Ekuma á ɓateki 9 - Ɔngana á Kɛ̌kɛ

Saúlɔ amɓeeki Yéso

¹ Ka matú ndɔ, Saúlɔ ɗásui ɓángisa na mowa á ɓagoigi ndea Mɔkɔta. Áɔngɛndɛa ngbɛga á ɓatoɓeigi-phɛ́a

² áɔmmɛma ɓaoɓa á ngia í ně k'éndu á madondanɔ ndea Ɓayúda ka nyɔngɔ á Mokonga á ka Damasíki, ka gea, aoɓá n'aedondi ɓǒko na ɓake, ɓunde ɓáotamba k'aphe ndea Yéso, áédungɛ, áéɓóɛgɛ, áégɛ na ɓɔ na Yɛusalɛ́ma.

³ N'a phɔ́tɔ k'aphe, bíbí á nji ndɔ, mɔngɔ ímoci owanga áotóka na koba, áonkomba, njuaa!

⁴ Saúlɔ áogua ka oɗo gbu! Áɔɔ́ka ɛsɔ n'aongea: «Saúlɔ, Saúlɔ, ka nyɔngɔ éke nde oomotambisaga kau?»

⁵ Yɛ, áomúsia te: «Mɔkɔta, onde ani?» Mɔkɔta áonsikisia: «Nende Yéso, mmbɔ oontambisaga.

⁶ Cɔ, má, ógɛ ka ntanga-nji á Damasíki. Kó, ɓáongoɗeande kema nde akeni ógeɛ ú.»

⁷ Ɓakpa ɓunde ɗáɓátambi na Saúlɔ, ɓáomama, ɓáodeeɓa, ɓáoɓánga phɛɛ. Ɗáɓaɔ́ki ɛsɔ, ɓákámɔnɛ gǎkɛ nkpa.

⁸ Cɔ, Saúlɔ áomá, áokoɗa iso, kaɔnaphɛ ye. Mpɔ, ɓáondunga Saúlɔ ka njaga, ɓáontámbisaga, ɓáoga ojua ka Damasíki.

⁹ Saúlɔ ɗáiki k'ésa isaɔ, kángá ɔnapha, kángá á eaga na noa á iɓo.

¹⁰ Cɔ, ngoigi moci ɗátú ka Damasíki, ina akɛ Ananía. Kó, Mɔkɔta Yéso áonkiɗianea ka mphaniɔ, áɔmɔphana: «Ananía!» Ananía áoɓeekea: «Mɔkɔta, eme yɛ.»

¹¹ Mɔkɔta áongoɗea: «Má, ógɛ k'aphe nde ɓáɔɔphana Écuma-dɛ, mɔtɛ á Yúda. Wa, ónkaɓɛ nkpa moci, ina akɛ Saúlɔ nto á ka Táasɔ. Nga, yɛ aɔmɛma Mokonga.

¹² Ande gea te, amɔni nkpa moci ka mphaniɔ. Nkpa ndɔ ɓáɔmɔphana Ananía, ɗángí k'éndu moci, áobisa njaga gǔ akɛ ka gea áɔnaphɛ goto.»

¹³ Ananía áonsikisia te: «Mɔkɔta, ɓakpa ɓásii ɓámɔtɔ̌migi nyɔngɔ á nkpa ndɔ na ɓojeɗe bui nde ɗégǐí ɓaɓêki nɛkɔ, ɓundɔ ɓá ka Yɛusalɛ́ma.

¹⁴ Ɓagbɛga á ɓatoɓeigi-phɛ́a, ɓámophi kɔkɔta ka bika dunga á ɓakpa ɓɔbu ɓunde ɓáɔmɛma Mokonga k'ína akɔ.»

¹⁵ Mɔkɔta â gǎkɛ ongoɗea te: «Gǎ tɔndɔ nga, nɛnsɔmbu ye nkpa ndɔɔ. Nɛmɔphani, áɓɛ mbɛɗanigi nɛmɔ ka úbisa ina ani k'ékuna bui na ɓaamɛ nɛɓɔ, na Ɓaisilaɛ́li phɔtɔ.

¹⁶ Eme gǎkɛ, nemphangiande tambisaga bui nde ɓángeande ně ka nyɔngɔ ani.»

