Ekuma á ɓateki 7 - Ɔngana á Kɛ̌kɛ

Sɛtɛphánɔ abɛɗi ɓoabi suɓi á ntua ángbó á ɓɔphɛi

¹ Ngbɛga á ɓatoɓeigi-phɛ́a áomúsia Sɛtɛphánɔ te: «Nyɔngɔ ndɔ ɓakpa ɓáɔyɔnga a ɓo?»

² Sɛtɛphánɔ áǒsikisia ɓe: «Ɓabɛ na ɓana-ayi, ɔ́kani phɔ́! Mokonga, mɛna-ɓoombia ɗánkiɗianei tatasu Abalaámu n'aphɔ́tɔ ka nji á Mɛsɔpɔtamía, na káikimbɛ ka ntanga-nji á Aláni.

³ Áongoɗea: ‹Tóka k'ékombo nɛkɔ na ka nji nɛkɔ. Ógɛ ka nji nde nekophangiande.›

⁴ Mpɔ, Abalaámu aoɓoa ekombo nɛkɛ, áotóka ka nji nɛkɛ á Kaadɛ́a, áoga oika ka Aláni. Kó, mbusa á kukuwa á abakɛ, Mokonga áontóisa, áombikisa ka nji nde ɓoiki kau kɛ̌kɛnde.

⁵ Mokonga ɗákámophi tanda miki á ɔma ka bisa ecinji ka nji ndɔ ka gea áɓɛ ɓotukɔ nɛkɛ, â ndiu ɔmɔkɔa gea, amophande nji ndɔ bubui, yɛ na ɓasuko akɛ mbusa akɛ. Wandɔ, Abalaámu ɗákámɓɔkɔtimbɛ gǎkɛ miki mmbé atɔande ɓotukɔ nɛkɛ.

⁶ Cɔ, Mokonga ɗángoɗi Abalaámu ka Kanána te: ‹Ɓasuko akɔ ɓáikande phɔ́ ka nji nɛngbo ɓea ɓakɛni. Wa, ɓáegaiande ɓɔ ɓakɔɓɛ. Ɓato á ka nji ndɔ ɓáetambisagande ájeɗe phɛɛ ka ɓasaga mia gena (400).

⁷ Kaɓondɔ, ɓato á ka nji ɓunde ɓáegaiande ɓakpa nɛmɔ ɓakɔɓɛ, netenande nyɔngɔ nɛɓɔ akpɛ. Mbusa, néǒtókisa ɓakpa nɛmɔ ka nji ndɔ, ɓáoga omoɗokomisa k'ɔ́ma nde ɓokau kesande.›

⁸ Mpɔ Mokonga áɔɔnga konsamba na Abalaámu. Cina á konsamba ndɔ áoɓá gúa á ganja. Mpɔ, áombisia njaga, Abalaámu áɔmɓɔkɔta Isáka. Mbusa á pɔsɔ moci, Abalaámu áongusa Isáka ganja. Isáka amɔti ye gǎkɛ, áɔmɓɔkɔta Yakɔ́ɓɔ, áongusa ganja. Yakɔ́ɓɔ â phɔtɔ ogea ɓó ka ɓaniki nɛkɛ nkama na ɓaɓɛ (12).

⁹ Ka ɓatataɓɔ, moci ɗátú Yɔsɛ́phu. Ɓana-amakɛ nkama na moci (11), ɓáoɓá na nsengo gǔ akɛ. Kaɓondɔ, ɓáonsombisa, áoɓá nkɔɓɛ na Mísii. Nanga ɓó, Mokonga áoɓá kimoci na yɛ.

¹⁰ Áontókisa ka tambaga ndɔ, áomopha kɔɓɔɔngɛ na ɓonjánja-ékondi ndea Mokonga gea te, Phaláɔ, moamɛ á ka Mísii, áombisa mɔkɔta gǔ á Mísii n'endu nɛkɛ.

¹¹ Cɔ, monganya ángbó phɛɛ áogua ka Mísii bui na ka Kanána. Ɓakpa ɓáotambaga phɛɛ, ɓatatasu phɔtɔ ɓákáɓɛ n'eea.

¹² Ɓî Yakɔ́ɓɔ ɗáɔ́ki ye gea eea ana Mísii, áǒteka ɓatatasu mɔngɔ á ko ímoci kó.

¹³ Ka mɔngɔ á ko iɓɛ, Yɔsɛ́phu áǒngoɗisaga na ɓana-amakɛ. Mpɔ Phaláɔ áoúba cina á ekombo ndea Yɔsɛ́phu.

