Ekuma á ɓateki 4 - Ɔngana á Kɛ̌kɛ

Pɛ́tɛɛ na Yoáni mosá á ntua ángbó á tena á nyɔngɔ

¹ Ɓî Pɛ́tɛɛ na Yoáni ɗáɓátú phɔ́tɔ ɔyɔngaga na ɓakpa, ɓatoɓeigi-phɛ́a, ɓáǒkiɗianea kimoci na mɔkɔta á ɓaɓondigi-éndu á Mokonga na Ɓasadukáyɔ.

² Ɓáɔɓɛa phɛɛ nga, Pɛ́tɛɛ na Yoáni ɗáɓáǒgoisaga ɓakpa nyɔngɔ á jujúka á Yéso ka kukuwa. Nga, jujúka akɛ ka kukuwa, aunge aengekisi gea ɓasí ɓájujukande ka kukuwa.

³ Kaɓondɔ, ɓáǒdunga, ɓáǒmakea ka mekakɔ na ka ɓî esa ɗáge okoɗokana nga, ɗá ye tɔ ɔgɔgɔ.

⁴ Ɓakpa ɓásii ɓundɔ ɗáɓáɔ́ki gǎkɛ ɓɔphɛi ndɔ, ɓáoɓeekea, ɓaɓêki ɓáoɓika phɛɛ. Ɓǒko ɓáoɓá ɓea ɛlɛphu ɓɔku (5.000).

⁵ Cɔ, mama í, ɓakɔta á Ɓayúda, ɓagbɛga na ɓaɗundu-ɛɔphi ɓáodondanaga ka Yɛusalɛ́ma.

⁶ Sɔsɔɓɛ aɓɔ ɗáɓátú phɔtɔ na: Anási, ngbɛga á ɓatoɓeigi-phɛ́a ɗátú wa, kimoci na Kayápha, Yoáni, Alɛsandúɔ na ɓato á k'ékombo ndea ɓagbɛga á ɓatoɓeigi-phɛ́a.

⁷ Ɓáǒmamisisa Pɛ́tɛɛ na Yoáni mosá aɓɔ, ɓáǒɓúsiaga gea: «Ɓogima ketangaɔ nde na ɓukpɛkpɛ sina, na k'ína á ani?»

⁸ Mpɔ, Pɛ́tɛɛ áotúma na Měma á kanga ɓojeɗe, áǒsikisia te: «Hoo! Ɓenu ɓakɔta na ɓagbɛga,

⁹ ɓoosoúsiaga kesande ka nyɔngɔ á kema ánjá nde ɓegi ka nɗɔti ndɔ na ka ama akɛ.

¹⁰ Ambe ɓenu ɓɔbu na Ɓaisilaɛ́li ɓɔbu, ɓóúbɛ gea, nɗɔti ndɔ aami na amé mosá anu ka ɓukpɛkpɛ á ina á Yéso Kiísito ɓa Najalɛ́ti, mmbɔ ɗóɓonkusi ka moyangɔ. Mokonga anjujúkisi gǎkɛ ka kukuwa.

¹¹ Yéso a ɓea ɛtɛ ndɔ ɓenu ɓaphɛki ɗóɓoyé. Cɔ, ěphangisi ye tɔ kɛ̌kɛnde ɛtɛ ététe á mɔphɛkɔ, ɓíndɔ ɗáɓáɗundu kala suɓi á Ɓuku á Mokonga.

¹² A tɔ yɛ aámbé aǒamisa ɓakpa ka měma. Nga, ka mokonda bui nna tanda na ina nde Mokonga aeɓophi ɓakpa n'ana ɓukpɛkpɛ á amisa á ɓɔ ka měma.»

¹³ Ɓakpa nde ɗáɓá ka ntua ndɔ, ɓáoyayama phɛɛ ɓî ɓɛ́ɓɔni Pɛ́tɛɛ na Yoáni na ɓáɔyɔnga kángá á kɔɓɔɓɔkɔ, na úba gea ɗáɓátú ɓato á jǎi-jǎi, ɓundɔ ɗáɓákángi ka kaasi. Ɓáoúba phɔtɔ gea, ɓɔ ɗáɓátú na Yéso.

¹⁴ Ɓî ɗáɓámɔni ye gǎkɛ nkpa ndɔ n'aami, n'amé goto kimoci na ɓɔ, ɗáɓákátú ye tanda na kema á yɔnga.

¹⁵ Kaɓondɔ, ɓáǒsosea gea, ɓájuanɛ ka ntua ángbó á tena á nyɔngɔ. Ɓáokpanga yɔngaga ngǔngu aɓɔ.

¹⁶ Ɓáogea te: «Ɓeǒgea ɓakpa nde ɓo? Nga, ɓato á ka Yɛusalɛ́ma ɓɔbu ɓáoúba base gea, ɓɔ ɓáunge ɗáɓági mphangiɔ ángbó. Ɓéké gǎkɛ ɔtɔka na ɓengáni.

¹⁷ Cɔ, ɓéɓángisɛni gea te, ɓákáɛmbisɛ mɔnɔ nyɔngɔ ndɔ na ɓákákumiɛmbɛ phɔtɔ ina á Yéso ka nkpa.»

¹⁸ Mbusa, ɓâ goto ɔ̌ɔphana na imisia aɓɔ akpɛ gea: «Ɓɔ́kɔ́yɔngɛmbɛ tanda na goisaga á ɓakpa k'ína á Yéso.»

