Ɓaɛphɛ́sɔ 3 - Ɔngana á Kɛ̌kɛ

Ekuma ndea Pɔ́lɔ ka ɓunde ɓáná Ɓayúda

¹ Kaɓondɔ unge, eme Pɔ́lɔ nɛɔmɛma Mokonga. Ne ka mekakɔ ka nyɔngɔ ékuma ndea Yéso Kiísito ka phɔanu ɓenu íɓunde ɓókó Ɓayúda.

² Ande ɗoni gea, ɓo ye ɔ́ki nyɔngɔ á ekuma nde Mokonga ɗámopi ka ɓonjánja-ékondi nɛkɛ gea te, nénóbɛɗaneɛgɛ.

³ Mokonga aámbé ɗámɔɔphani ka úbisa ani moangɔ nɛkɛ á ɓɔsɔmɛa. Ɗéneɗundu ábɔa ka nyɔngɔ í gǔ.

⁴ Ɓî ɓootanga ɓaoɓa nɛmɔ, ɓoengekisande gea, neoúba nyɔngɔ á ɓɔsɔmɛa ndea Kiísito.

⁵ Mokonga ɗásɔ̌mi nyɔngɔ ndɔ kala gea te, nkpa káúbɛmbɛ. Kɛ̌kɛnde gǎkɛ, aephani ɓateki na ɓaɔtu-nyɔngɔ nɛkɛ á kanga ɓojeɗe, moangɔ ndɔ ka ɓukpɛkpɛ á Měma akɛ.

⁶ Nyɔngɔ á ɓɔsɔmɛa kau aungee: Ka nyɔngɔ á Mbino-Ánjá aunge Ɓayúda na ɓunde ɓáná Ɓayúda ɓátɔande ɓotukɔ nde Mokonga aebisíí ɓakpa nɛkɛ. Ɓátóki tɔ ka nyama mo, mɔkɔ ndɔ Mokonga ɗábisi ka Yéso Kiísito, a tɔ ka ɓɔ.

⁷ Ne ye tɔ mbɛɗanigi á tɔ̌miaga Mbino-Ánjá ndea Mokonga, k'égabɔ á ɓonjánja-ékondi nɛkɛ na ɓukpɛkpɛ nɛkɛ.

⁸ Nende gǎkɛ kusi á ɓaɓêki ɓɔbu. Nanga áɓá ɓó, eme aámbé Mokonga ɗámopi ɓonjánja-ékondi nde ka gea te, nɛ́ɛtɔmiɛgɛ ɓakpa nde ɓáná Ɓayúda, Mbino-Ánjá á ɛtɔi á kanga sungiaga ndea Kiísito.

⁹ Ne phɔtɔ óɓúbisa ɓakpa ɓɔbu base kantíti á ɓî Mokonga aɔtɔtɔkisa moangɔ nɛkɛ á ɓɔsɔmɛa. Yɛ Nconji á kema bui ɗásɔ̌mi moangɔ ndɔ kpanga kala.

¹⁰ Cɔ, kɛ̌kɛnde k'aphe ndea kanisa unge ɓakɔta ɓɔbu na ɓukpɛkpɛ á na koba, ɓáúbɛ nyɔngɔ ɗanga-ɗanga á kɔɓɔɔngɛ ndea Mokonga.

¹¹ Mokonga agi nndɔ ka ɓeana na moangɔ á mɛyɔ nnde ɗátɔtɔkisi k'aphe ndea Mɔkɔta nɛsu Yéso Kiísito.

¹² Ɓî ɓɛɔngani na yɛ, na k'aphe á ɓeekea nɛsu, ɓe na aphe base á sɛkɛɗa mosá á Mokonga, kángá ngǎka.

¹³ Kaɓondɔ unge, nɛnɔmɛmi gea, ɓɔ́kɔɛlɛmbɛ ɓî ne ka tambaga ka nyɔngɔ anu. Nndɔ bui a tɔ kanu.

Ekondi ndea Kiísito

¹⁴ Kaɓondɔ unge negbúki muanku mosá á Abɛ Mokonga,

¹⁵ mmbé ande Abei á ekombo bubui á na koba, na nnde á ka mokonda bui.

¹⁶ Nɛɔmɛma Mokonga gea te, ánogbagisɛgɛ ka měma, ɓî ana ɓoombia ángbó. Mpɔ, ɓóoɓá ɓakiísito ɓákpɛkpɛ.

¹⁷ Ɓî ɓomɓeeki Kiísito, yɛ áikɛ ka měma anu. Édokoɗeani ɓóósimbiɛ akpɛ suɓi ékondani

¹⁸ ka gea te, ɓɔɔtɔka na ɓoengekisi kimoci na ɓato á kanga ɓojeɗe, ɓogbae, ɓondanda, bɔ́mbɔa na dǔmana á ekondi ndea Kiísito.

¹⁹ Ɓoúbande ekondi nde anyɛ́nyi úbapha bui na ɓɔtɔande enda bui ndea Mokonga na aikande buakɛ suɓi anu.

²⁰ Cɔ, ka Mokonga, mmbé abisi ɓukpɛkpɛ ka měma asu, Yɛ aɔtɔka tɔtɔkisa nyɔngɔ nde anyɛ́nyi ɛmɛmi nɛsu, na úbapha asu!

²¹ Ɓoombia áɓɛ ka yɛ suɓi á kanisa na ka Kiísito Yéso ka mbenɔ bui ka saga na saga. Áɓɛ ɓó.