Ekuma á ɓateki 5 - Ɔngana á Kɛ̌kɛ

Ananía na Saphíla ɓági odemayɔ

¹ Ɗátú phɔtɔ na nkpa moci, ina akɛ Ananía, ina á nkakɛ Saphíla, ɗáɓáɔ́kani ka sombisa á oɗo nɛɓɔ.

² Mbusa, áɔsɔmɛa phaeka á imɔna kau, nkakɛ ɗáúbi phɔtɔ nyɔngɔ ndɔ bui. Mpɔ, Ananía áobisa phaeka á imɔna ka njaga á ɓateki ndea Yéso.

³ Pɛ́tɛɛ â gǎkɛ ongoɗea te: «Ananía caa! Eke nde Sɛtáni, angí ně ka měma akɔ, na dema á Měma á kanga ɓojeɗe ɓende? Nga, ɔsɔ̌mi phaeka á imɔna nde ɔtɔí ka ciko ndɔɔ.

⁴ Cɔ, mosá á sombisa í, kátú akɔ? Mbusa á sombisa í, imɔna í ɗákátú phɔtɔ akɔ? Cɔ, nyɔngɔ sina nde ɗóangi gea ɓo? Kóndemi nkpa, ondemi ndiu Mokonga.»

⁵ Ka ɔ́ka á nyɔngɔ ndɔ, Ananía áogua ka oɗo gbu! Áokuwa. Ɓakpa ɓáɔ́ki ye nyɔngɔ ndɔ, ɓáoɓánga phɛɛ.

⁶ Mbusa, ɓaganda ɓáɔbɛɗa mǒnda akɛ, ɓáoɓóaga na bɔngɔ, ɓáoga oúmba.

⁷ Mbusa á mbenɔ ɓea isaɔ, nkakɛ áojúa kángá á úba á nyɔngɔ nde ɗángui munyakɛ.

⁸ Mpɔ Pɛ́tɛɛ áomúsia te: «Ómongoɗea phɔ́, sungia á imɔna nde ɓɔtɔí ɓî ɗóɓosombisi oɗo nɛnu a tɔ unge?» Yɛ áoɓeekea: «Eya, a tɔ ungɔ.»

⁹ Mpɔ Pɛ́tɛɛ â gǎkɛ ongoɗea te: «Ɓoɓeekeani ka jɔbisaga á Měma á Mɔkɔta? Cɔ, ɔɔɓɔna ɓakpa nde ɓátóge omúmba munyakɔ, ɓáungɔ ɓá k'íso á mpume. Ɓákogande phɔtɔ ně ɓó.»

¹⁰ Mɔngɔ moci, áogua mosá akɛ gbu! Áokuwa. Ɓaganda ndɔ ɓáongia, ɓáondonda n'aku. Ɓáokumba mǒnda akɛ, ɓâ goto tɔ oga oúmba ka mpɛphɛ índe á munyakɛ.

¹¹ Kaɓondɔ, ɓato á ka kanisa ɓɔbu na ɓunde ɗáɓáɔ́ki nyɔngɔ ndɔ ɓáoɓánga phɛɛ.

Ɓateki ndea Yéso ɓági ketangaɔ

¹² Ɓateki ndea Yéso ɗáɓáɔtɔtɔkisa ketangaɔ na mphangiɔ ásii sɔsɔɓɛ á ɓakpa. Ɓaɓêki ɗáɓáɛmbani dondanaga kimoci ka ntua ndea Moamɛ Sɔlɔmɔ́nɔ.

¹³ Ɓundɔ ɗáɓákátú ɓaɓeeki, nna na ka ɓɔ nde ɗáokinia dondanaga na ɓɔ. Nanga ɓó, ɓakpa ɗáɓáǒbeba ɓaɓêki phɛɛ.

¹⁴ Ɓakpa nde ɗáɓáomɓeekea Mɔkɔta, ɓǒko na ɓake ɗáɓáǒyamea phɛɛ.

¹⁵ Ka nyɔngɔ á kema bui nde ɗágeani, ɓakpa ɓáǒbika na ɓasambi na ɓébisi k'éka na ka kɛsɛ, ɓáǒbisa k'aphe, ɓáoseɓea gea, iii á Pɛ́tɛɛ égbukumiɛ mbenɔ nde aɔnyɛ́ya.

