Ekuma á ɓateki 6 - Ɔngana á Kɛ̌kɛ

Ɓáɛsɔmbu ɓakpa ngianjaga iɓɛ (7) ka enga á ɓateki ndea Yéso

¹ Ka mbenɔ ndɔ mɔɔmba á ɓagoigi ndea Yéso ɗáǒyamea phɛɛ, Ɓayúda ɓundɔ ɓáɔyɔnga Kigiíki ɓáɔ̌ngɔngɔnɛaga phɛɛ ɓadaɓɔ ɓundɔ ɗáɓáɔyɔnga Kiɛbulanía. Nga ɓɔ, ɗáɓáǒɓosea ɓake á k'ekusa ndea ɓunde ɗáɓáɔyɔnga Kigiíki mbenɔ égabɔ.

² Kaɓondɔ, ɓateki ndea Yéso nkama moci na iɓɛ (12), ɓáǒdondanisa ɓagoigi ɓɔbu, ɓáogea te: «Kákeni ɓéɗeketɛ phɛá á ɓakpa nyɔngɔ á Mokonga, ɓéikiɛ ndiu gaba á eea.

³ Cɔ, ɓaya, ɔ́sɔmbɔani ɓakpa ngianjaga iɓɛ (7) sɔsɔɓɛ anu, ɓunde ɓá na tambea ánjá, ɓátúmi na Měma á kanga ɓojeɗe na ɓá na kɔɓɔɔngɛ, ɓébisɛ k'ékuma á egabɔ.

⁴ Ɓesu gǎkɛ, ɓeikande nɛsu k'ékuma á ɛmɛmi na phɛá á ɓakpa nyɔngɔ á Mokonga.»

⁵ Nyɔngɔ ndɔ áɔ̌ɓɔngɛa ɓakpa ɓɔbu. Mpɔ ɓáɔ̌sɔmbɔa ɓakpa ndee: Sɛtɛphánɔ, mmbɔ ɗátúmi na ɓeekea ásii, phɔtɔ na Měma á kanga ɓojeɗe, Philípɔ, Pɔɔkɔ́ɔ, Nikanɔ́a, Timɔ́ni, Paamɛ́na, Nikɔláɔ nto á ka Antiɔkía, mmbɔ ɗáɓeeki esomba ndea Ɓayúda.

⁶ Ɓáǒbisa mosá á ɓateki, ɓateki ɓáǒbisia njaga, ɓáɔmɛma Mokonga ka nyɔngɔ aɓɔ.

⁷ Mpɔ, nyɔngɔ á Mokonga áɔɛmba phɛɛ, ɓagoigi ɓáoɓika phɛɛ ka Yɛusalɛ́ma. Ɓatoɓeigi-phɛ́a ɓásii ɓâ phɔtɔ omɓeekea Yéso.

Ɓándungi nengi-kanisa Sɛtɛphánɔ

⁸ Cɔ, Sɛtɛphánɔ, mmbɔ ɗátúmi na ɓonjánja-ékondi ndea Mokonga na ɓukpɛkpɛ nɛkɛ, ɗátúogea ketangaɔ ángbó na mphangiɔ sɔsɔɓɛ á ɓakpa.

⁹ Ɓakpa ɓuangbo ɗáɓátú ka ɓato á k'éndu á madondanɔ ndea Ɓayúda ka nyɔngɔ á Mokonga, nnde ɗáɓáɔɔphana «Ɓakɔɓɛ na ɓáekoɗi.» Ɓakpa ndɔ ɗáɓátóki na Kuɛ́nɛ na Alɛsanduía. Ɓuangbo ɗáɓátóki na Kilikía na Asía. Cɔ, ɓakpa ndɔ ɓáokpanga púa na Sɛtɛphánɔ.

¹⁰ Ɗáɓákántɔki gǎkɛ ka nyɔngɔ á ɓî ɗáɔyɔnga na kɔɓɔɔngɛ nde Měma á kanga ɓojeɗe ɗámophi.

¹¹ Kaɓondɔ, ɓáǒɓopha ɓakpa imɔna gea, ɓáyɔngɛ ɓe: «Ɓɛmɔ́ki nkpa nde n'aombóma Mósa na Mokonga!»

¹² Ɓakpa ndɔ ɓáɔ̌sɔia ɓakpa, ɓagbɛga na ɓaɗundu-ɛɔphi. Ɓɔ, ɓáondunga Sɛtɛphánɔ, ɓáombika ně mosá á ntua ángbó á ɓɔphɛi.

¹³ Ɓâ phɔtɔ ǒbika na ɓatɔngi á mbɛa. Ɓɔ, ɓáogea te: «Mogaa nde nnaoɗeketa yɔnga ájeɗe gǔ éndu á Mokonga, n'ɛɔphi nɛsu.

¹⁴ Nga, ɗɛ́ɓɛmɔ́ki n'aɔyɔnga gea, Yéso ɓa Najalɛ́ti angbɔande endu ndea Mokonga, áogaia asii nde Mósa ɗásophi.»

¹⁵ Mpɔ, ɓakpa ɓɔbu ɓunde ɗáɓádondanigi wa, ɓáontúmia Sɛtɛphánɔ n'íso, ɓáɔɔna keongi akɛ n'akengeani na keongi á malaéka.