Ɓaɛphɛ́sɔ 1 - Ɔngana á Kɛ̌kɛ

Nsesɔ

¹ Ka ɓaɓêki á ka Ɛphɛ́sɔ sambani! Eme Pɔ́lɔ nende nteki nde ɓa Kiísito Yéso ka mɔphɛ á Mokonga. Nenóɗundui ɓenu ɓato á Mokonga ka Ɛphɛ́sɔ ɓunde ɓoɓeeki suɓi á ɔngana na Yéso Kiísito.

² Ambe Abasu Mokonga na Mɔkɔta Yéso Kiísito, ánophɛ́ ɓonjánja-ékondi na ɓujɛjɛ.

Ɓonjánja ndea Mokonga ka phɔasu k'aphe ndea Kiísito

³ Obebɔ ka Mokonga, Aba Mɔkɔta nɛsu Yéso Kiísito. Asóbisíí njaga bui ka měma na bisia asu keɓu á na koba ka ɔngana asu na Kiísito.

⁴ Mokonga ɗásɔsɔmbu mosá á conjá á mokonda ka gea, ɓéɓɛ ɓakpa nɛkɛ ka ɔngana asu na Kiísito ka gea, ɓéɓɛ ɓato á kanga ɓojeɗe na kángá kisɛki mosá akɛ.

⁵ Kaɓondɔ, ɗáangi mosá gea, ɓéɓɛ ɓ'anakɛ k'aphe ndea Yéso Kiísito. Nga, moangɔ ndɔ aunge ɗámɓɔngɛi phɛɛ, áoɓá mɔphɛ akɛ ka ekondi nɛkɛ.

⁶ Kaɓondɔ, ɓémbebɛni Mokonga ka ɓonjánja-ékondi á ɓoombia nɛkɛ ka phɔasu, ka nyɔngɔ á anakɛ.

⁷ K'aphe ndea Kiísito aunge, ɗéɓejúani ka ɓojeɗe, ka nyɔngɔ á magia akɛ ka íma ɓojeɗe nɛsu. Mokonga ɗásóphangi ɛtɔi á ɓonjánja-ékondi nɛkɛ,

⁸ nnde ɗásóphi ásii phɛɛ ka opha asu kɔɓɔɔngɛ bui na úbapha bui.

⁹ Áosóphangia base moangɔ nɛkɛ á ɓɔsɔmɛa ka ɓonjánja, áosuia kala tɔtɔkisa í ka Kiísito.

¹⁰ Mokonga atɔtɔkisande moangɔ ndɔ, ka mbenɔ nde akeni. Nga, adondanisagande kema bui á ka mokonda na nnde á na koba, áoɓá kusi á moamɛ mo, Kiísito.

¹¹ Ka ɔngana na Kiísito, ɗéɓetɔí keɓu nde Mokonga ɗásɔɔku nga, Mokonga ɗásɔsɔmbu mosá ka ɓeana na moangɔ nɛkɛ, goto áɔtɔtɔkisa kema bui ɓíndɔ ɗáangi na konda.

¹² Cɔ, ɓémbebɛni Mokonga ka ɓoombia nɛkɛ, ɓesu íɓundɔ ɗéɓenseɓei Kiísito k'ama mosá-mosá.

¹³ Ɓenu phɔtɔ, mbenɔ nde ɗɔ́ɓɔɔ́ki ɓɔphɛi á ɗoni, Mbino-Ánjá á amisa anu ka měma, ɗóɓomɓeeki Kiísito, mpɔ Mokonga áobisa mphangiɔ ka gea te, ɓéɓɛ ɓakpa nɛkɛ. Mphangiɔ kau n'ande Měma á kanga ɓojeɗe nde ɗáɔku.

¹⁴ Měma ndɔ, a ɓea moéma, asóengekisíí ɓotukɔ nde Mokonga aebisíí ɓakpa nɛkɛ. Yɛ, asóengekisíí gea, ɓɛtɔaeka ú mbenɔ nde ɓetókande ka kɔkɔɓɛ ɗoni. Ɓébebɛni ɓoombia nɛkɛ!

Pɔ́lɔ aɔmɛma ka phɔa ɓakiísito

¹⁵ Ka nyɔngɔ índɔ unge, ɓî ɗɛ́nɛɔ́ki nyɔngɔ á ɓeekea anu Mɔkɔta Yéso na konda anu ɓato á Mokonga,

¹⁶ aunge kéoɗeketa beba á Mokonga ka phɔanu. Neonókanisia suɓi á ɛmɛmi nɛmɔ,

¹⁷ nɛɔmɛma Mokonga ka gea, Mokonga ndea Mɔkɔta nɛsu Yéso Kiísito, Aba ɓoombia ánophɛ měma á kɔɓɔɔngɛ mmbé anóphangiande na úbisa anu Mokonga.

¹⁸ Nɛɔmɛma gea ákoɗokisɛ iso anu á ka měma ka owanga nɛkɛ. Mpɔ, ɓôúba nseɓeɔ nde ɗánɔɔphanei na ɓongbóngbó á ɓoombia á ɓotukɔ nde ɗáebisíí ɓakpa nɛkɛ.

¹⁹ Ɓoúbande ɓukpɛkpɛ nde aɔbɛɗanaga ka phɔa asu ɓaɓêki. Ɓukpɛkpɛ ndɔ ande nnde Mokonga ɗáɔnisi na ɓukpɛkpɛ

²⁰ mbenɔ nde ɗánjujúkisi Kiísito ka kukwa. Mpɔ, áonikisa na koba ka njaga akɛ á mǔku.

²¹ Kiísito a gǔ á koɓoamɛ bui, kɔkɔta bui, ɓukpɛkpɛ bui, na ɓakɔta ɓɔbu kaɓɛ ka mokonda nde, kaɓɛ ka mokonda nde abikaeka.

²² Mokonga abisi kema bui kusi á ecinji á Kiísito, goto áombisa gǔ á kanisa.

²³ Nga, kanisa ande nyama á Kiísito. Suɓi í unge Kiísito aiki buakɛ, ɓíndɔ atúmisi kema bui k'ɔ́ma bui ka mokonda.