰ Cɔ, mmbé ɗádidi, yɛ tɔndɔ aámbé ɗátái phɔtɔ gǔ phɛɛ na koba ka gea, átúmisɛ mokonda bui.

¹¹ Cɔ, yɛ aámbé amophi nkpa na nkpa egabɔ ínɛkɛ. Aebisi ɓuangbo ɓáɓɛ ɓateki, ɓuangbo ɓaɔtu-nyɔngɔ ndea Mokonga, ɓuangbo ɓatɔmigi-Mbino-Ánjá ndea Mokonga, ɓuangbo ɓaámbi-kanisa na ɓagoisigi.

¹² Agi ɓó ka gbagisa á ɓakpa ndea Mokonga gea te, ɓámbɛɗaneɛgɛ ka mɔtisaga nyama á Kiísito.

¹³ Kaɓondɔ unge, ɓesu ɓɔbu ɓeɓande kimoci ka ɓeekea na ka úba Muna-Mokonga. Mpɔ, ɓéoɓá ɓakiísito á mɔta ánjá, na engimiana na Kiísito.

¹⁴ Kaɓondɔ, ɓékéɓɛku ye ɓea ɓaniki ɓunde sumbu na kɛtɛmbɔ á ɓɔphɛi ɗanga-ɗanga á ɓato á mbɛa aǒɓotea na maibe ka ɓojeɗe.

¹⁵ A gǎkɛ oɓá na ɓɛɔyɔnga nyɔngɔ á ɗoni n'ekondi, ámbé ɓɛmɔtande ka kema bui na engimiana na Kiísito mmbé ande mɔ̌.

¹⁶ Yɛ aámbé aojúkanisaga gbútuka ɗanga-ɗanga á nyama ka ɓá kimoci. Ɔngɔkanaga á nkua aoenga ka jukanisaga nyama. Na mbenɔ nde gbútuka ɗanga-ɗanga á nyama aɔbɛɗanaga, nyama áɔmɔta ɓíndɔ akeni na éjonga sisakɛ suɓi á ekondi.

Ɓá na enda á kɛ̌kɛ suɓi á Kiísito

¹⁷ Cɔ, nenóɗengemisigi k'ína á Mɔkɔta gea: Ɓókótambeɛ mɔnɔ ye ɓea ɓakpa nde ɓánáomúba Mokonga, ɓunde kanisia aɓɔ a tɔ jǎi-jǎi

¹⁸ na úbapha aɓɔ a tɔ suɓi á kaiphiɔ. Ɓáná na ɔma ka enda nde Mokonga aobikisa nga, ɓánde ɓasɔngɔɗa na ɓá na měma akpɛ.

¹⁹ Ɓáná ye oúba tinganisa nyɔngɔ ánjá na nnde aájeɗe. Ɓáotambea ɓíndɔ ɓákondi. Nyɔngɔ ájeɗe-jeɗe bui nde ɓá na mɔphɛ í, ɓáogea ú kángá ɛnyɛ́.

²⁰ Ɓenu gǎkɛ, nna ɓondɔ unge ɗáɓánógoisigi ka nyɔngɔ á Kiísito.

²¹ Ande ɗoni gea, nyɔngɔ akɛ unge ɗɔ́ɓɔɔ́ki na ɓáonógoisaga ɓenu ɓakiísito nyɔngɔ á ɗoni nde a ka Yéso.

²² Kaɓondɔ, ɗeketani tambea nɛnu á kala. Ɗeketani phɔtɔ kokpa anu á kala nde mɔphɛ í á odemayɔ aongisa ka ɓojeɗe.

²³ Akeni ndiu gea, měma anu na kanisia anu bui áɓɛ á kɛ̌kɛ.

²⁴ Mpɔ, ɓóoɓá ɓea ɓakpa na ɓáɔ́li bɔngɔ á kɛ̌kɛ, ɓunde Mokonga ɗáeconji na ɓákengeani na Yɛ ka gea te, ɓáɓɛ ɓato á koɗoni na kángá ɓojeɗe ka ɓeana na ɗoni.

²⁵ Kaɓondɔ, ɗeketani yɔnga á mbɛa. Ambe nkpa na nkpa án'yɔngɛɛ dakɛ nyɔngɔ á ɗoni nga, ɓesu ɓɔbu, ɓende gbútuka á nyama á Kiísito.

²⁶ Kaɓɛ na ɓɔɓɛí, ɓɛí ndɔ kanóngisɛmbɛ mɔnɔ ka ɓojeɗe na ɓókómakɛmbɛ esa suɓi á ɓɛí kau.

²⁷ Ɓókómophɛmbɛ nketi ɔma.

²⁸ Nkukuɓa kaúɓɛmbɛ ye goto. Ákpangɛ ndiu bɛɗanaga ekuma á njaga ánjá, ka gea, áendɛ ánjá na áɓɛ na kema á gabea ɓato á ɓuyɛnɛ.

²⁹ Nyɔngɔ ájeɗe kajúanɛ mɔnɔ tanda k'aphenɔkɔ anu. Yɔngani ndiu tɔ nnde ana kantíti na akenanigi na mɔphɛ á ɓakpa na aɔtɔka na aegbagisigi ɓakpa na gea ánjá ka ɓundɔ ɓáɔnɔɔ́ka.

³⁰ Ɓókóɓɛisɛmbɛ Měma á kanga ɓojeɗe nnde Mokonga anophi. Nga, Měma ndɔ unge a ɓea moéma ndea Mokonga ka ɓenu ka koɗaga anu ka ɓojeɗe esa ndɔ abikande.

³¹ Ɓókóbisɛmbɛ suɓi á měma anu ɓojeɗe bui nde ɓánogǐí. Ɓókóɓɛmbɛ na esúia, ɓɛí, ntaɓo na mbóma. Sagani ɓojeɗe bui.

³² Ɓáni na měma ánjá na á kuina ngomi. Nkpa na nkpa áímɛ ɓojeɗe ndea dakɛ ɓíndɔ Mokonga ɗáími ɓojeɗe nɛnu ka nyɔngɔ á Kiísito.