¹⁴ Mpɔ, Yɔsɛ́phu áǒteka ɓana-amakɛ k'aphe á ɔphana á abakɛ Yakɔ́ɓɔ n'ékombo nɛkɛ bui. Ɗáɓátú ɓakpa nkama ngianjaga iɓɛ na ɓɔku (75).

¹⁵ Kaɓondɔ, Yakɔ́ɓɔ, n'ékombo nɛkɛ bui, ɓáoga na Mísii. Kó, yɛ na ɓatatasu ɓunɛngbo ɓáosía.

¹⁶ Ɓáokumbaga mǒnda aɓɔ ka gǎ ně na Sɛkɛ́mu á ka Kanána. Wa, ɓáoúmbaga ka ngbangbata nde Abalaámu ɗásombi na imɔna mɔtɛ á ɓana Ɛmɔ́a.

¹⁷ Bíbí á tɔtɔkɛana á mɔkɔ ndea Mokonga ka Abalaámu, ɓatatasu ɓáoɓika phɛɛ ka Mísii.

¹⁸ Mpɔ, moamɛ nɛngbo áomamea nji á Mísii, kaɓɛ ye oúba ekombo ndea Yɔsɛ́phu.

¹⁹ Áǒdemaga ɓatatasu, áǒgeea ájeɗe, áǒsosea gea, ɓáesagɛ ɓambɛnjɛ, ɓásiɛ.

²⁰ Ka matú ndɔ, Mósa â gǎkɛ ɔɓɔkɔtɛana. Ɗátú miki anjánjá phɛɛ. Mokonga áonkonda. Ɓaɓɔkɔti akɛ ɓáɔmmɔtisa k'éndu nɛɓɔ ɓasonge ɓasaɔ.

²¹ Mbenɔ nde ɓaɓɔkɔti akɛ ɗáɓánɗeketi ye, nseka ndea Phaláɔ áɔmɔna, áɔmbɛɗa, áɔmmɔtisa ɓea anakɛ.

²² Báomúbisa Mósa kɔɓɔɔngɛ bubui ndea Ɓamísii. Áoɓá mǒko akpɛkpɛ ka ɓoabia nɛkɛ n'ekuma nɛkɛ.

²³ Mbenɔ nde Mósa ɗátú na ɓasaga nkama gena (40), áosuia gǎ ɛnjia á ɓana-amakɛ Ɓaisilaɛ́li.

²⁴ Akiɗi ye mɔtɛ-aɓɔ, áɔmɔna muna-amakɛ moci na nto á ka Mísii n'aontambisaga. Aɔni ye ɓó, áogisia nyɔngɔ á muna-amakɛ, áɔmɓɛta nto á ka Mísii ndɔ áokuwa.

²⁵ Wa, áoúba te, ɓana-amakɛ Ɓaisilaɛ́li ɓámɔnande na sesea akɛ ɓea namisi nɛɓɔ mmbé Mokonga anteki. Ɓɔ, ɓákáengekisɛ gǎkɛ nyɔngɔ ndɔɔ.

²⁶ Mama í, Mósa áǒdonda Ɓaisilaɛ́li ɓaɓɛ na ɓáomana, áogea éunɛ. Áǒngoɗea: ‹Ɓaya, ɓókó phɔ́ ɓato ékita? Eke nde ɓootambisanaga kau?›

²⁷ Ka ɓɔ moci mmbé ɗáonjakaɗisaga dakɛ, áontiɓa Mósa, áongea ɓe: ‹Moko, ani mmbé akophi kɔkɔta á tena á nyɔngɔ nɛsu?

²⁸ Oma ogea, ómomowɛ ɓíndɔ omowema nto á ka Mísii ndɔ nǎma?›

²⁹ Ɓî Mósa aɔ́ki ye ɓó, áotea, áoga oika na Midiáni ka nji á ɓakɛni. Kó, áɔ̌ɓɔkɔta ɓaniki ɓaɓɛ.

³⁰ Ɓî, saga nkama gena (40) anyɛ́nyi ye gǎkɛ, Mósa áoɓá bíbí á mamba Sinái. Wa, áɔɔna esasa n'aǒtoɓoaga, malaéka n'asuɓi á ɛɛmbɛ á nsa ndɔɔ.

³¹ Ka ɔna í, Mósa áotangaaga, áɔsɛkɛɗa bíbí á nsa ndɔ, ka gea áengekisɛ. Wa, áɔɔ́ka ɛsɔ á Mɔkɔta n'aogea:

³² ‹Eme aámbé nende Mokonga, mmbé ɓatatakɔ Abalaámu, Isáka na Yakɔ́ɓɔ ɗáɓámbɛɗaneigi.› Nyama á Mósa áɔɛkana na kɔɓɔɓɔkɔ, katɔkɛ ye tanda ɛnjia á kuɓei.