¹⁶ Usɛsɛ á ɓakpa á ka ntanga-nji á ka mpɛphɛ á Yɛusalɛ́ma, ɓâ phɔtɔ ǒbika na ɓasambi, na ɓato á kukuwa á ɓansombo, ɓáoama ka njaga á ɓateki.

Ɓateki ndea Yéso ɓáotambaga

¹⁷ Mpɔ, ngbɛga á ɓatoɓeigi-phɛ́a, na ɓunde ɗáɓátú kimoci na yɛ ande gea te, ɓato á k'ékombo ndea Ɓasadukáyɔ, ɓáoɓá na nsengo ka ɓateki na kanea aɓɔ.

¹⁸ Kaɓondɔ, ɓáǒdunga ɓateki, ɓáǒmakea ka mekakɔ ángbó.

¹⁹ Kǐpha, malaéka ndea Mɔkɔta â ndiu oúkuwa kǐo á mekakɔ, áǒjuanisa ɓateki. Áǒgea te:

²⁰ «Gǎni, k'éndu á Mokonga, ɓɔ́tɔ̌miɛ ɓakpa nyɔngɔ á enda á kɛ̌kɛ.»

²¹ Ɓáoɓeekea. Ka mɔkɛsuɛ, ɓáongia k'éndu á Mokonga, ɓáogoisaga. Mbusa, ngbɛga á ɓatoɓeigi-phɛ́a ndea Ɓayúda, kimoci na ɓadakɛ, ɓáɔ̌ɓɔphana ɓagbɛga ɓɔbu ndea ka Isilaɛ́li ka ntua ángbó á ɓɔphɛi. Mpɔ, ɓáǒteka ɓakpa ka gǎ bɛɗa ɓateki.

²² Ɓundɔ ɓáge ɔ̌bɛɗa, ɓákědondɛ suɓi á mekakɔ. Ɓáoja, ɓáɔyɔnga ɓe:

²³ «Ɓedondi kǐo á mekakɔ na ɓáphǎti akpɛ, ɓaɓondigi na ɓámé k'ɔ́ma á bɛɗanaga nɛɓɔ mosá éndu. Ɓî ɓeúku ye gǎkɛ kǐo, ɓɛ́kɛmɔnɛ ka nkpa suɓi í.»

²⁴ Ɓî mɔkɔta á ɓaɓondigi-endu á Mokonga na ɓagbɛga á ɓatoɓeigi-phɛ́a ɓáɔ́ki tɔ nyɔngɔ ndɔ, měma aɓɔ áoɓá na ngǎka phɛɛ. Ɓáoúsianaga ngǔngu aɓɔ te: «Nyɔngɔ sina nde ěgui ɓateki.»

²⁵ Mpɔ, nkpa moci áobika, áǒngoɗea te: «Ɔ́kani phɔ́! Ɓakpa nde ɓotóomaki ka mekakɔ, ɓá k'éndu á Mokonga, ɓáǒgoisaga ɓakpa.»

²⁶ Mbusa, mɔkɔta á ɓaɓondigi-endu á mekakɔ, áoga kimoci na ɓabɛɗanigi nɛkɛ k'aphe á jisa á ɓateki. Ɗáɓědungi ɓokɛ-ɓokɛ, ka nyɔngɔ nde ɗáɓáɓángi oyombɔ gea, ɓakpa ɓákáemakeɛgɛmbɛ ɓabɛɗanigi ndɔ ɛtɛ ka kusa aɓɔ.

²⁷ Ɓáǒbika ně, ɓáǒbisa ka ntua ángbó á ɓɔphɛi. Mpɔ, ngbɛga á ɓatoɓeigi-phɛ́a áǒúsia te:

²⁸ «Ɓékétónoimisima akpɛ gea ɓókogoisɛgɛmbɛ ye k'ína á mogáa ndɔ? Cɔ, kɛ̌kɛnde, ɓɔɛmbisi ye tɔ goisaga nɛnu ka Yɛusalɛ́ma bui, ɓokondi phɔtɔ, ɓóbisɛ mengombo á kukuwa akɛ ka mɔ̌ asu!.»

