Ɓaɛphɛ́sɔ 2 - Ɔngana á Kɛ̌kɛ

Jujúka ka kukuwa

¹ Ɓenu, ɗóɓoku ka měma kala ka nyɔngɔ á kisɛki na ɓojeɗe nɛnu.

² Ɗóɓooenda suɓi á ɓojeɗe na ɓeá nyɔngɔ á mokonda ndee. Ɗɔ́ɓɔɔmɔ́ka mɔkɔta á ɓansombo á ɓukpɛkpɛ ájeɗe mmbé amamei nji sɔsɔɓɛ á mokonda na koba, měma ndɔ aɔbɛɗanaga suɓi á ɓakpa nde ɓákáɔmɔ́ka Mokonga.

³ Ɓesu ɓɔbu, ɗéɓetú phɔtɔ ɓea ɓɔ, ɓéotambea ɓíndɔ nyama asu ɗátú osóɓotea, ɗéɓéɔtɔtɔkisa mɔphɛ á ka nyama asu na nnde á ka měma asu. Ka nyɔngɔ á tambea asu ájeɗe aunge, ɓékéólokɛku k'esúia ndea Mokonga ɓea ɓakpa ɓunɛngbo.

⁴ Mokonga a gǎkɛ na ngomi ka ɓesu phɛɛ, ka nyɔngɔ ékondi ángbó nde ɗásókondi ně.

⁵ Ɓî ɗéɓeku ye ka měma, ka nyɔngɔ á ɓojeɗe nɛsu, áosójujukisa ka kukuwa kimoci na Kiísito. Ɓoamia ndɔ ɗátú ka nyɔngɔ á ɓonjánja-ékondi ndea Mokonga.

⁶ Ka nyɔngɔ á ɔngana asu na Kiísito, Mokonga ɗásójujúkisi ka kukuwa kimoci na yɛ. Ɓemameande nji na yɛ na koba.

⁷ Kaɓondɔ, ka ɔnisa ɓonjánja-ékondi nɛkɛ ka ɓesu ka ɛɓɔkɔti bui nde abikaeka suɓi á Kiísito, aunge Mokonga ɗákondi phangia ɓongbóngbó á ɓonjánja-ékondi nɛkɛ.

⁸ Eya, ɓoami ye tɔ ka měma ka ɓonjánja-ékondi ndea Mokonga ka nyɔngɔ á ɓeekea. Ɓoamia ndɔ kátɔtɔkɛani ka ɓukpɛkpɛ nɛnu sasanu. A ndiu tɔ ka nyɔngɔ égabɔ ndea Mokonga.

⁹ Nna ka nyɔngɔ ékuma nɛnu. Kaɓondɔ, nna na nkpa nde aɔtɔka n'aébebi sasakɛ.

¹⁰ Ɓende ekuma á ka njaga á Mokonga. Ande gea te, ɗásóconji ka ɔngana asu na Kiísito Yéso ka gea te, ɓéendɛ suɓi á ɛtɔi k'ékuma ánjá nde ɗásóbisíí gea, ɓɛtɔtɔkisɛ ú.

Ɔngana suɓi á Kiísito

¹¹ Cɔ, kanisiani phɔ́ ɓî ɗóɓotú kala ɓenu íɓunde ɓókó Ɓayúda. Ɓayúda ɓáɔnɔɔphana ɓenu: «ɓawó», ɓɔ gǎkɛ ɓáɔ̌ɔphana sasaɓɔ «ɓagu-ganja» ka nyɔngɔ á epe nde ɓábisi ka nyama aɓɔ.

¹² Mosá, ɗóɓokótú omúba Kiísito. Ɗóɓokótú k'ékombo ndea Ɓaisilaɛ́li ɓunde Mokonga ɗáɛsɔmbu, ɗóɓotú ndiu nɛnu ɓatókanga. Mɔkɔ á ɔngana ndea Mokonga ɗákátú ka ɓenu. Ɗátú tɔ ka ɓakpa nɛkɛ. Ɓóoɓá ka mokonda, kángá á nseɓeɔ, na kángá á Mokonga.

¹³ Cɔ, kɛ̌kɛnde gǎkɛ, ka ɔngana anu na Kiísito Yéso, ɓenu íɓunde ɗóɓotú ɗanga, ɓǒbîmisi ka nyɔngɔ á magia akɛ.

¹⁴ Kiísito sasakɛ aámbé asóbikisíí ɓujɛjɛ ka jukanisa Ɓayúda na ɓakpa nde ɓáná Ɓayúda ɓáoɓá ekuna moci. Ka nyɔngɔ á kukuwa akɛ aunge ɗáuɗi ɓǔkendu nde ɗáekatanisi na bisa koɓiɓia sɔsɔɓɛ aɓɔ.

¹⁵ Ɗáphúi ɛɔphi ndea Ɓayúda na nyɔngɔ ɗanga-ɗanga ɛ́ɔphi ka jukanisa ekuna ndɔ iɓɛ áɓɛ tɔ moci na á kɛ̌kɛ ka ɔngana na yɛ. Mpɔ, áobisa ɓujɛjɛ.

¹⁶ Ka nyɔngɔ á kukuwa á Kiísito ka moyangɔ, yɛ ɗáejúkanisi ɓɔbu ka ɓá nyama moci, áɓá phɔtɔ kɔ̌ɔnganisa ɓɔ na Mokonga. Ka moyangɔ unge ɗáúji nsengo.

¹⁷ Ande gea, Kiísito ɗábiki ɔtɔmiaga Mbino-Ánjá á ɓujɛjɛ ka ɓakpa ɓɔbu. Ka ɓenu ɓato á k'ekuna nɛngbo, ɓunde ɗóɓotú ɗanga na Mokonga, phɔtɔ ka Ɓayúda ɓunde ɗáɓátú bíbí akɛ.

¹⁸ Ka nyɔngɔ á Kiísito, ɓesu ɓɔbu, Ɓayúda na ɓunde ɓáná Ɓayúda, ɓɛɔtɔka na ɓembîmisíí Abɛ Mokonga, ka ɓukpɛkpɛ á Měma ndɔ moci.

¹⁹ Kaɓondɔ, ɓenu íɓundɔ ɓókó Ɓayúda, ɓókó ye ɓatókanga, kaɓɛ ɓunde ɗáɓátói ka nji nɛɓɔ, ɓo ye tɔ ɓato á ka nji ndea Mokonga. Ɓo ye tɔ ɓato á k'ékombo nɛkɛ.

²⁰ Ɓo ɓea mɔphɛkɔ nde ɓateki na ɓaɔtu-nyɔngɔ ndea Mokonga ɓácumi akpɛ. Kiísito sasakɛ ande ɓea ngeɔ á mɔphɛkɔ ndɔɔ.

²¹ Nga, yɛ aámbé asukíí mɔphɛkɔ ndɔ bui kimoci, áoɓá endu ɛ́mɛmi á kanga ɓojeɗe ndea Mɔkɔta.

²² Ɓî ɓojúkani na Kiísito, ɓonde phɔtɔ nkumba á mɔphɛkɔ ka ɓá na ɓakpa ɓuangbo ɓɔbu, endu nde Měma á kanga ɓojeɗe aikande kau.