¹⁷ Mpɔ, Ananía áoga. Akiɗi ye k'éndu, áobisa njaga gǔ á Saúlɔ, áongea te: «Saúlɔ dani, Mɔkɔta Yéso, mmbɔ aokiɗianeima k'aphe ɓî otúma obika, amoteki mɔtɛ-akɔ gea, ɔ́ɔnaphɛ goto, Měma á kanga ɓojeɗe átúmɛ phɔtɔ suɓi akɔ.»

¹⁸ Mɔngɔ moci, kema ɓea kpase áojuana k'íso á Saúlɔ, áogua. Yɛ, â goto ɔɔnapha. Mpɔ, áomá, áoga k'aphe á ɓatisa akɛ.

¹⁹ Mbusa, áoeaga. Nyama akɛ â goto ogbaga. Saúlɔ ɗáiki esa ábɔa kimoci na ɓagoigi ɓundɔ ɗáɓátú ka Damasíki.

Saúlɔ aɔphɛa nyɔngɔ á Mokonga ka Damasíki

²⁰ Kɛ̌kɛndɔ, áɔphɛa k'éndu á madondanɔ ndea Ɓayúda ka nyɔngɔ á Mokonga gea, Yéso ande Muna-Mokonga.

²¹ Ɓakpa ɓɔbu ɓundɔ ɓámɔ́ki, ɓáoianaga phɛɛ, ɓáɔyɔngaga sɔsɔɓɛ aɓɔ te: «Nna phɔ́ nkpa nde aámbé ɗátú ǒtambisaga ɓakpa nde ɗáɓáɔmɛmaga Mokonga k'ína á Yéso? Kákiɗi phɔ́ wani ka dunga á ɓaɓêki na gǎ na ɓɔ na Yɛusalɛ́ma mosá á ɓagbɛga á ɓatoɓeigi-phɛ́a?»

²² Cɔ, ɓɔphɛi ndea Saúlɔ áonyanga phɛɛ. Ɓayúda ɓunde á ka Damasíki, ɗáɓáká ye na nyɔngɔ nde ɓáonsikisia ɓî ɗáephangisi gea, Yéso ande Kiísito.

²³ Mbusa ésa ásii, Ɓayúda ɓâ ndiu ɔɔ́kana gea, ɓámmowɛ.

²⁴ Saúlɔ â gǎkɛ ɔɔ́ka maca ndɔ. Ɓɔ́, ɗáɓáomɓondeaga ka ngba á ntanga-nji keiphe n'esa gea ɓámmowɛ.

²⁵ Mpɔ ɓagoigi nɛkɛ ɓáɔmbɛɗa kǐpha, ɓáommakea suɓi á jɔ, ɓáodidisa jɔ ndɔ ka nsinɔ, bǎ á ɓogaɔ á ntanga-nji ndɔɔ. Mpɔ, Saúlɔ áokia, áoga nɛkɛ.

Saúlɔ aobɛɗanaga ka Yɛusalɛ́ma

²⁶ Ajú ye ka Yɛusalɛ́ma, áokengea dondana na ɓagoigi. Ɓagoigi ɓɔbu, ɓâ gǎkɛ omɓánga ka nyɔngɔ nde, ɗáɓátú na ngǎka gea, ande ngoigi ɗoni.

²⁷ Baanába â gǎkɛ ɔmbɛɗa Saúlɔ, áonga ně mosá á ɓateki. Áɔ̌tɔmiaga etéte á ɓî Saúlɔ ɗámɔni Mɔkɔta Yéso k'aphe, na ɓî ɗáyɔngi na yɛ. Â phɔtɔ ɔ̌tɔmiaga etéte á ɓî Saúlɔ ɗáɔphɛa k'ína á Yéso ka Damasíki kángá ngǎka.

²⁸ Mbusa á ɓî ɓateki ɓámɓeeki ye, Saúlɔ áoika na ɓɔ. Ɗáoga n'aoja na Yɛusalɛ́ma, ɗáɔphɛa k'ína á Mɔkɔta Yéso kángá ngǎka.

²⁹ Â phɔtɔ ɔyɔngaga na púa na Ɓayúda, ɓundɔ ɓáɔyɔnga Kigiíki. Ɓayúda ndɔ ɓâ gǎkɛ okaɓa mowa akɛ.