³³ Mpɔ, Mɔkɔta áongoɗea: ‹Phúia ɓiato nɛkɔ, ka nyɔngɔ nde ɓî omamege, ande ɔma á kanga ɓojeɗe.

³⁴ Cɔ, nɛɔni ye tɔ tambisaga á ɓakpa nɛmɔ ka Mísii. Nɛɔ́ki phɔtɔ ngamɔ nɛɓɔ. Nekií gǎkɛ ka mokonda, k'aphe á phúia aɓɔ ka kɔkɔɓɛ. Cɔ, bika, neokoteka kɛ̌kɛnde na Mísii.›

³⁵ Cɔ, Mósa aámbɔ Ɓaisilaɛ́li ɗáɓán'yé na gea akɛ te: ‹Ani mmbé akophi kɔkɔta á tena á nyɔngɔ?› Mokonga ɗánteki ka gea áɓɛ moamɛ na namisi nɛɓɔ, malaéka nde ɗátú suɓi á ɛɛmbɛ á esasa ndɔ, yɛ aámbé ɗátú onenga.

³⁶ Mósa phɔtɔ aámbé ɗáetókisi Ɓaisilaɛ́li ka Mísii, ɗáetóisi n'aɔtɔtɔkisa ketangaɔ na mphangiɔ ka Mísii na k'Oɓenge á otaneaga. Â phɔtɔ ogea ɓó ka nkanda, ka ɓasaga nkama gena (40).

³⁷ A phɔtɔ Mósa mmbɔ ɗéngóɗi Ɓaisilaɛ́li nyɔngɔ gea: ‹Mokonga anjuanisande mɔtu-nyɔngɔ nɛkɛ ɓea eme. Aɓande k'ékombo nɛnu.›

³⁸ A phɔtɔ aámbɔ ɗáedondanisigi Ɓaisilaɛ́li ka nkanda. Ɗáiki na ɓatatasu, phɔtɔ na malaéka, mmbɔ ɗáyɔngi na yɛ ka mamba á Sinái. Yɛ aámbé ɗá phɔ́ ɔɔ́ka mbino á endisa, mpɔ áɔsɔtɔnganisia ú.

³⁹ Ɓatatasu ɓákákondɛ gǎkɛ ɔ́ka á mbino nde Mósa ɗáɔ́ki. Ɓáɔnkpɛmɛa, ɓâ tɔ okonda sikianaga na Mísii.

⁴⁰ Ɓáongoɗea ntoɓeigi-phɛ́a Alɔ́ni te: ‹Ɓɔngisiaga k'asu iii á ɓamokonga á mbɛa ɓunde ɓásɔmɛɛande mosá. Nga Mósa, mmbɔ ɗásotókisi na Mísii, ɓékéoúba nyɔngɔ sina nde angui.›

⁴¹ Mpɔ, ɓáɔsɛka iii á ɓamokonga á mbɛa, nnde akengeani na miki á ngɔmbɛ. Ɓáotoɓea phɛ́a mosá í, ɓáoɓá k'ekai ángbó, ka ɔna ekuma á ka njaga aɓɔ.

⁴² Mokonga aɔni ye ɓó, áǒmakea Ɓaisilaɛ́li ngɔngɔ. Aǒɗeketea gea, ɓángiɛ k'esomba á ɓasɛɛngɔa, ɓíndɔ ɓáɗundu ka ɓuku á ɓaɔtu-nyɔngɔ ndea Mokonga gea: ‹Ɓaisilaɛ́li ɓaya, ande ka phɔani aunge ɗóɓotoɓu nyama á phɛ́a na phɛ́a nɛngbo ka saga nkama gena (40) nde ɗóɓotú ka nkanda?

⁴³ Ɗóɓokumbigi ndiu ɛma ndea mɔkɔta á na koba Mɔlɛki. Ɓô phɔtɔ ogea ɓó na iii á sɛɛngɔa á mokonga á mbɛa, Lɛpháni. Ɓɔ́ɔsɛka iii aɓɔ ka ɗokomisa aɓɔ. Kaɓondɔ, nenótóisande ɗanga kɔnyɛ́nya Babilɔ́ni.›

⁴⁴ Cɔ, ka nkanda ndɔ, ɓatatasu ɗáɓátú na ɛma nde ɗáɓábisi gáo nde ɓáɗundu nyɔngɔ á konsamba nde Mokonga ɗáɔngani na ɓɔ. Ɛma ndɔ, ɗáɓáɓɔngisigi ɓíndɔ Mokonga ɗámɔkusigi Mósa na phangia akɛ kaengekɔ í.

