Ekuma á ɓateki 3 - Ɔngana á Kɛ̌kɛ

Nɗɔti moci aami

¹ Esa moci ka yega á maní, Pɛ́tɛɛ na Yoáni, ɗáɓáoga k'éndu á Mokonga k'aphe á ɛmɛmi.

² Bíbí á kǐo moci éndu á Mokonga nnde ɓáɔɔphana «kǐo ánjá», ɗátú na nkpa moci mmbé ɗákátúotamba kpanga á ɓɔkɔtɛana akɛ. Esa bui, ɗáɓáonkumbaga na bisa akɛ ka kǐo ndɔ ka gea te, á mɛmɛ kema á enga akɛ ka ɓakpa nde ɗáɓáongia k'éndu ndɔɔ.

³ Cɔ, ɓî nɗɔti ndɔ ɗáɛɓɔni Pɛ́tɛɛ na Yoáni na ɓáobika ongia k'éndu ndɔ, áɔ̌mɛma imɔna.

⁴ Ɓáontúmia n'íso. Mpɔ, Pɛ́tɛɛ áongea te: «Ɔ́sɔɛnjia.»

⁵ Nɗɔti ndɔ áǒtúmia n'íso, áoúba te, ɓámophande ka kema.

⁶ Mpɔ, Pɛ́tɛɛ áongea: «Kéna imɔna, kéna láté. Ne gǎkɛ okopha kema nde neně. Cɔ, k'ína á Yéso Kiísito ɓa Najalɛ́ti má, ótambɛ!»

⁷ Mpɔ, Pɛ́tɛɛ áondunga ka njaga á mǔku, áommesia. Mbenɔ ndɔ tɔ, endekpe na ecinji akɛ bui áogbagaga.

⁸ Áǒsamboa phǒi! Áotamba, áongia kimoci na ɓateki ndea Yéso suɓi éndu á Mokonga, n'aotamba, n'aɔɓɛkaga, n'aombeba Mokonga.

⁹ Ɓakpa ɓɔbu ɓáɔmɔna n'aotamba, n'aombeba Mokonga.

¹⁰ Ɓáonengekisa gea, yɛ aámbé ɗátú oikaga k'aphe á iso éndu á Mokonga, n'aɔ̌mɛmaga ɓakpa imɔna. Ɗáɓáɔɔphana kǐo ndɔ: «Kǐo Ánjá.» Cɔ, ɓáoɓá na kɔɓɔɓɔkɔ, ɓáoyayama phɛɛ ka nyɔngɔ ndɔ ɗágeani ka yɛ.

Pɛ́tɛɛ aɔphɛa suɓi éndu ndea Mokonga

¹¹ Nkpa ndɔ ɗákákondi ye katana na Pɛ́tɛɛ na Yoáni. Kaɓondɔ, ɓakpa ɓɔbu ɓáotangaaga phɛɛ, ɓáǒteea ka ntua nde ɓáiki kau nnde ɓáɔɔphana: «Ntua ndea Sɔlɔmɔ́nɔ.»

¹² Ɓî Pɛ́tɛɛ aɔni ye ɓó, áǒngoɗea ɓakpa gea te: «Ɓaisilaɛ́li ɓaya, ɓootangaaga nyɔngɔ nde? Ɓosótúmíí n'íso ka ɓo? Ɓokanisi gea, nkpa nde atambi tɔ ka ɓukpɛkpɛ na ɓonjánja nɛsu mosá á Mokonga?

¹³ Nna ɓó, atambi ka ɓukpɛkpɛ ndea Mokonga, mmbɔ ɓatatasu Abalaámu, Isáka na Yakɔ́ɓɔ ɗáɓámbɛɗaneigi. A phɔtɔ aámbé anɗokomisi mbɛɗanigi nɛkɛ Yéso ka ketangaɔ ndee. Ɗóɓombisi ka njaga á Moamɛ Pilátɔ, ɓóon'yá. Nanga ɓî ɗákondi ɗeketa akɛ,

¹⁴ ɗóɓon'yé Yéso, nto á kanga ɓojeɗe na nto á koɗoni ndɔ, ɓóokonda gea, ɓánkoɗɛ kanu nto á kaiso.

¹⁵ Ɗóɓonkusi Yéso, mɛna-ɓoamia, Mokonga â gǎkɛ onjujukisa sɔsɔɓɛ á ɓasí. Ɓende ɓaɗigimisi á nyɔngɔ ndɔ bui.

¹⁶ Cɔ, nɗɔti nde ɓɔɔmɔna na ɓoomúba wani, aami ánjá phɛɛ ka nyɔngɔ á ɓeekea á ɓukpɛkpɛ á ina á Yéso. Ɓeekea ndɔ unge akpengeanisi ɓoamia nde mosá anu.

¹⁷ Cɔ, ɓaya, neoúba te, ɓenu na ɓakɔta nɛnu, ɗóɓogi ɓojeɗe ndɔ ka kobóbó.

¹⁸ A gǎkɛ ɓe: Mokonga atɔtɔkisi nyɔngɔ nde ɗáúbisi kala ka moyo á ɓaɔtu-nyɔngɔ nɛkɛ gea, ɓántambisagande Kiísito.

¹⁹ Cɔ, akeni phɔ́ ɓókětiɛ tambea anu, ɓóopháiɛ ka Mokonga. Mpɔ, áoíma ɓojeɗe nɛnu.

²⁰ Ka ɓundɔ ɓámɓeeki Mɔkɔta, aebikisiande esa á Maseye á umbia, aetekisiande goto Yéso Kiísito mmbé ɗánsɔmbu, áoɓá Mɔkɔta nɛnu.

²¹ Kɛ̌kɛnde gǎkɛ, akeni Kiísito áikɛ na koba ka sungiaga ɓî Mokonga aɓɔngisiande goto kema bui, ɓíndɔ ɗéengoɗi ɓaɔtu-nyɔngɔ nɛkɛ á kala, ɓato á kanga á ɓojeɗe.

²² Nga, Mósa ɗági te: ‹Mɔkɔta nɛnu Mokonga ammesande mɔtu-nyɔngɔ nɛkɛ k'ékombo nɛnu ɓea eme. Akeni ɓóɓeekeɛ nyɔngɔ bui nde anóngoɗeagande.

²³ Nkpa ɓuakɛ mmbé kámɔ́kɛku mɔtu-nyɔngɔ ndea Mokonga ndɔ, ɓánkatanisande na ɓakpa ndea Mokonga na mowa akɛ.›

²⁴ Nga, ɓaɔtu-nyɔngɔ ndea Mokonga ɓɔbu kpanga á Samuɛ́li na ɓundɔ ɗáɓábiki mbusa akɛ, ɗáɓáphɛí nyɔngɔ ndɔ ka matú ndee.

²⁵ Ɓenu gǎkɛ, ɓonde ɓampɛnɛ á ɓaɔtu-nyɔngɔ ndɔɔ. Ɓonde phɔtɔ ɓamɛna-konsamba nde Mokonga ɗáɔngi na ɓatatanu. Nga, ɗángoɗi Abalaámu gea: ‹Ka ɓasuko akɔ, něgeeande ɓonjánja ɓato á k'ékombo bui á ka mokonda.›

²⁶ Kaɓondɔ, Mokonga ammesi phɔ́ mbɛɗanigi nɛkɛ Yéso ka phɔanu mosá á ɓato á ekuna nɛngbo, ka nyɔngɔ á bisia anu njaga, gea te, ɓóɓɛ na ngɔwa ka kětia á tambea anu, nkpa moci-moci, ka ɓojeɗe nɛnu.»