²⁹ Pɛ́tɛɛ, kimoci na ɓadakɛ ɓateki, ɓáǒsikisia te: «Akeni ɓɛ́mɔkɛ Mokonga, kɔ̌nyɛ́nya ɓakpa.

³⁰ Mokonga, mmbé ɓatatasu ɓámbɛɗaneigi, anjujúkisi Yéso mmbɔ ɗóɓonkɔkɛigi gǔ á moyangɔ, ɓóomowa.

³¹ Yɛ aámbé Mokonga anɗokomisi, áombisa nkɛkɛɔ á njaga akɛ á mǔku gea, áɓɛ moamɛ na Namisi ndea ɓato á ka Isilaɛ́li gea, ɓákětiɛ tambea nɛɓɔ na Mokonga áímɛ ɓojeɗe nɛɓɔ.

³² Ɓende phɔtɔ ɓaɗigimisi á nyɔngɔ ndɔ bubui. Měma á kanga ɓojeɗe mmbé Mokonga ɗéɓophi ɓundɔ ɓáɔmɔ́ka a phɔtɔ ogea ɓó.»

³³ Ɓî ɓato á ka ntua ángbó á ɓɔphɛi ɗáɓáɔ́ki ɓó, nyɔngɔ ndɔ áǒsumba ka měma, ɓáokaɓa aphe á mowa ɓateki.

³⁴ Mophaisáyɔ moci ɗátú gǎkɛ sɔsɔɓɛ aɓɔ, mmbɔ ɓáɔmɔphana Gamaliɛ́li. Ɗátú phɔtɔ nɗundu-ɛɔphi, mmbé ɓakpa ɓɔbu ɗáɓátú ɔmɔ́ka phɛɛ. Áoma, áɔmɛma gea ɓéjuanisɛ ɓateki ka ntua ángbó á ɓɔphɛi ka mbenɔ ábɔa.

³⁵ Mpɔ, áǒngoɗea te: «Ɓaisilaɛ́li ɓaya, óengani ánjá na kema nde ɓoogea ɓógeɛ ka phɔa ɓakpa ndee.

³⁶ Nga, kányɛ́nyimbɛ esa ásii, mogáa moci ɗásɛnɛki ina akɛ Tɛúda. Yɛ, ɗáǒɗokomisa gea, ande nkpa angbóngbó, ɓakpa ɓea mia gena (400) ɓáomɓea. Ɓakpa ɓuangbo ɓâ gǎkɛ omowa na ɓundɔ ɗáɓámɓǐ, ɓáophanjekana ɓɔbu. Nyɔngɔ ndɔ áoɓá ecici.

³⁷ Mbusa ábɔa, Yúda nto á ka Galiláya áɔsɛnɛka ka matú á tanga á ɓakpa, áǒɓotea ɓakpa, â phɔtɔ okuwa. Ɓunde ɗáɓámɓǐ ɓáophanjekana ɓɔbu.

³⁸ Nenóngoɗi gǎkɛ kɛ̌kɛnde gea, ɗeketani nyɔngɔ á ɓakpa ndee nga, aoɓá nyɔngɔ nɛɓɔ, n'ekuma nɛɓɔ n'ande á kokpa, aújukanande.

³⁹ A gǎkɛ oɓá n'atóki ka Mokonga, ɓɔ́kɔ́tɔkɛku na ɓotúkatúki. Ɛ́ngɛphani, ɓókommanisɛmbɛ Mokonga.» Mbusa, ɓáoɓeekea nyɔngɔ ndea Gamaliɛ́li,

⁴⁰ ɓáɔ̌ɓɔphana ɓateki, ɓáǒɓindisa. Ɓáǒimisia gea, Ɓákáyɔngɛmbɛ ye k'ína á Yéso. Mpɔ, ɓáǒɗeketa.

⁴¹ Mbusa í, ɓateki ɓáojuana ka ntua ángbó á ɓɔphɛi na maseye. Nga Mokonga ɗáɔni ánjá ɓáɛtɛbɛɛgɛ na ɓátambɛgɛ k'ína á Yéso.

⁴² Esa bui, k'éndu ndea Mokonga na k'éndu nɛɓɔ, ɗáɓákáɗeketi goisaga na tɔ̌mia á Mbino-Ánjá ndea Yéso Kiísito.