¹⁹ Mpɔ, Pɛ́tɛɛ na Yoáni ɓáǒsikisia te: «Tenani phɔ́ nyɔngɔ nde sasanu. Aánjá mosá á Mokonga ɔ́ka anu kángá á ɔ́ka Mokonga?

²⁰ Nga, ɓesu ɓékéɔtɔka ɗeketa á yɔnga á kema nde ɗɛ́ɓɛɔni, na nnde ɗɛ́ɓɛɔ́ki.»

²¹ Mbusa á ɓangisa aɓɔ goto, ɓáǒɗoa. Ɗáɓákáɔni nyɔngɔ á tambisaga aɓɔ kau nga, ɓakpa ɓɔbu ɗáɓáombeba Mokonga ka nyɔngɔ á kema nde ɗágeani.

²² Nɗɔti ndɔ ɗáami ka ketangaɔ, ɗátú na ɓasaga kɔnyɛ́nya nkama gena (40).

Ɓaɓêki ɓáɔmɛma Mokonga

²³ Ɓî ɗáɓěɗu ye, Pɛ́tɛɛ na Yoáni ɓáosikianaga, ɓáoga ǒdonda ɓadaɓɔ ɓaɓêki. Ɓáɔ̌tɔmiaga nyɔngɔ nde ɓagbɛga á ɓatoɓeigi-phɛ́a na ɓagbɛga á ka nji ɗáɓěngoɗi.

²⁴ Ɓî ɓáɔ́ki ye nyɔngɔ ndɔ, ɓáɔmɛma Mokonga n'ɛsɔ moci gea: «Mɔkɔta, oɓɛ aámbé oconji koba, mokonda, oɓenge, na kema bui nde a suɓi í.

²⁵ Oɓɛ aámbé ɗɔ́yɔngi nyɔngɔ nde ka ɓukpɛkpɛ á Měma á kanga ɓojeɗe ka aphenɔkɔ á mbɛɗanigi nɛkɔ tatasu moamɛ Daúdi gea: ‹Nyɔngɔ sina nde ɓato á k'ékuna nɛngbo ɓáyomboki ně? Nyɔngɔ sina nde goto ɓakpa ɓáobikisa maca jǎi-jǎi ɓende?

²⁶ Nga, ɓaamɛ á ka mokonda ɓáɛɓɔngisigi k'émani, ɓakɔta ɓádondanigi ka manisa á Mɔkɔta na Kiísito, mmbé ɗɔ́nsɔmbu.›

²⁷ Ande ɗoni, moamɛ Ɛlɔ́dɛ, mɔkɔta Pɔntíɔ Pilátɔ, ɓato á ka Isilaɛ́li na ɓato á k'ékuna nɛngbo ɗáɓádondanigi ka ntanga-nji nde ka maca á dunga á Yéso, nto á kanga ɓojeɗe na mbɛɗanigi nɛkɔ mmbé ɗɔ́nsɔmbu áɓɛ Kiísito.

²⁸ Kaɓondɔ, ɓádondanigi ka gea kema nde ɗósui kala. Nga, ona ɓukpɛkpɛ ka tɔtɔkisa á kema nde okondi.

²⁹ Cɔ, Mɔkɔta, ɔna phɔ́ ɓî ɓákpangi ɓangisa asu. Ósopha ɓukpɛkpɛ ka tɔ̌miaga á nyɔngɔ nɛkɔ kángá kɔɓɔɓɔkɔ nga, ɓende ɓabɛɗanigi nɛkɔ.

³⁰ Phangia ɓukpɛkpɛ nɛkɔ ka tɔtɔkisa á ɓoamia, mphangiɔ na ketangaɔ k'ína á mbɛɗanigi nɛkɔ Yéso, nto á kanga ɓojeɗe.»

³¹ Ɓî ɓágɔɓi ye ɛmɛmi, ɔma nde ɓádondanigi aoémanaga. Wa, ɓáotúma ɓɔbu na Měma á kanga ɓojeɗe, mpɔ ɓáɔtɔmiaga nyɔngɔ á Mokonga kángá kɔɓɔɓɔkɔ.

Ɓaɓêki ɓáokatisanaga nkumba nɛɓɔ ngǔngu aɓɔ

³² Cɔ, usɛsɛ á ɓaɓêki ɓáɔɔ́kana na měma moci, n'ɛsɔ moci. Nna na ka ɓɔ moci nde ɗáɔyɔnga gea te, nkumba nɛmɔ ú. Nkumba bui ɗá tɔ ka ɓɔ ɓɔbu.

³³ Ɓateki ɓáomamea na ɓukpɛkpɛ ángbó ka ɛmbisa á nyɔngɔ á jujúka á Mɔkɔta Yéso ka kukuwa. Mokonga áǒbisia ɓɔbu njaga.

³⁴ Nna na ka ɓɔ moci, mmbé ɗáúki kema. Nga, nkpa nde ɗátú na ciko, n'éndu, ɗásombisi, áɔbɛɗa imɔna kau,

³⁵ áobisa ka njaga á ɓateki ndea Yéso. Mpɔ, ɓáǒgabea nkpa na nkpa ka ɓeana na siki á kema nde aně.

³⁶ Cɔ, nkpa moci ɗátú sɔsɔɓɛ aɓɔ, ina akɛ n'ande Yɔsɛ́phu Moláwi mmbé nji á ɓɔkɔtɛana nɛkɛ ande Kipúɔ, mmbé ɓateki ɗáɓáɔmɔphana Baanába. Ande gea te: «Ngbagisigi.»

³⁷ Áosombisa oɗo nɛkɛ, áobisa imɔna nde atɔí kau ka njaga á ɓateki.