³⁰ Mbenɔ nde ɓadakɛ ɓaɓêki ɓáɔ́ki maca ndɔ, ɓáɔmbɛɗa Saúlɔ, ɓáondida ně na Kaisalía. Mpɔ ɓáonteka na Táasɔ.

³¹ Ka matú ndɔ, ɓato á kanisa ɗáɓátú na ɓujɛjɛ suɓi á Yudɛ́a bui, Galiláya, na Samalía. Ɓáɔmɔta ka měma na ɓánga á Mɔkɔta, Měma á kanga ɓojeɗe áǒɓikisa phɛɛ.

Pɛ́tɛɛ anamisi Ainɛ́a

³² Ka matú ndɔ, Pɛ́tɛɛ ɗáotamba ka ɛnjia á ɓaɓêki á ka nji ndɔ bui. Esa moci, â phɔtɔ oga na Lúda, k'aphe á ɔna á ɓaɓêki ɓunde ɗáɓáiki wa.

³³ Kó, áondonda nkpa moci ina akɛ Ainɛ́a, ɗáaɗe k'éka ka ɓasaga ngianjaga isaɔ (8) n'ana kukuwa á nyama á kanga emana.

³⁴ Pɛ́tɛɛ áongea te: «Ainɛ́a, Yéso Kiísito akoamisi. Cɔ, má! Ɔ́ɓɔngisiɛgɛ eka nɛkɔ.» Kɛ̌kɛndɔ, Ainɛ́a áomá.

³⁵ Ɓî ɓato á ka Lúda na ɓato á ka Salɔ́ni ɓɔbu ɓámɔni ye na aami, ɓáomɓeekea Mɔkɔta.

Pɛ́tɛɛ anjujúkisi Tabíta ka kukuwa

³⁶ Nke ngoigi moci ɗáoikaga ka Yɔ́pa, ina akɛ Tabíta mmbé ɓáɔmɔphana ka Kigiíki «Dɔlíka», ka Kikomo ande gea te: «Cɔcɔɗɛ». Ɗáogea ekuma ánjánja, na gabea á ɓaúki.

³⁷ Ka matú ndɔ gǎkɛ, áosamba, áokuwa. Mpɔ, ɓáosokosa mǒnda akɛ, ɓáobisa suɓi éndu á tɔ̌, nnde a k'ego.

³⁸ Ɓagoigi á ka Yɔ́pa ɗáɓáɔ́ki gǎkɛ gea, Pɛ́tɛɛ a ka Lúda, bíbí na Yɔpa. Kaɓondɔ, ɓáǒteka ɓakpa ɓaɓɛ na mbino gea: «Kamisaga ɓika mɔtɛ-asu.»

³⁹ Pɛ́tɛɛ áokamisaga gǎ kimoci na ɓɔ. Aí ɓî ajú, ɓáonga ně suɓi éndu ndɔ a k'ego. Ɓake á k'ekusa ɓáonsesea Pɛ́tɛɛ na ɓáogáma, ɓáɔmɔnisa Pɛ́tɛɛ nkanjo na bɔngɔ bui nde Dɔlíka ɗáéphopheí na kákumbɛ.

⁴⁰ Cɔ, Pɛ́tɛɛ áǒjuanisa ɓakpa ɓɔbu, áogbuka muanku ka mɛma á Mokonga. Mbusa, áǒpháia ka mǒnda, áogeae: «Tabíta má!» Tabíta áokoɗa iso. Amɔni ye Pɛ́tɛɛ, áǒmesia.

⁴¹ Pɛ́tɛɛ áondunga ka njaga, áonenga ka mesia akɛ. Mpɔ, áɔ̌ɔphana ɓaɓêki na ɓake á k'ekusa ɓɔbu, áɔ̌ɔnisa Tabíta n'aoenda.

⁴² Nyɔngɔ ndɔ áoúbikana ka Yɔ́pa bui. Kaɓondɔ, ɓakpa ɓásii ɓáomɓeekea Mɔkɔta.

⁴³ Mbusa, Pɛ́tɛɛ áoika k'ésa ásii ka Yɔ́pa mɔtɛ á Simɔ́ni, mɓɔngisigi kema á mpokɔ.