⁴⁵ Ɛma ndɔ aunge ɓatatasu ɗáɓáoɗeketeanaga k'ɛɓɔkɔti ndea mbusa, na ka ɓî ɗáɓángi ně ka nji á mɔkɔ nnde ɗáɓádungi na Yɔsúa aámbé aemamei. Mokonga áoɓeaga ekuna bui mosá aɓɔ ka nji ndɔɔ. Ɛma ndea Mokonga áoika kó na ka ɓî kɔkɔta á Daúdi ɗájú.

⁴⁶ Daúdi áoɓá na ɓonjánja-ékondi ndea Mokonga na ka ɓî ɗámɛmi Mokonga nde ɓa Yakɔ́ɓɔ gea, yɛ Daúdi ámphɛkɛɛ endu.

⁴⁷ Sɔlɔmɔ́nɔ mpɛnɛ á Daúdi, aámbé ɗámphɛkɛi ye tɔ ɔma á ɓuiki kau.

⁴⁸ Ande gea te, Mokonga mmbé ana kɔkɔta bui, nnaoika ɗoni k'éndu ɓakpa na ɓáphɛ̌ki, ɓíndɔ mɔtu-nyɔngɔ ndea Mokonga ɗáyɔngi:

⁴⁹ ‹Mokonga agie: Ego ande kankaanga nɛmɔ á koɓoamɛ. Mokonda, ande ɔma á bisa á ecinji ani. Cɔ, endu sina nde ɓɔmɔphɛkɛande? Ɔma sina nde neúmbiande?

⁵⁰ Kéconji kema á ka mokonda bubui ka njaga ani?›

⁵¹ Cɔ, ɓenu ɓato á mɔ̌ akpɛ nde ca! Ɓawó á ka měma na ɓaɗaki-kecue nde ca! Esa bui ɓoopúa na Měma á kanga ɓojeɗe ɓíndɔ ɓatatanu ɗáɓátú ogea.

⁵² Ka ɓaɔtu-nyɔngɔ ndea Mokonga sina mmbé ɓatatanu ɗáɓákántambisigi? Eya, ɗáɓáemowe ɓundɔ ɗáɓáɔtu kiɗia á mbɛɗanigi nɛkɛ, Nto á koɗoni. Ɓenu gǎkɛ, ɓɔ́ɔntɔnga, ɓóommowa.

⁵³ Ɓenu phɔtɔ, ɗɔ́ɓɔtɔí nyɔngɔ á ɛɔphi, nnde ɓamalaéka ɗáɓánóphi, ɓókóɓeɛ.»

Ɓámowe Sɛtɛphánɔ

⁵⁴ Ɓayúda, ɓunde ɗáɓátú ka ntua, ɓî ɓáɔ́ki ye ɓó, ɓáonkokea Sɛtɛphánɔ minyɔ na ɓɛɛa akɛ phɛɛ.

⁵⁵ Sɛtɛphánɔ â gǎkɛ otúma na Měma á kanga ɓojeɗe, áoenga na koba, áɔɔna ɓoombia ndea Mokonga, Yéso n'amamege ka njaga akɛ á mǔku.

⁵⁶ Áɔyɔnga te: «Ɔ́mɔɔ́kani! Nɛɔni koba n'akoɗokani, Muna-Nkpa, n'amamege ka njaga á mǔku á Mokonga.»

⁵⁷ Wa, ɓakɔta á k'ɔma á madondanɔ ndea Ɓayúda ka nyɔngɔ á Mokonga, ɓáokoga akpɛ na ɓáɗakigi kecue aɓɔ na ɓɔbu ɓáombutukia Sɛtɛphánɔ,

⁵⁸ ɓáonga ně bǎ á ntanga-nji. Mpɔ, ɓáomowa ka makeaga akɛ ɛtɛ ka mɔ̌. Ɓaɗigimisi á nyɔngɔ ndɔ ɓáɔbɛɗa bɔngɔ nɛɓɔ, ɓáobisa ka njaga á moganda moci, ina akɛ Saúlɔ.

⁵⁹ Na ɓá phɔ́tɔ ɔmɓɛta Sɛtɛphánɔ n'ɛtɛ, yɛ áɔmɛma ɓe: «Mɔkɔta Yéso, bɛɗa měma ani!»

⁶⁰ Mpɔ, áogbúka muanku, áokoga akpɛ phɛɛ, áogea: «Mɔkɔta Yéso, kóbisɛmbɛ nyɔngɔ á ɓojeɗe nɛɓɔ ka měma.» Mbusa á yɔnga akɛ ɓondɔ, áokuwa.