Ekuma á ɓateki 28 - Ɔngana á Kɛ̌kɛ

Pɔ́lɔ aɔbɛɗanaga ka kesanga á Mɛlíta

¹ Ɓî ɓeóloki ye ka kukuwa k'óɓenge, mpɔ ɓéoúba gea, ina á kesanga ndɔ ande Mɛlíta.

² Ɓato á ka kesanga ndɔ, ɗáɓásógǐí ánjá phɛɛ. Ɓɔ, ɓáotoɓoa nsa, ɓáosódondanisa ɓesu ɓɔbu ka mpɛphɛ í nga, mbua ɗáɔɔka, phiɔ áoɓá phɛɛ.

³ Pɔ́lɔ áɔbɛɗa ophakɔ á sake, áɔsɔsɔmɛa ka nsa. Njɔka áojuana k'ophakɔ ndɔ, ka nyɔngɔ á ɓojo á nsa, áɔngɔta na ɛgɔɛa ka njaga akɛ.

⁴ Ɓî ɓato á ka kesanga ndɔ ɓámɔni mpapha n'aoyangataga ka njaga á Pɔ́lɔ, ɓáɔyɔngaga sɔsɔɓɛ aɓɔ te: «Nkpa nde ande nto á kaiso ɗoni nga, aóloki phɔ́ kukuwa k'óɓenge. Ka ɓeana na mokonga nɛsu á mbɛa mmbé ɓáomɔphana koɗoni, kátókeni gǎkɛ yɛ, áendɛ.»

⁵ Pɔ́lɔ â ndiu oncicia njɔka ndɔ ka nsa, kɛ̌yɔkɛ cengu akɛ.

⁶ Ɓakpa ndɔ ɓáoɓá na mɔphɛ te, nyama á Pɔ́lɔ aɓimbande. Kaɓɛ n'a ɓó, ámbé aguande na kuwa akɛ tɔ súa ɓei. Ɓáoɓondea ka mbenɔ éndǎ, ɓákáɔnɛ gǎkɛ gea akambekani na ka kema. Mpɔ, ɓáoketia kanisia aɓɔ, ɓáogea te: «Yɛ, ande ka ɓamokonga á mbɛa.»

⁷ Cɔ, bíbí á ɔma ndɔ, ciko ndea mɔkɔta angbóngbó á kesanga, mmbé ɓáɔmɔphana Publíɔ, ɗátú wa. Yɛ, ɗásosesi na měma á ekondi, áosóikisa mɔtɛ-akɛ k'ésa isaɔ.

⁸ Abakɛ na Publíɔ ɗááɗe gǎkɛ k'éka ka nyɔngɔ nde, ɗátú na jónga, na ephóa á magia. Pɔ́lɔ áoga ɔmɔna ka yɛ, áobisa njaga gǔ akɛ, áɔmɛma Mokonga, áonamisa.

⁹ Mbusa índɔ, ɓasambi ɓuangbo á ka kesanga ndɔ ɓâ phɔtɔ ombikia Pɔ́lɔ, yɛ áǒamisa.

¹⁰ Ɓakpa ɓáosóɗokomisa phɛɛ. Ka mɛɛa asu, ɓáosótumbanea na kema nde ɗéɓenasiki í ka tamba.

Pɔ́lɔ akiɗi ka Lɔ́ma

¹¹ Mbusa á ɓasonge ɓasaɔ, ɓéoga ka koko á ka Alɛsanduía nnde ɗányɛ́nyisi mbenɔ á phiɔ ka kesanga ndɔɔ. Koko kau, ina í ɗátú «Ɓamokonga á mbɛa ɓaphase.»

¹² Ɓéojua ka Siakúsɛ, ɓéoika wa k'ésa isaɔ.

¹³ Ka toka á wa, ɓéokpangbaga k'ɔɓɛɛ, ɓéojua ka Lɛgíɔ. Mama í, maphopho áotóka kusi. Mbusa á ɓ'esa ɓaɓɛ, ɓéojua ka Putɛɔ́li.

¹⁴ Ka nji ndɔ, ɓéǒdonda ɓadasu ɓaɓêki, ɓáosóɗengemisaga gea, ɓéɗɛ na ɓɔ pɔsɔ moci. Ɓondɔ unge tamba nɛsu á na Lɔ́ma ɗátú.

¹⁵ Wa, ɓadasu ɓaɓêki ɓundɔ ɓá ka Lɔ́ma ɓáɔɔ́ka mbino asu, ɓáobika k'aphe á dondanisa asu. Ɓéodondana na ɓɔ ka mosomba á Apíɔ, ɓuangbo goto ka nji moci nnde ɓáɔɔphana Tiɛtabɛ́nɛ. Ɓî Pɔ́lɔ ɛ̌ɓɔni ye, áombeba Mokonga, áotúma na ɓukpɛkpɛ ka měma.

¹⁶ Ɓî ɓejú ye ka Lɔ́ma, ɓáonsosea Pɔ́lɔ, áikɛ k'ɔ́ma ínɛkɛ sasakɛ na nto émani nde ɗáonamba.

