Ekuma á ɓateki 8 - Ɔngana á Kɛ̌kɛ

¹ Cɔ, Saúlɔ ɗáɓeeki mowa á Sɛtɛphánɔ. Esa ndɔ tɔ, Ɓayúda ɓáokpanga sona á kanisa á ka Yɛusalɛ́ma akpɛ. Kaɓondɔ, ɓaɓêki ɓɔbu ɓáophanjekana ka nji á Yudɛ́a na Samalía. Ɓateki ɓáunge ɓâ tɔ ojiga ka Yɛusalɛ́ma.

Saúlɔ aosona kanisa

² Ɓakpa nde ɓáomɓánga Mokonga ɗáɓábɛɗi mǒnda á Sɛtɛphánɔ, ɓáoúmba. Ɓáobisa kekusa ángbó ka nyɔngɔ á kukuwa akɛ.

³ Saúlɔ gǎkɛ, áokaɓa tindisa á ɓato á kanisa. Áongia endu k'éndu, áǒdunga ɓǒko na ɓake, áǒmakea ka mekakɔ.

Philípɔ aɔtɔmiaga Mbino-Ánjá ka Samalía

⁴ Ɓaɓêki ɓunde ɗáɓáphanjekani, ɗáɓáge na ɓáɔtɔmiaga Mbino-Ánjá.

⁵ Philípɔ â phɔtɔ oga ka ntanga-nji moci á Samalía, áɔ̌phɛa ɓato á ka ntanga-nji ndɔ nyɔngɔ á Kiísito.

⁶ Ɓî usɛsɛ á ɓakpa ɗáɓáɔɔ́ka nyɔngɔ nde Philípɔ ɗáɔyɔnga na ɔna á ketangaɔ nde ɗáɔtɔtɔkisa, ɓɔbu ɓáobisa měma aɓɔ ka ɓɔphɛi ndɔɔ.

⁷ Nga, ɓansombo ɓásii ɗáɓáojuana suɓi á ɓasambi na ɓáokoga akpɛ. Ɓato á kukuwa á kiɗɔti á nyama kángá emana na ɓaketǔmbe ɓásii ɓâ phɔtɔ oama.

⁸ Ka nyɔngɔ á ɓoamia ndɔ, ɓakpa ɓáoɓá na maseye phɛɛ ka ntanga-nji ndɔɔ.

⁹ Nkpa moci ɗáiki kala ka ntanga-nji ndɔ á ka Samalía, ina akɛ Simɔ́ni. Ɗátú nkúme, yɛ ɗáɔtɔtɔkisa ketangaɔ nde ɓato á ka Samalía ɗáɓáotangaaga. Ɗáǒbeba gea, ande nkpa angbóngbó phɛɛ.

¹⁰ Ɓakpa ɓɔbu, kpangá ka ɓaniki na ɓagbɛga, ɗáɓáɔmɔ́ka bîbíbí. Ɗáɓáogea: «Mogaa nde ande ɓukpɛkpɛ ndea Mokonga.» Mmbé ɓáɔmɔphana «Ɓukpɛkpɛ ángbó.»

¹¹ Ɓakpa ɓásii ɗáɓáɔmɔ́ka bîbíbí nga, kpanga á kala, ɓakpa ɗáɓátúotangaaga iɓoki nɛkɛ.

¹² Ɓî ɓake na ɓǒko ɓáɓeeki gǎkɛ Mbino-Ánjá nde Philípɔ ɗáɔtɔmiaga á koɓoamɛ ndea Mokonga na nnde á Yéso Kiísito, ɓáǒɓatisa.

¹³ Simɔ́ni phɔtɔ áoɓeekea sasakɛ, ɓáomɓatisa. Áonɗakatea Philípɔ, áɔɔna mphangiɔ na ketangaɔ nde ageani ka njaga akɛ, áotangaaga phɛɛ.

¹⁴ Ɓî ɓateki á ka Yɛusalɛ́ma ɓáɔ́ki ye gea ɓato á ka Samalía ɓáɓeeki nyɔngɔ á Mokonga, ɓáǒtekea Pɛ́tɛɛ na Yoáni.

¹⁵ Ɓî ɓájú ye kó, ɓáɔmɛma Mokonga ka phɔa ɓaɓêki gea, ɓáɓɛ na Měma á kanga ɓojeɗe.

¹⁶ Nga, nna na ka ɓɔ nde Měma á kanga ɓojeɗe ɗádidi gǎkɛ gǔ akɛ, ɗáɓěɓatisi tɔ k'ína á Mɔkɔta Yéso.

¹⁷ Pɛ́tɛɛ na Yoáni ɗáɓábisi njaga gǔ aɓɔ, mpɔ ɓáoɓá na Měma á kanga ɓojeɗe.

¹⁸ Cɔ, ɓî Simɔ́ni aɔni ye gea, Měma á kanga ɓojeɗe adidi gǔ á ɓaɓêki nga, ɓateki ɓáébisíi njaga, áǒbikia ɓateki na imɔna áǒgea ɓe:

¹⁹ «Ómopani phɔtɔ ɓukpɛkpɛ ndee, ka gea te, mbenɔ nde něbisiande ɓakpa njaga, nkpa na nkpa áɓɛ na Měma á kanga ɓojeɗe.»

²⁰ Pɛ́tɛɛ áonsikisia te: «Ámbé oɓúngigi phɔ́, oɓɛ na imɔna nɛkɔ, ka nyɔngɔ nde, okanisi tɔá á egabɔ ndea Mokonga ka somba í na imɔna.

²¹ Kóna ka nyɔngɔ wani phɔtɔ n'ebigɔ wani. Nga, kanisia akɔ nna ánjá mosá á Mokonga.

²² Cɔ, kětia phɔ́ tambea akɔ ájeɗe, ɔ́mɛmɛ Mɔkɔta. Kǎi, aímande kanisia nɛkɔ ndɔ aájeɗe.

²³ Nga, nɛɔni gea měma akoíndí phɛɛ. Onde phɔtɔ nkɔɓɛ á ɓojeɗe.»

²⁴ Simɔ́ni áonsikisia Pɛ́tɛɛ na Yoáni te: «Mɛmani Mɔkɔta sasanu ka phɔani gea, ɓojeɗe ndɔ ɓɔmɔyɔngɛí, kau kaɓɛ́mbɛ gǔ ani.»

²⁵ Cɔ, ɓateki ɓaɓɛ ndɔ ɓágɔɓi ye tɔ̌miaga na phɛá á nyɔngɔ á Mɔkɔta, ɓáosikianaga, ɓáoga na Yɛusalɛ́ma. Na ɓá phɔ́tɔ k'aphe, ɓáɔtɔmiaga Mbino-Ánjá ndea Mokonga ka nji ásii á ka Samalía.

Philípɔ na mbɛɗanigi angbóngbó á ka Ɛtiɔpía

²⁶ Esa moci, malaéka ndea Mɔkɔta áongoɗea Philípɔ: «Má, ógɛ k'aphe nci á kusi k'aphe nde adidi ka toka na Yɛusalɛ́ma ka gǎ na Gája. Aphe ndɔ ande nkanda.»

²⁷ Philípɔ áoma na gǎ. N'a phɔ́tɔ k'aphe, nto á ka Ɛtiɔpía moci mbɛɗanigi angbóngbó mmbé ɓántǒngu áonkiɗianea. Yɛ, aámbé ɗátú nambi á imɔna ndea moamɛ nke, mmbé á ka Ɛtiɔpía. Nkpa ndɔ ɗákiɗi na Yɛusalɛ́ma k'aphe á beba á Mokonga.

²⁸ Ka ja akɛ gǎkɛ mɔtɛ-akɛ, ɗáiki ka koko nde mponda ɗáoɓotaga, n'aotanga suɓi á ɓuku ndea Isáya mɔtu-nyɔngɔ ndea Mokonga.

²⁹ Cɔ, Měma á kanga ɓojeɗe áongea Philípɔ te: «Sɛkɛɗa ka mpɛphɛ á koko ndɔɔ.»

³⁰ Philípɔ áokamisaga sɛkɛɗa ka mpɛphɛ í, áɔmɔ́ka nto á ka Ɛtiɔpía ndɔ n'aotanga suɓi á ɓuku ndea Isáya mɔtu-nyɔngɔ ndea Mokonga. Áomúsia te: «Oengekisi nyɔngɔ ndɔ ootanga ndɔ?»

³¹ Nkpa ndɔ áonsikisia te: «Neengekisande ɓó na kéna nkpa nde aomophangiaga?» Áɔmɔphana Philípɔ, ákambeɛ ka koko, áikɛ na yɛ.

³² Nkpa ndɔ ɗátú otanga k'ɔ́ma nde ɓáɗundu ɓe: «Ɗátú ɓea mɔgɔgɔ mmbé ɓáogaontena, áɔkɔɓa ɓea muna-mɔgɔgɔ mosá á nkpa nde aonkangaɗua. Kayɔngɛ gǎkɛ ka kema.

³³ Ɗáedidisi, ɓáotena nyɔngɔ nɛkɛ kángá koɗoni. Cɔ, ani mmbé atɔmiagaeka mbino á ɛɓɔkɔti nɛkɛ? Nga, ɗáɓámphúi ka mokonda.»

³⁴ Cɔ, mbɛɗanigi angbóngbó ndɔ áomúsia Philípɔ te: «Ka ɗenge-ɗenge, ómongoɗea phɔ́, mɔtu-nyɔngɔ ndea Mokonga nde ayɔngi gǔ á nkpa sina? Ka phɔa akɛ sasakɛ? Ka phɔa nkpa ɓaangbo?»

³⁵ Mpɔ, Philípɔ áokpanga tɔ̌mia akɛ Mbino-Ánjá ndea Yéso, n'akpangi n'ɔma nde nkpa ndɔ ɗáotanga.

³⁶ Ɓáotútuisa tamba nɛɓɔ, ɓáokiɗia k'ɔ́ma nde ɗátú na iɓo. Mbɛɗanigi angbóngbó ndɔ â gǎkɛ ongea te: «Cɔ, iɓo ungee, ekende aomoimisia oɓatisɔ?» [

³⁷ Philípɔ áongea: «Kaɓɛ n'oɓeeki ka měma akɔ bui, ɓáɔtɔka na ɓákoɓatisi.» Mpɔ nkpa ndɔ áonjisia: «Neɓeeki gea te Yéso Kiísito ande Muna-Mokonga.»]

³⁸ Mpɔ, mbɛɗanigi angbóngbó ndɔ áomamisisa koko, ɓɔbu ɓáodida ka iɓo, Philípɔ áomɓatisa.

³⁹ Ɓî ɓájabi, Měma á Mɔkɔta áɔnsɔmɛa Philípɔ. Mbɛɗanigi angbóngbó ndɔ kamɔnɛ ye. Â gǎkɛ otútuisa tamba nɛkɛ n'ana maseye.

⁴⁰ Mbusa, Philípɔ áɔsɛnɛka ka Ajɔ́tɔ, áɔtɔmiaga Mbino-Ánjá k'ɔ́ma bui, na ka ɓî ɗájú na Kaisalía.