Pɔ́lɔ aɔphɛa nyɔngɔ á Mokonga ka Lɔ́ma

¹⁷ Mbusa á ɓ'esa ɓasaɔ, Pɔ́lɔ áɔ̌ɓɔphana ɓakɔta á Ɓayúda ɓunde ɗáɓátú ka Lɔ́ma. Ɓî ɓádondanigi ye, áǒngoɗea: «Ɓaya, nanga ɓî kégi ka ɓojeɗe k'ékuna nɛsu, na ka asii ndea ɓatatasu, ɗáɓámodungi ka Yɛusalɛ́ma, ɓáomobisa ka njaga á Ɓalɔ́ma.

¹⁸ Ɓalɔ́ma ɓámoúsigi ye gǎkɛ, ɓákáɔnɛ ka nyɔngɔ ájeɗe ka phɔani, nnde akeni nékuiɛ. Kaɓondɔ, ɓáophánga ɗeketa ani.

¹⁹ Ɓî Ɓayúda ɗáɓákákondi gǎkɛ ɓámoɗeketɛ, néosuia gea ambe Moamɛ á Ɓalɔ́ma aámbé átenɛ ye tɔ nyɔngɔ nɛmɔ. Kɛ́ɛtɔngi gǎkɛ ɓato á k'ékuna nɛsu.

²⁰ Kaɓondɔ unge nɛnɔ́ɔphani gea nɛ́nɔɔnɛ, nɛ́yɔngɛgɛ na ɓenu. Nga, ɓámɔɓɔí ngoi á ngɔa nde, ka nyɔngɔ á nseɓeɔ nde Ɓaisilaɛ́li ɓáně.»

²¹ Ɓáonsikisia te: «Ɓɛ́kɛ́ɔni ɓaoɓa n'atóki na Yudɛ́a ka phɔakɔ. Ka ɓana-amasu kátóki gǎkɛ kó, ka ngoɗea asu nyɔngɔ ájeɗe ka phɔakɔ.

²² Cɔ, ɓekondi phɔ́ ɓɛ́ɔ́kɛ ianaga akɔ. Nga, ɓeoúba gea, ɓakpa ɓáɔyɔnga ájeɗe k'ɔ́ma bui gǔ á esomba nde okau.»

²³ Ɓakɔta á Ɓayúda ɓunde ɗáɓátú ka Lɔ́ma ɓáɔɔ́kana na Pɔ́lɔ esa á dondana goto na ɓɔ. Esa kau, ɓáodondanaga ɓakpa ɓásii k'ɔ́ma ndɔ ɗáoikaga. Kpanga á kamɓimba na ka ɓî age ojua ɔgɔgɔ, Pɔ́lɔ n'aɔ́tɔmiaga, na úbisa aɓɔ nyɔngɔ á koɓoamɛ ndea Mokonga. Áokaɓa gea, ɓámɓeekeɛ Yéso n'aokumia ɛɔphi ndea Mósa na ɓɔphɛi ndea ɓaɔtu-nyɔngɔ ndea Mokonga.

²⁴ Ɓuangbo ɓáoɓeekea nyɔngɔ nde ɗáɔyɔnga, ɓuangbo ɓákaɓeekeɛ gǎkɛ.

²⁵ Ɓî ɗáɓáotóka wa kángá á ɔ́kana sɔsɔɓɛ aɓɔ, Pɔ́lɔ â tɔ ɔyɔnga ka ɔkɔa aɓɔ te: «Měma á kanga ɓojeɗe ɗági tɔ ánjá ka tɔ̌mia ɓatatanu k'aphe ndea Isáya mɔtu-nyɔngɔ ndea Mokonga.

²⁶ Áongea te: ‹Gǎ, óngoɗeɛ ɓakpa ndɔ te, ɓoɓande ɔɔ́ka ánjá, ɓókóengekisɛ tanda nnde ɓɔɔ́ki. Ɓɔɓande ɔɔna, ɓókóengekisɛ gǎkɛ nnde ɓɔɔni.

²⁷ Nga, měma á ɓakpa nde a ye tɔ akpɛ, ɓáɗaki kecue aɓɔ, ɓáoíma iso aɓɔ, atúoɓá na nna ɓó, ámbé ɓáɔnaphi, ɓáɔ́kaphi, ɓáengekisi na měma aɓɔ. Ɓátúǒpháia k'éme ámbé néeamisi.›

²⁸ Cɔ, úbani gea, Mokonga ateki ɓoamia nɛkɛ k'ékuna nɛngbo, ɓáɔ́kande.» [

²⁹ Ka yɔnga á Pɔ́lɔ ɓó, Ɓayúda ɓáoga na ɓáopúa sɔsɔɓɛ aɓɔ phɛɛ.]

³⁰ Cɔ, Pɔ́lɔ áoika ɓasaga ɓaɓɛ k'éndu nde yɛ ɗáǒphendea. Áǒsesea ɓakpa ɓɔbu ɓunde ɗáɓáobika motɛ-akɛ,

³¹ n'aɔ́phɛa nyɔngɔ á koɓoamɛ ndea Mokonga, na goisaga á nyɔngɔ ndea Mɔkɔta Yéso Kiísito. Â phɔtɔ ɔɔ̌phɛa kángá kɔɓɔɓɔkɔ na kángá á kema nde áonimisia.